Matay 8
8
i Yēsu paka'inava kana malripay na trau
(Maruko 1.40-45; Luka 5.12-16)
1mulusu kemay zenan i Yēsu, mulepulepun na trau kurelrang kantaw. 2ulra a sasa malripay na trau zuwa kirepana'uwa kantaw, malrituzu semungal kantaw, marengay: <<Luzu a, nu muwai u mu, maruwa u pakakirungetr kaninku!>> 3i Yēsu pupana za lima demikes kantaw, marengay: <<muwai ku, mukirungetr u lra!>> nantu lripay payas malremes, mukirungetr lra. 4kemazu zi marengay i Yēsu kantaw: <<amanan marengay kana trau kanini na lremak. parepayas uwa kirepana'u kana rahan, pakinsayan i inu kantaw, zi iturusi nantu kuret ni Mosē semunan patavang, uwasay kana trau mapiya za tatena' u lra mukirungetr.>>
i Yēsu paka'inava kana ma'izang na Roma hitay kanantu pakarunan
(Luka 7.1-10)
5i Yēsu zuwa i Kabēnum, ulra a sasa tu ma'izang kana Roma hitay zuwa kiyatrevunga kantaw, kiyami kantaw za kipuwalrangan, 6marengay: <<Luzu a, nanku pakarunan kuwaleng za mutuwalre'ap, ulra i'ezeng i ruma', salaw maulep.>>
7marengay i Yēsu: <<kaya ku paka'inavaya kantaw.>>
8temuvang na ma'izang kana hitay: <<Luzu a, nu zuwa u i ruma', 'azi ku kirepa'uwa; nu temuru u ziya saya za ngay mu, ka'iyanava lra nanku pakarunan. 9kamawan i makatras kaninku ulra na pakarun kaninku na ma'izang, i makalusu ulra na kipakarun kaninku na hitay; semeratr ku kanini na sasa za trau mukuwa mu, zi mukuwa i intaw, semeratr kaniziyu na sasa za zuwa mu, zi zazuwa i intaw, marengay kananku kuli <kikarunu ini na lremak>, zi mukuwa kikaruna i intaw.>>
10kinger i Yēsu kanini na ngay mu, salaw pakumelri, marengay kana kurelrang kantaw na trau: <<tematena' ku marengay kanmu, kamawan kana kemani na pakutatena'an mu, kazu ku kana Iseraēl na trau i savakan, 'azi ku ziyan mena'u. 11marengaya ku kanmu, uri kaazu a kazuwazuwan zuwa kemay i lauz kemay i zaya, kurelrang kani Aburaham, Isak, Yakob mukasa semasaharan kana kanatal i itras. 12nazu na trau a mawziyan karuwa mutu zinekalranan kana kanatal i itras, muveliyas kivawi mukuwa i patraran kana 'aremengan i savakan, kaazu i kazu, tratrangis nazu, pakakaratr za walri.>> 13kemazu zi marengay kana ma'izang kana hitay i Yēsu: <<uruma' lra, paturusanay kanannu pakutatena'an zi veray kannu za mutulre'ay pula'esi!>>
tu kuwalengan nantu pakarunan mu 'inava lra a azu.
i Yēsu paka'inava kana kazuwan na kuwaaleng na trau
(Maruko 1.29-34; Luka 4.38-41)
14zuwa kana ruma' ni Pētēro i Yēsu, mena'u kani tainataw kanantu 'azin penauwa za zemelretr, i'ezeng i sa'esa'. 15a demikes kanantu lima i Yēsu mu, mulusu lra nantu vi'asan, kemazu zi marahan temara kani Yēsu.
16a karaurauv mu, ulra a trau pilralrang za kazuwan na pinalrar na trau zuwa kirepana'uwa kani Yēsu. i Yēsu mawmau mimanay za saya na ngay zi tu vawiyaw na palrar ziya, zi paka'inavayaw lra na kuwaaleng ziya na trau. 17na kemani i intaw penauwa pula'esi kanantu nirengay na patralritralri i Isaya:
<<tu pazekaw lra nanta apelran,
tu pizelrengaw lra nanta kuwalengan.>>
na kuwarelrang kani Yēsu na trau
(Luka 9.57-62)
18mena'u i Yēsu kana kazuwan a trau mulitrung kantaw mu, zi patalru kana temakesi za melavat kana danaw mukuwa i ngawayan makakuwaziyu kana dare'. 19ulra a sasa sinsi kana Sēsiyo zuwa kirepana'uwa kantaw, marengay kantaw: <<sinsi, nu mukuwa u lra i iyan mu, kuwarelrang ku kannu.>>
20marengay i Yēsu: <<ulra nantu vuwang na kungkung, ulra nantu ruvu na 'ayam, mawmu Alrak na trau arusay iniyan za salrazanan.>>
21ulra zuma a sasa temakesi kema marengay kani Yēsu: <<Luzu a, 'alrazi piyanguwayanaw ku ziya puruma' mukuwa tremevelra kani amalri.>>
22marengay i Yēsu: <<pakarasa kureturus kaninku i inu, pauwayu na minatray na trau tremevelra kanantu trau na minatray mu!>>
papaziyazi kana vali zi na kelun i Yēsu
(Maruko 4.35-41; Luka 8.22-25)
23muitras lra i Yēsu kana tamina, nantu temakesi kurelrang kantaw mukuwa. 24maherareher za, venali pakirev i itras kana danaw, na kelun tremaruv lra kana tamina, trurin lra alrupe' i Yēsu. 25zuwa i ngawayan kantaw na temakesi, venalruk kantaw, marengay: <<Luzu a, vaawaw mi, 'azi mi lra kavaaw a!>>
26temuvang i Yēsu: <<kemuda zi kemani kana makaud? kamakitengan lra nanmu pakutatena'an!>> kemazu zi marahan i intaw, maselru kana vali zi na kelun, zi maziyazi lra na vali zi na kelun.
27salaw maherareher mapiya, zi mazayazayar: <<i eman ini na trau, arusay na vali zi na kelun mu mukinger kantaw!>>
paka'inava za zazuwa na mupalrar na trau
(Maruko 5.1-20; Luka 8.26-39)
28i Yēsu mukuwa i ngawayan kana danaw makakuwaziyu kana Katara na pinidare'an, kiretrevung za zazuwa a mupana kemay trevelran na trau. kipalrar ini na zazuwa, salaw malemu, zi kemani iniyan a trau za 'uringetr kemakawang kanini na dalan. 29mena'u lra kani Yēsu nazu, payas 'emuy'uy marengay: <<Alrak na Viruwa i itras, kemuda zi zuwa u meringiza kaniyam? 'azi ziya meredek na wari zi zuwa u pakaulepa kaniyam ziyamaw?>>
30penauwa, i dalrep ulra mulepun a lriyung maaekan. 31zi na palrar kiyami kani Yēsu: <<nu vavuraw u pupatraran kaniyam mu, pusavakaw mi kana lriyulriyung i savakan mu.>>
32marengay i Yēsu: <<uwa a!>> zi mupana na palrar, musavak kana lriyulriyung i savakan; na lriyung peniya semerepang mutani kana tengalr, musavak kana danaw i savakan, minatray lra kana zanum peniya.
33na purarikan kana lriyung na trau penusar mukuwa i kazekalran, pakalrazam kana trau mapiya kanini na lremak kemay rakaz palru puludus zi tu pinakalrangan na kipalrar na trau. 34na trau mapiya i kazekalran mupatraran zuwa mena'uwa kani Yēsu, mena'u lra nazu, zi kiyami kantaw za uveruk uwaday kanantu pinidare'an nazu kama.
ទើបបានជ្រើសរើសហើយ៖
Matay 8: TPN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© The Bible Society in Taiwan, 2023