متى 10
10
1وجمّع يسوع تلاميذو الـ 12 واعطاهن السلطان عشان يطردوا الأرواح النجسة ويشفو كل مرض وكل ضعف. 2وهاي أسامي الـ 12 رسول: أولهن سمعان وبنادوه كمان بطرس، وأخوه اندراوس، ويعقوب ابن زبدي، وأخوه يوحنا، 3وفيلبس، وبرثولـماوس، وتوما، ومتـى إللي بلم الضرايب، ويعقوب ابن حلفى، وتداوس، 4وسمعان اللي من جماعة الغيورييـن، ويهوذا الإسخريوطي اللي خان يسوع.
5بعت يسوع هدول الـ 12 ووصاهن وقلهن: تروحوش لعند الأمم وتفوتوش عمدن السامرييـن 6بس روحو لشعب إسرائيل، للخرفان الهالكه. 7ولـما تروحو اوعظو وقولو ملكوت السموات قريب 8اشفو الـمرضى، ورجعو الحياة للأموات، وطهرو الـبُرُص، واطردو الشياطين. اخذتو منـي الهدية ببلاش فاعطوها للناس ببلاش. 9وتوخذوش معكو مصاري ذهب أو فضة أو نحاس 10ولا توخذو شنطة سفر أو قميصين أو صندل أو عصاي. لأنو الشغيل بستحق يوخد أجرو. 11ولـما تفوتو عـمدينة أو قرية اسألو عن الشخص اللي بيستاهل يستضيفوكو ونامو هناك لحد ما تتـركو البلد 12ولـما تفوتو عبيتو اطلبو السلام للبيت 13فإذا كان البيت مستاهل راح يحل السلام عليه بس إذا مكنش مستاهل برجع السلام لصحابو 14والبيت اللي برحبش فيكو وبسمعش كلامكو اطلعو منو أو حتى من هديك الـمدينة وكتو الغبـرة اللي على إجريكو. 15عنجد بقولكو، وضع سدوم وعمورة راح يكون أهون من هديك المدينة في يوم الحساب.
16افهموا إنو أنا عم ببعتكو زي غنم في وسط ذئاب عشان هيك كونو حذرين زي الحيات وبدون خداع زي الحمام 17دير بالكو من الناس لأنهن راح يسلموكو للمحاكم اليهودية ويجلدوكو في الكُنس 18وبسببي راح يوخذوكو عشان تشهدو قدام الحكام والـملوك والأمم 19فلما بمسكوكو تهكلوش هم شو بدكو تقولو أو كيف تحكو لأنو الله راح يرشدكو في هذيك اللحظة إيش تقولو 20فمش راح تكونو إنتو اللي بتحكو لأنو روح أبوكو اللي فيكو راح يحكي من خلالكو 21وراح يسلم الأخ أخوه للموت وراح يخون الأبو ولادو وراح يتمردو الولاد عأهلهن ويمّوتوهن. 22وكل الناس راح يكرهوكو عشاني واللي بظل أمين للنهاية راح يخلص 23ولما بيضطهدوكو في مدينة اهربو لمدينة تانيه. عنجد بقولكو راح يجي ابن الإنسان قبل ما تهربو من كل مدن إسرائيل.
24الطالب مش أشطر من معلمو والعبد مش أعظم من سيدو 25بكفي الطالب أنو يصير زي معلمو والعبد يصير زي المسؤول عنو. إذا سمو كبيـر العيلة شيطان بعلزبول فشو راح يعملو بعيلتو؟!
26بس تخافوش منهن لأنو كل إشي مخفي راح يبين وراح تبين الأسرار 27اكشفو الكلام اللي بقولو بالسر واحكوا كل إشي وشوشتكو إياه بأعلى صوت عندكو 28تخافوش من اللي بيقتلو الجسد وبقدروش يقتلو الروح. بس خافو الله اللي بيقدر يهلك الجسد والروح في جهنم. 29طيب مش العصافير حقها رخيص؟ فش واحد منها بوقع عل الأرض بدون إذن أبوكو. 30وانتو كمان كل شعره براسكو محسوبه. 31فمتخافوش، مكانتكو أحسن من أسراب العصافيـر.
32وكل إنسان بيعتـرف فيّ قدام الناس راح أنا كمان اعتـرف فيه قدام ابوي اللي في السموات 33وكل إنسان بتبـرا مني قدام الناس راح أنا كمان اتبـرا منو قدام ابوي اللي في السموات.
34تفكروش أنو إجيت عشان يحل الهدوء ع الأرض. ماجيبتش هدوء، جيبت سيف. 35فراح يصير الابن ضد ابوه والبنت ضد إمها والكنة ضد حماتها 36وراح يكون الإنسان عدو لأهل بيتو. 37اللي بيحب أبوه أو إمو أكثـر منـي أو بيحب ابنو أو بنتو أكثـر مني بستحقش يكون تلميذي 38واللي بيحملش صليبو وبيتبعني بستحقش يكون تلميذي 39اللي بدو يكسب حياتو لازم يخسرها واللي بضحي بحياتو عشاني راح يكسبها.
40اللي بيستقبلكو برحّب في واللي بيرحّب في بيستقبل اللي بعثني. 41اللي برحّب بإنسان لأنو نبـي بيوخذ مكافئة استقبال نبي واللي بيرحب بإنسان لأنو أمين مع الله بيوخذ مكافئة استقبالو 42وعنجد بقولكو إذا واحد بس بيعطي كوباية مي باردة لحدا من هدول الزغار لأنو تلميذ ولا يمكن تضيع مكافئتو.
ទើបបានជ្រើសរើសហើយ៖
متى 10: CGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Colloquial Galilean Bible © 2025 The Arab Israeli Bible Society
ترجمة الكتاب المقدس باللهجة العامية الجليلية © 2025 دار الكتاب المقدس في الناصرة