مَتّی 4
4
اِبلیس، عیسایی امتحان ائدیر
1اوندان سورا عیسا، تارئ روحو طَریقیندَن بیابانا ساری آپاریلدی تا اِبلیس اؤنو امتحان ائده. 2عیسا قیرخ گؤن-قیرخ گئجه اوروج توتاندان سورا چوخ آج ایدی 3و امتحان ائدَن گلدی و عیسایا دئدی: «اگر سَن تارئ اوغلویانگ، فرمان وئر تا بو داشلار چؤره‌ک اولالّار.» 4آما عیسا جواب وئردی: «مُقدّس یازیلی‌لاردا یازیلمیش کی:
«”اِنسانینگ دئرّیلیگی فقط چؤره‌که باغلی ده‌ییل،
بلکی هر سؤزه کی تارئ آغیزیندان چیخیر.“»
5اوندان سورا اِبلیس عیسایی مُقدّس شَهره کی اورشلیم دیر، آپاردی و اؤنو مَعبدینگ ائنگ اوجا یئرینه قؤیدو، 6و اؤنا دئدی: «اگر سَن تارئ اوغلویانگ، اؤزونگو آشاغی آت؛ چونکی مُقدّس یازیلی‌لاردا یازیلمیش کی:
”او اؤز فرشته‌لَرینه سَنینگ بارینگده فرمان وئره‌ر،“
و
”اوللار سَنی اؤز اَل‌لَری اوستونده آپارارلار،
تا ائدمئیه قیچینگ بیر داشا دَیه.“»
7عیسا اؤنا دئدی: «مُقدّس یازیلی‌لاردا بو ده یازیلمیش کی:
«”اؤز رَب تارینگی امتحان ائدمه.“»
8اوندان سورا گئنه اِبلیس اؤنو بیر اوجا داغ باشینا آپاردی و دنیانینگ واری پادشاه‌لیگ‌لارینی و اوللارینگ شوکتینی اؤنا گؤرسَتدی 9و دئدی: «اگر مَنه سجده ائدینگ و مَنی پَرست ائدینگ، بوللارینگ واریسینی سَنه وئره‌رَم.» 10عیسا اؤنا دئدی: «ایراق اول، شیطان، چونکی مُقدّس یازیلی‌لاردا یازیلمیش کی:
«”اؤز رَب تارینگی پَرست ائد
و فقط اؤنو خدمت ائد.“»
11اوندا اِبلیس، عیسایی ویل ائدی. فرشته‌لَر گلدیلَر و عیسایا خدمت ائدیلَر.
عیسا اؤز خدمتینی باشلاییر
12اوندا کی عیسا ائشیتدی کی تَعمید وئرَن یحیا توتولموش، جَلیل ولایتینه دؤندو 13و ناصِره شَهریندَن چیخدی و کَفَرناحوم شَهرینه گئتدی و اؤردا مَنزل ائدی. کَفَرناحوم شَهری، جَلیل دریاچه‌سی‌نینگ یانیندا و زِبولون و نَفتالی دیارلارینده ایدی. 14بو اولوندو تا اِشعَیای پیغمبر طَریقیندَن دئییلَن سؤز یئرینه ائتیشه کی:
15«زِبولون دیاری و نَفتالی دیاری،
جَلیل دریاچه‌سی‌نینگ یولو، اورودن چئیی‌نینگ او تئیی،
غیری‌یهودی‌لارینگ جَلیلی؛
16قَرَنگی‌لیگده مَنزل‌لَری اولان خَلخ
بیر بویوک ایشّیق گؤرموشلَر،
و اؤلومونگ دیاریندا و کؤلگه‌‌سینده مَسکن‌لَری اولانلارا،
بیر ایشّیق چالمیش.»
17او زاماندان عیسا تَعلیم وئرمَکه باشلادی و دئدی: «توبه ائدینز، چونکی گؤی پادشاه‌لیگی کی ائله تارئ پادشاه‌لیگی دیر، یاخین دیر.»
عیسا اَوّلکی شاگردلَری چاغیریر
18عیسا جَلیل دریاچه‌سی‌نینگ قیراقیندا یول گئدَنده، ایکّی کاکایی گؤردو. شَمعونی کی پِطرُس چاغیریلیردی و شَمعونونگ کاکاسی، آندریاسی. اوللار سویا تور آتیرلاردی، چونکی بالیق توتان ائدیلَر. 19عیسا اوللارا دئدی: «منیم قولونجومدان گلینز و من سیزی آداملار صَیّادی ائده‌رَم.» 20اوللار ائله او آن، تورلارینی ویل ائدیلَر و عیسا قولونجوندان گئتدیلَر. 21ایلَری‌تر گئدَنده، عیسا آیری ایکّی کاکا گؤردو، کی آدلاری یَعقوب و یوحَنّا ایدی و زِبِدی اوغوللاری ایدیلَر. اوللار بووآلاری زِبِدی اینان، قایق ایچینده، اؤز تورلارینی دؤزَتیرلَر ایدی. عیسا اوللاری چاغیردی. 22اوللار ائله او آن، قایقی و اؤز بووآلارینی ویل ائدیرلَر و عیسا آردی سورا گئتدیلَر.
عیسا چوخ آداملارا خدمت ائدیر
23عیسا بوتون جَلیل ولایتینده گزیردی، یهودی‌لارینگ عبادتگاه‌لاریندا تَعلیم وئریردی، تارئ پادشاه‌لیگی‌نینگ خوش خَبرینی اعلام ائدیردی و رَقم به رَقم مَریض‌لیگ و ناخوشلیگی خَلخ آراسیندان شفا وئریردی. 24پس عیسانینگ آد و سانی بوتون سوریه‌ده داغیلدی؛ خَلخ واری مَریض‌لَری کی رَقم به رَقم مَریض‌لیگ‌لَره و دردلَره دچار ایدیلَر و شیطانلی روح‌لارا گرفتار اولانلاری، غَشّئ‌لَری و فَلج‌لَری عیسا یانینا گتیردیلَر و عیسا اوللاری شفا وئردی. 25پس بیر بویوک جماعت جَلیل ولایتیندن، دِکاپولوس منطقه‌‌سیندن، اورشلیم شَهریندن، یهودیه ولایتیندن و اوردون چئیی‌نینگ او تئییندَن، عیسا آردی سورا گئتدیلَر.
ទើបបានជ្រើសរើសហើយ៖
مَتّی 4: QII
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company