Matay 9
9
i Yēsu paka'inava kana mikuwalengan kana mutuwalre'ap na trau
(Maruko 2.1-12; Luka 5.17-26)
1muitras kana tamina i Yēsu, melavat lra kana danaw, mukuwa kanantu kazekalran. 2ulra a trau 'emalu kana i'ezeng i lre'ap na mikuwalengan kana mutuwalre'ap kuwaaleng na trau zuwa kantaw i ngawayan. i Yēsu malrazam mena'u kanantu pakutatena'an nazu, zi kema marengay kana mikuwalengan kana mutuwalre'ap na trau: <<alrak, ikavangavang mianger, mulapus lra nannu pinamelriyan!>>
3ulra papida na sinsi kana Sēsiyo kema mianger: <<ini na trau kapalavatan kemamatras lra marengay!>>
4i Yēsu malrazam kanazu za kemiyaanger za eman, zi kiyumalr: <<kemuda zi mianger mu za kuwatreng awa? 5marengay kanini na trau za <mulapus lra nannu pinamelriyan> kalre'ayan, nu 'azi mu marengay za <karahan kakawang> kalre'ayan nay? 6uwasay ku kanmu, Alrak na trau kazu i punapunan mikezang melapus za pinamelriyan.>> kemazu zi i intaw kema marengay kanizu na mikuwalengan mutuwalre'ap na trau: <<karahan, elaku nannu lre'ap, uruma' lra!>>
7zi marahan izu na trau, muveruk muruma' lra. 8na mena'u na trau ziya mu mare'alav purekaud; semenay puitras kana Viruwa i itras nazu, 'alrana veray kana trau za kemani na kezang i intaw.
kidaulr i Matay
(Maruko 2.13-17; Luka 5.27-32)
9muwaday i Yēsu i kazu kemakawang ziya mungawayan, mena'u za sasa kisasata na trau mingadan kani Matay, kemayan kana pusasatayan. marengay i Yēsu kantaw: <<alamu kurelrang kaninku!>>
zi marahan i Matay, kurelrang lra kani Yēsu.
10i Yēsu kazu kanantu ruma' ni Matay a maekan mu, kazuwan na kisasata zi na kuwaatrengan na trau mu zuwa lra, kurelrang kani Yēsu zi kanantu temakesi mukasa mekan. 11ulra papida na Palisay na trau mena'u lra mu, zi kema marengay kanantu temakesi ni Yēsu: <<kemuda zi nanmu sinsi marelrang kana kisasata zi na kuwaatrengan na trau mukasa mekan ziyamaw?>>
12a kinger lra i Yēsu kanini na ngay mu marengay: <<na dalikedikan na trau mu 'azi kiyana'u kana ising, na mikuwalengan na trau mu kiyana'u kana ising. 13marengay na Sēsiyo: <ku niranger mu maw na kemalawas melraman, amelri na patavangan.> uwa rangangeru tu pauwayan ini na ngay mu! 'alranu nanku iyazuwa na pauwayan mu amelri demadaulr kana 'inava na trau, a mawna demadaulr kana kuwatrengan na trau.>>
kiyaumalran za 'a'iwayan
(Maruko 2.18-22; Luka 5.33-39)
14ulra paresan, tu temakesi na semasuwap i Yohanē zuwa kiyumalra kani Yēsu: <<iniyam zi na Palisay na trau marayas 'ema'iway, mawmu nannu temakesi 'azi 'ema'iway, kumuda ziyamaw?>>
15temuvang i Yēsu: <<na pinakaetim na ma'inayan anu kazu ziya kana semasaharan mu, na zuwa semasahara 'emaperez na trau mu kasipeleng ziyamaw? 'azi kuwaazu. mawmu uri raredek lra na wari, na pinakaetim na ma'inayan tu i aurungaw muveruk kemay kanazu i savakan, nu azu mu 'a'iway lra nazu.
16<<iniyan za trau melak kana vekal na inuwan tremapang kana maluman na kavang, 'alrana vekal na inuwan tu i papirisaw izu na maluman na kavang, puwapuwa ma'izang na mupiris. 17zi iniyan za trau melak kana vekal na kutra mavak kana maluman na kalritr na luvuk. nu kemani mu, papalretruk na kalritr na luvuk, uwalra'ud na kutra, arusay na kalritr na luvuk mu kakuwaatreng lra. na vekal na kutra aavaken kana vekal na kalritr na luvuk; nu kemazu mu, ka'iyanava mutarazuwa.>>
alrak na vavayan kana ma'izang i waazukan ruma' zi na vavayan na mikuwalengan kana maiviv
(Maruko 5.21-43; Luka 8.40-56)
18penauwa i Yēsu za venavati kanantu temakesi ni Yohanē kananni na ngay mu, ulra a sasa tu ma'izang kana waazukan ruma' i Yodaya zuwa kirepana'uwa kantaw, malrituzu i ngawayan kantaw, marengay: <<nanku alrak na vavayan mawziya minatray a haremay, 'alrazi alamu i inu dikesi i intaw, marevaawa masalr i intaw.>>
19marahan i Yēsu, kurelrang kantaw mukuwa; tu temakesi ni Yēsu mukasa mukuwa.
20ulra a sasa vavayan kuwaleng lra za muketrep zi zuwaya 'ami za maiviv; mukuwa i likuzan kani Yēsu, semihiyu tu lrungpaw i kapuyungan. 21kemianger i intaw: <<nu semihiyu ku ziya kanantu lrungpaw i kapuyungan mu, 'azi ku ka'azi 'inava.>>
22marepiles pikuwani i Yēsu mu, mena'u kantaw, zi marengay kantaw: <<alrak a, amanan na mavangavang mianger, nannu pakutatena'an venaaw lra kannu!>> maw a azu, 'inava lra nantu kuwalengan izu na vavayan.
23zuwa i Yēsu kanantu ruma' kanizu na ma'izang, mena'u kana makuwa tremevelra na patatiyup na trau zi na mavuri'awan na mulepun na trau, 24zi marengay kanazu: <<upatraran i inmu mapiya, ini na alrak na vavayan 'azi minatray, mawna trurin alrupe' i intaw!>>
tu kalikeday mapiya za trau i intaw. 25kivawi nanni na mulepun na trau i likuzan lra mu, musavak kanantu kiya'ezengan kana alrak na vavayan i Yēsu, kemezeng kanantu lima, zi marahan i intaw. 26ini na lremak mupalenak lra peniya kana pinidare'an.
paka'inava kana zazuwa na mavutri' na trau
27muveruk i Yēsu kanizu na kinazuwan, kemakawang ziya mungawayan. ulra a zazuwa mavutri' kureturus kantaw, 'emuy'uy marengay: <<Alrak ni Davidē a! kalramanaw mi a!>>
28a musavak lra i Yēsu kana ruma', zuwa i ngawayan kantaw na zazuwa mavutri' na trau, zi kiyumalr kanazu i intaw: <<pakutatena' mu kaninku za kararuwa ku kemakuda kanini na lremak ziyamaw?>>
temuvang nazu: <<Luzu a, pakutatena' mi.>>
29kemazu mu, demikes kanantu matra nazu i Yēsu, marengay: <<paturusanay kananmu pakutatena'an pula'esi kanmu mu!>> 30nantu iyana'u mareveliyas 'inava lra. kemaaluzun marengay patalru i Yēsu kanazu: <<amanan marengay kanini na lremak kani i eman ziyan!>>
31mawmu, a mupatraran nazu mu na lremak ni Yēsu tu pu'ivatanay i kazu makaiyaiyan ziya.
paka'inava kana ma'umuy
32a mupatraran nazu mu, ulra a trau tu pilralrangaw a sasa kipalrar a ma'umuy zuwa i ngawayan kani Yēsu. 33a kivawi mupatraran na palrar mu, izu na trau mararengay lra. salaw mare'alav mapiya, marengay: <<kani i Iseraēl, 'azi ta ziyan mena'u kemani za lremak.>>
34mawmu, marengay na Palisay na trau: <<i intaw kuretalrima kana yawan na palrar venawi kana palrar.>>
i Yēsu mulraman kana zinekalranan
35i Yēsu muwa'iva'ivat kana kazekalran zi kana zekazekalr, kazu kana waazukan ruma' ziyan panadam kana trau, venavati za fukuing kana kanatal i itras, pawnung paka'inava i zazekazekalr kana marekamelrimelri na kuwalengan. 36a mena'u i intaw kana mulepun na trau, zi purelraman i anger; 'alranu kasasayan iniyan za kipuwalrangan, kamawan kana siri na iniyan za puwarikan. 37kemazu ziyanay, marengay kanantu temakesi i intaw: <<salaw sazu na ra'anien, mawmu na mara'azni na trau salaw kaytayan. 38kiyamiya mu kana mi'a'uma kani Luzu, pakarun za trau zuwa mare'aniya kanantu sinaleman.>>
ទើបបានជ្រើសរើសហើយ៖
Matay 9: TPN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© The Bible Society in Taiwan, 2023