مَتّی 5
5
داغ اوستونده‌کی موعظه
1عیسا او جماعتی گؤرَنده، داغ اوستونه چیخدی و اوتوراندا، شاگردلَری اؤنونگ یانینا گلدیلَر. 2عیسا، اوللارا تَعلیم وئرمَکه باشلادی و دئدی:
3«خوش اوللار حالینا کی روحدا یوخسول دیرلار،
چونکی گؤی پادشاه‌لیگی، کی ائله تارئ پادشاه‌لیگی دیر، اوللارینگ دیر.
4خوش یاسلی‌لار حالینا،
چونکی اوللار تَسلّی توتارلار.
5خوش گؤنگول آلچاق آداملار حالینا،
چونکی اوللار یئری میراثا آلارلار.
6خوش او آداملار حالینا کی صالح‌لیگه آج و سویوز دورلار.
چونکی اوللار دویارلار.
7خوش رَحم ائدَنلَر حالینا،
چونکی اوللارا رَحم اولونار.
8خوش اؤره‌کی آرّی‌لار حالینا،
چونکی اوللار تارئ‌یی گؤرَرلَر.
9خوش صُلح سئیَنلَر حالینا،
چونکی اوللار تارئ اولادلاری چاغیریلارلار.
10خوش او آداملار حالینا کی صالح‌لیگ سَبرسینه جور و جَفا چَکیرلَر،
چونکی گؤی پادشاه‌لیگی اوللارینگ دیر.
11«خوش سیزینگ حالینزا اوندا کی خَلخ، منیم سبرمه سیزی سؤیورلَر، جَفا ائدیرلَر و یالاندان واری رَقم پیس گپ سیزینگ ضدّینزه چالیرلار. 12خوشحال اولینز و شادلیگ ائدینز؛ بو سَبریه کی اَجرینز گؤیده بویوک دور. چونکی اوللار، ائله بئله ده او پیغمبرلَره کی سیزدن ایلَری وار ایدیلار، جَفا ائدیلَر.
دوز و ایشّیق
13«سیز یئرینگ دوزی‌یاینز. آما اگر دوز اؤز شورلیگینی اَلدَن وئره، گئنه نه‌یین شور اولا بیلَر؟ داها هئچ ایشدَن گلمَز، به‌غیری کی یازّیا آتیلا و خَلخینگ آیاقی آلتیندا پامال اولا.
14«سیز دنیانینگ ایشّیقی‌یَینز. بیر شَهر کی بَناسی یال اوستونده قؤیولموش پناه ائدمه‌لی ده‌ییل. 15آداملار دا چیراغ آلیشدیرمئیرلار تا اؤنو بیر پایلا آلتینا قؤیالّار، بلکی اؤنو چیراغدانا قؤییرلار تا ائو ایچینده واری‌کَسه ایشّیق چالا. 16ائله بئله ده قؤیینز تا سیزینگ ایشّیقینز آداملار گؤزو دَمینده ایشّیلیه تا اوللار سیزینگ خوب عَمل‌لَرینزی گؤرَلَّر و گؤیده‌کی بووآینزی حمد و ثنا ائدَلَّر.
مَسیح گلدی تا شَریعتی یئرینه ائتیشدیره
17«گمان ائدمَینز کی من گلمیشَم تا تورات و پیغمبرلَر یازیلی‌لارینی اعتباردان سالام. من گلمه‌میشَم تا اوللاری اعتباردان سالام، بلکی تا اوللاری یئرینه ائتیشتیرَم. 18گرچَکینی سیزه دئییرم او زامانانچاز کی یئر اینن گؤی برقرار دیر، توراتینگ بیر هَمزه‌سی یا دا بیر نُقطه‌سی آرادان گئدمه‌ز؛ ائله کی واریسی یئرینه ائتیشه. 19پس هَرکَس کی شَریعتینگ بیر ائنگ کوچوک حکمینی دا سوس توتا و باقّی آداملارا دا اؤرگده کی بئله ائدَلّر، گؤی پادشاه‌لیگیندا کی ائله تارئ پادشاه‌لیگی دیر، ائنگ کوچوک چاغیریلار. آما هَرکَس کی شَریعته عَمل ائده و باقّی آداملارا دا بئله اؤرگده، گؤی پادشاه‌لیگیندا بویوک چاغیریلار. 20چونکی سیزه دئییرم، اگر صالح‌لیگده، تورات معلّم‌لَریندن و فَریسی فِرقه‌سی‌نینگ عالِم‌لَریندن ایلَری وورمیاینز، هئچ زامان گؤی پادشاه‌لیگینا گیرمَینز.
خشم
21«ائشیدمیشینز کی قَدیم خَلخینه دئییلمیش: ”آدام اؤلدورمه و هَر کَس کی آدام اؤلدوره مُحاکمه‌یه سزاوار دیر.“ 22آما من سیزه دئییرم کی هَر کَس اؤز کاکاسینا خشم ائده محاکمه‌یه سزاوار دیر و هَر کَس کی اؤز کاکاسینی خوار ائده، شورا حُضوروندا محاکمه‌یه سزاوار دیر؛ و هَر کَس کی اؤز کاکاسینا دئیه ”ای نافَهم“ جَهنّم اوتونا سزاوار دیر. 23پس اگر سَن هَدیه‌‌ینگی قُربانگاهدا تقدیم ائدنده، یادینگه گله کی کاکانگ سَندَن بیر دلخورلیگ واری، 24هَدیه‌‌ینگی اؤردا قُربانگاه دَمینده ویل ائد و گئد. اَوّل کاکانگ اینان صُلح ائد و اوندان سورا گَل و هَدیه‌‌ینگی تقدیم ائد.
25«سَندَن شاکی اولان آدام اینان، تا مَحکمه‌یه گئدَن یولدایانگ، تئز صُلح ائد، تا ائدمئیه سَنی قاضی اَلینه تاپشیرا، قاضی دا سَنی زندانبان اَلینه وئره و زندانا آتیلانگ. 26گرچَکینی سَنه دئییرم کی تا آخیرکی قِرّانی‌یی وئرمه‌‌ینگ، هئچ زامان اؤردان چیخمَینگ.
شَهوَت و طلاق
27«ائشیدمیشینز کی تورات کتابیندا دئییلمیش: ”زِنا ائدمه.“ 28آما من سیزه دئییرم کی، هَر کَس بیر آروادا شَهوَت اینن باخا، ائله او آن، اؤز اؤره‌کینده اؤنونگ اینان زِنا ائدمیش. 29پس اگر ساغ گؤزونگ سَنی گُناها آتیر، اؤنو چیخارت و یازّیا آت؛ چونکی یئی‌تَر دیر کی بَدنینگ بیر عُضوینی اَلدَن وئرَینگ، تا بو کی بوتون بَدنینگ جَهنّمه آتیلا. 30و اگر ساغ اَلینگ سَنی گُناها آتیر، اؤنو کَس و یازّیا آت؛ چونکی یئی‌تَر دیر کی بَدنینگ بیر عُضوینی اَلدَن وئرَینگ، تا بو کی بوتون بَدنینگ جَهنّمه گئده.
31«ائله بئله ده دئییلمیش کی: ”هَر کَس آروادینی طلاق وئره، اؤنا بیر طلاقنامه وئره‌سی.“ 32آما من سیزه دئییرم، هَر کَس کی آروادینی زِنا‌دان آیری، بیر آیری علّت اوستونه طلاق وئره، اؤنو زِنایا آتیر و هَرکَس ده کی بیر طلاق وئریلمیش آرواد اینان ائولَنه، زِنا ائدیر.
آند ایچمَک
33«ائله بئله ده ائشیدمیشینز کی قَدیم خَلخینه دئییلمیش: ”یالاندان آند ایچمَه و رَب آدینا آند ایچَنده، او ایشی یئرینه ائتیشتیر.“ 34آما من سیزه دئییرم، هئچ‌وخت آند ایچمَینز؛ نه گؤیه، چونکی تارئ‌نینگ پادشاه‌لیگی تختی دیر، 35نه یئره، چونکی اؤنونگ آیاقی آلتی‌نینگ کُرسی‌سی دیر، نه ده اورشلیم شَهرینه، چونکی او بویوک پادشاهینگ شَهری دیر. 36و اؤز باشینزا دا آند ایچمَینز، چونکی تیکینزینگ بیر تالاسینی ده نه آغ ائده‌بیله‌رَینز، نه ده قَره ائده‌بیله‌رَینز. 37”بَله‌ینز“، ”بَله“ و ”یوینز“، ”یو“ اولسون. بوندان آرتیقی، شَریردن گلیر.
تَقّاص آلماگ
38«ائشیدمیشینز کی توراتدا دئییلمیش: ”گؤز، گؤز عَوضینه و دیش، دیش عَوضینه.“ 39آما من سیزه دئییرم کی شَریر آدامینگ جلوسیندا اِستقامت ائدمه‌ینز. بلکی اگر بیری ایزینگ ساغ طَرَفینه شاپالاق وورسا، ایزینگ او بیر طَرَفینی دا اؤنا ساری بؤک. 40و اگر بیری سئیه سَنی مَحکمه‌یه آپارا تا کؤینَکینگی آلا، قابانگی دا اؤنا وئر. 41و اگر بیری سَنی مجبور ائدسه تا بیر آغاج یول گئدَینگ، سن اؤنونگ اینان ایکّی آغاج یول گئد. 42بیرکَس سَندَن بیر زاد سئیَنده، اؤنا وئر و او آدامدان کی سَندَن قَرض سئیر، ایز بؤکمه.
دُشمنه مُحبّت ائدمک
43«ائشیدمیشینز کی توراتدا دئییلمیش: ”قونشونگو چوخ سئه و دُشمَنینگدَن نفرت وارینگ اولسون.“ 44آما من سیزه دئییرم کی دشمن‌لَرینزی چوخ سئینز و سیزه جَفا ائدَنلَر ایچی دُعا ائدینز، 45تا گؤیده‌کی بووآینزینگ اولادلاری اولاینز. چونکی او، اؤز گؤنونو، پیس آداملارا و خوب آداملارا چالیر و اؤز یاغیشینی اِنصافلی و اِنصاف‌سیز آداملار اوستونه یاغیر. 46اگر فقط سیزی چوخ سئیَن آداملاری چوخ سئینز، سیزینگ نه اَجر وارینز؟ بئیه باج ییغَن‌لَر دا ائله بو ایشی گؤرمئیرلَر؟ 47و اگر فقط اؤز کاکالارینزا سالام وئرَینز، نه ایش گؤرموشَینز کی باقّی آداملار ایشیندَن آرتیق دیر؟ بئیه حتّی بُت پَرستلَر دا ائله بو ایشی گؤرمئیرلَر؟ 48پس سیزده کامل اولاسینز، ائله اوله‌یین کی گؤیده‌کی بووآینز کامل دیر.
ទើបបានជ្រើសរើសហើយ៖
مَتّی 5: QII
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company