ယောဟန် 2
2
တောႏလမ်းမင်္ဂလာႏပွယ်ꩻဝေင်ꩻကာနကို
1ဆုဲင်ꩻနီနီꩻ ကာလိလဲခမ်း ဝေင်ꩻကာနကိုနဝ်ꩻ ပွယ်ꩻတောႏလမ်း မင်္ဂလာႏ အဝ်ႏသွူ။ ဗွေႏယေသျုမွိုးနဝ်ꩻ အဝ်ႏနဝ်ꩻကို 2တဲင်ဗွေႏယေသျုတွမ်ႏ ဝွေꩻဗွေႏ တပဲ့တောႏဖုံႏနဝ်ꩻတဲ့ အဝ်ႏဖစ်ပင်ꩻသော့ꩻ ပွယ်ꩻတောႏလမ်း မင်္ဂလာႏကိုနဝ်ꩻသွူ။ 3ဝုဲင်ထွိုင်ႏလို့ထိုꩻချိန်ႏ ဗွေႏယေသျု မွိုးနဝ်ꩻ ဒေါ့ꩻဖေႏဝွေꩻဗွေႏ၊ “ဝွေꩻသီး ဝုဲင်လို့ထိုꩻလဲဉ်း” နုဲင်းနဝ်ꩻသွူ။
4ဗွေႏယေသျု လဝ်းချာ၊ “အီႏမာꩻဗာႏတမုဲင်ꩻနဝ်ꩻ နာꩻတအဝ်ႏလိုႏဒေါ့ꩻတဝ်းခွေ။ ခွေအချိန်ႏ တတွိုႏတဝ်းဒွိုန်း” နုဲင်းနဝ်ꩻသွူ။
5ဗွေႏယေသျုမွိုး ဒေါ့ꩻနယ်ဖေႏ အသွဉ်းဖုံႏ၊ “ဝွေꩻဒေါ့ꩻဖေႏသီ နုဲင်းမုဲင်ꩻတဲ့ မာꩻဟုဲင်း” နုဲင်းနဝ်ꩻသွူ။
6နဝ်ꩻကို ဂျူးထွုံꩻစံႏအလꩻ ပသေကြောင်းစင်အီတာႏ ထီဖွိုင်ꩻမာꩻနေး လုံးတူႏတန်တဲင် နွမ်ႏထီဂါလံ နီဆီစွဉ်ႏ သွံဆီခါႏ အဝ်ႏသူဖြုံႏသွူ။ 7ဗွေႏယေသျု ဒေါ့ꩻဖေႏသွဉ်းဖုံႏ၊ “ထီဖွိုင်ꩻအဲင်ႏဖုံႏယိုနဝ်ꩻ သော့ꩻဗွေဗွေထီဟုဲင်း” နုဲင်းနဝ်ꩻတဲင် ဝွေꩻသီးသော့ꩻဗွေ ဗꩻစွဉ်ႏအငွါနဝ်ꩻသွူ။ 8နဝ်ꩻမꩻဝွေꩻဗွေႏ ဒေါ့ꩻဖေႏဝွေꩻသီး၊ “ယိုခါ ဗွိုန်ႏထန်ႏထီနဝ်ꩻ ယင်ဟန်ႏတွော့ꩻ ဖေႏသွော့ပါꩻခို ပွယ်ꩻထိန်ꩻသားနဝ်ꩻဟုဲင်း” နုဲင်းနဝ်ꩻသွူ။ ထီနဝ်ꩻ ဝွေꩻသီး ထူႏလွေꩻဖေႏစွဉ်ႏ ဝွေꩻသွူ။ 9ယိုခါ ထီကထွာခွိုန်ꩻ ထိုꩻဒါႏ ဝုဲင်နဝ်ꩻ ဝွေꩻအွꩻထွားစမ်ꩻစွဉ်ႏသွူ။ ဝုဲင်ယိုထွာလွဉ် နုဲင်းမုဲင်ꩻနဝ်ꩻ ဝွေꩻတသေတဝ်း။ (ကွဲႏတွော့ꩻ သွဉ်းဖုံႏ ကဗွိုန်ႏလွဉ်ဒါႏ ထီဖုံႏနဝ်ꩻ အဝ်ႏသေသွူ။) နဝ်ꩻမꩻ ဝွေꩻဟဲ့ꩻ ခွန်မောင်ႏတဲင်၊ 10ဒေါ့ꩻဖေႏဝွေꩻ၊ လိုꩻဖုံႏနဝ်ꩻ ကဉ်းအာအာ အွဉ်ႏတမ်ꩻဖေႏရီးဒျာႏ ဝုဲင်အဟဝ်သွတ်ꩻ ထွူတွော့ꩻ ထဉ်ႏဖုံႏ မဉ်ႏမွန်ꩻငါႏလဲဉ်းမꩻ ဝွေꩻအသွဉ်းဖုံႏ အွဉ်ႏတမ်ꩻဖေႏ ဝုဲင်ရိုꩻရိုꩻသွူ။ ကွဲႏတွော့ꩻ ဝုဲင်အယံသွတ်ꩻနဝ်ꩻ ဗꩻတွိုႏယိုခါ နာꩻအဝ်ႏအွဉ်ႏဟဝ်ခါꩻဒျာႏ နုဲင်းမုဲင်ꩻ” နုဲင်းနဝ်ꩻသွူ။
11ဗွေႏယေသျုမာꩻနယ် ထာꩻအံႏဖြာႏခရာႏ နိမိတ်လက္ခဏာႏ ကာလိလဲခမ်း၊ ဝေင်ꩻကာနကိုယိုနဝ်ꩻ ထွာအရီးသွတ်ꩻလဲင်ႏသွူ။ နဝ်ꩻကိုနဝ်ꩻ ဝွေꩻဗွေႏဖေါႏနယ် ဝွေꩻဗွေႏ ဘွုန်ꩻသရေႏတောႏတဲင် ဝွေꩻဗွေႏ တပဲ့တောႏဖုံႏနဝ်ꩻ ယွုမ်းစွဉ်ႏဝွေꩻဗွေႏသွူ။
12 #
မ ၄:၁၃။ ယိုထွူနဝ်ꩻ ဗွေႏယေသျုတွမ်ႏ ဝွေꩻဗွေႏအမွိုး၊ အဖူးခိုဖုံႏစွဉ်ႏ တပဲ့တောႏဖုံႏ လွေꩻထိုꩻ ဝေင်ꩻကပေရနောင်တဲင် အုံနဝ်ꩻကို တပေါႏညတဝ်းသွူ။
ဗွေႏယေသျုကျွꩻလွေꩻဗိမာန်ႏတောႏကျောင်ꩻ
(မတဲ ၂၁:၁၂–၁၃။ မာကု ၁၁:၁၅–၁၇။ လုကာ ၁၉:၄၅–၄၆)
13 #
ထလ ၁၂:၁–၂၇။ ပွိုးပွယ်ꩻပတ္တခါချိန်ႏ အီႏဗော့ꩻတွိုႏလွဉ်နဝ်ꩻမꩻ ဗွေႏယေသျု လွေꩻထိုꩻ ဝေင်ꩻယေရုသလမ်ႏနဝ်ꩻသွူ။ 14ဗိမာန်ႏတောႏကျောင်ꩻကိုနဝ်ꩻ ဝွေꩻဗွေႏထီႏလိုꩻဖုံႏ အဝ်ႏစာ ဖိုး၊ သွိုꩻ၊ ဝါးကွူဖုံႏတွမ်ႏ ရွဉ်လုဲင်ႏသားဖုံႏ အဝ်ႏအုံလင်ꩻ ဝွေꩻသီးခွုံႏဖုံႏထျꩻသွူ။ 15နဝ်ꩻမꩻ စွဉ်ႏတဖြွီꩻဖုံႏ ဝွေꩻဗွေႏမာꩻ ခွဉ်းတွဲႏတလီးတဲင် ဝါးထန်ႏထိုꩻ သွိုꩻဖုံႏစွဉ်ႏ ဖိုးဖုံႏ ဗိမာန်ႏတောႏ ကျောင်ꩻ ကောင်းထန်ႏသွူ၊ နွန်ႏဝန်ထိုꩻစွဉ်ႏ ရွဉ်လုဲင်ႏခွုံႏဖုံႏတဲင် မာꩻလီလာထိုꩻစွဉ်ႏ ဝွေꩻသီးရွဉ်ယွဲ ဒင်္ဂါꩻဗီႏဖုံႏနဝ်ꩻသွူ။ 16လိုꩻကစာဒါႏ ဝါးကွူဖုံႏနဝ်ꩻ ဝွေꩻဗွေႏမိန်း၊ “ယိုဖုံႏနဝ်ꩻ ထူႏထန်ႏထိုꩻခန်း ကောင်းထန်ႏဟုဲင်း။ နီဖါလမ်းနဝ်ꩻ တွမ်ႏမာꩻမွိုန်း ဆေꩻခင်ႏလမ်းဟုဲင်း” နုဲင်းနဝ်ꩻသွူ။ 17#သာ ၆၉:၉။ “ခွေကဝုဲင်ႏကိုꩻကွယ်ႏဒါႏ ခွေဖါလမ်းကိုနဝ်ꩻ အွိုးဗွေႏ၊ နုဲင်းစွဉ်ႏမေႏ အဝ်ႏခိုးလျား ခွေအကို” နုဲင်းလိတ်ကျမ်ꩻကရိုꩻနဝ်ꩻ ဝွေꩻဗွေႏ တပဲ့တောႏဖုံႏ ယူႏလꩻချာနဝ်ꩻသွူ။
18စွဉ်ႏငဝ်းရီတစွိုးနဝ်ꩻ ဂျူးအာႏဏာႏပဲင်ႏသားဖုံႏ လွဉ်ထေ့ချာ ဝွေꩻဗွေႏထျꩻ၊ “နာꩻမာꩻထာꩻနုဲင်းယို မဲဉ်ႏဒျာႏကျောင်ꩻနဝ်ꩻ အွဉ်ႏနယ်နွောင်ꩻနီ နိမိတ်လက္ခဏာႏ နုဲင်းမုဲင်ꩻဟောင်း” နုဲင်းနဝ်ꩻသွူ။
19 #
မ ၂၆:၆၁၊ ၂၇:၄၀၊ မာ ၁၄:၅၈၊ ၁၅:၂၉။ ဗွေႏယေသျုလဝ်းချာ၊ “မာꩻပြင်ꩻလင်ꩻထိုꩻ ဗိမာန်ႏတောႏကျောင်ꩻယိုတဲင် သွံနီꩻယံꩻတွင်ꩻ ခွေအီႏတယ်ႏဟဝ်ချာ ဖျင်ယင်း” နုဲင်းနဝ်ꩻသွူ။
20ဝွေꩻသီးရီဝွေꩻဗွေႏ၊ “ဗိမာန်ႏတောႏကျောင်ꩻယိုနဝ်ꩻ တယ်ႏည နေင်ႏပေါင်ꩻ လစ်ꩻဆီသူနေင်ႏပဉ်နဝ်ꩻ သွံနီꩻယံꩻတွင်ꩻ နာꩻအီႏတယ်ႏ ဟဝ်ချာနွောင်ꩻနဲ့ဟောင်း” နုဲင်းနဝ်ꩻသွူ။
21ကွဲႏတွော့ꩻ ဗိမာန်ႏတောႏကျောင်ꩻနဝ်ꩻ ဗွေႏယေသျု မဉ်ရိုꩻဒျာႏ အီႏထွာ ဝွေꩻဗွေႏ နမ်းခန္ဓာႏသွူ။ 22နဝ်ꩻမꩻ ဝွေꩻဗွေႏ အဝ်ႏထာꩻသီကို ထွိုင်ႏမွန်လွဉ်ချာချိန်ႏ ဝွေꩻဗွေႏကဒေါ့ꩻဒါႏ နုဲင်းယိုနဝ်ꩻ ဝွေꩻတပဲ့တောႏဖုံႏ ယူႏလꩻချာတဲင် လိတ်ကျမ်ꩻတွမ်ႏ ဗွေႏယေသျု ကဒေါ့ꩻလဲဉ်း ငဝ်းဖုံႏနဝ်ꩻ ဝွေꩻသီးယွုမ်းစွဉ်ႏသွူ။
ဗွေႏယေသျုအဝ်ႏသေလိုꩻဇာႏတိခရာႏ
23ပွယ်ꩻပတ္တခါကျာꩻနဝ်ꩻ ဗွေႏယေသျုအဝ်ႏသော့ꩻ ဝေင်ꩻယေရုသလမ်ႏကို နုဲင်းဝွေꩻသီး ကထီႏဗာႏလဲဉ်း ဝွေꩻဗွေႏမာꩻနယ် နိမိတ်လက္ခဏာႏဖုံႏနဝ်ꩻ လိုꩻဖုံႏယွုမ်းလွဉ် ဝွေꩻဗွေႏ အာဖြာꩻတန်သွူ။ 24ကွဲႏတွော့ꩻ ဝွေꩻသီး ကားကအဝ်ႏ ခရာႏနဝ်ꩻ ဝွေꩻဗွေႏအဝ်ႏသေ နဝ်ꩻမꩻ ဗွေႏယေသျု နမ်း တယွုမ်းအံႏတဝ်း ဝွေꩻသီးသွူ။ 25ဝွေꩻသီးသꩻကို အဝ်ႏနုဲင်းမုဲင်ꩻနဝ်ꩻ ကွပ်ပွိုး ဝွေꩻဗွေႏနမ်း အဝ်ႏသေနဝ်ꩻမꩻ ဝွေꩻသီးခရာႏနဝ်ꩻ ပါꩻမုဲင်ꩻတဖြာꩻတဲ့ တလိုႏဒေါ့ꩻနယ်တဝ်း ဝွေꩻဗွေႏသွူ။
ទើបបានជ្រើសរើសហើយ៖
ယောဟန် 2: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.