ကမ္ဘာႏစ 10
10
နောဧပိုဖုံႏပိုလီꩻအစွိုးခွိုꩻ
(၁ရာႏဇဝင်ႏချုပ် ၁:၅–၂၃)
1ထီလုမ်ႏထွူ နောဧပိုခိုဝင်ꩻသွံ သျေမ၊ ဟာမတွမ်ႏ ယာဖဲက် ကလင်ꩻ လွဉ်ဒါႏ ပိုလီꩻစွိုးခွိုꩻဖုံႏနဝ်ꩻ နုဲင်းယိုသွူ။ ပိုခိုဝင်ꩻသွံ 2ယာဖဲက် ပိုခိုဖုံႏနဝ်ꩻ ဂေါမာ၊ မာဂေါဂ၊ မဒဲ၊ ယာဝန်၊ တုဗလ၊ မေသျဲက်၊ တိရက်နဝ်ꩻသွူ။ ဝွေꩻသီး အပိုလီꩻဖုံႏနဝ်ꩻ စူꩻလွဉ်ꩻ အဖါမဉ်ꩻတဲင် ဝွေꩻသီးယိုထွာလွဉ် လိုꩻမျိုꩻဖုံႏအဖါသွူ။ 3အဝ်ႏဂေါမာ ပိုလီꩻစွိုးခွိုꩻဖုံႏနဝ်ꩻ ထွာလွဉ် အာသျကေနတ်၊ ရိဖတ်တွမ်ႏ တော်ကမ လိုꩻမျိုꩻဖုံႏသွူ။ 4ယာဝန်ပိုလီꩻ စွိုးခွိုꩻနဝ်ꩻ ထွာလွဉ် ဧလိသျာ၊ သပေင်၊ သုဲင်းပရတ်တွမ်ႏ ရောက်လိုꩻမျိုꩻဖုံႏသွူ။ 5ဝွေꩻသီးယိုဖုံႏနဝ်ꩻ ထွာလွဉ်လိုꩻ ကအုံလောင်းဒါႏ ပင်ႏလယ်ႏ ထျꩻတွမ်ႏ ကြွန်လောင်းသားဖုံႏ အဖါသွူ။ နဝ်ꩻဖုံႏနဝ်ꩻထွာ ယာဖဲက် ပိုလီꩻစွိုးခွိုꩻတဲင် ဝွေꩻသီးနဝ်ꩻ အခွိုꩻတွမ်ႏအခွိုꩻ အခမ်းတွမ်ႏအခမ်း အုံဖခေါ်လို့ဝင်ꩻတဲင် ဒေါ့ꩻချာဒျာႏ အဘာႏသာႏငဝ်းဖုံႏသွူ။
6ဟာမပိုခိုဖုံႏနဝ်ꩻ ကုသျ၊ အီဂျစ်၊ လစ်ဗျားတွမ်ႏ ခါနန်သီးနဝ်ꩻသွူ။ ဝွေꩻသီး အပိုလီꩻဖုံႏနဝ်ꩻ စူꩻလွဉ် အဖါမဉ်ꩻတဲင် ဝွေꩻသီးယို ထွာလွဉ် လိုꩻမျိုꩻဖုံႏအဖါသွူ။ 7ကုသျပိုလီꩻစွိုးခွိုꩻနဝ်ꩻ သေဗ၊ ဟာဝိလ၊ သာဗတ၊ ရာဂမတွမ်ႏ သက်တေခါ လိုꩻမျိုꩻဖုံႏသွူ။ ရာဂမ ပိုလီꩻစွိုးခွိုꩻနဝ်ꩻ ထွာလွဉ် သျီဗတွမ်ႏ ဒေဒန်လိုꩻမျိုꩻဖုံႏသွူ။ 8ကုသျပိုခို အဝ်ႏဒွိုန်းကတဖြာꩻ အမဉ်နိမ်ရောဒသွူ။ ဝွေꩻနဝ်ꩻ ဟံႏတန်လောင်း အရီးသွတ်ꩻထွာလိုꩻ တွိုက်ꩻသိမ်ꩻအောင်ႏမျင်ႏနွောင်ꩻ ဝင်ꩻခမ်းသွူ။ 9ဝွေꩻနဝ်ꩻ ထာဝရဘုရာꩻ စွဲကိုနဝ်ꩻမꩻ ထွာလွဉ်(မုတ်ဆိုꩻတန်) လိုꩻလော်တခြာကျင်ႏ အစွန်ꩻထင် တဖြာꩻသွူ။ ပွိုးနဝ်ꩻမꩻ လိုꩻဖုံႏနဝ်ꩻ ဒေါ့ꩻပဆိုးဒါႏ “ထာဝရဘုရာꩻ ယံကမာꩻဖေႏနာꩻ လိုꩻလော်ထာꩻခြာကျင်ႏ နုဲင်းနိမ်ရောဒ”နုဲင်းနဝ်ꩻသွူ။ 10ဝွေꩻခမ်းထီနဝ်ꩻ အရီးသွတ်ꩻ ဗာဗုလုန်ဝေင်ꩻ၊ ဧရဲက်ဝေင်ꩻတွမ်ႏ အက္ကဒ်ဝေင်ꩻဖုံႏသွူ။ နဝ်ꩻသွံဝေင်ꩻနဝ်ꩻ အဝ်ႏသော့ꩻ ဗာဗုလုန်ခမ်းကိုသွူ။ 11အဝ်ႏခမ်းနဝ်ꩻ ဝွေꩻလွေꩻသော့ꩻ အာသီးရီးယားခမ်းကို တယ်ႏဝေင်ꩻတောႏတန် နိနေဝေဝေင်ꩻ၊ ရဟောဗုဒ်ဣရဝေင်ꩻ၊ ကာလဝေင်ꩻသွူ။ 12ရေသေင်ဝေင်ꩻနဝ်ꩻ တယ်ႏသော့ꩻ နိနေဝေဝေင်ꩻစွဉ်ႏ ဝေင်ꩻတောႏတန် ကာလဝေင်ꩻခါႏသွူ။
13အီဂျစ်ပိုလီꩻ စွိုးခွိုꩻဖုံႏနဝ်ꩻ ထွာလစ်ဒျား၊ အနမ်မိန်၊ လဟာဗိန်၊ နတ္တုဟိမ် 14ပက်သရုဟိမ်၊ ကာသလူးဟိမ်တွမ်ႏ ကရေတေ လိုꩻမျိုꩻဖုံႏတဲင် ဖိလိတ္တိလိုꩻမျိုꩻနဝ်ꩻ အဝ်ႏကာသလူးဟိမ် လိုꩻမျိုꩻ သွုပ်လင်ꩻသွူ။
15ခါနန် အပိုခိုယင်း သိဒုန် တွမ်ႏဟေသလိုꩻမျိုꩻဖုံႏနဝ်ꩻ ထူႏစူꩻလွဉ်ꩻဒျာႏ ဝွေꩻသီးအဖါဖုံႏ မဉ်ꩻသွူ။ 16ခါနန်နဝ်ꩻတဲ့ꩻ ထွာလွဉ်ပါက ယေဗုသိလိုꩻမျိုꩻ၊ အံမွန်ရိလိုꩻမျိုꩻ၊ ဂိရဂါသျိလိုꩻမျိုꩻ၊ 17ဟိဝိလိုꩻမျိုꩻ၊ အာကိလိုꩻမျိုꩻ၊ သိနိလိုꩻမျိုꩻ 18အာဝိဒိလိုꩻမျိုꩻ၊ ဇေမရိလိုꩻမျိုꩻတွမ်ႏ ဟာမတိလိုꩻမျိုꩻ အဖါနဝ်ꩻသွူ။ ခါနန်ခွိုꩻနွယ်ႏနဝ်ꩻ ထွာလိုꩻမျိုꩻ တဗွိုန်လို့တဝ်းဝင်ꩻတဲင် အုံစွစ်ꩻလီဒျာႏသွူ၊ 19တွိုႏလွေꩻစွဉ်ႏ ခါနန်ခမ်းကူ တယ်ႏစစွဉ်ႏ သိဒုန်ဝေင်ꩻ စွို့ꩻနဝ်လွေꩻစွဉ်ႏ ဂေရာဝေင်ꩻ ကဗော့ꩻဂါဇဝေင်ꩻထျꩻတဲင် စွို့ꩻကွဉ်ႏလွေꩻ သောဒုံဝေင်ꩻ၊ ဂေါမောရဝေင်ꩻ၊ အာဒမာဝေင်ꩻတွမ်ႏ ဇိဗုဲင်ဝေင်ꩻက အဝ်ႏဗော့ꩻဒါႏ လာသျဝေင်ꩻနဝ်ꩻသွူ။ 20ဟာမပိုလီꩻစွိုးခွိုꩻဖုံႏနဝ်ꩻ ဝွေꩻသီး အခွိုꩻတွမ်ႏအခွိုꩻ ဝွေꩻသီးဝေင်ꩻတွမ်ႏ ဝွေꩻသီးဝေင်ꩻ အုံခေါ်ဒေါ့ꩻဒျာႏ ဝွေꩻသီးငဝ်းငွါဖုံႏသွူ။
21ယာဖဲက်ဝေးခို သျေမနဝ်ꩻ ထွာဟေဗြဲလိုꩻမျိုꩻဖုံႏ ကားကအဝ်ႏ အဖါသွူ။ 22သျေမပိုခိုဖုံႏနဝ်ꩻ ထွာဧလံ၊ အာသျာရ၊ အာဖါသျတ်၊ လုဒတွမ်ႏ အာရံသွူ။ ဝွေꩻသီး အပိုအလီꩻဖုံႏနဝ်ꩻ စူꩻလွဉ်ꩻ အဖါမဉ်ꩻဖုံႏတဲင် ဝွေꩻသီးယို ထွာလွဉ် လိုꩻမျိုꩻဖုံႏ အဖါသွူ။ 23အာရံပိုလီꩻ စွိုးခွိုꩻဖုံႏနဝ်ꩻ ထွာဥဇလိုꩻမျိုꩻ၊ ဟုလလိုꩻမျိုꩻ၊ ဂေသာလိုꩻမျိုꩻတွမ်ႏ မာသျလိုꩻမျိုꩻသွူ။ 24အာဖါသျတ်ပိုနဝ်ꩻ ထွာသျေလ၊ သျေလပိုနဝ်ꩻ ထွာဧဗာ၊ 25ဧဗာနဝ်ꩻ ပိုခို အဝ်ႏဝင်ꩻနီ၊ တဖြာꩻနဝ်ꩻ မဉ်ꩻဖါလဲက်၊ ပွိုးတွော့ꩻ ဝွေꩻစိုးနဝ်ꩻ လိုꩻဟံႏတန်လောင်းယို ဖလီလို့ဗာႏဝင်ꩻနဝ်ꩻမꩻ ဟဲ့ꩻဗာႏနုဲင်းနဝ်ꩻသွူ။ အလင်တဖြာꩻနဝ်ꩻ မဉ်ꩻ ယုတ်တန်သွူ။ 26ယုတ်တန်ပိုလီꩻ စွိုးခွိုꩻနဝ်ꩻထွာ အမိုဒလိုꩻမျိုꩻ၊ သျာလပ်လိုꩻမျိုꩻ၊ ဟာသာမာဝဲတ်လိုꩻမျိုꩻ ယေရလိုꩻမျိုꩻ 27ဟာဒိုရံလိုꩻမျိုꩻ၊ ဥဇလလိုꩻမျိုꩻ၊ ဒိကလလိုꩻမျိုꩻ 28ဩဗလလိုꩻမျိုꩻ၊ အာဗိမေလလိုꩻမျိုꩻ၊ သျေဗလိုꩻမျိုꩻ၊ 29ဩဖိရလိုꩻမျိုꩻ ဟာဝိလလိုꩻမျိုꩻစွဉ်ႏ ယောဗပ်လိုꩻမျိုꩻဖုံႏသွူ။ ဝွေꩻသီး ကားကအဝ်ႏနဝ်ꩻ ထွာဒျာႏ ယုတ်တန်ပိုလီꩻစွိုးခွိုꩻဖုံႏသွူ။ 30ဝွေꩻသီး ကအုံဒါႏ ခင်ႏလမ်းနဝ်ꩻ တယ်ႏမေသျဝေင်ꩻ တွိုႏလွေꩻ သဲက်ဖါဝေင်ꩻဆꩻကွဉ်ႏဖဲ့ꩻ ကောင်ခြာကို သေဖါဝေင်ꩻနဝ်ꩻသွူ။ 31နဝ်ꩻဖုံႏနဝ်ꩻထွာ သျေမပိုလီꩻစွိုးခွိုꩻတဲင် အုံအဝ်ႏခေါ်ဒျာႏ ဝွေꩻသီးအခွိုꩻ တွမ်ႏအခွိုꩻ အခမ်းတွမ်ႏ အခမ်းတဲင် အစွိုꩻတွမ်ႏ အစွိုꩻနဝ်ꩻတဲ့ꩻ ဒေါ့ꩻချာဒျာႏဝွေꩻသီး အဘာႏသာႏငဝ်းဖုံႏသွူ။
32နဝ်ꩻဖုံႏ ကားကအဝ်ႏနဝ်ꩻ ထွာဒျာႏ နောဧ ပိုလီꩻစွိုးခွိုꩻဖုံႏတဲင် ဖေါႏနယ်ဖေႏဒျာႏ ဝွေꩻသီး အလိုꩻမျိုꩻတွမ်ႏ အခွိုꩻရဲဉ်ႏဖုံႏသွူ။ ထီလုမ်ႏထွူ လိုꩻမျိုꩻဖုံႏ ကားကအဝ်ႏ ဟံႏတန်အလောင်းနဝ်ꩻ အဝ်ႏဒျာႏနောဧ ပိုခိုစွိုးခွိုꩻဖုံႏ ထွာလွဉ်သွူ။
ទើបបានជ្រើសរើសហើយ៖
ကမ္ဘာႏစ 10: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.