ယောဟန် 3
3
ဗွေႏယေသျုတွမ်ႏနိကောဒေင်
1နဝ်ꩻကို ဂျူးလိုꩻတန် မဉ်ꩻကဟဲ့ꩻ နိကောဒေင် အဝ်ႏတဖြာꩻ၊ ဝွေꩻနဝ်ꩻ အဝ်ႏပါသော့ꩻ ဖါရိသဲစွိုꩻကိုသွူ။ 2တဟာသား ဝွေꩻလွေꩻထေ့ ဗွေႏယေသျုထျꩻတဲင် ဒေါ့ꩻဖေႏဝွေꩻဗွေႏ၊ “ရပ်ဗိ၊ နီဗွေႏနဝ်ꩻထွာ ဗွေႏဘုရာꩻ ကအွဉ်ႏစွꩻလွဉ် ဆရာႏတဖြာꩻနဝ်ꩻ နီအဝ်ႏသေသွူ။ နိမိတ်လက္ခဏာႏ နုဲင်းနီဗွေႏ ကမာꩻဒါႏဖုံႏနဝ်ꩻ ဗွေႏဘုရာꩻ မဉ်ႏတပါငီꩻတဝ်း ဝွေꩻနဝ်ꩻ ပါꩻမုဲင်ꩻတဖြာꩻတဲ့ တမာꩻနယ်နွောင်ꩻတဝ်း” နုဲင်းနဝ်ꩻသွူ။
3ဗွေႏယေသျုလဝ်းချာ၊ “ခွေဒေါ့ꩻဖေႏနာꩻ အမွေးအမဲဉ်ႏ၊ ပေါႏတလွူးလွဉ် ဖျင်ယင်းတဝ်း တလဲင်ႏနဝ်ꩻ ပါꩻမုဲင်ꩻတဖြာꩻတဲ့ တထီႏနွောင်ꩻတဝ်း ဗွေႏဘုရာꩻ ခမ်းထီနဲင်ႏငံႏ” နုဲင်းနဝ်ꩻသွူ။
4နိကောဒေင်ရီ၊ “လိုꩻတဖြာꩻ တန်လွဉ်လဲဉ်းနဝ်ꩻ အီႏမာꩻနုဲင်းမုဲင်ꩻ လွူးလွဉ်ဖျင် တလဲင်ႏဟောင်း။ ဝွေꩻနွို့သော့ꩻချာ ဝွေꩻအမွိုးဟို့ꩻကို တလꩻနွောင်ꩻတဝ်း၊ နဝ်ꩻမ အီႏလွူးလွဉ် ဒုတိယလဲင်ႏ နုဲင်းမုဲင်ꩻ” နုဲင်းနဝ်ꩻသွူ။
5ဗွေႏယေသျုလဝ်းချာ၊ “ခွေဒေါ့ꩻဖေႏနာꩻ အမွေးအမဲဉ်ႏ။ မဉ်ႏ တလွူးတဝ်းတွမ်ႏထီ တွမ်ႏဝိညာဉ်ႏတောႏနဝ်ꩻ ပါꩻမုဲင်ꩻတဖြာꩻတဲ့ တနွို့နွောင်ꩻတဝ်း ဗွေႏဘုရာꩻခမ်းထီ နဲင်ႏငံႏတောႏကိုသွူ။ 6တွမ်ႏမွိုးဖါတွော့ꩻ ကလွူးလွဉ်ဒါႏ လိုꩻတဖြာꩻနဝ်ꩻ ထွာဒျာႏ သွီႏတွမ်ႏယာႏ၊ ကွဲႏတွော့ꩻ မဉ်ႏလွူးလွဉ်ဒျာႏ တွမ်ႏဝိညာဉ်ႏတောႏနဝ်ꩻထွာ ဝိညာဉ်ႏသွူ။ 7သီကားကအဝ်ႏနဝ်ꩻ အီႏလွူးလွဉ် ဗာႏဖျင်ယင်းတလဲင်ႏ၊ ခွေကဒေါ့ꩻဖေႏသီနဝ်ꩻ တွမ်ႏအံႏဖြာႏမွိုန်း။ 8တလီꩻနဝ်ꩻ မဉ်မာꩻလွေꩻမုဲင်ꩻတဲ့ မာꩻဒျာႏ။ သီအဝ်ႏဟွိုန်ဗာႏ တလီꩻမာꩻငဝ်း၊ ကွဲႏတွော့ꩻ အဝ်ႏမုဲင်ꩻကိုမာꩻလွဉ် မဉ်ႏတမွေးတဝ်း အီႏမာꩻလွေꩻမုဲင်ꩻနဝ်ꩻ သီတသေတဝ်းသွူ။ လိုꩻစွုမ်ႏဖြာꩻ ကအီႏလွူးလွဉ်ဒါႏတွမ်ႏ ဝိညာဉ်ႏနဝ်ꩻ ဗွိုန်နုဲင်းနဝ်ꩻ နေနေသွူ။
9နိကောဒေင်ရီ၊ “ထာꩻယိုနဝ်ꩻ အီႏထွာနွောင်ꩻ နုဲင်းမုဲင်ꩻဟောင်း” နုဲင်းနဝ်ꩻသွူ။
10ဗွေႏယေသျု လဝ်းဖြေႏချာ၊ “ဣသရေး လိုꩻမျိုꩻဖုံႏကို နာꩻနဝ်ꩻထွာ ဆရာႏတန် တဖြာꩻတဲင် ထာꩻယိုနဝ်ꩻ နာꩻတလꩻသေ တဝ်းဒွိုန်းဟောင်း။ 11ခွေဒေါ့ꩻဖေႏနာꩻ အမွေးအမဲဉ်ႏ၊ နုဲင်းနီကသေနဝ်ꩻ နီဒေါ့ꩻဒျာႏတွော့ꩻ နုဲင်းနီကထီႏဗာႏလဲဉ်းဖုံႏနဝ်ꩻ အွဉ်ႏဟွိုန်ချာဖေႏ။ ကွဲႏတွော့ꩻ နီငဝ်းသတင်ꩻနဝ်ꩻ သီတဖြာꩻဖြာꩻတဲ့ တမဉ်လက္ခံႏတဝ်းသွူ။ 12ခွေကဒေါ့ꩻနယ်ဖေႏသီ ပွိုင်းဝွို့စွဉ်ႏ ထာꩻကအဝ်ႏ ကမ္ဘာႏလောင်းယို ခရာႏနဝ်ꩻ သီတယွုမ်းတဝ်းခွေ၊ တွိုႏနဝ်ꩻ ခွေမဉ်ႏဒေါ့ꩻနယ်ဖေႏသီ ထာꩻကအဝ်ႏ ခမ်းထီ မို့ꩻလောင်းခရာႏနဝ်ꩻ သီအီႏမာꩻနုဲင်းမုဲင်ꩻ ယွုမ်းနွောင်ꩻခွေဟောင်း။ 13လွိုတဲင် အဝ်ႏခမ်းထီမို့ꩻလောင်း ကကျွꩻလင်ꩻလွဉ်ဒါႏ လိုꩻပိုခိုနဝ်ꩻ ပါꩻမုဲင်ꩻတဖြာꩻတဲ့ ထင်ႏဗာႏဖိုတဝ်း ခမ်းထီမို့ꩻလောင်း” နုဲင်းနဝ်ꩻသွူ။
14 #
ကွ ၂၁:၉။ နုဲင်းမောသျေ ကယွိုင်ႏထင်ႏဒါႏ ရူးတောင်ꩻရွုတ်ထွန်ႏနာ ကန္တာရ ထာꩻခြာကိုအတွိုင်ꩻ ဗွိုန်နုဲင်းနဝ်ꩻနေနေ လိုꩻပိုခိုနဝ်ꩻ အီႏခံႏဗာႏ အယွိုင်ႏထင်ႏနဝ်ꩻသွူ။ 15နဝ်ꩻမꩻ ပါꩻကယွုမ်း ဝွေꩻဗွေႏသား စွုမ်ႏဖြာꩻနဝ်ꩻ အီႏလꩻ ထာဝရအသက်နဝ်ꩻသွူ။ 16ပွိုးဗွေႏဘုရာꩻနဝ်ꩻ ရက်ငါႏ လောကသားဖုံႏ နဝ်ꩻမꩻ ဝွေꩻဗွေႏစွဉ်ꩻဖေႏ ဝွေꩻဗွေႏပိုခိုတောႏ ကအဝ်ႏတပါꩻလွုမ်ꩻနဝ်ꩻသွူ။ နဝ်ꩻမꩻ ပါꩻကယွုမ်းဒါႏ ဝွေꩻဗွေႏသား စွုမ်ႏဖြာꩻနဝ်ꩻ အီႏတသီဗာႏတဝ်း အီႏလꩻထာဝရ အသက်မွန်သွူ။ 17ပွိုးဗွေႏဘုရာꩻ ကအွဉ်ႏစွꩻလွဉ် ပိုခိုတောႏ ကမ္ဘာႏလောကကိုနဝ်ꩻ အီႏစီႏရင်ႏတာႏ တမွေးတဝ်း၊ ကွဲႏတွော့ꩻ အီႏကယ်ႏဒျာႏသွူ။
18ပါꩻမုဲင်ꩻယွုမ်း ပိုခိုတောႏနဝ်ꩻ အီႏတခံႏဗာႏတဝ်း ထာꩻစီႏရင်ႏ၊ ကွဲႏတွော့ꩻ ပါꩻတယွုမ်းတဝ်းနဝ်ꩻ ပွိုးဝွေꩻတယွုမ်းတဝ်း ဗွေႏဘုရာꩻ ပိုခိုတောႏ အဝ်ႏတပါꩻလွုမ်ꩻအတွက် ယိုခါကာႏ ခံႏဗာႏ ထာꩻစီႏရင်ႏသွူ။ 19ထာꩻစီႏရင်ႏ ထာꩻမာꩻနဝ်ꩻ ထွာနုဲင်းယိုသွူ။ ထာꩻလေနဝ်ꩻ ကျွꩻလွဉ်လဲဉ်း လောကကိုစွဉ်ႏတဲ့ ကွပ်ပွိုး ဝွေꩻသီးအဝ်ႏမာꩻဒျာႏ ထာꩻကုဲင်အတွက် လိုꩻဖုံႏ ကကျွိုက်နစ်သက် ထာꩻခေ့ꩻနဝ်ꩻ လွိုကယ်ꩻက ထာꩻလေသွူ။ 20လိုꩻကမာꩻဒါႏ ထာꩻကုဲင်သားဖုံႏနဝ်ꩻ လွꩻထီႏထာꩻလေ၊ ပွိုးတွော့ꩻ ဝွေꩻသီးကမာꩻဒါႏ ထာꩻကုဲင်ဖုံႏနဝ်ꩻ တမဉ်အွဉ်ႏပေါႏနယ်တဝ်း နဝ်ꩻမꩻ အီႏတလွဉ်တဝ်း ထာꩻလေထျꩻသွူ။ 21ကွဲႏတွော့ꩻ ပါꩻကမာꩻဒါႏ နုဲင်းထာꩻအမဲဉ်ႏသားဖုံႏနဝ်ꩻ နုဲင်းဝွေꩻသီး ကမာꩻဒါႏဖုံႏနဝ်ꩻ မာꩻလွဉ်ꩻဒျာႏ ဗွေႏဘုရာꩻ အလိုႏတောႏကျောင်ꩻ ဖေႏကထင်ႏသျာꩻနဝ်ꩻ လွဉ်ဒျာႏ ထာꩻလေထျꩻသွူ။
ဗွေႏယေသျုတွမ်ႏယောဟန်
22နဝ်ꩻထွူ ဗွေႏယေသျုတွမ်ႏ ဝွေꩻဗွေႏ တပဲ့တောႏဖုံႏ လွေꩻယုဒနယ်ႏကို၊ နဝ်ꩻကိုနဝ်ꩻ ယလဲင်ႏလဲင်ႏ ဝွေꩻဗွေႏ အဝ်ႏငီꩻတွမ်ႏ ဝွေꩻသီးတဲင် ဖေႏဗတ္တိဇံႏ ထီမင်္ဂလာႏသွူ။ 23တပေါ့ꩻညာꩻတဝ်းစွဉ်ႏ ဝေင်ꩻသျာလိမ် ဧနွန်အရပ်နဝ်ꩻ ပွိုးတွော့ꩻ ခင်ႏလမ်းနဝ်ꩻကို ထီပြန်ꩻပြော်ꩻငါႏ နဝ်ꩻမꩻ ယောဟန်နဝ်ꩻတဲ့ အဝ်ႏဖေႏ ဗတ္တိဇံႏ ထီမင်္ဂလာႏသွူ။ လိုꩻဖုံႏအဝ်ႏလွေꩻထေ့ ဝွေꩻထျꩻတဲင် ဝွေꩻအဝ်ႏဖေႏဝွေꩻသီး ဗတ္တိဇံႏ ထီမင်္ဂလာႏသွူ။ 24#မ ၁၄:၃၊ မာ ၆:၁၇၊ လု ၃:၁၉၊၂၀။(ယိုနဝ်ꩻထွာ ခလားယောဟန် ကထဲ့သော့ꩻ ထောင်ႏကိုနဝ်ꩻသွူ။)
25ပွိုင်းဝွို့တွမ်ႏ ပသေကြောင်းစင်ဒါႏ ကိစ္စခရာႏနဝ်ꩻ ယောဟန်တပဲ့ဖုံႏ ယင်ဟန်ႏ အဝ်ႏထေင်ငဝ်းအာ စလို့ဝင်ꩻ စွဉ်ႏဂျူးလိုꩻမျိုꩻ တဖြာꩻသွူ။ 26နဝ်ꩻမꩻ ဝွေꩻသီးလွေꩻထေ့ ယောဟန်ထျꩻတဲင် ဒေါ့ꩻဖေႏဝွေꩻ၊ “ဆရာႏ၊ ပါꩻခိုကအဝ်ႏငီꩻဒါႏစွဉ်ႏနာꩻ ယော်ဒန် ထီခြောင်တန် ဝတ်ကွဉ်ႏ အဖြာꩻနာꩻကအဝ်ႏဒေါ့ꩻဒါႏ အခရာႏနဝ်ꩻ နာꩻတောင်ꩻချာနေဟောင်း။ မွေးသွူ၊ ယိုခါ ဝွေꩻအဝ်ႏဖေႏ ဗတ္တိဇံႏ ထီမင်္ဂလာႏတဲင် လိုꩻစွုမ်ႏဖြာꩻ အဝ်ႏလွေꩻထေ့ ဝွေꩻထျꩻဖုံႏ” နုဲင်းနဝ်ꩻသွူ။
27ယောဟန်လဝ်းချာ၊ “ဗွေႏဘုရာꩻ မဉ်ႏတအပ်ဖေႏတဝ်းနဝ်ꩻ ပါꩻမုဲင်ꩻတဖြာꩻတဲ့ တမာꩻနွောင်ꩻတဝ်း တစွိုးစွိုးသွူ။ 28#ယော ၁:၂၀။ နုဲင်းခွေကဒေါ့ꩻဒါႏ၊ ‘ခွေနဝ်ꩻ မေသျိယ တမွေးတဝ်း၊ ကွဲႏတွော့ꩻ ခွေနဝ်ꩻ ခံႏဗာႏ အွဉ်ႏစွꩻလွဉ် ရီးဒျာႏ ဝွေꩻဗွေႏ၊’ နုဲင်းနဝ်ꩻနဝ်ꩻ သီနမ်းဖုံႏ ထွာခွေသက်သေႏသွူ။ 29အဖြာꩻ ကအီႏတောႏလမ်းဒါႏ ခွန်မောင်ႏနဝ်ꩻ ဆဲင်ႏဒျာႏ နင်ꩻမူႏသွူ။ ကွဲႏတွော့ꩻ ခွန်မောင်ႏသွꩻ ကအဝ်ႏအုံထွိုင်ႏထာꩻ အထျꩻတဲင် အဝ်ႏနာႏထာꩻတွော့ꩻ ဝွေꩻထွိုင်ႏဟွိုန် ခွန်မောင်ႏငဝ်းချိန်ႏနဝ်ꩻ သꩻဟဝ်သꩻရေꩻငါႏသွူ။ ခွေနမ်းယိုတဲ့ ထာꩻသꩻပျော်ꩻ အီႏဗွေစွုံႏလင်ႏ နုဲင်းယိုသွူ။ 30ဝွေꩻဗွေႏနဝ်ꩻ အီႏတိုꩻတက် ထင်ႏထိုဗာႏတဲင် ခွေနဝ်ꩻ အီႏဆေ့ꩻယွမ်ꩻ ထိုꩻဗာႏသွူ။
အဝ်ႏခမ်းထီမို့ꩻလောင်းကကျွꩻလွဉ်ဒါႏဝွေꩻဗွေႏ
31အဝ်ႏအွိုးကီ ကကျွꩻလင်ꩻလွဉ်ဒါႏ ဝွေꩻဗွေႏနဝ်ꩻ တန်မျတ်လွိုလဲဉ်း ကားကအဝ်ႏသွူ။ ကအဝ်ႏဒါႏ ဟံႏတန်လောင်းလွဉ်နဝ်ꩻ ဆဲင်ႏဒျာႏ ဟံႏတန်တဲင် ဒေါ့ꩻဒျာႏ ဟံႏတန်ခရာႏသွူ။ ကွဲႏတွော့ꩻ ဗွေႏကအဝ်ႏဒါႏ ခမ်းထီမို့ꩻလောင်း ကျွꩻလွဉ်နဝ်ꩻ မျတ်လွိုလဲဉ်း ကားကအဝ်ႏသွူ။ 32နုဲင်းဝွေꩻဗွေႏ ကထီႏဗာႏတွမ်ႏ ကဟွိုန်ဒါႏဖုံႏနဝ်ꩻ ဝွေꩻဗွေႏ ဒေါ့ꩻနယ်ဖေႏလဲဉ်း၊ ကွဲႏတွော့ꩻ ပါꩻမုဲင်ꩻတဲ့ တလက္ခံႏတဝ်း ဝွေꩻဗွေႏတရာꩻငဝ်းသွူ။ 33ကွဲႏတွော့ꩻ ပါꩻမုဲင်ꩻလက္ခံႏ ဝွေꩻဗွေႏ တရာꩻငဝ်းနဝ်ꩻ ဝွန်ႏခံႏဒျာႏ ဗွေႏဘုရာꩻနဝ်ꩻထွာ သစ္စာႏတရာꩻအဗွေႏသွူ။ 34ပါꩻအဖြာꩻ ဗွေႏဘုရာꩻ ကအွဉ်ႏစွꩻလွဉ်နဝ်ꩻ ကွပ်ပွိုး ဗွေႏဘုရာꩻဖေႏဝွေꩻ အဝ်ႏဗွေစွဉ်ႏ ဝွေꩻဗွေႏ ဝိညာဉ်ႏတောႏနဝ်ꩻမꩻ ဒေါ့ꩻဒျာႏ ဗွေႏဘုရာꩻ ငဝ်းတောႏသွူ။ 35#မ ၁၁:၂၇၊ လု ၁၀:၂၂။ ဖါတောႏနဝ်ꩻ ရက်ဝွေꩻဗွေႏ ပိုခိုတောႏတဲင် ထာꩻဖုံႏကားကအဝ်ႏနဝ်ꩻ အပ်ဖေႏလို့လဲဉ်း ဝွေꩻဗွေႏစူကိုသွူ။ 36ပါꩻမုဲင်ꩻယွုမ်း ပိုခိုတောႏနဝ်ꩻ လꩻထာဝရအသက်သွူ၊ ပါꩻမုဲင်ꩻ လွောက်ꩻနာႏတဝ်း ပိုခိုတောႏနဝ်ꩻ အီႏတလꩻတဝ်း အသက်၊ ကွဲႏတွော့ꩻ အီႏအဝ်ႏစွူစွူဗာႏဒျာႏ ဗွေႏဘုရာꩻ အပဲစ်တံႏ ထာꩻစီႏရင်ႏ ဆꩻလနဝ်ꩻသွူ။
ទើបបានជ្រើសរើសហើយ៖
ယောဟန် 3: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.