متى 8
8
1ولـما نزل يسوع من الـجبل لحقوو ناس كتيـر. 2وبعدين أجا عندو أبرص وسجدلو وقالو: يا رب، إذا بدك طهرني. 3فحط يسوع إيدو عليه وقالو: أنا بدي. صير طاهر. وطوالي اختفى البـرص. 4وقالو يسوع: انتبه ومتحكيش لحدا وروح بالأول أرجي حالك للكاهن وبعدين قدم التقدمه اللي طلبها موسى برهان عشفائك.
5ولـما فات يسوع عكفرناحوم اجا لعندو ضابط روماني مسؤول عن 100 جندي. وترجاه 6وقالو: يا رب، عندي شب بالبيت مرمي بالفراش ومشلول ومتعذب كتيـر 7قالو يسوع: أنا باجي وبشفيه 8قالو الضابط: يا رب، بستحقش إنك تيجي عبيتـي بس قول كلمه وحده منك وبطيب الشب 9لأني إنسان بتبع الأوامر وجنودي بردوا علي. فلما بقول لواحد روح برد علي. وبقول للتاني تعال بيجي. ولما بأمر خادمي بطيع الأوامر. 10لـما سمعو يسوع تعجب وقال لأتباعو: عنجد بقولكو: هذا النوع من الإيمان فِش منو عند أي حدا في إسرائيل. 11وبعدين قالهن راح تيجي أمم من الشرق والغرب ويقعدو مع إبراهيم واسحاق ويعقوب في حفلة ملكوت السموات 12بس ولاد الـمملكة راح ينـزتو بره وين في ظلام وعياط وطقطقة الأسنان 13وقال يسوع للضابط: روّح عبيتك وراح يصيـر زي ما آمنت. فشفي الشب الـمريض وقت ما خلّص يسوع كلامو.
14ولـما راح يسوع عبيت بطرس كانت حماة بطرس مرمية بالفراش وحمها عالي 15فمسك يسوع إيدها ونـزلت حرارتها وشفيت. وقامت وصارت تخدمو 16وبعدين لـما عتمت الدنيا جابو لعند يسوع كتيـر ناس راكبهن شياطين، فطرد الأرواح الشريرة بكلمه وشفا كل واحد عندو مشكله. 17وتحققت فيه كلمات النبـي إشعيا اللي قال عنه: هو اللي أخذ ضعفنا وشفا أمراضنا.
18ولـما شاف يسوع الناس حوليه قال تعالو نروح للجهة التانية من البحر 19واجا لعندو واحد من الكتبة وقالو: يا معلم، بلحقك لوين ما تروح 20قالو يسوع: الثعالب إلها سكن وفي أعشاش للطيور بس ابن الإنسان فِش وين يحط راسو. 21واحد تاني من التلاميذ قالو: يا رب، اسمحلي بالأول أروح أدفن أبوي 22قالو يسوع: اتبعني واترك الأموات يدفنو أمواتـهن.
23ولـما ركب يسوع السفينة طلعو معو تلاميذو. 24وهاج البحر وماج والمي عبت السفينة، بس يسوع كان نايم. 25واجو لعندو وفيقوه، قالولو: يا رب، نجينا، إحنا عمنموت. 26فقالهن يا ضعاف الإيمان، ليش خايفين؟ وطوالي قام وسكّت الرياح والبحر. فهدي كل شي. 27تعجبو التلاميذ وتسائلو: مين هذا اللي حتى الرياح والبحر بردو عليه؟
28ولـما وصلو للجهة الثانية من البحر، لمنطقة الجدريين، التقى معو شخصين فيهن أرواح شريره. وأجو من الـمقبـره، وكانو شرسين كتيـر. فش حدا بيقدرلهن أو بيقدر يمرء من هديك الطريق 29وصارو يصيحو ويقولو: شو بدك منا يا ابن الله؟ إجيت لهون قبل الوقت عشان تعذبنا؟ 30وكان في مجموعه كبيـره من الخنازير بتـرعى عمسافة منهن. 31فترجوه الشياطين وقالولو: إذا بدك تطردنا، ودينا لقطيع الخنازير. 32فقالهن: روحوا من هون. فطلعو ودخلو في القطيع. وقتـها ركض كل قطيع الخنازير من النزلة ونطوا في البحر وماتوا هناك. 33هربو الرعاة. ولـما راحو للمدينة قالو لكل الناس عن الـ 2 اللي كان راكبهن شياطين. 34فطلعو كل سكان الـمدينة عشان يشوفو يسوع. بس لـما شافوه طلبو منو يطلع من المنطقة تبعتهن.
ទើបបានជ្រើសរើសហើយ៖
متى 8: CGB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Colloquial Galilean Bible © 2025 The Arab Israeli Bible Society
ترجمة الكتاب المقدس باللهجة العامية الجليلية © 2025 دار الكتاب المقدس في الناصرة