مَتّی 7
7
هئچ کَسه حکم ائدمَینز
1«هئچ کَسه حکم ائدمَینز تا سیزه ده حکم اولونمیا. 2بو سَبریه کی ائله او حکم اینَن کی محاکمه ائدیرَینز، سیزه حکم اولونار و ائله او اؤلچو اینان کی اؤلچیرَینز، سیزینگ ایچی اؤلچَرلَر. 3نه ایچی کاکانگ گؤزونده‌کی سامان پَرینی گؤرورَینگ آما اؤز گؤزونگده‌کی آغاج کونّاسینی گؤرمئیرَینگ؟ 4یا دا اؤز گؤزونگده آغاج کونّاسینی اولاندا، نه‌یین کاکانگا دئیه بیلیرَینگ کی: ”کاکام، قؤی تا سامان پَرینی گؤزونگدَن چیخارتام.“ 5ای ایکّی‌ایزلی! اَوّل اؤز گؤزونگده‌کی کونّایی چیخارت کی اوندا یئی‌تر گؤره‌رَینگ تا سامان پَرینی کاکانگ گؤزوندن چیخارتانگ. 6مُقدّس زادی، کؤپک‌لَره وئرمَینز و اؤز مُرواریدلارینزی دونقوزلار دَمینه تؤکمَینز، تا ائدمئیه کی اوللاری آیاق‌لاری آلتیندا پامال ائدلَّر، گئری دؤنلَّر و سیزه حَمله ائدَلَّر.
سئینز کی سیزه وئریلَر
7«سئینز کی بئلَینزه وئریلَر، گَزینز کی بولاراینز، چالینز کی دَر سیزه آچیلار. 8چونکی هَر کَس کی سئیه، اَله گتیرَر و هَر کَس کی گزه، بولار و هَر کَس ده کی چالا، دَر اؤنا آچیلار. 9سیزینگ هانی بیرینز، اوغلو اوندان چؤره‌ک سئیَنده، اؤنونگ اَلی ایچینه داش قؤیار؟ 10یا دا اوغلو اوندان بالیق سئیَنده، اؤنونگ اَلی ایچینه ایلان قؤیار؟ 11پس اگر سیزلَر کی شَریرَینز، بیلیرَینز کی نه رَقم اولادلارینزا خوب زادلار وئره‌سینز، ناغاد آرتیق گؤیده‌کی بووآینز، اوندان سئیَنلَره، خوب زادلار وئرَ‌ر! 12خَلخ اینن ائله اوله‌یین رووآل ائدینز کی گؤینونز سئیر اوللار سیزینگ اینَن اوله‌یین رووآل ائدَلَّر. بو سَبریه کی بو تورات و پیغمبرلَر یازیلی‌لاری دیر.
دار دَردن ایچَری گیرینز
13«دار دَردن ایچَری گیرینز. بو سَبریه کی او دَر کی ائنلی دیر و او یول کی آسان دیر هلاکته ساری آپاریر و او دَردن ایچَری گیرنلَر چوخ دورلار. 14آما او دَر کی دار دیر و او یول کی چَتین دیر زندلیگه ساری آپاریر و اؤنو بولانلار آز دیرلار.
آغاج و اؤنونگ ثَمری
15«اؤزونزو یالان پیغمبرلَردن ایراق ساخلاینز. اوللار قویون رَختینده سیزینگ یانینزا گلیرلَر، آما باطینده درّنده قورد دیرلار. 16سیز اوللاری ثَمرلَری اوستوندَن تانییارانز. بئیه گئیَندَن، اوزوم یا دا تیکاندان، انجیر ییغیلَر؟ 17ائله بئله ده هر سالم آغاج، خوب ثَمر وئریر آما آفتلی آغاج، پیس ثَمر وئریر. 18سالم آغاج، پیس ثَمر وئره بیلمَز، آفتلی آغاج دا، خوب ثَمر وئره بیلمَز. 19هر آغاج کی خوب ثَمر وئرمیه، کَسیلَر و اوت ایچینه آتیلار. 20پس سیز بئله‌یین آداملاری، ثَمرلَری اوستوندَن تانییاراینز.
هئچ زامان سیزی تانیمامیشام
21«بئله ده‌ییل کی هَر کَس منی ”یا رَب، یا رَب“ چاغیرا، گؤی پادشاه‌لیگینا گیره، بلکی او آدام کی منیم گؤیده‌کی بووآمینگ سئدیگینی یئرینه ائتیردیر، گؤی پادشاه‌لیگینا گیرَر. 22قیامت گؤنونده چوخ آداملار منه دئیه‌رلَر: ”یا رَب، یا رَب، بئیه سَنینگ آدینگدا نَبوّت ائدمه‌دیک؟ بئیه سَنینگ آدینگدا شیطانلی روح‌لاری یازّیا چاخارتمادیک؟ بئیه سنینگ آدینگدا چوخ قُدرتلی ایشلَر گؤرمه‌دیک؟“ 23او زامان من اوللارا دئیه‌رَم: ”من هئچ زامان سیزی تانیمامیشام. ای سیز، پیس ایش گؤرَن‌لَر، مَندَن ایراق اولینز.“
ایکّی ائو
24«پس هَر کَس کی منیم بو سؤزلَریمی ائشیدیر و اوللارا عَمل ائدیر، بیر عَقللی کیشی له‌یین دیر کی اؤز ائوینی داش اوستونه دؤزَتدی. 25یاغیش یاغدی، سیل‌لَر رو ائدی، یئل‌لَر اَسدی و او ائوه گؤج گتیردی، آما او ائو یومورولمادی چونکی پی‌یی، داش اوستونه قؤیولموش ایدی. 26آما هَر کَس کی منیم بو سؤزلَریمی ائشیدیر و اوللارا عَمل ائدمئیر، بیر نافَهم آدام له‌یین دیر کی اؤز ائوینی قوم اوستونه دؤزَتدی. 27یاغیش یاغدی، سیل‌لَر رو ائدی، یئل‌لَر اَسدی و او ائوه گؤج گتیردی، او ائو یومورولدو و ویرانلیگی بویوک ایدی!»
28عیسا بو سؤزلَری تؤکدنده، جماعت اؤنونگ تَعلیم‌لَریندن مات قالمیشلاردی. 29چونکی او، اِقتدار اینان تَعلیم وئریردی، نه اوللارینگ تورات معلّم‌لَری له‌یین.
ទើបបានជ្រើសរើសហើយ៖
مَتّی 7: QII
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company