Matay 7
7
iparevativati kemuret za trau
(Luka 6.37-38, 41-42)
1<<iparevativati kemuret za trau, zi 'azi taw mu sayvangi na Viruwa i itras. 2'alranu, kemuda mu parevativati kemuret za trau mu, na Viruwa i itras tu kamawanaw sayvang kanmu; mimanay mu za eman vakesiyu venakesiyu mu, na Viruwa i itras kemazu pimanay kana mararesan na vakesiyu venakesiyu veray kanmu. 3kemuda zi mawmau mena'u u tu rimekan na kawi i matra kanannu wadadiyan, mawmu 'azi milingaw kanannu matra na ma'izang na puwalrepus awa? 4ulra ma'izang a puwalrepus kanannu matra, kuwadakuda marengay kana wadadiyan <kuwa puelakaw nannu rimekan na kawi i matra> ziyamaw? 5inu na kitu'inavanava na trau, piyanguwayanu puelak na puwalrepus kanannu matra, zi maruwaya mena'u patulre'ay za kemuda puelak kanantu rimekan na kawi i matra kana wadadiyan.
6<<na vangesangesar na eman amanan 'ematelr veray kana suwan, munu marepiles kemaratr kanmu; amanan 'atelranay na sinziyu veray kana lriyung, tu i lralrumetraw na sinziyu kanantu kuy i makalusu.>>
kiyanun, miya', tremunetrun za 'alrevan
(Luka 11.9-13)
7<<nu kiyanun mu, zi kiyaveray mu; nu maaya' mu, zi kaatrevung mu; tremunetrun kana 'alrevan mu, zi truwalranay mu za 'alrevan. 8'alrana kiyanun ziya mu, zi kiyaveray; na maaya' mu, kaatrevung; na tremunetrun kana 'alrevan mu, mutruwalr na 'alrevan lra. 9ulra i eman kanmu i savakan, nu kiyaveray za pang na alrak mu, zi tu verayay za varasa'? 10kiyaveray za vulraw mu, zi tu verayay za unan? 11ara kuwatrenga mu, malrazam mu ziya melak kana 'inava na eman veray kananmu lralrak, nanmu Temama i itras kamelriyalra 'azi puwapuwa veray za 'inava na eman kana kiyanun kantaw na trau ziyamaw?
12<<semeneng, nu maranger mu kemuda kitara za trau mu, kemazuwa mu temara za trau; i ini mu maw tu kuret ni Mosē zi tu panadam na patralritralri na tatena' tu pauwayan.>>
sa'utr na sulray
(Luka 13.24)
13<<inmu usavak kemay kana sa'utr na sulray; 'alrana izu na makuwa kana matrepu na sulray mu mawna lawas, na dalan 'inava nu kemakawang ta, na mukuwaani na trau mu kazuwan. 14izu na tremepa mukuwa kana uwavaawan na sulray mu kemudakuda kana sa'utr, na dalan mu kemudakuda kana kakuwalengan kemakawang, na atrevung na trau mu kaytayan.>>
kawi zi na vuwa'
(Luka 6.43-44)
15<<temaranapawa mu kana mavetra' na patralritralri. zuwa nazu kanmu i ngawayan mu, seme'er ta i panayan mu kamawan za siri, i savakan mu maw na malemu na suwasuwan i alalas. 16karuwa mu pakumaw mena'u kanazu kemay kanantu paelrangan. na su'asu'ar 'azi karuwa mivuwa' za budo, na sangka 'azi karuwa mivuwa' za tepur. 17na 'inava na kawi mivuwa' za 'inava; na kuwatreng na kawi mu mivuwa' za kuwatreng. 18na 'inava na kawi 'azi mivavuwa' za kuwatreng; na kuwatreng na kawi 'azi mivavuwa' za 'inava. 19'azi mivavuwa' za 'inava za vuwa' na kawi mu aeteken, 'atelranay kana apuy i savakan. 20semeneng, kemay tu paelrangan nazu, karuwa mu pakumaw mena'u kana mavetra' na patralritralri.
'azi ku malrazam kanmu
(Luka 13.25-27)
21<<amelri na venina ziya kaninku za <Luzu a, Luzu a> kema na trau ziya mu karuwa musavak kana kanatal i itras; mawmau na tematena' miturus tu nirangeran ni Ama i itras mu kararuwa musavak. 22nu meredek na uwaludusan na wari mu, kakazuwan na trau kema kaninku marengay: <Luzu a, Luzu a, a aziyu ziya pakalrang mi zannu ngadan palenak za vati na Viruwa i itras, zi a aziyu ziya pakalrang zannu ngadan venawi kazuwan za palrar, pakakawang sazu za karepalripalri.> 23nu azu, rarengay ku kanazu kana trau i ngawayan: <'azi ku ziya malrazalrazam kanmu; inmu na kemuwaatreng mu, uveruk a!> >>
zuwaya na pukaarekezan
(Luka 6.47-49)
24<<semeneng, na kinger ziya kananni nanku ngay zi miturus mu, kamawan kana misayhuwan na trau parahan kana ruma' i danapan i itras; 25anu tu valiyay, 'udalray, 'ung'ungaw za zanum, 'azi muwareve' na ruma', 'alrana tu puarekezan i rakaz ipatikezir kana danapan i itras. 26mawmu, izu na kinger kananni nanku ngay zi 'azi miturus mu, kamawan kana mapungaw na trau parahan za ruma' kana vutrevutrek i itras. 27nu tu valiyay, 'udalray, 'ung'ungaw za zanum, zi mureve' lra na ruma', pawnung mutrerev za kemudakuda kana pakirev!>>
kareayawanan ni Yēsu
28piya lra marengay i Yēsu kananni na ngay, na zinekalranan ziya mu pasalaw maherareher pakumelri kanantu ipanadam; 29'alrana nantu ipanadam ni Yēsu salaw mikezang, zi 'azi maresan kanantu sinsi kana Sēsiyo nazu.
ទើបបានជ្រើសរើសហើយ៖
Matay 7: TPN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© The Bible Society in Taiwan, 2023