Genesis 1
1
Esito
1Pomuhowo Karunga kwa sitire eguru nevhu. 2Evhu kwa lirumba-rumbire, alyo hena mawoko‐woko lya kere. Ano mundema makura tagu kudumike etondo lyomema. Mpepo zaKarunga ngazi teremba nye kontunda zomema. 3Makura Karunga ta tanta asi: “Uzera u kare po.” Makura uzera tau kara po. 4Ano Karunga eyi ga mona asi uzera una zire mo, makura ta hangura nye uzera komundema. 5Uzera Karunga ta u ruku ‘Mutenya’, ano mundema ta gu ruku ‘Masiku’. Tapa kara nye ngurova nongurangura. Olyo ngoso ezuva lyomuhowo.
6Karunga makura ta panga asi: “Pa kare mbando zokugaununa mema, asi ga kare pomavega gavali gokulikarera.” Makura tayi kara po. 7Yimo nye ga peke po ngoso Karunga mbando zokuhangura mema ga kare konhi zazo, gamwe keguru lyazo; 8mbando makura ta zi ruku ‘Eguru’. Tapa kara ngurova nongurangura. Olyo ngoso ezuva lyauvali.
9Makura Karunga ta panga asi: “Mema gokonhi zeguru ga ponge pamwe tupu, ukukutu u moneke.” Makura tayi kara po. 10Ukukutu ta u ruku ‘Evhu’, ano mema aga ga pongere, ta ga ruku ‘Efuta’. Makura ta tara eyi ga rugene, hawe yina wapa. 11Makura ta panga asi: “Evhu li mene yimeno peke‐peke, yimwe yokuyima mbuto, ano eyi yimwe yokuyima enyango.” Makura tayi kara po. 12Makura evhu tali mene yimeno peke‐peke, yimwe yonombuto, ano eyi yimwe yokuyima enyango. Karunga makura ta tara eyi ga rugene, ta yi mono asi yina wapa. 13Tapa kara nye ngurova nongurangura. Olyo ngoso ezuva lyautatu.
14Karunga makura ta panga asi: “Ku kare mauzera keguru gokuhangura mutenya nomasiku. Ga kare yidiviso yomazuva nonomumvho noyiruwo. 15Ngayi teme keguru yi gave uzera kouzuni.” Makura taga kara po. 16Karunga makura ta paka po mauzera gomanene gavali, ezuva lyokupangera mutenya, ano kwedi kokupangera masiku; age kwa peke po hena nombungururu. 17Age kwa tulire mauzera keguru ga minikire uzuni, 18ga pangere mutenya nomasiku, ago hena ga hangure uzera nomundema. Ta tara eyi ga rugene, ta yi mono asi yina wapa. 19Tapa kara ngurova nongurangura. Olyo ngoso ezuva lyaune.
20Karunga ta panga asi: “Mema ga kare noyinamwenyo peke‐peke, ano yidira yi tuke keguru.” Makura tayi kara po. 21Yimo nye ga sitire ngoso Karunga mamukorama gomanene noyinamwenyo nayinye eyi ya likohere momema, noyidira yomarudi peke‐peke. Ga yi tara eyi ga rugana, ta mono asi yina wapa. 22Age makura ta yi tungikisa kompangera ezi asi: “Yinamwenyo yomomema ngayi livhare tayi zura mefuta, yidira nayo ngayi vhuke.” 23Ngurova tazi ka pita, ngurangura tazi wiza. Olyo ngoso ezuva lyautano.
24Karunga ta panga asi: “Pevhu pa kare yimuna peke‐peke noyikorama peke‐peke yoyinene neyi yoyinunu.” Makura tayi kara po. 25Yimo nye ga sitire ngoso yimuna peke‐peke noyikorama peke‐peke yoyinene neyi yoyinunu. Ga tara eyi ana rugana, ta mono asi yina wapa.
26Karunga makura ta ninki asi: “Ntaantani tatu ungeni po nye vantu; muntu nga kare ngwendi nyose, a tu fane. Age nga pangere nomfi domomema noyidira yekeguru noyimuna noyikorama nayinye yoyinene neyi yoyinunu yepevhu.” 27Makura Karunga ta ungu nye vantu; muntu kwa mu ungire a fane Karunga. Age kwa va ungire mugara nomukadi. 28Makura ta va tungikisa kompangera ezi asi: “Livhareni mu zwide evhu, makura ruvharo rweni ngaru li pangere. Tani mu pe nonkondo dokupangera nomfi noyidira noyikorama nayinye yoyinene neyi yoyinunu.” 29Karunga ta tanta hena asi: “Tani mu pe nombuto nadinye nenyango nalinye lyomouzuni mudima mu lye; 30nye yikorama yoyinene neyi yoyinunu nayinye noyidira nayinye, tani yi pe yimeno yoyitarara, yido nondya dayo.” Makura tayi kara po. 31Ano Karunga eyi ga tara nayinye eyi ga rugene, tayi mu zi komutjima. Ngurova tazi ka pita, ngurangura tazi wiza. Olyo ezuva lyautano‐nalimwe.
ទើបបានជ្រើសរើសហើយ៖
Genesis 1: KWN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Egwanekerobibeli Lyanamibia 1987, 2003
© Bible Society of Namibia 1987, 2003