ကမ္ဘာႏစ 11
11
ဗာဗုလုန်ရန်းခြေင်ႏတွိုက်ထို
1အစစ လိုꩻကအဝ်ႏဒါႏ တကမ္ဘာႏလွုမ်း ကားကအဝ်ႏနဝ်ꩻ ငဝ်းဘာႏသာႏ အဝ်ႏတမျိုꩻလွုမ်ꩻတဲင် ဒေါ့ꩻသွုံꩻဒျာႏ ငဝ်းတမျိုꩻလွုမ်ꩻသွူ။ 2ဝွေꩻသီးလွေꩻကွဉ်ႏတဲင် ဖျော်လွေꩻ ဗာဗုလုန်ခမ်း ထာꩻပြင်ႏ တထွောင်းတွော့ꩻ အုံနဝ်ꩻကိုသွူ။ 3တဖြာꩻတွမ်ႏတဖြာꩻ ဒေါ့ꩻဖေႏလို့ဝင်ꩻ “လွဉ်ဟုဲင်း ဗွော့ꩻအွတ်ꩻတွော့ꩻ ဖို့ꩻဆွော့ꩻဆွော့ꩻတွမ်။” ပွိုးနဝ်ꩻမ ဝွေꩻသီးလꩻလွဉ် အွတ်ꩻတဲင် ကအီႏတယ်ႏတဉ်ႏအီတာႏ မာဆလာနဝ်ꩻ မာအီတွမ်ႏ မဝ်ယုဲင် တစားသွူ။ 4ဝွေꩻသီးရိုꩻ “နီ ဖေႏကဖလီ ဗာႏမွိုန်းဝင်ꩻ တဟံႏလွုမ်းနဝ်ꩻ ယိုခါ နီတယ်ႏထင်ႏတွမ် ဝေင်ꩻတန်တွမ်ႏ ရန်းခြေင်ႏတွိုက်ထို ဖေႏကတွိုႏကီ ထင်ႏစွဉ်ႏမို့ꩻ ဖေႏနီမဉ်ႏကကျော်ႏ” နုဲင်းနဝ်ꩻသွူ။
5နဝ်ꩻထွူ ဖေႏကထီႏ ဝွေꩻသီး ကတယ်ႏလဲဉ်းဒါႏ ဝေင်ꩻတန်တွမ်ႏ ရန်းခြေင်ႏတွိုက်ထိုနဝ်ꩻ ထာဝရဘုရာꩻ ကျွꩻလင်ꩻလွဉ် 6တဲင်ဝွေꩻဗွေႏရိုꩻ “ယိုခါ လိုꩻဖုံႏ ကားကအဝ်ႏနဝ်ꩻ ထွာလိုꩻတစွိုꩻလွုမ်ꩻတဲင် ဒေါ့ꩻဒျာႏ ဘာႏသာႏငဝ်း တစွိုးချင်ႏလွုမ်ꩻ။ ဝွေꩻသီး ကမာꩻယိုနဝ်ꩻ ထွာအစလွုမ်ꩻသွူ။ ဆုဲင်ꩻတညတဝ်းနဝ်ꩻ ဝွေꩻသီးမဉ်မာꩻ တမုဲင်ꩻတဲ့ꩻ အအီႏမာꩻနွောင်ꩻထိုꩻသွူ။ 7နီအွဉ်ဝင်ꩻ လင်ꩻတဲင် မာꩻသျွုတ် တရေင်ထိုꩻတွမ် ဝွေꩻသီး ဘာႏသာႏငဝ်း ဖေႏဝွေꩻသီး တဖြာꩻတွမ်ႏတဖြာꩻ ကသေနာႏမွိုန်းဒွုမ် လို့ဝင်ꩻငဝ်း” နုဲင်းနဝ်ꩻသွူ။ 8ပွိုးနဝ်ꩻမꩻ ထာဝရဘုရာꩻနဝ်ꩻ မာꩻလီလာစွစ်ꩻထိုꩻ ဝွေꩻသီး ဟံႏတန် တဖြုံႏလွုမ်းတဲင် ဝွေꩻသီး ကအဝ်ႏတယ်ႏဒါႏ ဝေင်ꩻတန်နဝ်ꩻ အွဉ်ႏဆွိုးထိုꩻဗာႏစွဉ်ႏသွူ။ 9ကွပ်ပွိုး ထာဝရဘုရာꩻ မာꩻသျွုတ်တရေင်ထိုꩻ ဝွေꩻသီးငဝ်းတဲင် ဖလီစွစ်ꩻစဲစ်ꩻထိုꩻ တဟံႏတန်လွုမ်း နဝ်ꩻမꩻ ဝေင်ꩻတန်နဝ်ꩻတဲ့ꩻ ဟဲ့ꩻထိုꩻဗာႏ ဗာဗုလုန်သွူ။
သျေမပိုလီꩻစွိုးခွိုꩻ
(၁ရာႏဇဝင်ႏချုပ် ၁:၂၄–၂၇)
10ယိုနဝ်ꩻထွာ သျေမ ပိုလီꩻစွိုးခွိုꩻဖုံႏသွူ။ ထီလုမ်ႏထွူ ညနီနေင်ႏ၊ သျေမ သက်ထွိုင်ႏလꩻ နေင်ႏ၁၀ဝ၊ ဝွေꩻလꩻပိုခိုတဖြာꩻ မဉ်ꩻအာဖါသျတ်သွူ။ 11နဝ်ꩻထွူ ဝွေꩻသက်မွန် အုံဗာႏထဲင်းယင်း နေင်ႏ၅၀ဝတဲင် ဝွေꩻလꩻယင်း ပိုအလင်ဖုံႏ။
12အာဖါသျတ် သက်ထွိုင်ႏလꩻ ၃၅နေင်ႏချိန်ႏ ဝွေꩻလꩻ ပိုခိုတဖြာꩻ အမဉ်ꩻသျေလသွူ။ 13နဝ်ꩻထွူ ဝွေꩻသက်မွန် အုံဗာႏထဲင်းယင်း ၄၀၃နေင်ႏတဲင် လꩻယင်း ပိုအလင်ဖုံႏသွူ။
14သျေလ သက်ထွိုင်ႏလꩻ နေင်ႏ၃၀ချိန်ႏ ဝွေꩻလꩻ ပိုခိုတဖြာꩻ ဧဗာသွူ။ 15နဝ်ꩻထွူ ဝွေꩻသက်မွန်အုံဗာႏထဲင်း ၄၀၃နေင်ႏတဲင် ဝွေꩻလꩻယင်း ပိုအလင်ဖုံႏသွူ။
16ဧဗာသက်ထွိုင်ႏလꩻ ၃၄နေင်ႏချိန်ႏ ဝွေꩻလꩻ ပိုခိုတဖြာꩻ ဖါလဲက်သွူ။ 17နဝ်ꩻထွူ ဝွေꩻသက်မွန် အုံဗာႏထဲင်း ၄၀၃နေင်ႏတဲင် ဝွေꩻလꩻယင်း ပိုအလင်ဖုံႏသွူ။
18ဖါလဲက်သက်ထွိုင်ႏလꩻ ၃၀နေင်ႏချိန်ႏ ဝွေꩻလꩻ ပိုခိုတဖြာꩻ ရာအူးသွူ။ 19နဝ်ꩻထွူ ဝွေꩻသက်မွန် အုံဗာႏထဲင်း ၂၀၉နေင်ႏတဲင် လꩻယင်း ပိုအလင်ဖုံႏသွူ။
20ရာအူးသက်ထွိုင်ႏလꩻ ၃၂နေင်ႏချိန်ႏ ဝွေꩻလꩻပိုခိုတဖြာꩻ သေရောက်သွူ။ 21နဝ်ꩻထွူ ဝွေꩻသက်မွန် အုံဗာႏထဲင်း ၂၀၇နေင်ႏတဲင် လꩻယင်းပိုအလင်ဖုံႏသွူ။
22သေရောက် သက်ထွိုင်ႏလꩻ ၃၀နေင်ႏချိန်ႏ ဝွေꩻလꩻပိုခိုတဖြာꩻ နာဟော်သွူ။ 23နဝ်ꩻထွူ ဝွေꩻသက်မွန်အုံဗာႏထဲင်း ၂၀ဝတဲင် လꩻယင်း ပိုအလင်ဖုံႏသွူ။
24နာဟော် သက်ထွိုင်ႏလꩻ၂၉နေင်ႏချိန်ႏ ဝွေꩻလꩻပိုခိုတဖြာꩻ တေရသွူ။ 25နဝ်ꩻထွူ ဝွေꩻသက်မွန် အုံဗာႏထဲင်း ၁၁၉နေင်ႏတဲင် လꩻယင်းပိုအလင်ဖုံႏသွူ။
26နဝ်ꩻထွူ တေရ သက်ထွိုင်ႏလꩻ နေင်ႏ၇၀ချိန်ႏ ဝွေꩻနဝ်ꩻ လလွဉ်ပိုခိုအာဗြံ နာဟော်တွမ်ႏ ဟာရန်သွူ။
တေရပိုလီꩻစွိုးခွိုꩻ
27ယိုဖုံႏနဝ်ꩻထွာ တေရပိုလီꩻစွိုးခွိုꩻဖုံႏသွူ။ တေရနဝ်ꩻထွာ အာဗြံ၊ နာဟော် ၊ ဟာရန်သီး ဖါသွူ။ ဟာရန်နဝ်ꩻထွာ လောတအဖါသွူ။ 28ဟာရန်နဝ်ꩻ သီသော့ꩻ ဝွေꩻဖါဇာႏတိခင်ႏလမ်း ဥရဝေင်ꩻ၊ ဗာဗုလုန်ခမ်းကိုနဝ်ꩻသွူ။ 29အာဗြံနဝ်ꩻ မင်္ဂလာႏတောႏလမ်းတွမ်ႏ သာရဲတဲင် နာဟော်နဝ်ꩻ မင်္ဂလာႏတောႏလမ်းတွမ်ႏ ဟာရန်ပိုမူႏ မိလခါသွူ။ ဟာရန်နဝ်ꩻထွာ မိလခါတွမ်ႏ ဣသခါ အဖါသွူ။ 30သာရဲနဝ်ꩻ ထွာလိုꩻမူႏဒုဲင် ပိုအဲဉ်ထဝ်းသွူ။
31တေရနဝ်ꩻ ဟဲ့ꩻဝွေꩻပိုခို အာဗြံတွမ်ႏ ဝွေꩻလီꩻလောတ ကထွာဒါႏ ဟာရန် ပိုခိုတွမ်ႏ ဝွေꩻပါႏနမ်သာရဲ ကထွာအာဗြံမာနဝ်ꩻတဲင် ဝွေꩻသီး အဝ်ႏဥရဝေင်ꩻ ဗာဗုလုန်ခမ်းနဝ်ꩻ ထန်ႏလွေꩻထိုꩻ ခါနန်ခမ်းသွူ။ ဝွေꩻသီးအဝ်ႏလွေꩻတွင်ꩻ ထွိုင်ႏဖျော်လွဉ် ဟာရန်ဝေင်ꩻတဲင် အုံနဝ်ꩻကိုသွူ။ 32တေရ ကအဝ်ႏအုံဝေင်ꩻ နဝ်ꩻကိုတွင်ꩻ သက်ထွိုင်ႏလꩻ ၂၀၅နေင်ႏနဝ်ꩻ သီထိုꩻနဝ်ꩻသွူ။
ទើបបានជ្រើសរើសហើយ៖
ကမ္ဘာႏစ 11: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.