လုကာ 24
24
အဝ်ႏထာꩻသီထွိုင်ႏမွန်လွဉ်ချာ
(မတဲ ၂၈:၁–၁၀။ မာကု ၁၆:၁–၈။ ယောဟန်၂၀:၁–၁၀)
1တနင်ꩻနွေႏနီꩻ မွူးရဝ်ꩻခိုႏစဝ်းစဝ်း ပါꩻမူႏဖုံႏနဝ်ꩻ လွေꩻသဲင်ႏခဲင်ꩻအောင်တွော့ꩻ အီလွေꩻပါ ဝွေꩻသီး ကဖျင်ရဲဉ်ꩻ သေꩻခါꩻဒါႏ နံꩻသာႏဟွမ်ဖုံႏ နဝ်ꩻသွူ။ 2ဝွေꩻသီးထီႏ လုံးတူႏတန် ကအဝ်ႏဒို့ꩻဒါႏ သဲင်ႏခဲင်ꩻအောင်ငွါနဝ်ꩻ အဝ်ႏတကြွီႏညာꩻ ထိုꩻလဲဉ်းနဝ်ꩻသွူ။ 3နဝ်ꩻမꩻ ဝွေꩻသီး နွို့လွေꩻသော့ꩻသွူ။ ကွဲႏတွော့ꩻ ဝွေꩻသီးတထီႏတဝ်းဒွုမ် ဗွေႏယေသျု ရုပ်ခန္ဓာႏသွူ။ 4ပွိုင်းဝွို့တွမ်ႏ ထာꩻနုဲင်းယိုခရာႏ ဝွေꩻသီး အဝ်ႏအုံထွိုင်ႏ ယူႏကွင်ကယ်ကျာꩻ ပါꩻဝင်ꩻနီ ကကွဉ်ကꩻဒါႏ ခွမ်ꩻလာꩻ ခꩻလိက်ꩻနဝ်ꩻ ပေါႏလွဉ်စွော့ꩻ အုံထွိုင်ႏစွဉ်ႏ ဝွေꩻသီးထျꩻနဝ်ꩻသွူ။ 5ပါꩻမူႏဖုံႏနဝ်ꩻ အဝ်ႏဗွေစွဉ်ႏ ထာꩻငမ်းသꩻတဲင် အွပ်ꩻလင်ꩻစွဉ်ႏ ဟံႏလောင်း၊ ပါꩻခိုဖုံႏနဝ်ꩻ ဒေါ့ꩻဖေႏဝွေꩻသီး၊ “လိုꩻသက်အဝ်ႏမွန် တဖြာꩻနဝ်ꩻ ပွိုးတမုဲင်ꩻ သီအဝ်ႏထုမ်ႏဗာႏတွိုႏ လိုꩻသီခါႏ နုဲင်းမုဲင်ꩻဟောင်း” နုဲင်းနဝ်ꩻသွူ။ 6#မ ၁၆:၂၁၊ ၁၇:၂၂၊ ၂၃၊ ၂၀:၁၈၊ ၁၉၊ မာ ၈:၃၁၊ ၉:၃၁၊ ၁၀:၃၃၊၃၄၊ လု ၉:၂၂၊ ၁၈:၃၁–၃၃။ ဝွေꩻဗွေႏ တအဲဉ်ထဝ်းဒွုမ်ယိုကို။ ဝွေꩻဗွေႏ ထွိုင်ႏမွန်လဲဉ်း၊ နုဲင်းဝွေꩻဗွေႏ ကအဝ်ႏနေက ကာလိလဲခမ်းကိုကျာꩻ ဝွေꩻဗွေႏ ကဒေါ့ꩻဖေႏဒါႏသီနဝ်ꩻ ယူႏလꩻချာသွော့။ 7‘လိုꩻပိုခိုနဝ်ꩻ အီႏခံႏဗာႏ ဝင်ꩻဆွမ်ꩻ အီႏအပ်ဖေႏ လိုꩻအပဲစ်သားဖုံႏစူကို၊ အီႏမာꩻသီဝွေꩻ ကင်းထွန်ႏလောင်းတဲင် သွံနီꩻကို အီႏထွိုင်ႏမွန်လွဉ်ချာ’ ”နုဲင်းနဝ်ꩻသွူ။
8တွိုႏနဝ်ꩻ ပါꩻမူႏဖုံႏ ယူႏလꩻချာ ဝွေꩻဗွေႏငဝ်းဖုံႏသွူ။ 9အဝ်ႏသဲင်ႏခဲင်ꩻအောင် သဲင်ꩻလွဉ်ချာတဲင် ထာꩻယိုဖုံႏခရာႏ ကားကအဝ်ႏနဝ်ꩻ ဒေါ့ꩻနယ်ဖေႏစွဉ်ႏ တပဲ့တောႏ တဆီပုဲင်ဖြာꩻတွမ်ႏ လိုꩻကအဝ်ႏကုဲင်ဖုံႏ ကားကအဝ်ႏသွူ။ 10ပါꩻမူႏဖုံႏနဝ်ꩻ ထွာဒျာႏမာဂဒလ ဝေင်ꩻသားမူႏ မာရိ၊ ယောဟန္နတွမ်ႏ ယာကုပ်အမွိုး မာရိနဝ်ꩻသွူ။ ဝွေꩻသီးတွမ်ႏ လိုꩻမူႏကအဝ်ႏငီꩻဒါႏ ဝွေꩻသီးနဝ်ꩻ ထာꩻယိုဖုံႏခရာႏ ဒေါ့ꩻနယ်ဖေႏစွဉ်ႏ တမန်ႏတောႏဖုံႏသွူ။ 11ကွဲႏတွော့ꩻ နုဲင်းလိုꩻမူႏဖုံႏ ကဒေါ့ꩻနဝ်ꩻ တမန်ႏတောႏဖုံႏ ထင်းဒျာႏ တထွာနွောင်ꩻတဝ်းတဲင် တယွုမ်းတဝ်း ဝွေꩻသီးငဝ်းသွူ။ 12ကွဲႏတွော့ꩻ ပေတရုနဝ်ꩻ ထွိုင်ႏတဲင် ဖင်းလွေꩻစွဉ်ႏ သဲင်ႏခဲင်ꩻအောင်တွော့ꩻ ဝွေꩻထွားယောင်ႏလင်ꩻသော့ꩻ သဲင်ႏခဲင်ꩻထမ်းအိုကိုနဝ်ꩻ ထီႏဒျာႏခွမ်ꩻလာꩻလွုမ်ꩻ အလင်နဝ်ꩻ တထီႏတဝ်း တမုဲင်ꩻမုဲင်ꩻသွူ။ နဝ်ꩻထွူ နုဲင်းကထွာလွဉ်လဲဉ်းဖုံႏနဝ်ꩻ အံႏဖြာႏငါႏတဲင် ဝွေꩻသဲင်ꩻချာစွဉ်ႏ လမ်းသွူ။
ထောင်လွေꩻတဖူꩻဒုံဧမောက်
(မာကု ၁၆:၁၂–၁၃)
13အနီꩻနဝ်ꩻစွဉ်ႏ ဗွေႏယေသျု တပဲ့တောႏဝင်ꩻနီ ကအဝ်ႏလွေꩻ ဒုံမဉ်ꩻကဟဲ့ꩻ ဧမောက်နဝ်ꩻတွော့ꩻ တွမ်ႏဝေင်ꩻယေရုသလမ်ႏနဝ်ꩻ ညာꩻနွတ်ꩻမဲင်ႏရပ်သွူ။ 14တဲင်ဝွေꩻသီး တဖြာꩻစွဉ်ႏတဖြာꩻ ပွိုင်းဝွို့တွမ်ႏ နုဲင်းထာꩻကထွာလွဉ်လဲဉ်းဒါႏ ခရာႏဖုံႏနဝ်ꩻ အဝ်ႏဒေါ့ꩻရီလို့ဝင်ꩻနဝ်ꩻသွူ။ 15နုဲင်းဝွေꩻသီး ကအဝ်ႏဒေါ့ꩻရီလို့ဝင်ꩻကျာꩻ ဗွေႏယေသျုနမ်း လွဉ်ဗော့ꩻဝွေꩻသီးတဲင် ထောင်လွေꩻငီꩻစွဉ်ႏ ဝွေꩻသီးသွူ။ 16ဝွေꩻသီးထီႏ ဝွေꩻဗွေႏစွဉ်ႏတဲ့ တတောင်တဝ်း ဝွေꩻဗွေႏသွူ။ 17ဗွေႏယေသျုဒေါ့ꩻဖေႏ ဝွေꩻသီး၊ “နုဲင်းသီကထောင် လွေꩻထာꩻကျာꩻ တဖြာꩻစွဉ်ႏတဖြာꩻ ဒေါ့ꩻ တမုဲင်ꩻခရာႏဟောင်း” နုဲင်းနဝ်ꩻသွူ။
တွိုႏနဝ်ꩻ ဝွေꩻသီးမဲ့ငါကုဲင်တဲင် အုံထွိုင်ႏစွူစွဉ်ႏသွူ။ 18ဝွေꩻသီးကိုတဖြာꩻ မဉ်ꩻကဟဲ့ꩻဒါႏ ကလောဖနဝ်ꩻ ရီဝွေꩻဗွေႏ၊ “နာꩻနဝ်ꩻ ထွာဒျာႏထဉ်ႏ ဝေင်ꩻယေရုသလမ်ႏကို တဖြာꩻ နဝ်ꩻမꩻ မွူးနီꩻအကျာꩻယိုယံꩻတွင်ꩻ ထာꩻကထွာလွဉ်လဲဉ်း ခရာႏဖုံႏ တသေတဝ်းနဝ်ꩻ အဝ်ႏနာꩻတဖြာꩻလွုမ်ꩻ” နုဲင်းနဝ်ꩻသွူ။
19ဝွေꩻဗွေႏရီ၊ “တမုဲင်ꩻခရာႏဟောင်း” နုဲင်းနဝ်ꩻသွူ။
ဝွေꩻသီးလဝ်းချာ၊ “ထာꩻကထွာလွဉ်နဝ်ꩻ နာဇရဲစ်ဝေင်ꩻသား ယေသျုခရာႏဖုံႏဒျာႏ။ ပါꩻယိုနဝ်ꩻ ဗွေႏဘုရာꩻစွဉ်ႏ လိုꩻဖုံႏကားကအဝ်ႏဆꩻငါ ဝွေꩻထာꩻဒေါ့ꩻတွမ်ႏ ကမာꩻလဲဉ်းဒါႏဖုံႏနဝ်ꩻ အဝ်ႏဗွေစွဉ်ႏ တန်ꩻခိုꩻတဲင် ထွာပရောဖဲစ်တပါꩻ ယူႏစဉ်ꩻစာꩻနုဲင်းနဝ်ꩻသွူ။ 20နီယဇ်ပရောဟိတ် တန်ဖုံႏတွမ်ႏ လိုꩻတန်ဖုံႏနဝ်ꩻ ဆွမ်ꩻအပ်ဝွေꩻ ဖေႏနေးကစီႏရင်ႏ ထာꩻသီတံႏတဲင် မာꩻသီထိုꩻဝွေꩻ ကင်းထွန်ႏလောင်းသွူ။ 21ဝွေꩻနဝ်ꩻ အီႏထွာ ဗွေႏအပါꩻ ကကယ်ႏလွစ်ဖေႏဒါႏ ဣသရေး လိုꩻမျိုꩻနဝ်ꩻ နီအဝ်ႏမောင်ꩻ နုဲင်းနဝ်ꩻစွဉ်ႏတဲ့ တယ်ႏစွဉ်ႏကထွာထာꩻ နုဲင်းယိုနဝ်ꩻ ယိုခါ လꩻလဲဉ်းသွံနီꩻသွူ။ 22နီစွိုꩻကို လိုꩻမူႏယင်ဟန်ႏနဝ်ꩻ ဝွေꩻသီးလွေꩻ သဲင်ႏခဲင်ꩻအောင်တဲင် မာꩻအံႏဖြာႏ မွေးနေးစွဉ်ႏနီသွူ။ 23ကွဲႏတွော့ꩻ ဝွေꩻသီး တထီႏတဝ်း ဝွေꩻဗွေႏနမ်းသွူ။ ဝွေꩻသီး သဲင်ꩻလွဉ်ချာတွော့ꩻဒေါ့ꩻ ဝွေꩻသီးထီႏဗာႏလဲဉ်း ရူႏပါႏရုံႏ မို့ꩻလောင်းတမန်ႏ ဒေါ့ꩻဖေႏဝွေꩻသီး ဝွေꩻဗွေႏနဝ်ꩻ သက်အဝ်ႏမွန်ဒျာႏ နုဲင်းနဝ်ꩻသွူ။ 24နီလိုꩻစွိုꩻဖုံႏကို ယင်ဟန်ႏ လွေꩻသဲင်ႏခဲင်ꩻအောင်တဲင် နုဲင်းပါꩻမူႏဖုံႏ ကဒေါ့ꩻလဲဉ်းဒါႏဖုံႏနဝ်ꩻ ထီႏဗာႏမွေးသွူ၊ ကွဲႏတွော့ꩻ ဝွေꩻသီး တထီႏဗာႏတဝ်း ဝွေꩻဗွေႏ” နုဲင်းနဝ်ꩻသွူ။
25နဝ်ꩻထွူ ဗွေႏယေသျု ဒေါ့ꩻဖေႏဝွေꩻသီး၊ “သီမွော့ꩻ ထာꩻသေဉာဏ်ႏဆေ့ꩻငါႏ ခွိုင်းကားမုဲင်ꩻ၊ ကအီႏယွုမ်း ပရောဖဲစ်ဖုံႏ ကဟော်ꩻခါꩻဒါႏနဝ်ꩻ သီနန်ꩻသေနာႏငါႏ ခွိုင်းကားမုဲင်ꩻ။ 26မေသျိယတာႏ အီႏခံႏပါဗာႏ ထာꩻဒုက္ခယိုဖုံႏထွူတဲင် အီႏနွို့သော့ꩻ ဝွေꩻဗွေႏ ဘွုန်ꩻသရေႏတောႏ တမွေးတဝ်းဟောင်း” နုဲင်းနဝ်ꩻသွူ။ 27နုဲင်းလိတ်ကျမ်ꩻကို ကအဝ်ႏဒေါ့ꩻဒါႏ ဝွေꩻဗွေႏနမ်းခရာႏဖုံႏ ကားကအဝ်ႏ၊ တယ်ႏစစွဉ်ႏ မောသျေကျမ်ꩻဖုံႏတွမ်ႏ ပရောဖဲစ်ဖုံႏ ကားကအဝ်ႏ ကတဲမ်းသေꩻခါꩻဒါႏဖုံႏနဝ်ꩻ ဗွေႏယေသျု သျင်ꩻနယ်ဖေႏဝွေꩻသီးသွူ။ 28နုဲင်းဝွေꩻသီး ဖျော်လွဉ်ဗော့ꩻ ဝွေꩻသီး ကအီႏလွေꩻဒါႏဒုံနဝ်ꩻ ဗွေႏယေသျု ကဉ်းနုဲင်းမာꩻ ဝွေꩻဗွေႏ အီႏလွေꩻငါသွုပ်နဝ်ꩻသွူ။ 29ကွဲႏတွော့ꩻ ဝွေꩻသီး ဟဲ့ꩻသဲင်ꩻချာနွိုင်ႏ ဝွေꩻဗွေႏတဲင်ရိုꩻ၊ “အုံငီꩻဗော့ꩻနီ၊ မွူးဟာလဲဉ်းတဲင် ထာꩻအီႏဗော့ꩻခေ့ꩻသွူ။” နဝ်ꩻမꩻ ဝွေꩻဗွေႏ နွို့အုံငီꩻစွဉ်ႏ ဝွေꩻသီးသွူ။ 30အီႏအံႏငီꩻစွဉ်ႏဝွေꩻသီး ဝွေꩻဗွေႏအုံလင်ꩻ ထူႏတခိုးတဲင် အုပ်ꩻထင်ႏ ကေꩻဇူꩻတောႏတွော့ꩻ ဗျာႏတခိုးတဲင် ဖေႏစွဉ်ႏဝွေꩻသီးသွူ။ 31တွိုႏနဝ်ꩻ ဝွေꩻသီး မဲ့ဗွောင်တဲင် ဝွေꩻသီး တောင်ꩻချာယင်း ဝွေꩻဗွေႏသွူ။ ကွဲႏတွော့ꩻ အဝ်ႏဝွေꩻသီးဆꩻငါနဝ်ꩻ ဝွေꩻဗွေႏ ထိုꩻမားထိုꩻစွဉ်ႏသွူ။ 32ဝွေꩻသီးတဖြာꩻ တွမ်ႏတဖြာꩻ ဒေါ့ꩻဖေႏလို့ဝင်ꩻ၊ “ဝွေꩻဗွေႏ ကဒေါ့ꩻနယ်နီ တဖူꩻတန်လောင်း ကသျင်ꩻနယ်ဖေႏဒါႏနီ လိတ်ကျမ်ꩻချိန်ႏနဝ်ꩻ ဗွိုန်နုဲင်း မေႏအဝ်ႏခိုးသော့ꩻ နီအကို တမွေးတဝ်းဟောင်း” နုဲင်းနဝ်ꩻသွူ။
33တလဲင်ႏချင်ꩻ ဝွေꩻသီးထွိုင်ႏတဲင် သဲင်ꩻချာစွဉ်ႏ ဝေင်ꩻယေရုသလမ်ႏတွော့ꩻ နဝ်ꩻကိုနဝ်ꩻ ဝွေꩻသီးထီႏ တပဲ့တောႏ တဆီပုဲင်တဖြာꩻ အဝ်ႏအုံစုဗူႏလို့ဝင်ꩻ တွမ်ႏလိုꩻလင်ဖုံႏတဲင်၊ 34အဝ်ႏရိုꩻ၊ “ဗွေႏဘုရာꩻနဝ်ꩻ ထွိုင်ႏမွန်မွေးလဲဉ်း ဝွေꩻဗွေႏ ပေါႏနယ်ဖေႏလဲဉ်း သိမုန်။’ နုဲင်းနဝ်ꩻသွူ။ 35တွိုႏနဝ်ꩻ ပါꩻဝင်ꩻနီနဝ်ꩻ နုဲင်းထာꩻကထွာလွဉ်လဲဉ်း တဖူꩻတန်လောင်း နုဲင်းမုဲင်ꩻတဲ့နဝ်ꩻ ဝွေꩻဗွေႏ ထွိုင်ႏဗျာႏတခိုးချိန်ႏ ဝွေꩻသီးတောင်ꩻချာစွဉ်ႏ ဝွေꩻဗွေႏခရာႏ နုဲင်းမုဲင်ꩻတဲ့နဝ်ꩻ သျင်ꩻနယ်ဖေႏ ဝွေꩻသီးသွူ။
ဗွေႏယေသျုပေါႏနယ်ဝွေꩻဗွေႏတပဲ့တောႏဖုံႏ
(မတဲ ၂၈:၁၆–၂၀။ မာကု ၁၆:၁၄–၁၈။ ယောဟန် ၂၀:၁၉–၂၃။ တမန်ႏတောႏ ၁:၆–၈)
36ပါꩻဝင်ꩻနီ ကအဝ်ႏဒေါ့ꩻနယ်ဖေႏ ဝွေꩻသီး နုဲင်းယိုကျာꩻ ဝွေꩻဗွေႏနမ်း ပေါႏလွဉ်စွော့ꩻ အုံထွိုင်ႏထာꩻ ဝွေꩻသီးအခါႏတဲင် ဒေါ့ꩻဖေႏဝွေꩻသီး၊ “ထာꩻငိမ်ꩻချမ်ꩻသာႏ ယံကအဝ်ႏငီꩻသွော့ စွဉ်ႏသီ” နုဲင်းနဝ်ꩻသွူ။
37ဝွေꩻသီးထင်းဒျာႏ ထီႏထာꩻကုဲင်လောက်ꩻတဲင် ဝွေꩻသီး ငမ်းသꩻငါႏသွူ။ 38ကွဲႏတွော့ꩻ ဝွေꩻဗွေႏ ဒေါ့ꩻဖေႏဝွေꩻသီး၊ “ပွိုးတမုဲင်ꩻ သီ သꩻဝꩻဗာႏတွိုႏဟောင်း။ ပွိုးတမုဲင်ꩻ သင်ႏသရ နွို့လွဉ်သော့ꩻဗာႏတွိုႏ သီသꩻကို နုဲင်းမုဲင်ꩻဟောင်း။ 39ထွားခွေစူဖုံႏတွမ်ႏ ခွေခင်ႏဖုံႏတွော့ꩻ ကထီႏဗာႏနဝ်ꩻ ထွာဒျာႏ ခွေနမ်းခန္ဓာႏသွူ။ စမ်ႏထွားခွေတဲင် သီအီႏသေဗာႏ ပွိုးထာꩻကုဲင်လောက်ꩻနဝ်ꩻ အယာႏတွမ်ႏ အဆွတ်ꩻဖုံႏ တအဲဉ်ထဝ်း နုဲင်းသီကထီႏခွေအတွိုင်ꩻ ခွေနဝ်ꩻ အဝ်ႏဗွေစွုံႏလင်ႏဒျာႏ” နုဲင်းနဝ်ꩻသွူ။
40ဝွေꩻဗွေႏဒေါ့ꩻဖေႏ နုဲင်းယိုတဲင် ဝွေꩻဗွေႏ စူဖုံႏတွမ်ႏ ဝွေꩻဗွေႏခင်ႏဖုံႏနဝ်ꩻ အွဉ်ႏနယ်ဝွေꩻသီးသွူ။ 41ဝွေꩻသီး အဝ်ႏဗွေတွမ်ႏ ထာꩻသꩻဟဝ်သꩻရေꩻစွဉ်ႏ ထာꩻအံႏဖြာႏဖုံႏတဲ့ ဝွေꩻသီး တလꩻယွုမ်းတဝ်းဒွိုန်း။ နဝ်ꩻမꩻ ဝွေꩻဗွေႏရီဝွေꩻသီး၊ “ယိုကိုနဝ်ꩻ သီထာꩻအံႏ အဝ်ႏနေ တစွိုးစွိုးဟောင်း” နုဲင်းနဝ်ꩻသွူ။ 42ဝွေꩻသီးဖေႏ ဝွေꩻဗွေႏ ထပေႏမဉ်ထွူ တကွို့ꩻ။ 43ဝွေꩻဗွေႏထူႏတဲင် အံႏစွဉ်ႏ ဝွေꩻသီးဆꩻငါနဝ်ꩻသွူ။
44တွိုႏနဝ်ꩻ ဝွေꩻဗွေႏဒေါ့ꩻဖေႏ ဝွေꩻသီး၊ “နုဲင်းခွေကအဝ်ႏငီꩻ နေကသီတွင်ꩻ ထာꩻယိုဖုံႏ ခရာႏကားကအဝ်ႏနဝ်ꩻ ခွေဒေါ့ꩻနယ်ဖေႏလဲဉ်းသီ၊ ပွိုင်းဝွို့တွမ်ႏ ခွေခရာႏ မောသျေ ကတဲမ်းသေꩻခါꩻဒါႏ ပညတ်ကျမ်ꩻကို ၊ ပရောဖဲစ်ဖုံႏ ကအဝ်ႏတဲမ်း သေꩻခါꩻဒါႏစွဉ်ႏ သာလံကျမ်ꩻကိုဖုံႏနဝ်ꩻ ဗွေမဲဉ်ႏလွဉ်လဲဉ်း” နုဲင်းနဝ်ꩻသွူ။
45နဝ်ꩻထွူ ဖေႏကသေနာႏ လိတ်ကျမ်ꩻဖုံႏနဝ်ꩻ ဝွေꩻဗွေႏ ဗွောင်ဖေႏ ဝွေꩻသီးသꩻဖုံႏတဲင်၊ 46ဒေါ့ꩻဖေႏဝွေꩻသီး နုဲင်းကတဲမ်းသေꩻခါꩻနဝ်ꩻ နုဲင်းယို။ မေသျိယနဝ်ꩻ ခံႏဗာႏမွေး ထာꩻဒုက္ခဝေႏဒနာႏတဲင် အဝ်ႏထာꩻသီကို လꩻသွံနီꩻကို ထွိုင်ႏမွန်ချာဗာႏယင်း၊ 47တွမ်ႏဝွေꩻဗွေႏ အမဉ်ꩻတောႏ နာႏမနဝ်ꩻ ပွိုင်းဝွို့တွမ်ႏ ထာꩻကော့ꩻမာႏ တရာꩻစွဉ်ႏ အွဉ်ႏစွꩻလွစ်ဖေႏ အပဲစ် တရာꩻနဝ်ꩻ တယ်ႏစစွဉ်ႏ ဝေင်ꩻယေရုသလမ်ႏ ဗꩻတွိုႏလိုꩻမျိုꩻဖုံႏ ကားကအဝ်ႏနဝ်ꩻ အီႏဟော်ꩻဖေႏဗာႏသွူ။ 48ယိုခရာႏဖုံႏနဝ်ꩻ သီအီႏခံႏဖေႏဗာႏ သက်သေႏသွူ။ 49#တ ၁:၄ နုဲင်းခွေ ဖါတောႏ ကအွဉ်ႏသေꩻလဲဉ်း ဂတိတောႏနဝ်ꩻ ခွေနမ်း အီႏပသာဖေႏ သီလောင်းသွူ။ ကွဲႏတွော့ꩻ ဗꩻတွိုႏစွဉ်ႏ တန်ꩻခိုꩻလင်ꩻလွဉ် သီလောင်းနဝ်ꩻ သီအုံပွေါးဗာႏ ဝေင်ꩻကိုနဝ်ꩻသွူ။
ဗွေႏယေသျုကျွꩻထင်ႏခမ်းထီမို့ꩻလောင်း
(မာကု ၁၆:၁၉–၂၀။ တမန်ႏတောႏ ၁:၉–၁၁)
50 #
တ ၁:၉–၁၁။ နဝ်ꩻထွူ ဝွေꩻဗွေႏ အွဉ်ထန်ႏညာꩻလွေꩻ ဝွေꩻသီး ဒုံဗေတနိ၊ နဝ်ꩻကို ဝွေꩻဗွေႏယွိုင်ႏ ဝွေꩻဗွေႏစူဖုံႏတဲင် ဖေႏဝွေꩻသီး မင်္ဂလာႏနဝ်ꩻသွူ။ 51နုဲင်းဝွေꩻဗွေ အဝ်ႏဖေႏဝွေꩻသီး မင်္ဂလာႏအတွိုင်ꩻ ဝွေꩻဗွေႏအဝ်ႏ ဝွေꩻသီးထျꩻ ဖထန်ႏတဲင် ခံႏဗာႏ ပင်ꩻထင်ႏ ခမ်းထီမို့ꩻလောင်းကိုသွူ။ 52ဝွေꩻသီး ဝုဲင်ႏကိုꩻကွယ်ႏ ဝွေꩻဗွေႏတဲင် အဝ်ႏဗွေစွဉ်ႏ ထာꩻသꩻဟဝ်သꩻရေꩻ သဲင်ꩻချာ ဝေင်ꩻယေရုသလမ်ႏကိုသွူ။ 53ဝွေꩻသီး ကားကအဝ်ႏနဝ်ꩻ အချိန်ႏလို့ဗော့ꩻစွဉ်ႏ အုပ်ꩻထင်ႏ ဗွေႏဘုရာꩻ ဂွုဏ်ႏကေꩻဇူꩻတောႏ ဗိမာန်ႏတောႏ ကျောင်ꩻကိုသွူ။
ទើបបានជ្រើសរើសហើយ៖
လုကာ 24: PBCL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Pao Bible Common Language© Bible Society of Myanmar, 2019.