متى 9
9
1ركب يسوع السفينة وراح لـمدينتو كفرناحوم. 2وهناك جابولو مشلول كانو حاملينو على الفرشه. شاف يسوع إيمانهن وقال للمشلول: تشجع يا ابنـي، انغفرت خطاياك. 3فصارو ناس من الكتبة يحكو بينات بعض، هذا الزلـمه عم بيغلط، 4شافهن يسوع وقالهن: ليش بتفكرو بالشر بقلوبكم؟ 5أيش الأسهل أقول: انغفرت خطاياك أو قوم وامشي؟ 6بس عشان ابرهنلكو إنو ابن الإنسان عندو السلطة عالأرض أنو يغفر الخطايا، بقولك يا مشلول قوم احمل فرشتك وروّح عبيتك. 7فقام وروّح عبيتو. 8ولما شافوا الناس اللي صار خافو ومجدو الله اللي أعطى الإنسان هاي السلطة.
9وترك يسوع الـمكان وشاف في طريقو زلـمة اسمو متى قاعد في محل الضرايب. فقالو يسوع تعال انضم لجماعتي. قام متـى لحقو وصار من تلاميذو 10وراح يسوع ععزيمة في بيت متـى وقعد هو وتلاميذو ومجموعة كبيـرة من الخطاة واللي بيجمعو الضرايب. 11فلما شافو الفريسيين هذا الـمنظر قالو لتلاميذ يسوع: ليش معلمكو بوكول مع الخطاة واللي بيجمعو الضرايب؟ 12سمعهن يسوع بيحكو فرد عليهن وقالهن: الـمريض هو اللي محتاج للدكتور مش اللي بصحتو. 13وأنا اجيت ادعو الخاطييـن مش المناح. افهمو وتعلمو كلمات الله اللي بقول فيها أنا بطلب الرحمة مش الذبيحة.
14وبعد ما خلّص حكي سألوه تلاميذ يوحنا: ليش إحنا والفريسييـن دايما منصوم وتلاميذك بصوموش؟ 15فقالهن يسوع: تتوقعوا إنو الـمحتفليـن بالعرس يبكو والعريس معاهن؟ أكيد لأ! بس راح يجي يوم ويروح العريس وقتها راح يصومو. 16بنفعش نرقع ثوب قديم برقعة قماش مش مغسولة لأنها راح تنكمش بالغسيل وهيك بِتمزَع الثوب أكثـر من الأول 17وكمان بنفعش نحط نبيذ جديد في قنينة جلد قديمة وإلا بتتمزع القنينة وبتخرب وبنكب النبيذ. لازم نحط النبيذ الجديد في قنينة جلد جديدة وهيك فش اشي بخرب.
18ولـما كان بعدو بيحكي معهن اجا واحد من الرؤسا وركع قدامو وقالو: بنتـي اسه ماتت بس تعال وحط إيدك عليها وراح تعيش 19فقام يسوع وتلاميذو وراحو معو 20وفي هذيك اللحظة أجت من ورا يسوع مرة صارلها بتنـزف 12 سنة ولـمست طرف اواعيه 21لأنها آمنت إنو إذا لـمست اواعيه راح تشفى من الـمرض 22فلف يسوع لورا ولـما شافها قالها: تشجعي يا صبية. إيمانك شفاك. وشِفيَت الـمرة بنفس اللحظة. 23ولما وصل يسوع لبيت الرئيس شاف اللي بيعزفو ع الناي وقت الـموت وعجئة الناس في العزا 24فقالهن رَوْحُو من هون لأنو البنت ما ماتتش هي بس نايمة فتمسخرو عليه 25ولما طلعو من الغرفة دخل يسوع ومسك إيدها للبنت فقامت. 26وانتشرت الأخبار في كل هديك الـمنطقة.
27وبعد ما ترك يسوع المحل لحقوه تنيـن عميان وصاروا يصيحو ويقولو: ارحمنا يا ابن داود 28ولـما دخل يسوع ع البيت اجى لعندو الأعميين فقلهن يسوع: بتآمنو أنو بقدر أشفيكو؟ جاوبوه وقالولو: نعم يا رب. 29بعدها حط إيديه على عيونهن وقالهن: خلي الطلب يتحقق بحسب إيمانكو 30وانفتحت عيونهن ونَبَههن يسوع وقالهن أوعوكو تحكو لحدا 31بس هِني نشرو الخبر في كل هديك الـمنطقة.
32وبعد ما طلعو العميان الإتنين من عند يسوع اجو ناس تانييـن ومعهن واحد أخرس راكبو شيطان 33وبعد ما طلع يسوع الشيطان حكا الأخرس وتعجبت الناس وقالو: ولا مرة صار هيك إشي مع شعب إسرائيل 34اعترض الفريسيين وقالو: بطلع الشياطين بسلطة رئيس الشياطين.
35وسافر يسوع عشان يعلم في كل كُنس الـمدن والقرى ويخبرهن عن أخبار الـملكوت الحلوة. وكان يشفي كل مرض وكل ضُعف 36ولـما شاف يسوع الناس شفق عليهن لأنهن كانو تعبانين ومهدود حيلهن مثل الغنم اللي فش إلهن راعي 37وقتها قال يسوع لتلاميذو: الحصاد كثيـر بس الشغيله قلال 38عشان هيك اطلبو من رب الحصاد يبعت شغيله لحصاده.
ទើបបានជ្រើសរើសហើយ៖
متى 9: CGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Colloquial Galilean Bible © 2025 The Arab Israeli Bible Society
ترجمة الكتاب المقدس باللهجة العامية الجليلية © 2025 دار الكتاب المقدس في الناصرة