Matay 2
2
na lavang i makalauz
1a mutu yawan ziya i Hērodē a azu, i Yēsu pinialrak i Yodaya i Bētlēhēm. ulra a papida na mitrepa kana nirekudayan na vitu'en kemay i lauz zuwa i Yērusalem; 2kiyumalr nazu: <<izu na pinialrak utu yawan kana Yodaya na trau mu ulra i iyan? mena'u mi i lauz kanantu vitu'en, paruzang zuwa semungala kantaw.>>
3na yawan i Hērodē a kinger kanini na ngay mu, mazakazak 'azi ametreh; i Yērusalem mapiya na trau mararesan 'azi ametreh. 4zi i Hērodē demaulr puwazuk lra kana ma'izang na rahan mapiya zi na sinsi kana Sēsiyo i zekalr, kiyumalr kanazu: <<pauwayanay mu pinialrak i iyan i Kiristo?>>
5temuvang nazu: <<kazu i Yodaya i Bētlēhēm, 'alrana kemani venalray a aziyu na patralritralri:
6i Yoda na pinidare'an i Bētlēhēm a,
kazu u kana kazekalran i kani Yoda ziya mu amelri a maramakitekiteng;
'alrana ulra a sasa ayawan za uwapana kemay kannu i kazu,
puwarikan kananku zinekalranan i Iseraēl i intaw.>>
7kemazu zi, i Hērodē mulrek demaulr kirepana'u kanazu na mitrepa kana nirekudayan na vitu'en, kiyumalr kanazu kanizu na vitu'en tu uwapanayan na pamaw na wari, 8kemazu mu patalru kanazu mukuwa i Bētlēhēm, marengay: <<uwa i inmu, tareiya'u i izu na alrak, nu muatrevung lra mu alamu pakalrazamay ku, maruwaya ku mukuwa semungala kantaw.>>
9a kinger kanini na ngay, zi muveruk lra nazu. a azu mu, nazu tu nina'uwan na vitu'en i lauz mu masalr ziya mupana, pawnung kazu i ngawayan pilralrang kemezeng kanazu, palru za meredeka kana alrak tu kinazuwan i makatras zi maziyazi. 10mena'u nazu kanizu na vitu'en mu, tatena' lra za semangal. 11a musavak lra kana ruma' nazu, mena'u kana alrak zi kani tainataw i Maliya, zi mihelrupu semungal kanini na alrak, kemazu zi kiyutrav kana pinazangal na travak, melak pupana kana kim, na pakaulringulr, moyak na kulriyames semunan veray kantaw.
12i tiya'an, pakalrazam kanazu na Viruwa i itras iauwa mareveliyasa mukuwa kirepana'uwa kani Hērodē, kemazu zi makalrang kana zuma na dalan muveruk muruma' kantaw nazu.
penusar mukuwa i Ēzibuto
13a muveruk nazu mu, na tēnsi ni Luzu kurepana'u kazu kana tiya' ni Yosēf, marengay: <<karahan! pilralrangu na alrak zi i tainataw pusar uwa i Ēzibuto, kikazu i kazu, palru za patalru ku kannu za uwaveruk i kazu; 'alrana i Hērodē semakesak miya' kanini na alrak, piyanatray kantaw.>>
14kemazu zi, masikasik i Yosēf, 'emaremengan murung kana alrak zi i tainataw penusar mukuwa i Ēzibuto, 15kaazu i kazu, palru za minatray lra i Hērodē. ini na lremak mu maw pula'esi za pakalrang kana patralritralri tu nirengay ni Luzu: <<ku daulraw pupana nanku Alrak kemay Ēzibuto.>>
pinatray kana vu'enin
16i Hērodē marulrazam kantaw za kana mitrepa kana nirekudayan za vitu'en, ka'ilremesan, zi miturus kanantu kiningeran kana mitrepa kana nirekudayan na vitu'en tu inupanayan na wari kanizu na vitu'en, zi pakarun za trau kazu i Bētlēhēm zi i dalrep na pinidare'an na pakalusu za zuwaya 'ami na alrak na ma'inayan piyanatrayaw mapiya.
17i ini na lremak mu pula'esi lra kanantu nirengay na patralritralri i Yēlimiya:
18kazu i Rama kinger lra
za pakirev trematrangis a lrengaw.
muramawan kana lralrak trematrangis i Rakēl,
'azi muwai kidelu'us,
'alrana minatray lra nazu mapiya.
muruma' kemay i Ēzibuto
19a minatray lra i Hērodē mu, kazu i Ēzibuto, na tēnsi ni Luzu kazu i tiya' ni Yosēf kurepana'u, 20marengay: <<karahan! pilralrangu na alrak zi i tainataw uveliyas i Iseraēl, 'alrana nazu na maranger pinatray kanini na alrak na trau mu minatray lra.>> 21kemazu zi masikasik i Yosēf, murung kana alrak zi i tainataw muveruk mukuwa i Iseraēl.
22'alrana kinger i Yosēf kani Arekēlaus tremungulr kituluz kani temamataw i Hērodē mutu yawan i Yodaya, makaud mukuwa i kazu. i likuzan lra, i Luzu masalr ziya kazu i tiya' ni Yosēf pakalrazam kantaw, zi mukuwa kirevavulriya i Galili na pidare'an i intaw, 23kikazu lra kana Nazalē kinuwa na zekalr. ini mu maw pula'esi lra kana patralritralri kanantu nirengay: <<utu trau i Nazalē kema.>>
ទើបបានជ្រើសរើសហើយ៖
Matay 2: TPN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© The Bible Society in Taiwan, 2023