ଜଅନ୍ 3
3
ଜିସୁଲା ନିକଦିମଲାବୁରଂ ଅଇଁଡେନ୍
1ପାରୁସି ଦଲ୍ବକ୍ ନିକଦିମ ଡ'ସେକ୍ ମୁଇନ୍ଡା ରେମ ଡୁକୁ । ମାଇ ଜିଉଦିରେମଲେନା ମୁଇନ୍ଡା ମୁନା'ରେମ୍ । 2ମାଇ ତୁମୁଂଗ ଜିସୁନ୍ବକ୍ ସାକ୍ସେକ୍ ସୁନ' “ଅ ଗୁରୁ, ଆରେମଲେ ଅମାକ୍ପୁଲେଇ ମାପ୍ରୁ ଆନ ବେନ୍ଟାୟ'ତା ଡ'ସେକ୍ ନେଇ ମାଗ'ତୁନେଇ । ମାସା'ଡ'ନା ମାପ୍ରୁ ତିରେ ଆଡୁକୁନା ନ ଡିନେମ୍ସୁଗ କାବାକାବା ଡିନ୍ଡେମ୍ବାଇ' କାମ୍ ଜାଏସା ଡିନ୍ଡେମ୍ ଆଗଂତା” ଡ'ସେକ୍ ସୁନ' ।
3ସା' ଜିସୁଲା ଆମାଇ ସୁନ' “ନିଂ ଆନ ସତ୍ ସୁନ'ତିଂ, ମାରି ମୁସଉ ଜନମ୍ ଆଡେଂନା ମାପ୍ରୁନା ରାଜି ଜୁଜୁ ଆଗଂତା” ଡ'ସେକ୍ ସୁନ' ।
4ସା' ନିକଦିମଲା ଆମାଇ ସୁନ' “ମୁଇନ୍ଡା ଡକ୍ରାକ୍ସେ'ଗା ମାରି ମୁସଉ ମି ଜନମ୍ ଡିନ୍ଡେମ୍ ଗଂତା । ମାଇ ମା ମାରି ମୁସଉ ୟଂନା ସୁଲଇ'ବକ୍ ଗାଇସେକ୍ ଜନମ୍ ଡେନ୍ତା ଇ?” ଡ'ସେକ୍ ଅ'ଗଁସ୍ଲା'ଗା' ।
5ସା' ଜିସୁଲା ଆମାଇ ସୁନ' “ନିଂ ଆନ ସତ୍ ସୁନ'ତିଂ, ଡାଗ୍ବୁରଂ ମାରି ମାପ୍ରୁନା ଜିବନ୍ବୁରଂ ଜନମ୍ ଆଡେଂନା ଜାଏସା ମାପ୍ରୁନା ରାଜିବକ୍ ଗୁଗାଇ ଆଗଂତା । 6ରେମଲେନ୍କୁରୁଂ ଜା ଜନମ୍ ଡେଂଗୁତା ମାଇ ରେମ । ମାତର୍ ମାପ୍ରୁନା ଜିବନ୍କୁରୁଂ ଜା ଜନମ୍ ଡେନ୍ତା ମାଇ ତିମେ ଜିବନ୍ ବାମ୍ତା । 7ମାରି ମୁସଉ ପେ ଜନମ୍ ଡିନ୍ଡେମ୍ ଡୁତା ଡ'ସେକ୍ ନିଂ ସୁନ'ନିଂସା' ନ କାବା ଆଡେଂଗା' । 8ଉଇଡାଗ୍ ତମ୍ବ' ମୁନ୍ ତଂତା ଉଇଡାକ୍ତ । ମାରି ଗୁତୁନ୍ ଲାଇକୁନୁଂ ନ ଅଂଅଁ'ତୁନ । ମାତର୍ ଗୁତୁନ୍ ଇମ୍ବ'କୁରୁଂ ସାପ୍ତା ମାରି ତମ୍ବ' ଉଇତା ଡ'ସେକ୍ ଆମାକ୍ତୁନ । ମାପ୍ରୁନା ଜିବନ୍ବୁରଂ ଜନମ୍ ଡେଂକୁନୁଂ ଗୁଲାଇ ରେମଲେ ଡୁ'ତୁନାଉ” ଡ'ସେକ୍ ସୁନ' ।
9ସା' ନିକଦିମଲା ଆମାଇ ସୁନ' “କେନା ଗୁଲାଇଉ ମି ଡେନ୍ତା?” ଡ'ସେକ୍ ସୁନ' ।
10ସା' ଜିସୁଲା ଆମାଇ ସୁନ' “ନ ଡ'ନା ଆଇସ୍ରାଏଲ୍ରେମଲେ ଅମାକ୍ରେମ୍, ନ କେନା ଗୁଲାଇଉ ଆମାକ୍ତୁନ ଇ? 11ଆନ ନିଂ ସତ୍ ସୁନ'ତିଂ: ନେଇ ମା ମାଗ'ତୁନେଇ ଗୁତୁନା ସୁନ୍ତୁନେଇ ମାରି ମା ଜୁଲ'ତୁନେଇ ଗୁତୁନା ସାକି ସୁନ୍ତୁନେଇ ମାତର୍ ନେଇ ସାକି ସୁନ'କୁନୁଂ ପେ ଆଅଂତୁପେ । 12ଆପେ ନିଂ କେନ୍ ଦର୍ତନିନା ବିସୟ ସୁନ'ନା ପେ ବିସ୍ବାସ୍ ଆଡେମ୍ତୁପେ ଡ'ନା ସରଗ୍ନା ବିସୟ ସୁନ'ନା ମି ବିସ୍ବାସ୍ ଡେମ୍ତୁପେ? 13ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁ ସରଗ୍କୁରୁଂ ଜର୍ଗୁତା । ମାତର୍ ମାଇନ୍କୁରୁଂ ଜାଏସା ବାଗ୍ବକ୍ ଡାଇ'ସେକ୍ ମାରି ଜର୍ ଆଡୁତା । 14ଇନ୍ତେକନ୍ଡେ'କା ମସାଲା ଟାଂରାବାଟା ପାଦାବକ୍ ଇସ୍ରାଏଲ୍ ରେମଲେବୁରଂ ଡୁକୁନୁଂବେଲା ପିତଲ୍ନା ମୁଇ ବୁବୁ' ଅ'ରଇଁୟ'ସେକ୍ ଆତୁନ୍ ବୁବୁ' ମୁଇ ବୁ'ଡୁଂବକ୍ ବୁଂଅଁ'ସେକ୍ ବାଗ୍ବକ୍ ଅଡାୟ'ସେକ୍ ତାଂପୁଗ' ବେଡ' । ମାସା'ଡ'ନା ଆଇସ୍ରାଏଲ୍ରେମଲେ ଆଜାଏସା ବୁବୁ' ଅବ'ନା ଆତୁନ୍ ପିତଲ୍ବାଇ'ନା ବୁବୁ' ତାଂଡାୟ' ଜୁଲ'ନା ବଲ୍ ଡେନ୍ତା । ଡୁ'ତୁନାଉ ମାପ୍ରୁ ବେନ୍ଟାୟ'ସା' ସା'କୁନୁଂ ଆରେମନା ଉଁ'ଉଁସା ରେମଲେ କୁର୍ସବକ୍ ଅଡାଇ' ଡୁତା । 15ସା' ଜା ଆମାଇ ବିସ୍ବାସ୍ ଡେମ୍ତ ମାଇ ମଡୁନମ୍ ଜିବନ୍ ବାମ୍ତା ।
16ମାପ୍ରୁ ଆକେନ୍ #3:16 ଜଗତଦେସ୍ଦୁନିଆ ଅବୁଦି ଆଲାତ୍ ଡେମ'ସା' ମାଇ ଆମାଇନା ତା'ମୁଇଉଁ ବେଡ' । ସା' ଜାଏସା ଆମାଇ ବିସ୍ବାସ୍ ଡେମ'ନା ମାଇ ଇନ୍ଡଇ'ଏସା ଆନାସ୍ତା ମାତର୍ ମାଇ ମଡୁନମ୍ ଜିବନ୍ ବାମ୍ତା । 17ଦେସ୍ଦୁନିଆନା ରେମଲେବକ୍ ବିସାର୍ନା ଡିନ୍ଡେମ୍ପୁଲେଇ ମାପ୍ରୁ ଆମାଇନା ଉଁ'ଉଁ ଦେସ୍ଦୁନିଆବକ୍ ବେନ୍ଟାୟ' ଆଡୁତା । ମାତର୍ ଦେସ୍ଦୁନିଆବକ୍ ଡୁକୁନୁଂ ଆଗୁଲାଇ ରେମଲେ ପାପ୍କୁରୁଂ ବାନି ଡିନ୍ଡେମ୍ପୁଲେଇ ଆମାଇ ବେନ୍ଟାୟ' । 18ଜା ମାଇନ୍ବକ୍ ବିସ୍ବାସ୍ ଡେମ୍ତ ଆମାଇ ବିସାର୍ନା ଆଡେମ୍ତ । ମାତର୍ ଜା ମାପ୍ରୁନା ତା'ମୁଇଉଁନା ଇମିବକ୍ ବିସ୍ବାସ୍ ଆଡେମ୍ତ ଆମାଇ ବିସାର୍ନା ଡେଂଗା' । 19ମାସା' ବିସାର୍ନା ଡେମ'ତା ଡ'ନା, ମାପ୍ରୁନା ଉଁ'ଉଁ ଆରେମଲେ ତାରା' ବିବେ'ପୁଲେଇ ମୁଇ ତାରା'ସୁଗ ଦେସ୍ଦୁନିଆବକ୍ ସା'ଗା' । ମାତର୍ ରେମଲେ ଆତାରା' ଅନ୍ତୁର'ସେକ୍ ଆଞୁର୍ ଅବୁଦି ଆଲାତ୍ ଡେମ' । ମାସା'ଡ'ନା ମା'ଏନା କାମ୍ ଗୁଲାଇ ଞୁର୍ବକ୍ ଡେମ'କୁନୁଂ କାମ୍ସୁଗ ଅଲିରାକ୍ବାଇ' ଡୁକୁ। 20ଜା ଅଲିରାକ୍ବାଇ' କାମ୍ ଡେମ୍ତ ମାଇ ଆତାରା' ଗୁମୁଇତ । ମାସା'ଡ'ନା ମାଇ ଡେମ'କୁନୁଂ ଅଲିରାକ୍ବାଇ' କାମ୍ ତୁନାକ୍ବେ'ତ ଡ'ସେକ୍ ତାରା' ଉନ୍ତୁ' ଆସାପ୍ତା । 21ମାତର୍ ଜା ସତ୍ବାଇ' କାମ୍ ଡେମ୍ତ ମାଇ ତାରା'ବକ୍ ସାପ୍ତା । ମାସା'ଡ'ନା ମାଇ ଡେମ'କୁନୁଂ ଗୁଲାଇ କାମ୍ବକ୍ ଆମାପ୍ରୁ ମାନ୍ସେ'ଗା ଡେମ'ତାସା' ମାଇନା କାମ୍ ଆଗୁଲାଇର ଅସୁଇ' ଗଂତା ।”
ବାପ୍ତିସ୍ମା ବିବେ'ଡା ଜଅନ୍ଲା ଜିସୁନା ବିସୟ ସୁଁସୁଡେନ୍
22ତିର୍ଗି' ଜିସୁଲା ମାରି ମାଇନା ସିସ୍ୟଲେ ଜିଉଦା ଜିଲାବକ୍ ଉଇଗା' । ଉଇସେକ୍ ମାଇ ଆତା ମା'ଏବୁରଂ ଡୁକୁକ୍ସେକ୍ ବାପ୍ତିସ୍ମା ବିବେ' ମୁଲାୟ' । 23ସାଲମ୍ ଡ'ସେକ୍ ମୁଇ ମୁନା'ଉଂଗମ୍ ଉନ୍ତୁ' ଡୁକୁନୁଂ ଏନନ୍ ଡ'ସେକ୍ ମୁଇ ଉଂଗମ୍ବକ୍ ଅବୁଦି ଡାଗ୍ ଡୁକୁ । ଅବୁଦି ଡାଗ୍ ଡୁକୁସା' ଜଅନ୍ଲା ଆତା ବାପ୍ତିସ୍ମା ବିବେ' ଡେଂକୁ । ସା' ରେମଲେ ଇସାଉ ମାଇନ୍ବକ୍ ସାକ୍ସେକ୍ ବାପ୍ତିସ୍ମା ରିଂକୁ । 24#ମାତିଉ 14:3; ମାର୍କ 6:17; ଲୁକ 3:19,20ସା' ଆଇ'ତୁନ୍ବେଲା ଆଜଅନ୍ଲା ବନ୍ଦିବକ୍ ସୁରୁଂ ଅରଇ' ଡେଂକୁ । 25ସା' ମୁସିଂ ଆ'ଇରସୁଗ ଜଅନ୍ନା ସିସ୍ୟଲେ ଜିଉଦିରେମବୁରଂ ଜିଉଦିରେମଲେନ୍ ନିୟମ୍ସୁଗ ମୁଇନ୍ଡା ମି ଗୁଲାଇ ତନ'ରିଡ'ସେକ୍ ଗୁଇ'ସୁଂଗୁଇ'ତିକ୍ସେକ୍ ବଲ୍ ଡୁକୁଡୁତା ଡ'ସେକ୍ କିରକୁ । 26ମା'ଏ ଜଅନ୍ବକ୍ ଉଇସେକ୍ ଆମାଇ ସୁନ' “ଅ ଗୁରୁ, ଜର୍ଦନ୍ କିନ୍ଡାକ୍ ଇନ୍ସିପାଟ୍ ଜା ନବୁରଂ ଡୁକୁ ମାରି ଜାନା ବିସୟ ନ ସାକି ସୁନ'କୁନ, ଜୁ ମାଇ ଆରେମଲେ ବାପ୍ତିସ୍ମା ବିବେ'ଡେନ୍ତା ମାରି ଗୁଲାଇର ମାଇନ୍ବକ୍ ଉଇଡେନ୍ତା” ଡ'ସେକ୍ ସୁନ' ।
27ସା' ଜଅନ୍ଲା ଆମା'ଏ ସୁନ' “ମାପ୍ରୁ ସରଗ୍କୁରୁଂ ମା ବେ'ତ ଗୁତୁନାଉ ମୁଇନ୍ଡା ବୁମ୍ବାମ୍ ଗଂତା । 28#ଜଅନ୍ 1:20‘ନିଂ କିରିସ୍ଟ ଆରାକ୍ । ମାତର୍ ମାଇ ସାପ୍ତା ଡ'ସେକ୍ ଆରେମଲେ ସୁଁସୁପୁଲେଇ ମାପ୍ରୁ ଆନିଂ ମାଇ ସୁସାପ୍ ସିଁସେଇଁଉ ବେନ୍ଟାୟ'ତା’ ଡ'ସେକ୍ ନିଂ ସୁନ'କୁନୁଂ ପେ ସାକି ଡୁତୁପେ । 29ଜା ସେଲାମ୍ବୁଇ' ରିଂତ ମାଇ ଆର୍ଜୁନ୍ରେମ୍ । ଆର୍ଜୁନ୍ରେମ୍ ମା ସୁନ୍ତ ଗୁତୁନ୍ ଅଂପୁଲେଇ ବାଇଲକ୍ଡେଇଁ ତଂଗୁତା । ମାରି ଗୁତୁନ୍ ଅଂଅଁ'ସେକ୍ ମାଇ ଅବୁଦି ସାର୍ଦା ଡେନ୍ତା । ଡୁ'ତୁନାଉ ନିଂନା ସାର୍ଦା ଆ'ନା ସତ୍ ଡେଂଗା' । 30ରେମଲେ ଆମାଇ ମୁନା'ରେମ୍ ଡିଗେଇ' ମାତର୍ ଆନିଂ ଡାଉରେମ୍ ଡିଗେଇ' ।”
31ଜା ବାଗ୍ବକ୍କୁରୁଂ ସାପ୍ତା ମାଇ ଗୁଲାଇରନ୍କୁରୁଂ ମୁନା'ରେମ୍ । ଜା ଦର୍ତନିକୁରୁଂ ସାପ୍ତା ମାଇ ଦର୍ତନିନା ରେମ । ସା' ଦର୍ତନିନା ବିସୟଉ ମାଇ ସୁନ୍ତ । ଜା ସରଗ୍କୁରୁଂ ସାପ୍ତା ମାଇ ଗୁଲାଇରନ୍କୁରୁଂ ମୁନା'ରେମ୍ । 32ମାଇ ମା ଜୁଲ' ମାରି ମା ଅଂଅଁ' ଗୁତୁନ୍ ବିସୟରେଉ ମାଇ ସାକି ସୁନ'ତା । ମାତର୍ ମାଇନା ତୁମ' ଜାଏସା ଆସପ୍ତ । 33ଜା ମାଇନା ତୁମ' ସବ'ତା ମାଇ ମାପ୍ରୁନା ତୁମ' ସତଇସା ସତ୍ବାଇ' ଡ'ସେକ୍ ସୁନ'ତା । 34ମାସା'ଡ'ନା ମାପ୍ରୁ ଆଜା ବେନ୍ଟାୟ'ତା ମାଇ ମାପ୍ରୁନା ତୁମ' ସୁନ୍ତ । ମାସା'ଡ'ନା ମାପ୍ରୁ ଆମାଇ ନାପ୍ବାର୍ ମଗୁନଂବାଇ' #3:34 ଆତ୍ମାମାପ୍ରୁନା ଜିବନ୍ ବେ'ତ । 35#ମାତିଉ 11:27; ଲୁକ 10:22ବାଡେଇଁ ଆମାଇନା ଉଁ'ଉଁ ଆଲାତ୍ ଡେମ'ତା ମାରି ଗୁଲାଇ ମାଇନା ତିତିବକ୍ ବେଡ'ତା । 36ଜା ମାପ୍ରୁନା ଉଁ'ଉଁନ୍ବକ୍ ବିସ୍ବାସ୍ ଡେମ'ତା ମାଇ ମଡୁନମ୍ ଜିବନ୍ ବାଂଗୁତା । ମାତର୍ ଜା ଆମାପ୍ରୁନା ଉଁ'ଉଁ ଆମାନ୍ତା ମାଇନା ବାଗ୍ବକ୍ ମାପ୍ରୁନା ଗିସେ' ଇସାଉ ଡୁତାସା' ମାଇ ମଡୁନମ୍ ଜିବନ୍ ଆବାମ୍ତା ।
ទើបបានជ្រើសរើសហើយ៖
ଜଅନ୍ 3: BFW
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
CC BY-NC-ND 4.0