انجیل یوحنا 6
6
عیسی پنج هزار نفر غذا آدَیه
1چنده پش، عیسی بشه دریاچه‌ی جلیله اَ دیم را که هه دریاچه تیبریه اِسه. 2پِره جماعتی چَه پشدنه بشنده، چون علامت و معجزانی که مریضان شفا دییَنِنش آمانسرده، ویندشان به. 3عیسی اَشه تپه‌ای کفا و اِشتن شاگرداننه اَگا بِنِشت. 4یهودیان پِسَخ عید نزدیک به. 5وختی عیسی دییشته و بیندشه که پِره جماعتی چَوه ور آمییرنده، فیلیپُس نه باتشه: «کاردنه نان بِخِرام تا اِم مردم بخرنده؟» 6اِمش باته تا فیلپسه امتحان بکره، چون اَ اِشتن چاک زانسردشه چِه گه بکَره. 7فیلیپُسه جواو بدا: «دویست دینار نان نی بِخِرام چوان کفافه نِدیه، حتی اگم هر کامین فقط ای کَملی بخرنده.» 8ایگله عَلوده شاگرد که چَه نام آندریاس به، و شَمعون پِطرُسه برا به، باتشه: 9«کوله ای اِنگاریه که پنج گله یَوینه نان و دو گله مایی داره، امّا اِم جماعته را چِه کره؟» 10عیسی باته: «مردمه بنشانا.» اَگارک سبزه پِر بِه. پس اَوه بنشتنده و مردکان حدوداً پنج هزار نفر بنده. 11اَدمی عیسی نانش اَکتنده و شکر کردنه پَش، اَ کسانی که نِشته بنده میانه آبخشسشه، ایزه نی ماییش، ه اندازه ای که گَوسِشانه. 12وختی بخردشانه و سیر آبنده، عیسی اِشتن شاگرداننه باته: «نانه خوردَان بیدا آگیرا تا چیزی هدر مَشی.» 13پس اَوه نانه خوردشان بیدا آکته و اَ پنج گله یَوینه نانان باقیماندک که جماعته خرده به، دونزده گله سَبَ فِت آبه.
14وقتی مردم علامت و معجزه ای که عیسی کرده به بیندشانه، باتشانه: «راس راسینه که اَ هَ پیغمبریه که گَه بایه اِم دنیا.» 15عیسی وختی بزانسشه که مردم رایشانه اَوه بیگیرنده، زورنه پادشاه بکرنده، اَگاردِنه بشه و هنی تَینا بشه کوه.
عیسی مِتَن او سرک
16نمسیره دم، عیسی شاگرده بامنده دریاچه طرف 17و دِنشتنده قایقک، بشنده دریاچه اَدیم، شهر کَفَرناحومه طرف. هوا تاریک آبییه به، امّا عیسی هلا نامییه به چوان وَر. 18اِم موقعک، دریا طوفانی بیبیا چون تند باهادی آمییرده. 19وقتی حدودا ای فرسخ پاروشان بیزی، عیسی شان بینده که دریاچه سر مِتَر و قایقه نزدیک آبییر. پس زهله ترک آبنده. 20امّا عیسی اَواننه باتشه: «از اِم؛ مترسا.» 21اَدمی رایشان به اَوه دنشاننده قایقک، که قایقَه ه لحظه آرسسا ه یاگایی که رایشان به بیشینده.
از، نان زیندگی بخش اِسِم
22صباینه روج، جماعتی که دریاچه اَ دیمک مانده بنده، بیندشانه که فقط ایگله قایق اگارک اِسه، و زانسَردِشانه که عیسی اِشتن شاگردانه اَ قایقک دِنشته نی، بلکم شاگرده تینایی شییه بِنده. 23اَدمی علوده قایقان تیبریه دریاچنه بامنده و اَ یاگایی نزدیکی آرسسنده که اَگارک خداونده شکرگذاریه پَش، نانشان خَرده به. 24پس وختی جماعت بِزانسشانه که نه عیسی اَگاریه و نه چَه شاگرده، اَ قایقانک دِنشتنده و بِشنده کفرناحوم تا عیسی پَشه بگردنده.
25وختی عیسی شان دریاچه اَدیمک بینده، اَونه باتشانه: «استاد، کِینی ته بامش یا؟» 26عیسی جواو بدا: «حقیقتا، اَز شاما نه واجم، چِمن پَشه گردا، نه علامت و معجزانی واسنه که ویندرانه، بلکم اَ نانی واسنه که بخردرانه و سیر آبران. 27کار بکرا، امّا نه خوراکی واسنه که از بین شی، بلکم خوارکی واسنه که تا ابدی زندگی مانه، خوراکی که انسانه زا شاما آدَیه. چون خدایی که په اِسه اِنسانه زاش تاییدیه مهر زیه.» 28اَدمی اَوکشان آپرسس: «چه گه بکرام تا خدا کارمان انجام دییه بیبی؟» 29عیسی جواو آداه: «خدا کار اِمه، به کسی که خرسانسشه ایمان بوعَرا.» 30اَوان عیسی نه باتشانه: «چِه علامت و معجزه ای چاما را کری تا چوه ویندننه ته باور بکرام؟ چه معجزه ای کری؟ 31چاما اجداد بیابانک، مَنّا، اَ نانی که آسماننه وارسِه بخردشانه، اَجوره که مقدس نیویشته هانک نویشته بیه: ”موسی آسمانِنه اَوانش نان آدا تا بخرنده.“ 32عیسی جواو بدا: «حقیقتا، شاما نه واجم، موسی نِبه که اَ نانش آسماننه آداشه شاما، بلکم چِمن په یِه که حقیقیه نانه آسماننه آدیه شاما. 33چون خدا نان اَوییه که آسماننه جیر بامه، و دنیا زندگی بخشه.» 34اَوان باته: «آقا، اِم نانه همیشه آما آده.» 35عیسی اَواننه باته: «اَز نانی اِسم که زندگی بخشه. هر کسی بایه چِمن ور، هرگز وَشیر نیبی، و هر کسی من ایمان بوعره هرگز تشیر نیبی. 36امّا ایزه که شاما نه باتِمه، هر چند منران بیندم، امّا حلا ایمان ناورا. 37همه‌ی کسانی که په من آدییَشنده، آیِنده چِمن ور؛ و اَ کسی که بایه چِمن ور، اَوه هرگز بَنِرکرم. 38چون از آسماننه آمییه نییم جیر تا چِمن گوسه انجام بدیم، بلکم آمییم تا چِمن خرساناره گوسه انجام بدیم. 39و چِمن خرسانار گوسه اِمه که اَ کسانی که اَو من آدییه، هیچ کامینه از دست مدیم، بلکم اَوان قیامته روجک زنده آکرم. 40چون چِمن پییَر گوسه اِمه که هر کسی که زا دیسه و اَوه ایمان بوعره، زندگی ابدی بداره، و از داوریه روجک اَوه زنده آکَرم.»
41چاوش یهودیان شروع بکه چوه درباره غرغر کردن، چیه را که عیسی واتش به «اَزِم اَ نان که آسماننه جیر آمیه.» 42اَوان باته: «مگم اِم مردک، عیسی یوسفه زا نی که آما چوه پییَر و مار آزانام؟ پس چُنجوریه اِسا واتر، ”آسماننه جیر آمییم“؟» 43عیسی جواو آدا: «هندیگرنه اینده غرغر مکرا. 44هیچکس نِتانه بایه چِمن ور مگم اِم که په ای که منش خِرسانسم اَوه بوعره چِمن طرف، و از قیامت روجک اَوه زنده کرم. 45پیغمبران نیویشته هانک آمییه که ”همه خداک تعلیم گیرنده.“ پس هر کسی خداک بشنوه و اَوک تعلیم بیگیره، آیه چِمن وَر. 46هیچکس پِش وینده نی، مگم اَ کسی که خدا طرفنه بیبی؛ اَوه که پِش وینده. 47حقیقتا، شامانه واجم، هر کسی که ایمان داره، زندگی ابدی داره. 48اَز اَ نانی اِسِم که زندگی بخشِه. 49شاما اجداد، مَنّا شان بیابانک بِخه، با اِم حال بمردنده. 50اِمه اَ نانی که آسماننه نازل بیه، ایزنه که هر کسی اَوک بخره، نِمره. 51اَ نانی اِسِم که زندگی بخشه که آسماننه جیر بامه. هر کسی اِم نانک بخره، تا ابد زنده مانه. نانی که از آدَییم تا دنیا مردم زندگی بدارنده، چِمن بدن اِسه.»
52برکه بحثی یهودیان میانک دگس که «اِم مردک چُنجوره تانه اِشتن بدنه آدَیه آما تا بخرام؟» 53عیسی اَواننه باتشه: «حقیقتا، شامانه واجم که، تا انسان زا بدنه مخرا و چَوه خونه آمخرا، اِشتنک زندگی ندارا. 54هر کسی چِمن بدنه بخره و چِمن خونه آخره، زندگی ابدی داره، و از قیامته روجک اَوه زنده کرم. 55چون چِمن بدن حقیقی خَردنی و چِمن خون آخردنی حقیقی اِسه. 56کسی که چِمن بدنه خَره و چِمن خون آخَره، منک ساکن بی و از اَوک. 57ایزه که په ای که زندگی دَیه منش خرسانسم و از پییر واسنه زنده ام، اَ کسی که من بِخَره چِمن واسنه زنده مانه. 58اِم اِسه اَ نانی که آسماننه جیربامه؛ نه اَ نانی شوار که شاما اجداد بخردشانه، و با اِم حال بمردنده؛ بلکم هر کسی اِم نانک بخره، تا ابد زنده مانه.» 59عیسی اِم لاوَان زمانی باتشه که کَفَرناحومه شهرک ایگله یهودیان عبادگاک تعلیمش دیرده.
پِطرُسه اعتراف
60خیلی عیسی شاگرده اِم لاوان اَشنوسننه باتشانه: «اِم لاوَان چتیننده، کی تانه اَوان قبول بکره؟» 61عیسی، زانسرده که چَوه شاگرده اِم لاوان واسنه غرغر کردرنده، اَواننه باتشه: «چِمن لاوَه شاما ناراحت کردرنده؟ 62پس اگم بینا انسان زا بیشی کفا اَیاگایی که اوّلک اَگا به، چه کرا؟ 63خدا روح اِسه که زنده کره؛ جسم فایده‌ای نداره. لاوانی که از شامانه باتِمه، روح و زندگی اِسنده. 64امّا بعضی شاما دلَک اِسنده که ایمان ناورنده.» چون عیسی صِفتنه زانسِشه که کییِه ایمان ناورنده و کیِه اَ کسی که اَوه خیانت کَره. 65و باتشه: «چِمه واسنه شامانه باتِمه هیچکس نتانه چِمن ور بایه، مگم اَ کسی که آسمانیه پییر طرفنه اَوه بَخشَسه بییه بیبی.»
66اِم لاوانه پش، خیلی چوه شاگرده آگردسنده، و دَ اَوشان همراهی نکه. 67پس عیسی اَ دونزده گله شاگرداننه باتشه: «شاما نی رایرانه بِشا؟» 68شَمعون پِطرُسه جواو بدا: «آقا آما چیکی ور بشام؟ زندگی ابدی لاوَه اِشته ورک اِسنده. 69و آما ایمانمان آورده و زانسرام که ته اَ خدا قدّوسِش.» 70عیسی چوان جواوش بدا: «مگم از شاما دونزده نفرم انتخاب کرده نیران؟ با اِم حال، ای نفر شاماک ابلیس اِسه.» 71عیسی یهودا درباره، شَمعون اِسْخَریوطی زا، لاوش کردرده. چون یهودا ایگله از اَ دونزه نفر به، که ای مدت پَش عیسش خیانت بکه.
ទើបបានជ្រើសរើសហើយ៖
انجیل یوحنا 6: TIT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
@ 2024 Korpu Company