Genesis 2
2
1Makura evhu neguru neyi ya kara ko nayinye tayi pu kusita. 2Mezuva lyautano‐nauvali Karunga age ana mana eyi ga rugene, mezuva olyo yimo ga pwizumukire. 3Age kwa tungikire ezuva lyautano‐nauvali, ta li pongora mo momakwawo li likarere, yeeyi mezuva olyo yimo ga mene esito lyendi, a hulise kurugana. 4Yimo nye ngoso ga sitire evhu neguru neyi ya kara‐kara ko nayinye.
Sikunino saEdeni
Apa ga sitire Karunga evhu neyi nayinye ya kara keguru, 5kapi pwa kere yimeno pevhu ndi mbuto asi zi mene, yeeyi kapi ga tumine mvhura pevhu. Apo hena kapi pwa kere gokulima mapya. 6Nampili ngomu pwa pilire mvhura, eundu ngali tuntuka li nengedeke evhu.
7Makura Hompa Karunga ta gusa evhu limwe a li unge muntu, ta mu heserere munku gomwenyo momazuru, makura muntu ta kara munamwenyo.
8Makura Karunga ta rugana sikunino moEdeni, korwaUpumezuva, makura ta tura mo muntu ogu ga ungire. 9Karunga ta menesa mo yitji yomarudi peke‐peke yoyiwa mokutara, eyi ngayi yimi enyango lyewa. Pokatji kosikunino pa kere nye sitji sokugava mwenyo, nesi sokugava ediwo lyeyi yoyiwa neyi yoyidona.
10Mukuro makura tagu tundilire moEdeni gu tekere sikunino, ano ago kwa ligaunwine monomukuro ne. 11Edina lyomukuro gomuhowo Pisoni; ago yigo gwa kunduruka sirongo saHavhira. (12Omo yimo nye ava gwana ngorodo zene‐zene, nomanganganga gomulyo nomamanya gomageha goonikisi.) 13Edina lyomukuro gwauvali Gihoni; ago kwa kunduruka sirongo saKusi. 14Mukuro gwautatu Tigilisi, ogu gwa genda koUpumezuva waAsuli. Mukuro gwaune Eufurata.
15Makura Hompa Karunga yipo nye ga damwine muntu, ta mu tura mosikunino saEdeni a si rugane a si pakere mbili. 16Age kwa pangerere muntu asi: “Yiyimwa yokoyitji nayinye yomosikunino kulya tupu, 17ntudi yokositji esi asi gava ediwo lyeyi yoyiwa neyi yoyidona no. Siyimwa saso nokanunu si asi o si lye. Nsene ngo yi hetekera, ngo fa lyoolyo ezuva.”
18 Hompa Karunga makura ta ninki asi: “Kapisi nawa asi muntu a kare gelike. Tani mu ruganene ko gokumuhamena, mukwafi gwendi.” 19Makura ta gusa evhu limwe, ta rugana yikorama nayinye yepevhu noyidira nayinye yekeguru, makura ta yi retere muntu a tare omu na yi ruka. Ano madina aga ga yi ruka‐rukire muntu, yigo ga kara madina gayo. 20Makura muntu ta ruku yimuna nayinye noyidira noyikorama; nye gokumuhamena mukwafi gwendi kutupu.
21Makura Hompa Karunga ta ponyokesa muntu nompofu dokufa nokutara. Ano eyi ga ponyoka ngoso, Karunga ta mu gusa rupatji rumwe, ta sitike po opo nonyama. 22Oro rupatji oru ga gusire momugara, ta ru rugana mukadi, makura ta mu mu retere. 23Makura mugara ta tanta asi:
“Hawe ogu ntaantani
damu‐damu nyame nye,
sisupa somoyisupa yange,
nonyama zomonyama zange.
‘Mukadigara’ yilyo edina lyendi,
yeeyi age kuna mu gusa momugara.”
24Yipo nye a sigire mugara nozina, makura ta likwatakana namukadendi, makura tava kara gumwe tupu.
25Navenye pouvali wawo marutu‐rutu va kere, nye kapi va fire nomuga.
ទើបបានជ្រើសរើសហើយ៖
Genesis 2: KWN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Egwanekerobibeli Lyanamibia 1987, 2003
© Bible Society of Namibia 1987, 2003