مَتّی 6
6
صدقه وئرمَک
1«گؤزله‌یینز کی خیر ایشلَرینزی خَلخ گؤزو دَمینده، بو نیّت اینن کی اؤزونزو اوللارا گؤرسَدَینز، یئرینه ائتیردمیه‌ینز. چونکی اوندا گؤیده‌کی بووآینز یانیندا هئچ اَجرینز اولماز.
2«پس صَدقه وئرَنده، ساز و کرانا آغیزینگا قؤیما، ائله او طور کی ایکّی‌ایزلی‌لَر، عبادتگاهلاردا و خیابانلاردا ائدیرلَر تا خَلخ اوللاردان تعریف ائدَلَّر. گرچَکینی سیزه دئییرم کی بئله‌یین اوللار اؤز ایشلَری‌نینگ اَجرینی آلمیشلار! 3آما بیر یوخسولا کؤمَک ائدنده قؤیما چَپ اَلینگ، ساغ اَلینگ ائدیگی ایشدَن خَبر اولا، 4تا ائدیگینگ کؤمَک پناه دا اولا؛ و گؤیده‌کی بووآنگ کی پناهی گؤرور، سَنه اَجر وئره‌ر.
رَب اؤرگدیگی دُعا
5«دُعا ائدَنده، ایکّی‌ایزلی‌لَر له‌یین اولمایاسینز. چونکی اوللار خوشلاری گلیر کی عبادتگاهلاردا و خیابان‌لار قیراقیندا تورالّار و دُعا ائدَلَّر تا اؤزلَرینی خَلخه گؤرسَدمیش اولالّار. گرچَکینی سیزه دئییرم کی، اوللار اؤز ایشلَری‌نینگ اَجرینی آلمیشلار. 6آما سَن، دُعا ائدَنده، اؤز اُتاقینگ ایچینه گئد، دری باغلا و گؤزلَردن پناه اولان، گؤیده‌کی بووآنگ حُضوروندا دُعا ائد. و بووآنگ کی پناهی گؤرور، اَجرینگی وئره‌ر.
7«دُعا ائدَنده، بُت پَرستلَر ائدیگی له‌یین، بیر بیر آردینا، مَعنی‌سیز سؤزلَر دئمَینز. اوللار گمان ائدیرلَر کی چوخ دئمَک اینَن، دُعا‌لاری ائشیدیلَر. 8بوللار له‌یین اولمانز چونکی سیزینگ گؤیده‌کی بووآینز، احتیاج‌لارینزی، اوندان ایلَری کی بئلَسیندَن سئینز بیلیر.
9«پس سیز بئله دُعا ائدینز:
«ای گؤیده‌کی بووآمیز،
سَنینگ آدینگ مُقدّس اولسون،
10سَنینگ پادشاه‌لیگ‌ینگ گلسین.
سَنینگ اِراده‌ینگ ائله اوله‌یین کی گؤیده اولونیر،
یئرده ده اولونسون.
11بیزه گؤنده وئردیگینگ چؤره‌کی، بوگؤن بیزه وئر.
12بیزیم قَرض‌لَریمیزی باغیشلا،
ائله اوله‌یین کی بیز دا بیزه مَدیون اولانلاری باغیشلامیشاک.
13و بیزی امتحانا چَکمه
بلکی شَریردن قورتار،
چونکی پادشاه‌لیگ و قُدرت و شوکت اَبَدنچاز سَنینگ دیر. آمین.
14«چون اگر سیز، آداملارینگ خطالارینی باغیشلایاینز، گؤیده‌کی بووآینز دا سیزی باغیشلایار. 15آما اگر سیز، آداملارینگ خطالارینی باغیشلامایاینز، گؤیده‌کی بووآینز دا سیزینگ خطالارینزی باغیشلاماز.
اوروج
16«اوروج توتاندا، ایکّی‌ایزلی‌لَر له‌یین اؤزونزو پَکَر گؤرسَدمَینز، چونکی اوللار اؤز قیافه‌لَرینی ده‌ییشیرلَر تا خَلخه گؤرسَدَلَّر کی اوروج دیرلار. گرچَکینی سیزه دئییرم، اوللار اؤز ایشلَری‌نینگ اَجرینی آلمیشلار! 17آما سَن اوروج توتاندا، باشینگا یاغ سؤرت و ایزینگی یو، 18تا سَنینگ اوروج اولدوگونگی نه خَلخ، بلکی گؤزلَردن پناه اولان بووآنگ گؤره. و بووآنگ کی پناهی گؤرور، سَنه اَجر وئره‌ر.
گؤیده کی گنج
19«اؤزونزه، یئر اوستونده گنج ییغمَینز. اؤرا کی بید وورور، مَنگ وورور و اوغرولار اؤرا گیریرلَر و اؤنو اوغورله‌ییرلار. 20بلکی اؤزونزه، گؤیده گنج ییغینز. اؤرا کی نه بید وورور، نه مَنگ وورور، نه ده اوغرولار اؤرا گیریرلَر و اؤنو اوغورلاییرلار. 21بو خاطره کی گنجینگ هر یئرده اولسا، اؤره‌کینگ دا ائله اؤردا اولور.
22«گؤز بَدن چیراغی دیر. پس اگر گؤزونگ ساغ اولسا، بوتون وجودینگ ایشّیقدن دؤلو اولور، 23آما اگر گؤزونگ پیس اولسا، بوتون وجودینگ قَرَنگی‌لیگدن دؤلو اولور. پس اگر او ایشّیق کی سَنینگ ایچینگده دیر، قَرَنگی‌لیگ اولا، او نه بویوک قَرَنگی‌لیگ دیر!
24«هئچ کَس ایکّی اَربابینگ قوللوقوندا اولا بیلمَز؛ بو خاطره کی یا بیریندَن نفرت واری اولور و او بیرینی چوخ سئیر، یا دا بیرینه وفالی قالار و او بیرینی کوچوک سایار. سیز باشارماینز کی هم تارئ قوللوقوندا اولاینز، هم‌ده پیل قوللوقوندا.
نگران اولمانز
25«پس سیزه دئییرم، نه زندلیگینز ایچی نگران اولینز کی نه یئیه‌سینز یا دا نه ایچَسینز، نه ده بَدنینز ایچی نگران اولینز کی نه گئیَسینز. بئیه زندلیگ، خورَکیدن و بَدن رَختدن اوخاری ده‌ییل؟ 26گؤیینگ قوش‌لارینا باخینز: نه اَکیرلَر، نه بیچیرلَر و نه ده آمبارلارا ییغیرلَر، و گئنه ده سیزینگ گؤیده‌کی بووآینز، اوللاری دویاردیر. بئیه سیز اوللاردان اَرزشلی‌تر ده‌ییلَینز؟ 27سیزینگ هانی بیرینز، نگران اولماگ اینان بیر ساعت عُمری اوستونه قؤیا بیلَر؟ 28نه ایچی رَخت ایچی نگراناینز؟ چؤلونگ زَنبق‌لَرینه باخینز کی نه‌یین گئیَریرلَر؛ نه زَحمت چَکیرلَر، نه ده ایپ اَیریرلَر. 29آما سیزه دئییرم کی حتّی سُلیمان پادشاه ده بوتون شوکتینده، بوللارینگ بیرسی له‌یین بَزَنمه‌دی. 30آما اگر تارئ چؤل اوتونا کی بوگؤن وار و صابا اوت اوجاغ ایچینه آتولیر، بئله گئیدیریر، آیا سیزه اوللاردان چوخ آرتیق گئیدیرمَز؟ ای ایمانی آزلار! 31پس نگران اولمانز و دئمَینز: ”نه یئیَسیک؟“ یا ”نه ایچَسیک؟“ یا دا ”نه گئیه‌سیک؟“ 32چونکی بُت پَرستلَر دیرلار کی واری بو زادلار قولونجوندا دیرلار، آما سیزینگ گؤیده‌کی بووآینز بیلیر کی سیز بوللارینگ واریسینا احتیاج وارینز. 33آما سیز اَوّل تارئ پادشاه‌لیگی و اؤنونگ عِدالتی قولونجوندا اولینز، اوندا بوللارینگ واریسی سیزه وئریلَر. 34پس صابا ایچی نگران اولمانز، بو سَبریه کی صابا اؤز نگرانلیگینی واری. هر گؤنونگ سَختلیگی، ائله او گؤن ایچی بَس دیر.
ទើបបានជ្រើសរើសហើយ៖
مَتّی 6: QII
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company