انجیلِ مَتّی 9
9
شَفِی مِردِ فلج
1پَ عیسی سُوارِ قایق وابی وِ رَت اولَتِ دریاچَه، وَ شهر خُوش.
2اوسِه چَن نفر، مِردِ فَلجی نَه که سرِ تِشَکی خوسییَه بی، آوُردِن طِیش. عیسی وختی ایمون اونگَلَه دی، وَ مِردِ فلج گُت: «رو دِلِت قُرص بو، گِنایَلِت آمرزییَه وابی!» 3مِنِه ای موقَع، یِه‌پاره‌ای وَ معلملِ تورات بِی خِشون گُتِن: «ای مِرد کُفر ایگُ.» 4عیسی که دونِس چه فکری ایکِنِن وَشون گُت: «سیچه ای فکرِ گَندَ وَ دلتون رَه ایئیت؟ 5گُتنِ کویکی آسونتَرِه: یِکِه "گِنایَلِت آمرزییَه وابی،" یا یِکِه "وَری وِ رَه بِرَه"؟ 6ایسِه تا بِیونیت که کِرِ انسان وَ ری زمین اقتدارِ آمرزییَنِ گِنایَلَه دارِه...» - وَ مِردِ فلج گُت: - «وَری، جاتَه وَگِه وِ بِرَه حونَت.» 7او مِرد وَریسا وِ رَت وَ حونَش. 8وختی مردم یِنَه دییِن، زَلَشون رَت وِ خدا نَه ستایش کِردِن که ایطو اقتداری وَ انسان بَخشییِه.
دعوت وَ مَتّی
9وختی عیسی وَ وُچِه رَت، مِردی نَه دی که نومِش مَتّی بی که مِنِه خَراجگاه نِشَسَه بی. وَش گُت: «وَ دینِ مِ بیو!» او مِرد وَریسا وُ وَ دینِ عیسی رُونَه وابی.
10وَختی که عیسی مِنِه حونۀ متّی وَ سَرِ سفرَه نِشَسَه بی خیلی وَ خَراجگیرَل وِ گِناکارَل اومَن وِ بِی عیسی وِ شاگردَلِش هُمسفرَه وابی‌یِن. 11وختی عالِمَلِ فرقۀ فَریسی یِنَه دییِن، وَ شاگردَلِ عیسی گُتِن: «سیچه استادِ ایشا بِی خَراجگیرَل وِ گِناکارَل غذا ایخَرِه؟» 12امّا عیسی وختی یِنَه اِشنُفت، گُت: «مَریضَلِن که وَ طبیب اِتیاج دارِن، نَه آیَمَلِ سالم. 13بِرِیت وِ معنی ای کلامَه بِفَمیت که " مِ وَ ایشا قُربونی وِ پیشکش نیخوام، بلکم رحمت ایخوام." سی‌یِکِه مِ نَیومَمِه تا صالِحَلَه، بلکم تا گِناکارَلَه دعوت کِنُم.»
سؤال درموردِ روزَه
14اوسِه شاگردلِ یحیِی تعمیددَهندَه اومَن طِی عیسی وِ گُتِن: «سیچه ایما وِ فرقۀ فَریسی‌یَل روزَه ایگِریم، امّا شاگردَلِ تِ روزَه نیگِرِن؟» 15عیسی جواب دا: «مَه ایابو دوسَلِ دوما تا موقِی که دوما باشونِه، عزاداری کِنِن؟ امّا روزَلی ایایِه که دوما وَشون گِرُتَه وابو، اوسِه روزَه ایگِرِن. 16هیشکَه پارچِی نو نَه وَ جومِی کُهنَه پَرو نیزَنِه، سی‌یِکِه پَرو وَ جومَه کندَه ایابو وِ پَرَش بَتَر ایابو. 17وِ هم شراب نو نَه مِنِه مشکَلِ کُهنَه نیریزِن، سی‌یِکِه مَشکَل پَرَه ایابون وِ شراب ایریزِه وِ مَشکَل هَم وَ بِین ایرَن. بلکم شرابِ نو نَه مِنِه مَشکَلِ نو ایریزِن تا هر دِتاشون سالم وِیسِن.»
زِندَه کِردَنِ یِه دُویَر وِ شَفِی یِه زَن
18مِنِه هَمو حال که عیسی ای گَپَلَه سیشون ایگُت، یکی وَ رئیسَلِ کنیسَه اومَه طِی عیسی وِ جِلوش زونی زَه وِ گُت: «دویَرُم هَمیسِه مُرد. وا ای حال التماس ایکِنُم بیو وِ دَسِتَه وَش بِنِه که زندَه ایابو.» 19عیسی وَریسا وِ بِی شاگردلِش باش رَت. 20مِنِه هَمو موقَع، زنی که دُوازَه سال وَ خینریزی عذاب ایکَشی، وَ پَسِ سَر وَ عیسی نِزِنگ وابی وِ دَس نَها وَ رُو قَباش. 21وِّ بِی خُوش گُتَه بی: «اَر حتی دَس بِنُم وَ قَباش، شفا ایگِرُم.» 22عیسی وَرگَشت، وِّ نَه دی وِ فرمایش کِه: «دویَرُم، دِلِت قرص بو، ایمونِت تِنَه شفا دایِه.» وَ او ساعت، زن شفا گِرُت. 23موقِی که عیسی رَت مِنِه حونِی او رئیسِ کَنیسَه وِ شَربَه‌خونَل وِ کَسَلی نَه دی که شیوَن ایکِردِن، 24فرمایش کِه: «بِرِیت وَدَر. دویَر نَمُرده بلکم وَ خُویَه.» امّا اونگَل وَش خَندِسِن. 25وختی مردمَه کِردِن وَدَر، عیسی رَت داخل وِ دَسِ دویَرَ گِرُت وِ او دویَر وَریسا. 26خَوَرِ ای اتّفاق مِنِه سرتاسرِ او وِلات پیچِس.
شَفِی دِتا کور وِ یِه گُنگ
27موقِی که عیسی وَ وُچِه ایرَت، دِتا مِردِ کور وَ دینِ وِّ ایجِکِسِن وِ قیرَه ایزَن: «ای کِرِ داوودِ پادشاه، وَ ایما رحم کُ!» 28وختی عیسی اومَه وَ حونَه، او دِتا مِرد اومَن طِیش. عیسی وَشون پُرسی: «ایمون داریت که مِ ایتَرُم ای کارَ کِنُم؟» جواب دان: «بَلِه، آقا.» 29اوسِه عیسی وَ تییَلِشون دَس نَها وِ گُت: «طبقِ ایمونِتون سیتون کِردَه وابو.» 30اوسِه تییَلِشون واز وابی. عیسی وَشون قَدَقَن کِه: «حَواستون بو کسی وَ ای جَریان باخَوَر وانَبو.» 31امّا اونگَل رَتِن وَدَر، وِ تمومِ او وِلاتَه درموردِ ای کارِ عیسی پُر کِردِن.
32مِنِه هَمو حال که اونگَل ایرَتِن وَدَر، مِردی دیوزَیَه نَه که گُنگ بی، آوُردِن طِی عیسی. 33وختی عیسی دیوَ وَش کِه وَدَر، زُوونِ او مِردِ گُنگ واز وابی. مردم حیرت‌زَیَه ایگُتِن: «ایطو چیئی وَتَه مِنِه اسرائیل دییَه نَوابی‌یِه!» 34امّا عالِمَلِ فرقۀ فَریسی گُتِن: «وِّ دیوَلَه وَ کِمَکِ رئیسِ دیوَل ایکِنِه وَدَر.»
مَصول زیادِه، کارِگر کم
35عیسی مِنِه تَمومِ شهرَل وِ دهاتَل ایگَشت، مِنِه کَنیسه‌یَلِ اونگَل تعلیم ایدا وِ خَوَرِ خَشِ پادشاییِ خدا نَه اعلام ایکِه وِ هر درد وِ مَریضی نَه شفا ایدا. 36عیسی وختی جَماعَتَلِ زیادی دی، دِلِش وَ حالِ اونگَل سُت سی‌یِکِه مِی میشَلی بی‌چِپون، پریشون‌حال وِ درمُندَه بییِن. 37پَ وَ شاگردَلِش گُت: «مَصول زیادِه، امّا کارگر کَم. 38پَ، وَ صاحاب مَصول بِخِیت کارِگَرَلی سی بِرییَنِ مَصولِ خُوش بِسی کِنه.»
ទើបបានជ្រើសរើសហើយ៖
انجیلِ مَتّی 9: SLB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company