ယောဟန် 4

1ဗွေႏယေသျုဖေႏ အတပဲ့တောႏဖုံႏ ဗတ္တိဇံႏ ထီမင်္ဂလာႏနဝ်ꩻ အာလွိုကယ်ꩻက ယောဟန်ကျောင်ꩻ ဖါရိသဲဖုံႏဟွိုန်သွူ။ 2(အမဲဉ်ႏနဝ်ꩻ ဗွေႏယေသျုနမ်း တဖေႏတဝ်း ဗတ္တိဇံႏ ထီမင်္ဂလာႏ တဖြာꩻဖြာꩻ ဝွေꩻဗွေႏ တပဲ့တောႏဖုံႏလွုမ်ꩻ ဖေႏဒျာႏသွူ။) 3နဝ်ꩻမꩻ ကဒေါ့ꩻဒါႏ နုဲင်းနဝ်ꩻချိန်ႏ ဗွေႏယေသျု ထွိုင်ႏဟွိုန်နဝ်ꩻ ဝွေꩻဗွေႏအဝ်ႏ ယုဒခမ်းထန်ႏတဲင် သဲင်ꩻချာထိုꩻ ကာလိလဲခမ်းနဝ်ꩻသွူ။ 4နဝ်ꩻကို ဝွေꩻဗွေႏ ကလွေꩻတဖူꩻနဝ်ꩻ ဝွေꩻဗွေႏဖျတ် ကာႏ သျာမရိခမ်းဖဲ့ꩻသွူ။

5 # ကမ္ဘာႏ ၃၃:၁၉၊ ယောသျု ၂၄:၃၂။ သျာမရိခမ်းကိုနဝ်ꩻ ဝွေꩻဗွေႏနွို့လွဉ်သော့ꩻ ဝေင်ꩻတဖြုံႏ မဉ်ꩻကဟဲ့ꩻဒါႏ သျုခါ တပေါ့ꩻညာꩻတဝ်း ယာကုပ် ကဖေႏဒါႏ အပိုခိုယောသပ် ခြံနဝ်ꩻသွူ။ 6ယာကုပ်ထီအုံႏနဝ်ꩻ အဝ်ႏနဝ်ꩻကိုတဲင် ဗွေႏယေသျု ထန်ႏတဖူꩻ ရွိုးငါႏနဝ်ꩻမꩻ အုံလင်ꩻ ထီအုံႏထျꩻသွူ။ အချိန်ႏနဝ်ꩻနဝ်ꩻထွာ မွူးယာခိုႏရပ်သွူ။

7သျာမရိ မူႏတဖြာꩻနဝ်ꩻ အီႏလွဉ်တွောင်ထီတဲင် ဗွေႏယေသျု ဒေါ့ꩻဖေႏဝွေꩻမူႏ၊ “ဖေႏအွꩻဗဲင်း ခွေထီမွိုင်” နုဲင်းနဝ်ꩻသွူ။ 8(ဝွေꩻဗွေႏ တပဲ့တောႏဖုံႏ အီႏဖြေꩻထာꩻအံႏနဝ်ꩻ နွို့လွေꩻသော့ꩻ ဝေင်ꩻကိုဖုံႏသွူ။)

9 # ဧဇ ၄:၁–၅၊ နေ ၄:၁၊ ၂။ ပါꩻမူႏလဝ်းချာ၊ “နာꩻနဝ်ꩻထွာ ယုဒလိုꩻဖုံႏ တဖြာꩻတဲင် ခွေနဝ်ꩻထွာ သျာမရိ လိုꩻမျိုꩻတဖြာꩻဒျာႏသွူ။ နဝ်ꩻမꩻ ကအီႏအွꩻထီတာႏနဝ်ꩻ နာꩻကွီဗာႏတွိုႏခွေ နုဲင်းမုဲင်ꩻဟောင်း” နုဲင်းနဝ်ꩻသွူ။ ( နုဲင်းသျာမရိ လိုꩻမျိုꩻဖုံႏ ကသွုံꩻဒါႏ တကောက်ꩻတွမ်ႏ ဝန်ႏဖုံႏနဝ်ꩻ ဂျူးလိုꩻမျိုꩻဖုံႏ အီႏတသွုံꩻအီတဝ်းသွူ။)

10ဗွေႏယေသျု လဝ်းချာ၊ “ဗွေႏဘုရာꩻ ကဖေႏဒါႏ ဆုကေꩻဇူꩻတွမ်ႏ ပါꩻကကွီ နာꩻထီအွꩻ ထွာပါꩻမုဲင်ꩻ နာꩻမဉ်ႏသေငါꩻနဝ်ꩻ နာꩻအီႏကွီဝွေꩻတဲင် ဝွေꩻအီႏဖေႏနာꩻ အသက်မွန်ထီ” နုဲင်းနဝ်ꩻသွူ။

11ပါꩻမူႏဒေါ့ꩻ၊ “ဗွေႏ၊ ဆရာႏ နီဗွေႏနဝ်ꩻ ထီဗွုံꩻတဲ့အဲဉ်ထဝ်း ထီအုံႏနဝ်ꩻ ယော့တန်သွူ။ နီဗွေႏအီႏထူႏ အသက်မွန်ထီ မုဲင်ꩻကိုဟောင်း။ 12ထီအုံႏယိုနဝ်ꩻ နီဖါဖြားယာကုပ် ဖေႏသေꩻခါꩻဒျာႏနီသွူ။ ဝွေꩻတွမ်ႏ ဝွေꩻပိုဖုံႏစွဉ်ႏ ဝွေꩻထာꩻသောင်ꩻထာꩻသားဖုံႏ ကားကအဝ်ႏနဝ်ꩻ အွꩻဗာႏထီ၊ ထီအုံႏယိုသွူ။ နီဗွေႏရိုꩻ နီဗွေႏနဝ်ꩻ တန်မျတ်ကယ်ꩻက ယာကုပ်နဲ့ဟောင်း” နုဲင်းနဝ်ꩻသွူ။

13ဗွေႏယေသျုလဝ်းချာ၊ “လိုꩻကအွꩻဒါႏ ထီယိုနဝ်ꩻ အီႏဟို့ꩻခိုးဗာႏဖျင် က။ 14ကွဲႏတွော့ꩻ လိုꩻကအွꩻဗာႏ ခွေကဖေႏဒါႏ ဝွေꩻသီးထီနဝ်ꩻ မုဲင်ꩻခါတဲ့ အီႏတဟို့ꩻခိုႏ ဗာႏဖျင်တဝ်းဒွုမ်သွူ။ ခွေကဖေႏဒါႏ ဝွေꩻသီးထီနဝ်ꩻ အီႏထွာလွဉ် ဝွေꩻသီးအကို ထီထန်ႏခြောင်တလီး အီႏဖေႏဝွေꩻသီး အသက်မွန်ထီတွော့ꩻ ဖေႏဝွေꩻသီး ထာဝရအသက်” နုဲင်းနဝ်ꩻသွူ။

15ပါꩻမူႏဒေါ့ꩻ၊ “ဗွေႏ၊ ပေါ့ꩻနုဲင်းနဝ်ꩻ မုဲင်ꩻခါတဲ့ ခွေသွဉ်းမူႏ ဖေႏကဟို့ꩻခိုး ဖျင်မွိုန်းဒွုမ်ထီတဲ့နဝ်ꩻ ဖေႏခွေသွဉ်းမူႏ ကလွဉ်တွောင် ဗာႏမွိုန်းဒွုမ်ထီ ယိုကိုတဲ့နဝ်ꩻ ဖေႏခွေသွဉ်းမူႏ ထီနဝ်ꩻမွိုင်၊” နုဲင်းနဝ်ꩻသွူ။

16ဗွေႏယေသျု ဒေါ့ꩻဖေႏပါꩻမူႏ၊ “လွေꩻတဲင် ဟဲ့ꩻနာꩻဝါꩻတွော့ꩻ သဲင်ꩻလွဉ်ချာဟုဲင်း”နုဲင်းနဝ်ꩻသွူ။

17ဝွေꩻမူႏလဝ်းချာ၊ ခွေသွဉ်းမူႏ ဝါꩻတဖြာꩻဖြာꩻတဲ့ အဲဉ်ထဝ်း” နုဲင်းနဝ်ꩻသွူ။

ဗွေႏယေသျုဒေါ့ꩻချာ၊ “နာꩻကရိုꩻဒါႏ နာꩻဝါꩻတဖြာꩻဖြာꩻ အဲဉ်ထဝ်းနဝ်ꩻ မွေး။ 18နာꩻနဝ်ꩻ တောႏလမ်းလဲဉ်း လိုꩻခိုဝင်ꩻငတ်ꩻတဲင် ပါꩻခို နာꩻကအဝ်ႏအုံငီꩻ ယိုခါနဝ်ꩻ နာꩻဝါꩻတမွေးတဝ်း။ အမဲဉ်ႏတရာꩻအတွိုင်ꩻ နာꩻဒေါ့ꩻဖေႏလဲဉ်းခွေ” နုဲင်းနဝ်ꩻသွူ။

19ဝွေꩻမူႏဒေါ့ꩻ၊ “ခွေထီႏ နီဗွေႏနဝ်ꩻထွာ ပရောဖဲစ်တပါꩻကျောင်ꩻ ခွေသေလဲဉ်း။ 20ခွေသွဉ်း သျာမရိလိုꩻမျိုꩻ အမွိုးဖြား ဖါဖြားသီးဖုံႏနဝ်ꩻ ဝုဲင်ႏကိုꩻကွယ်ႏဒျာႏ ဗွေႏဘုရာꩻ ကောင်ယိုလောင်း။ ကွဲႏတွော့ꩻ သီဂျူးလိုꩻမျိုꩻဖုံႏနဝ်ꩻရိုꩻ နီအဝ်ႏလိုႏဝုဲင်ႏ ကိုꩻကွယ်ႏဒျာႏ ဗွေႏဘုရာꩻ ခင်ႏလမ်း ဝေင်ꩻယေရုသလမ်ႏကိုလွုမ်ꩻ” နုဲင်းနဝ်ꩻသွူ။

21ဗွေႏယေသျု ဒေါ့ꩻဖေႏဝွေꩻမူႏ၊ “ပါꩻမူႏ၊ ယွုမ်းသွော့ခွေဟုဲင်း။ ကောင်တန် ယိုလောင်းတဲ့နဝ်ꩻ ဝေင်ꩻယေရုသလမ်ႏကို တဲ့နဝ်ꩻ လိုꩻဖုံႏ အီႏတဝုဲင်ႏ ကိုꩻကွယ်ႏတဝ်းဒွုမ် ဖါဗွေႏနဝ်ꩻ အချိန်ႏ အီႏတွိုႏလွဉ်နဝ်ꩻသွူ။ 22သီသျာမရိလိုꩻမျိုꩻဖုံႏ ဝုဲင်ႏကိုꩻကွယ်ႏ ပါꩻမုဲင်ꩻနဝ်ꩻ သီတသေစဲင်းတဝ်းသွူ။ ကွဲႏတွော့ꩻ နီဂျူးလိုꩻမျိုꩻဖုံႏ၊ ဝုဲင်ႏကိုꩻကွယ်ႏ ပါꩻမုဲင်ꩻနဝ်ꩻ နီအဝ်ႏသေသွူ။ ပွိုးတွော့ꩻ ထာꩻကယ်ႏတင်ႏနဝ်ꩻ အဝ်ႏဒျာႏ ဂျူးလိုꩻမျိုꩻဖုံႏထျꩻ လွဉ်သွူ။ 23ကွဲႏတွော့ꩻ နုဲင်းဖါတောႏ ကထွာ အစဲစ်အမဲဉ်ႏအတွိုင်ꩻ စွဉ်ႏဗွေႏဘုရာꩻ ဝိညာဉ်ႏတန်ꩻခိုꩻနဝ်ꩻ လိုꩻဖုံႏ အီႏဝုဲင်ႏကိုꩻကွယ်ႏဗာႏ ဝွေꩻဗွေႏ၊ ဝွေꩻဗွေႏ ကမဉ်လꩻဒါႏ ထာꩻလူႏပူႏဇောႏ ဝုဲင်ႏကိုꩻကွယ်ႏ အစဲစ်မဲဉ်ႏ ချိန်ႏနဝ်ꩻ အီႏဖျော်လွဉ်တဲင် ဖျော်လွဉ်လဲဉ်း ယိုကိုသွူ။ 24ဗွေႏဘုရာꩻနဝ်ꩻထွာ ဝိညာဉ်ႏတောႏတဲင် နုဲင်းဝွေꩻဗွေႏကထွာ အစဲစ်မဲဉ်ႏအတွိုင်ꩻ စွဉ်ႏဝွေꩻဗွေႏ ဝိညာဉ်ႏတောႏ တန်ꩻခိုꩻလွုမ်ꩻ လိုꩻဖုံႏနဝ်ꩻ ဝုဲင်ႏကိုꩻကွယ်ႏနွောင်ꩻ ဝွေꩻဗွေႏသွူ။

25ဝွေꩻမူႏဒေါ့ꩻဖေႏ ဝွေꩻဗွေႏ၊ “မေသျိယ အီႏကျွꩻလွဉ်တဲင် ဝွေꩻဗွေႏ ထွိုင်ႏကျွꩻလွဉ်ချိန်ႏနဝ်ꩻ ဝွေꩻဗွေႏ အီႏဒေါ့ꩻနယ်ဖေႏနီ ကားကအဝ်ႏနဝ်ꩻ ခွေသွဉ်းမူႏ အဝ်ႏသေ” နုဲင်းနဝ်ꩻသွူ။

26ဗွေႏယေသျုလဝ်းချာ၊ “ဝွေꩻဗွေႏနဝ်ꩻထွာဒျာႏ နာꩻကအဝ်ႏဒေါ့ꩻရီဒါႏ ခွေယိုသွူ” နုဲင်းနဝ်ꩻသွူ။

27အချိန်ႏနဝ်ꩻ တဆင်ႏပေႏတွင်ꩻ ဗွေႏယေသျု တပဲ့တောႏဖုံႏ ဖျော်သဲင်ꩻလွဉ်ချာတဲင် ထီႏဝွေꩻဗွေႏ အဝ်ႏဒေါ့ꩻရီစွဉ်ႏ ပါꩻမူႏတဖြာꩻနဝ်ꩻတွော့ꩻ ဝွေꩻသီး အံႏဖြာႏ မွေးနေးစွဉ်ႏသွူ။ ကွဲႏတွော့ꩻ၊ “နာꩻအဝ်ႏလိုႏ တမုဲင်ꩻဟောင်း”နဝ်ꩻ ဝွေꩻသီးကို တဖြာꩻဖြာꩻတဲ့ တဒေါ့ꩻဗွိုန်ႏတဝ်း ပါꩻမူႏ၊ မဉ်ႏတမွေးတဝ်း ၊ “ပွိုးတမုဲင်ꩻ နီဗွေႏ ဒေါ့ꩻရီဗာႏတွိုႏ ပါꩻမူႏနဝ်ꩻဟောင်း” နုဲင်းနဝ်ꩻနဝ်ꩻ တရီဗွိုန်ႏတဝ်း ဝွေꩻဗွေႏသွူ။

28နဝ်ꩻထွူ ပါꩻမူႏအွဉ်ႏကုဲင် အထီဖွိုင်ꩻတွော့ꩻ သဲင်ꩻချာဝေင်ꩻတဲင် ဒေါ့ꩻနယ်ဖေႏစွဉ်ႏ လိုꩻဖုံႏနဝ်ꩻကို၊ 29ခွေကမာꩻလဲဉ်းဒါႏဖုံႏ ကဒေါ့ꩻနယ်ချာလို့ဒါႏခွေ ပါꩻခိုနဝ်ꩻနဝ်ꩻ လွဉ်ထွားသွော့။ ဝွေꩻနဝ်ꩻ အီႏထွာနွောင်ꩻ မေးသျိယဟောင်း” နုဲင်းနဝ်ꩻသွူ။ 30နဝ်ꩻမꩻ ဝွေꩻသီးအဝ်ႏဝေင်ꩻကို ထန်ႏလွေꩻစွဉ်ႏ ဗွေႏယေသျုထျꩻသွူ။

31အတွင်ꩻနဝ်ꩻ တပဲ့တောႏဖုံႏ အဝ်ႏတောင်ꩻပြန်ႏ ဗွေႏယေသျု၊ “ဆရာႏ၊ အံႏခန်းထာꩻအံႏ တစွိုးစွိုးဟုဲင်း” နုဲင်းနဝ်ꩻသွူ။

32ကွဲႏတွော့ꩻ ဝွေꩻဗွေႏလဝ်းချာ၊ “သီတသေတဝ်း ထာꩻအံႏခရာႏနဝ်ꩻ ခွေအံႏလဲဉ်း” နုဲင်းနဝ်ꩻသွူ။

33နဝ်ꩻမꩻ တပဲ့တောႏဖုံႏ ရီချာလို့ဝင်ꩻ၊ “ပါꩻတဖြာꩻဖြာꩻ အီလွဉ်ဖေႏလဲဉ်း ဝွေꩻဗွေႏ ထာꩻအံႏဟောင်း” နုဲင်းနဝ်ꩻသွူ။

34ဗွေႏယေသျု ဒေါ့ꩻဖေႏဝွေꩻသီး၊ “ခွေထာꩻအံႏနဝ်ꩻ ထွာဒျာႏ လွောက်ꩻနာႏ ဗွေႏအပါ ကအွဉ်ႏစွꩻလွဉ်ခွေတဲင် မာꩻထွူထဲ့ဖေႏဗာႏ ဝွေꩻဗွေႏ ကဖေႏဒါႏခွေ အမုတောႏ ထာꩻမာꩻဒျာႏသွူ။ 35သီရိုꩻဒါႏ ‘ထဲင်းယင်း လစ်ꩻလာထွူနဝ်ꩻ အချိန်ႏရဲ့သိမ်ꩻဗွူတွိုႏ’ နုဲင်းနဝ်ꩻသွူ။ ကွဲႏတွော့ꩻ ခွေဒေါ့ꩻဖေႏသီ၊ ထွားလင်ꩻစဲင်းစဲင်း လုဲင်းတုံးသူꩻဟုဲင်း။ ယိုခါ ဗွူမဉ် တသီးလဲဉ်းတဲင် အဝ်ႏလိုႏရဲ့ငါႏလဲဉ်း။ 36ပါꩻအဖြာꩻ ကရဲ့သိမ်ꩻသားနဝ်ꩻ လꩻအခတဲင် စုသိမ်ꩻ ထာဝရအသက်ရာႏဖုံႏသွူ။ နဝ်ꩻမꩻ ပါꩻအဖြာꩻ ကဆို့ꩻ အမွူးသားတွမ်ႏ ပါꩻအဖြာꩻ ကရဲ့သိမ်ꩻသားဖုံႏနဝ်ꩻ အီႏသꩻဟဝ်သꩻရေꩻ ငီꩻဗာႏလို့ဝင်ꩻနဝ်ꩻသွူ။။ 37‘ပါꩻတဖြာꩻနဝ်ꩻဆို့ꩻ၊ အလင်တဖြာꩻနဝ်ꩻရဲ့ ’ ကအဝ်ႏရိုꩻဒါႏ ငဝ်းနဝ်ꩻမဲဉ်ႏသွူ။ 38သီတဆို့ꩻမာꩻတဝ်း ခင်ႏလမ်း ဖေႏကရဲ့သိမ်ꩻလုဲင်းနဝ်ꩻ ခွေအွဉ်ႏစွꩻလွေꩻသီ။ လိုꩻလင်ဖုံႏ ကဆို့ꩻမာꩻဒါႏခင်ႏလမ်း ဝွေꩻသီး အထာꩻမာꩻကိုနဝ်ꩻ သီလꩻအကျိုꩻ” နုဲင်းနဝ်ꩻသွူ။

39“ခွေကမာꩻလဲဉ်းဒါႏဖုံႏ ကားကအဝ်ႏနဝ်ꩻ ဝွေꩻဗွေႏ ဒေါ့ꩻနယ်ချာလဲဉ်းခွေ” ကွပ်ပွိုး ပါꩻမူႏနဝ်ꩻ အွဉ်ႏဒေါ့ꩻနုဲင်းနဝ်ꩻမꩻ၊ သျာမရိလိုꩻမျိုꩻဖုံႏ ဝေင်ꩻကို ယွုမ်းဗွေႏယေသျုနဝ်ꩻ အာငါႏသွူ။ 40နဝ်ꩻမꩻ သျာမရိလိုꩻမျိုꩻဖုံႏ ထွိုင်ႏလွဉ်ထေ့ ဝွေꩻဗွေႏထျꩻချိန်ႏ ဝွေꩻဗွေႏ ဖေႏကအုံငီꩻ စွဉ်ႏဝွေꩻသီးနဝ်ꩻ ဝွေꩻသီး တောင်ꩻပြန်ႏတဲင် ဗွေႏယေသျု အုံစွဉ်ႏနဝ်ꩻကို နီနီꩻသွူ။

41ပွိုးဝွေꩻဗွေႏတရာꩻနဝ်ꩻမꩻ ယွုမ်းဝွေꩻဗွေႏသားနဝ်ꩻ ယိန်းအာလွဉ်တဲင်၊ 42ဝွေꩻသီးဒေါ့ꩻဖေႏ ပါꩻမူႏ၊ “ယိုခါ နီကယွုမ်းဗာႏနဝ်ꩻ ကွပ်ပွိုး နာꩻဒေါ့ꩻတွော့ꩻ ယွုမ်းတမွေးတဝ်း၊ ကွပ်ပွိုး နီနမ်းဟွိုန်ဗာႏ ဝွေꩻဗွေႏငဝ်းတဲင် ဝွေꩻဗွေႏနဝ်ꩻထွာ လောကသား ထာꩻကယ်ႏတင်ႏဗွေႏ အမွေးနဝ်ꩻ နီသေဗာႏ” နုဲင်းနဝ်ꩻသွူ။

43အုံနဝ်ꩻကိုနီနီꩻထွူ ဗွေႏယေသျုထန်ႏတဲင် လွေꩻထိုꩻ ကာလိလဲခမ်းသွူ။ 44#မ ၁၃:၅၇၊ မာ ၆:၄၊ လု ၄:၂၄။ ပွိုးဝွေꩻဗွေႏနမ်း ဒေါ့ꩻလဲဉ်း၊ “ပရောဖဲစ်ဖုံႏနဝ်ꩻ ဝွေꩻသီးအခမ်းကို ဝင်ꩻတရိုႏသေႏတဝ်း” နုဲင်းနဝ်ꩻသွူ။ 45#ယော ၂:၂၃။ ဝွေꩻဗွေႏ ထွိုင်ႏဖျော်လွဉ်သော့ꩻ ကာလိလဲခမ်းကိုချိန်ႏ ပွိုးတွော့ꩻ ဝွေꩻသီး ကအဝ်ႏဖျော်လွဉ်သော့ꩻ ပွယ်ꩻပတ္တခါ ဝေင်ꩻယေရုသလမ်ႏကိုတွော့ꩻ ပွယ်ꩻကျာꩻဝွေꩻဗွေႏ ကမာꩻလဲဉ်းဒါႏဖုံႏ ကားကအဝ်ႏနဝ်ꩻ ဝွေꩻသီး ထီႏဗာႏလို့လဲဉ်း အတွက် လိုꩻနဝ်ꩻကိုဖုံႏ ကျိုႏဆွုမ်ႏဝွေꩻဗွေႏသွူ။

46 # ယော ၂:၁–၁၁။ နဝ်ꩻထွူ ဗွေႏယေသျု သဲင်ꩻလွဉ်ချာ ကာလိလဲခမ်း၊ ဝေင်ꩻကာနကို၊ နဝ်ꩻကို အဝ်ႏထီ ဝွေꩻဗွေႏ မာꩻထွာခွိုန်ꩻထိုꩻဒါႏ ဝုဲင်ခင်ႏလမ်းနဝ်ꩻသွူ။ နဝ်ꩻကို အစိုႏရ အာႏဏာႏပဲင်ႏသား တဖြာꩻ ပိုခိုနဝ်ꩻ အဝ်ႏဆော့ဆာထာꩻ ဝေင်ꩻကပေရနောင်ကိုသွူ။ 47ဗွေႏယေသျု အဝ်ႏယုဒခမ်း ကျွꩻလွဉ် ကာလိလဲခမ်း ဝွေꩻထွိုင်ႏဟွိုန်နဝ်ꩻ ဝွေꩻလွေꩻထေ့ ဝွေꩻဗွေႏထျꩻတဲင် ဖေႏကကျွꩻလွေꩻ ဝေင်ꩻကပေရနောင်ကို ဖေႏကလုမ်ꩻလာꩻ မာꩻဟဝ်ဖေႏ ဝွေꩻပိုခို ကအီႏဗော့ꩻသီထိုꩻသွူနဝ်ꩻ တောင်ꩻပြန်ႏ ဝွေꩻဗွေႏသွူ။ 48ဗွေႏယေသျု ဒေါ့ꩻဖေႏဝွေꩻ၊ “ပေါ့ꩻသီတထီႏဗာႏတဝ်း နိမိတ်လက္ခဏာႏဖုံႏတွမ်ႏ ထာꩻအံႏဖြာႏခရာႏဖုံႏနဝ်ꩻ သီကိုတဖြာꩻတဲ့ တယွုမ်းတဝ်း” နုဲင်းနဝ်ꩻသွူ။

49အာႏဏာႏပဲင်ႏသား လဝ်းချာ၊ “ဗွေႏ၊ ခလာႏခွေသွဉ်းပို ကသီနဝ်ꩻ ကျွꩻသဲင်ꩻလွဉ်ꩻ ခွေသွဉ်းမွိုင်” နုဲင်းနဝ်ꩻသွူ။

50ဗွေႏယေသျု ဒေါ့ꩻဖေႏဝွေꩻ၊ “သဲင်ꩻဟုဲင်း၊ နာꩻပိုခို သက်အဝ်ႏမွန်ဒျာႏ” နုဲင်းနဝ်ꩻသွူ။

ပါꩻခိုနဝ်ꩻ ယွုမ်းဗွေႏယေသျုငဝ်းတွော့ꩻ သဲင်ꩻစွဉ်ႏသွူ။ 51ဝွေꩻကသဲင်ꩻချာလမ်း တဖူꩻလောင်းနဝ်ꩻ ဝွေꩻအသွဉ်းဖုံႏ မော့ꩻခွဲဆွုမ်ႏဝွေꩻတွော့ꩻ ဖေႏငဝ်းသတင်ꩻ၊ “နာꩻပိုခိုပေႏ သက်အဝ်ႏမွန်ဒျာႏ” နုဲင်းနဝ်ꩻသွူ။

52ဝွေꩻပိုခို ဟဝ်ရေꩻလွဉ် အချိန်ႏမုဲင်ꩻနဝ်ꩻ ဝွေꩻရီ အသွဉ်းဖုံႏတဲင် ဝွေꩻသီးလဝ်းချာ၊ “ဝွေꩻထာꩻဆော့ ကလင်ꩻထိုꩻနဝ်ꩻ မဟာနီꩻ မွူးပင်ꩻလင်ꩻ တနားရီႏချိန်ႏ” နုဲင်းနဝ်ꩻသွူ။ 53နဝ်ꩻထွူ အချိန်ႏနဝ်ꩻနဝ်ꩻ ဗွေႏယေသျု ဒေါ့ꩻဖေႏဝွေꩻ “နာꩻပိုခို သက်အဝ်ႏမွန်ဒျာႏ” နုဲင်းနဝ်ꩻနဝ်ꩻ အဖါယူႏလꩻချာသွူ။ နဝ်ꩻမꩻ ဝွေꩻတွမ်ႏ ဝွေꩻတမွိုးဖါပိုစွိုꩻဖုံႏ ကားကအဝ်ႏ ယွုမ်းလို့စွဉ်ႏ ဝွေꩻဗွေႏနဝ်ꩻသွူ။

54ယိုနဝ်ꩻထွာဒျာႏ ဗွေႏယေသျု အဝ်ႏယုဒခမ်းကျွꩻလွဉ် ကာလိလဲခမ်းထွူ ကမာꩻနယ်ဒါႏ ဒုတိယ နိမိတ်လက္ခဏာႏ နဝ်ꩻသွူ။

ខគម្ពីរពេញនិយមពី
ယောဟန် 4

ព្រះគម្ពីរ:

Pa’o

ជំនាន់បកប្រែ: Pao Bible Common Language - PBCL