Genesis 3
3
Kuzona komuntu
1Ano ezoka kwa kere nomamundunge kupitakana yikorama nayinye eyi ga sitire Hompa Karunga. Ezoka makura tali pura mukadi asi: “Enye sili Karunga ga mu tantera asi walye omu li yiyimwa yokoyitji eyi ya kara mosikunino ndi?”
2Mukadi ta limburura asi: “Ose kuvhura kulya yiyimwa yokoyitji eyi yomosikunino, 3ntudi yokositji sopokatji no. Karunga kwa tanta asi, nokulya si siyimwa sokositji oso, ndi nampili kuguma kooku nokusiguma si, nsene tu yi hetekera, ngano ngatu fa.”
4Ezoka tali limburura asi: “Ndangako asi ngomu fe one. 5Karunga kwa yi tantera eyi morwa ga diva asi nsene ngomu lya ko, neisi ngomu gwana nondunge, ngomu mu fane mokudiva yoyiwa neyi yoyidona.”
6Mukadi makura ta tara oso sitji omu sa fuura nomu ya wapa yiyimwa yaso mokutara, ta gazara omu ya wapa yokukara nonondunge. Makura ta gusa ko siyimwa simwe, ta li. Ga ninka ta pe ko yendi, makura nage ta li. 7Kwa mana tupu kulya, tava gwana nondunge, tava limono asi muherehere vana kara; yipo nye va ninkire va tunge yihako youkuzu va livive.
8Ngurova ozo ako kuna tenderere, tava zuvhu Hompa Karunga ta gendi mosikunino, makura awo tava ka vanda mokatji koyitji. 9Nye Hompa Karunga ta zigida muntu asi: “Kupi oku ono kara?” 10Mugara ta limburura asi: “Nina ku zuvhu mosikunino, ame kuna tjira, yiyo nina ka vanda, yeeyi muhere‐here nina kara.”
11“Ogu ana ku tantere asi muherehere ono kara yilye ogo?” Yimo ga mu pulire Karunga. “Ndi kuna li siyimwa esi na ku sansekera asi nokusilya si?”
12Mugara ta limburura asi: “Mukadi ogu wa pa nge, yige ana pe nge siyimwa asi ni lye, name yiyo na li.”
13 Hompa Karunga ta pura mukadi asi: “Yinke eyi ono yi ruganene?” Gwina ta limburura asi: “Ezoka lina kumbagere nge, makura yiyo na li.”
Karunga ta divisa mfuto zonzo
14Makura Hompa Karunga ta tantere ezoka asi:
“Pweyi yipo nava ku futisira,
moyimuna nayinye
nomoyikorama nayinye yepevhu
efingiliro lyanyovelike lyeli asi:
Kutunda apa ove ngo wovanesa
kezimo lyoge,
mbundu yido nondya doge ngadi kara.
15Ngani paka unkore pokatji koge nomukadi
pokatji koruvaro roge noru rwendi.
Aro ngaru myona mutwe goge,
ove ngo ru huma kosinsinsina saro.”
16Karunga makura ta tantere mukadi asi:
“Ngani nenepeka udigu woge
pokukara nezimo,
nokukora pokuhampuruka koge,
nye meharo nyove tupu kuhara yoge,
ano age nga kara mupangeli goge.”
17Karunga ta tantere hena Adamu asi:
“Ove kuna zuvhu lyamukadoge,
yiyo ono li siyimwa esi na tanta
asi nokusilya si.
Moomu ono yi rugana eyi,
evhu ngani li fingilira.
Ngo rugana unene ukaro woge naunye,
ngali ku pe nondya dina gwana po.
18Ngali ku menesera mega
noyihwa nononhonho,
ano ove ngo lya yimeno yomosanzara.
19Ngo rugana unene, to tjimpuka
asi o gwane nondya,
dogoro noku ngo tengwira
mevhu omu va ku gusa.
Yeeyi ove kwa tunda mevhu,
makura ngo kara hena evhu.”
20Mugara makura ta ruku mukadendi Eva, yeeyi yige zinyavantu navenye.
21 Hompa Karunga makura ta ruganene oAdamu namukadendi yidwara yoyipapa yoyikorama, ta va dwareke.
Adamu naEva tava va gusa mosikunino
22Makura Hompa Karunga ta tanta asi: “Ntaantani muntu damu‐damu nyose tupu nye, yeeyi ana kara nye nediwo lyeyi yoyiwa neyi yoyidona. Nokumutarerera si hena a lye siyimwa sokositji somwenyo, nga dire kufa.” 23Hompa Karunga yipo nye ga mu gusire mo mosikunino saEdeni, a mu ninke a ka rugane evhu omu va mu gusa. 24Karunga kwa tjidire mo muntu, makura koUpumezuva wosikunino saEdeni, ta tura ko vakerubi negonga lyomundiro lyokuvyuka‐vyuka komaruha nagenye. Alyo lyokukonderesa nkenye ogu ana kuhara kuwiza kositji somwenyo.
ទើបបានជ្រើសរើសហើយ៖
Genesis 3: KWN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Egwanekerobibeli Lyanamibia 1987, 2003
© Bible Society of Namibia 1987, 2003