ଜଅନ୍ 4
4
ଜିସୁଲା ସମିରନି ଉଂଗମ୍ନା ସେଲାନ୍ଲାବୁରଂ ଅଇଁଡେନ୍
1ଜଅନ୍ନାକୁରୁଂ ଜିସୁଲା ଅବୁଦି ରେମବକ୍ ସିସ୍ୟ ଅ'ଏଲ'ସେକ୍ ଆମା'ଏ ବାପ୍ତିସ୍ମା ବିବେ'ଡେନ୍ତା ଡ'ସେକ୍ ପାରୁସିଦଲ୍ନା ରେମଲେ ଅଂଅଁ' । 2ମାତର୍ ସତଇସା ଜିସୁଲା ନିଜେ ଆରେମଲେ ବାପ୍ତିସ୍ମା ବେଡ'ଆଡୁତା, ମାଇନା ସିସ୍ୟଲେଉ ବାପ୍ତିସ୍ମା ବେଡ'କୁ । 3ପାରୁସିଦଲ୍ନା ରେମଲେ କେନା ଅଂଅଁ'ତା ଡ'ସେକ୍ ଜିସୁଲା ମାଗ'ସା' ମାଇ ଜିଉଦା ଜିଲା ଅନ୍ତୁର'ସେକ୍ ଗାଲିଲି ଜିଲାବକ୍ ମାରି ଆନ୍ଡେଇଁଗା' ।
4ମାତର୍ ମାଇ ଉଇରେମ୍ ସମିରନି ଦେସ୍ ରି'ତା ଉଇପଡ୍ଗା' । 5ସା' ମାଇ ଉଇବେଲା ଜାକୁବ୍ଲା ଆମାଇନା ଉଁ'ଉଁ ଆଜସେପ୍ଲା ଇମ୍ବ'ନ୍ ଜମି ବେଡ'ବୁଂଅଁ' ଆତା ଉନ୍ତୁ' ଡେଲ' । ଗୁତୁନ୍ ଜମି ସମିରନି ମୁନା'ଉଂଗମ୍ନା ସୁକାର୍ ଡ'ସେକ୍ ମୁଇ ଉଂଗମ୍ବକ୍ ଡୁକୁ । 6ଗୁତୁନ୍ ଜମିବକ୍ ଜାକୁବ୍ନା ମୁଇ ତଗ୍ଡାଗ୍ ଡୁକୁ । ସା' ଜିସୁଲା ଉରିଂଅଁ' ଉରିଂଅଁ' ଉଇବେଲା ମୁନ୍ଡେବେଲା ଡେଂଗା'ସା' ମାଇ ଅବୁଦି ଲାକାର୍ସେକ୍ ଗୁତୁନ୍ ତଗ୍ଡାଗ୍ ଉନ୍ତୁ' ଲେଇ'କୁଗା' ।
7ଆଇ'ତୁନ୍ବେଲା ମୁଇନ୍ଡା ସମିରନି ଉଂଗମ୍ନା ସେଲାନ୍ଲା ଗୁତୁନ୍ ତଗ୍ଡାଗ୍ବକ୍ ଗେନ୍ଡାଗ୍ ସା'ଗା' । ସା' ଜିସୁଲା ଆମାଇ ସୁନ' “ଅ କୁଇ', ଆନିଂ ଇ'କି ଇ'ପୁଲେଇ ଡାଗ୍ ବେ'” ଡ'ସେକ୍ ସୁନ' । 8ମାସା'ଡ'ନା ମାଇନା ସିସ୍ୟଲେ ଉଂଗମ୍ ବିତ୍ରେ ସୁସୁମ୍ପୁଲେଇ ସୁସପ୍ ଉଇକୁଗା' ।
9ସା' ଗୁତୁନ୍ ସମିରନିୟ ସେଲାନ୍ଲା ଆମାଇ ସୁନ' “ନ ମୁଇନ୍ଡା ଜିଉଦିରେମ, ନିଂ ମୁଇନ୍ଡା ସମିରନି ସେଲାନ୍ଲା, ମିଞାଂ ନ ନିଂନା ତିତିକୁରୁଂ ଇ'ପୁଲେଇ ଲୁଡ'ତୁନ?” ଡ'ସେକ୍ ସୁନ' । ମାସା'ଡ'ନା ଜିଉଦିରେମଲେ ଆସମିରନି ରେମଲେ ଡାଉ ଜାତିସୁଗ ଜୁଲ'କୁସା' ମା'ଏବୁରଂ ଆମିସ୍ତା ।
10ସା' ଜିସୁଲା ଆମାଇ ସୁନ' “ମାପ୍ରୁ ଆନ ମା ବିବେ' ମୁନ୍ ଡେଂଗୁତା ଡ'ସେକ୍ ମାରି ଆନିଂ ଇ'ପୁଲେଇ ଡାଗ୍ ବେ' ଡ'ସେକ୍ ଜା ଆନ ସୁନ'ତା ମାଇ ଜା ଡ'ସେକ୍ ନ ମାଗ'କୁନାଏ ଆମାଇ ନ ଲୁ'ନ ମାରି ମାଇ ଆନ ଜିବନ୍ ବିବେ'ବାଇ' ଡାଗ୍ ବେ'ନା” ଡ'ସେକ୍ ସୁନ' ।
11ସା' ଗୁତୁନ୍ ସେଲାନ୍ଲା ଆମାଇ ସୁନ' “ଅ ବାବୁ, ଡାଗ୍ ତକ୍ତକ୍ପୁଲେଇ ନନ୍ବକ୍ତ ଗାରିୟାକି ମୁତା ମାସା ଆରାକ୍, ମାରି ତଗ୍ଡାଗ୍ସା' ଅବୁଦି ସୁଲୁଂ । ନ ଇମ୍ବ'କୁରୁଂ ଗୁତୁନ୍ ଜିବନ୍ ବିବେ'ନା ଡାଗ୍ ବାମ୍ତୁନ? 12ନେଇନା ୟା'ତୁତା ଜାକୁବ୍ଲା ଆନେଇ କେନା ତଗ୍ଡାଗ୍ ବେଡ'ତା। ମାଇ ନିଜେ ମାରି ମାଇନା ଉଁ'ଉଁନେ, ଗୁଇ'ତାଂ ଗିମେ'ଡେସା ଇଂକେକୁରୁଂ ଇଡ'କୁ । ଡୁ'ତୁନ୍ ଡ'ନା ମାଇନ୍କୁରୁଂ ନ ମୁନା' ଇ?” ଡ'ସେକ୍ ସୁନ' ।
13ସା' ଜିସୁଲା ଆମାଇ ସୁନ' “ଜାଜା କେନ୍ ଡାଗ୍ ଇ'ତ ଆମା'ଏ ଆଗୁଲାଇର ମାରି ଇଡାକ୍ ଡୁସୁପ୍ତା । 14ମାତର୍ ନିଂ ଇମ୍ବ'ନ୍ ଡାଗ୍ ବେ'ତିଂ ଗୁତୁନ୍ ଜାଏସା ଇଡ'ନା ଆମାଇ ଇନ୍ଡଇ'ଏସା ଇଡାକ୍ ଆଡୁସୁପ୍ତା । ନିଂ ବେଡ'କୁନୁଂ ଡାଗ୍ ମାଇନା ଜିବନ୍ବକ୍ ଇସାଉ ମଞୁନ' ମୁଇ ତୁର୍ଗନ୍ଡାଗ୍ସୁଗ ଡେଂସେକ୍ ଆମାଇ ମଡୁନମ୍ ଜିବନ୍ ବେ'ତ” ଡ'ସେକ୍ ସୁନ' ।
15ସା' ଗୁତୁନ୍ ସେଲାନ୍ଲା ଆମାଇ ସୁନ' “ବାବୁ, ଗୁତୁନ୍ ଡାଗ୍ ଆନିଂ ବେ' । ମାସା'ଡ'ନା ଗୁତୁନ୍ ଡାଗ୍ ବେଡ'ନା ଆନିଂ ଇନ୍ଡଇ'ଏସା ଇଡାକ୍ ଆଡୁସୁପ୍ତା ମାରି ନିଂ ଗେନ୍ଡାଗ୍ପୁଲେଇ ଆକେ ଇସାଉ ସୁସାପ୍ ଦର୍କାର୍ ଆରାକ୍” ଡ'ସେକ୍ ସୁନ' ।
16ସା' ଜିସୁଲା ଆମାଇ ସୁନ' “ୟା, ଆନନା ଇମ୍ପର୍ ୱାୟ'ସା'ବା” ଡ'ସେକ୍ ସୁନ' ।
17ସେଲାନ୍ଲା ଆମାଇ “ନିଂ ଇମ୍ପର୍ ଆବାମ୍ତିଂ” ଡ'ସେକ୍ ସୁନ'ସା'
ଜିସୁଲା ଆମାଇ ସୁନ' “ନିଂ ଇମ୍ପର୍ ଆବାମ୍ତିଂ ଡ'ସେକ୍ ନ ସୁନ'କୁନୁଂ ସତ୍ । 18ମାସା'ଡ'ନା ନନା ଇମ୍ପର୍ ପାଁନ୍ସ୍ଲକ୍ ଡୁକୁ । ମାରି ଆ'ନା ନବୁରଂ ଜା ଡୁତା ମାଇସା ନନା ଇମ୍ପର୍ ଆରାକ୍ । କେନା ନ ସତ୍ ସୁନ'ତୁନ” ଡ'ସେକ୍ ସୁନ' ।
19ସା' ସେଲାନ୍ଲା ଆମାଇ ସୁନ' “ବାବୁ, ନ ତ ମୁଇନ୍ଡା ବାବବାଦି ଡ'ସେକ୍ ନିଂ ମାଗ'ନିଂ । 20ନେଇନା ୟା'ତୁତାଲେ କେନ୍ କୁନ୍ଡାବକ୍ ଆମାପ୍ରୁ ସୁନ୍ଡ୍ରକୁ । ମାତର୍ ପେ ଜିଉଦିରେମଲେ ସୁନ'ତୁପେ ଜିରୁସାଲମ୍ବକ୍ ଆମାପ୍ରୁ ସୁନ୍ଡ୍ର ଡୁତା ଡ'ସେକ୍ ।”
21ସା' ଜିସୁଲା ଆମାଇ ସୁନ' “ଅ କୁଇ', ଆବାଲା ସୁନ୍ଡ୍ରନା ଜାଗା ଆକେନ୍ କୁନ୍ଡାବକ୍ଉ ଡ'ସେକ୍ ଆରାକ୍ ମାରି ଜିରୁସାଲମ୍ବକ୍ଉ ଡ'ସେକ୍ ଆରାକ୍, ଡୁ'ତୁନ୍ବାଇ' ମୁଇ ବେଲା ସୁସାପ୍ଡେନ୍ତା ଡ'ସେକ୍ ନିଂ ସୁନ'କୁନୁଂ ତୁମ' ନ ବିସ୍ବାସ୍ ଡେମ୍। 22ପେ ସମିରନିରେମଲେ ଆଜା ସୁନ୍ଡ୍ରତୁପେ ଆମାଇ ପେ ବଲ୍ ଆମାକ୍ତୁପେ । ମାତର୍ ନେଇ ଆଜା ସୁନ୍ଡ୍ରଗୁତୁନେଇ ଆମାଇ ନେଇ ବଲ୍ ମାଗ'ତୁନେଇ । ମାସା'ଡ'ନା ଆରେମଲେ ରକ୍ୟା ଡିନ୍ଡେମା ଜିଉଦିରେମଲେନ୍କୁରୁଂ ସାପ୍ତା । 23ଆନେଇନା ବା ଆମାପ୍ରୁ ଜାଜା ସତଇସା ସୁନ୍ଡ୍ରତା ମା'ଏ ମାପ୍ରୁନା ଜିବନ୍ନା ବପୁ ବାଂସେକ୍ ସତଇସା ସୁନ୍ଡ୍ରନା ବେଲା ସୁସାପ୍ଡେନ୍ତା ମାରି ଆ'ନା ସା'ଗୁତା । ଜାଜା ଆମାଇ ସୁନ୍ଡ୍ରତା ମା'ଏ ଡୁ'ତୁନ୍ଉ ସୁନ୍ଡ୍ର ଡୁତା ଡ'ସେ'ଗାଉ ବାନା ମୁନ୍ । 24ମାପ୍ରୁ ଆତ୍ମାସା' ଜାଜା ଆମାଇ ସୁନ୍ଡ୍ରତା ମା'ଏ ମାପ୍ରୁନା ଜିବନ୍ନା ବପୁବାଂସେକ୍ ମାରି ଜିବନ୍ ବିତ୍ରେକୁରୁଂ ସତ୍ବାଇ' ସୁନ୍ଡ୍ର ଡୁତା” ଡ'ସେକ୍ ସୁନ' ।
25ସା' ଗୁତୁନ୍ ସେଲାନ୍ଲା ଆମାଇ ସୁନ' “ମସିଅଲା ଡ'ନା ଆଜା କିରିସ୍ଟ ଡ'ସେକ୍ ସୁନ୍ତ ମାଇ ସୁସାପ୍ଡେନ୍ତା ଡ'ସେକ୍ ନିଂ ମାଗ'ତିଂ । ମାଇ ଇନ୍ଡଇ'ୟା ସାପ୍ତା ଉନ୍ତା ମାଇ ଆନେଇ ଗୁଲାଇ ବିସୟ ସୁନ'ବେ'ତ” ଡ'ସେକ୍ ସୁନ' ।
26ସା' ଜିସୁଲା ଆମାଇ ସୁନ' “ଆ'ନା ନବୁରଂ ଜା ଅଇଁୟ'ତା ନିଂଉ ମସିଅଲା” ଡ'ସେକ୍ ସୁନ' ।
27ସା' ଆଇ'ତୁନ୍ବେଲା ମାଇନା ସିସ୍ୟଲେ ସା'ଗା'ସା' ମାଇ ମୁଇନ୍ଡା ସେଲାନ୍ଲାବୁରଂ ଅଇଁଡେଂକୁନୁଂ ଜୁଲ'ସେକ୍ କାବାକାବା ଡେଂଉଇଗା' । ମାତର୍ ଆମାଇ ନ ମା ମୁନ୍ କି ଆରା'ଗେ ମାସା' ନ ମାଇବୁରଂ ଅଇଁୟ'ତୁନ ଡ'ସେକ୍ସା ଜାଏସା ଆମାଇ ଆ'ଗଁସ୍ଲାକ୍ତା । 28ତିର୍ଗି' ଗୁତୁନ୍ ସେଲାନ୍ଲା ମାଇନା ଗାରିୟା ବୁଂଅଁ'ସେକ୍ ଉଂଗମ୍ ବିତ୍ରେ ଉଇସେକ୍ ଆରେମଲେ ସୁନ', 29“ଲ ଆମୁଇନ୍ଡା ଜୁତୁପେ । ନିଂ ମାମା ଡେମ'ତିଂ ଗୁତୁନ୍ ଗୁଲାଇ ମାଇ ଆନିଂ ସୁନ' । ଜାକ୍ ମାଇ କିରିସ୍ଟ ଡେ ମାଡେ” ଡ'ସେକ୍ ସୁନ' । 30ସା' ରେମଲେ ଉଂଗମ୍କୁରୁଂ ତୁର୍ସେକ୍ ଆମାଇ ଜୁଜୁପୁଲେଇ ମାଇନ୍ବକ୍ ଉଇଗା' ।
31ଗୁତୁନ୍ ସେଲାନ୍ଲା ଉଂଗମ୍ ବିତ୍ରେ ଉଇକୁନୁଂବେଲା ଜିସୁନା ସିସ୍ୟଲେ ଆଜିସୁଲା ସୁନ' “ଅ ଗୁରୁ, ନ ମାଏସା ସୁମ୍” ଡ'ସେକ୍ ସୁନ' ।
32ସା' ଜିସୁଲା ଆମା'ଏ ସୁନ' “ନିଂବକ୍ ମୁଇ ସୁସୁମ୍ନା ଡୁତା, ଗୁତୁନ୍ ମା ଡ'ସେକ୍ ପେ ଆମାକ୍ତୁପେ” ଡ'ସେକ୍ ସୁନ' ।
33ସା' ଜା'ଡେ ଆମାଇ ସୁସୁମ୍ନା ରିଂଅଁ' ବେଡ'ତା ଡେ ମାଡେ ଡ'ସେକ୍ ସିସ୍ୟଲେ ମା'ଏ ମା'ଏଉ ଅଇଁୟ' ।
34ସା' ଜିସୁଲା ଆମା'ଏ ସୁନ' “ଆନିଂ ଜା ବେନ୍ଟାୟ'ତା ମାଇନା ମୁନ୍ସୁଗ ଗୁଲାଇ ଡିନ୍ଡେମ୍ନା ମାରି ମାଇନା କାମ୍ ଅ'ଡମ୍ନାଉ ନିଂନା ସୁସୁମ୍ନା” ଡ'ସେକ୍ ସୁନ' । 35ଅଇରିକ୍ ଅଇ'ସାମ୍ପୁଲେଇ ମାରି ସାର୍ମାସ୍ ଡୁତା ଡ'ସେକ୍ ପେ ଆସୁନ୍ତୁପେ ଇ? ମାତର୍ ନିଂ ଆପେ ସୁନ'ତିଂ, ଆଗୁଲାଇ ଲି'ଉଂବୁରଂ ବଲ୍ ଜୁଲ'ଜୁ । ଗୁତୁନ୍ ଆ'ନା ଗୁଲାଇ ଅଇ'ସିସି'ପୁଲେଇ ବୁଲୁକୁନୁଂ ଜୁତୁପେ । 36ଜା ଅଇ'ତ ମାଇ ବଲ୍ଟା କୁନ୍ତା ବାମ୍ତା । ମା'ଏ ଅଇଁୟ'କୁନୁଂ ମା ଡ'ନା ମାପ୍ରୁନା ତୁମ' ସୁନ'ସା' ଆମାପ୍ରୁ ବିସ୍ବାସ୍ ଡେମ'ସେ'ଗା ରେମଲେ ମଡୁନମ୍ ଜିବନ୍ ବାଂକୁନୁଂ । ସା' ଜା ବି'ତ ମାରି ଜା ଅଇ'ତ ମାଇପା ଇମ୍ବାୟ ଅବୁଦି ସାର୍ଦା ଡେନ୍ତା । 37ସା' ମୁଇନ୍ଡା ବି'ତ ମାରି ପାଲ୍ ମୁଇନ୍ଡା ଅଇ'ତ ଡ'ସେକ୍ ଇନ୍ତେକନ୍ଡେକ୍ ସୁନ'କୁନୁଂ ବୁନାର୍ସୁଁ କେନ୍ ବିସୟ ସତ୍ ଡେଂଗୁତା । 38ପେ ପାଇଟି ମଡିନେମ୍ବକ୍ ଉଇସେକ୍ ଅଇ'ପୁଲେଇ ନିଂ ଆପେ ବେନ୍ଟାୟ'ବୁଂଅଁ'ନିଂ । ପାଲ୍ ରେମଲେ ଅବୁଦି ପାଇଟି ଡେମ'ବୁଂଅଁ', ସା' ଆ'ନା ପେ ଅୟ'ସେକ୍ ବାମ୍ତୁପେ ।
39ନିଂ ମାମା ଡେମ'ତିଂ ଗୁତୁନ୍ ଗୁଲାଇ ମାଇ ଆନିଂ ସୁନ' ଡ'ସେକ୍ ଗୁତୁନ୍ ସେଲାନ୍ଲା ସାକି ସୁନ'କୁନୁଂ ଅଂଅଁ'ସେକ୍ ଗୁତୁନ୍ ସମିରନିୟ ମୁନା'ଉଂଗମ୍ନା ରେମଲେ ଅବୁଦିର ଆଜିସୁଲା ବିସ୍ବାସ୍ ଡେମ' । 40ସା' ଗୁତୁନ୍ ସମିରନିୟ ରେମଲେ ମାଇନ୍ବକ୍ ସାକ୍ସେକ୍ ନ ନେଇବୁରଂ ଡୁକୁଲାବେ ଡ'ସେକ୍ ଆମାଇ ସୁନ'ସା' ମାଇ ଦୁଇଦିନ୍ ଆତା ଡୁକୁ । 41ମାରି ମାଇନା ତୁମ' ଅଂଅଁ'ସେକ୍ ମାରି ଅଦିକ୍ ରେମଲେ ବିସ୍ବାସ୍ ଡେମ' । 42ମାରି ମା'ଏ ଆତୁନ୍ ସେଲାନ୍ଲା ସୁନ' “ନ ସୁନ'କୁନୁଂ ତୁମ'ଉ ନେଇ ବିସ୍ବାସ୍ ଡେମ'ତୁନେଇ ଡ'ସେକ୍ ଆରାକ୍ ମାତର୍ ନେଇ ନିଜେସା ମାଇ ସୁନ'କୁନୁଂ ଅଂଅଁ'ତୁନେଇ । ମାରି ମାଇ ସତଇସା ଆଦେସ୍ଦୁନିଆନା ରେମଲେ ରକ୍ୟା ଡିନ୍ଡେମା ଡ'ସେକ୍ ନେଇ ମାଗ'ତୁନେଇ” ଡ'ସେକ୍ ସୁନ' ।
ଜିସୁଲା ଆମୁଇନ୍ଡା ମୁନା'ରେମ୍ନା ଉଁ'ଉଁ ବଲ୍ ଡିନ୍ଡେମ୍ଡେନ୍
43ଗୁତୁନ୍ ଦୁଇଦିନ୍ ତିର୍ଗି' ମାଇ ଉନ୍ତାକୁରୁଂ ତୁର୍ସେକ୍ ଗାଲିଲି ଜିଲାବକ୍ ଉଇଗା' । 44#ମାତିଉ 13:57; ମାର୍କ 6:4; ଲୁକ 4:24ବାବବାଦିଲେନା ତୁମ' ନିଜର୍ନା ଉଂଗମ୍ରେମ୍ ଆମାନ୍ତା ଡ'ସେକ୍ ଜିସୁଲା ସିଁସେଇଁଉ ସାକି ସୁନ'କୁ । 45#ଜଅନ୍ 2:23ମାରି ମାଇ ଗାଲିଲି ଜିଲାବକ୍ ସା'ଗା'ସା' ନିସ୍ତାର୍ ପରବ୍ବକ୍ ଜିରୁସାଲମ୍ ମୁନା'ଉଂଗମ୍ବକ୍ ମାଇ ମାମା ଡେମ'ବୁଂଅଁ' ଗୁତୁନ୍ ଗୁଲାଇ ଗାଲିଲି ଜିଲାନା ରେମଲେ ପରବ୍ବକ୍ ଉଇସେକ୍ ଜୁଲ'ବୁଂଅଁ'ସା' ମା'ଏ ଆମାଇ ମା'ଏନ୍ ଉଂଗମ୍ବକ୍ ୱାୟ' ।
46 #
ଜଅନ୍ 2:1–11
ମାଇ ମାର୍ ମୁସଉ ଗାଲିଲି ଜିଲାନା କାନା ଉଂଗମ୍ବକ୍ ସା'ଗା' । ଆତୁନ୍ କାନା ଉଂଗମ୍ବକ୍ଉ ମାଇ ଆଡାଗ୍ ଅଂଗୁର୍ନା ଡାଗ୍ ଅଏଲ'ବୁଂଅଁ'କୁ । ଆତା ଉନ୍ତୁ' ଡୁକୁନୁଂ କପର୍ନାଉମ୍ ଡ'ସେକ୍ ମୁଇ ଉଂଗମ୍ବକ୍ ରାଜାନା ଡିଂଅଁବକ୍ କାମ୍ ଡେମ'କୁନୁଂ ମୁଇନ୍ଡା ମୁନା'ରେମ୍ ଡୁକୁ । ମାଇନା ଇଂଗେର୍ଗୁ ମୁଇନ୍ଡା ସିକ୍ସେ'ଗା ଡିରି'କୁ । 47ଜିସୁଲା ଜିଉଦା ଜିଲାକୁରୁଂ ଗାଲିଲି ଜିଲାବକ୍ ସା'ଗା' ଡ'ସେକ୍ ମାଇ ଅଂଅଁ' । ଅଂଅଁ'ସେକ୍ ମାଇନ୍ବକ୍ ଉଇସେକ୍ ଆମାଇନା ଉଁ'ଉଁ ବାନି ଡିନ୍ଡେମ୍ପୁଲେଇ ସୁନ' । ମାସା'ଡ'ନା ମାଇନା ଉଁ'ଉଁ ସିକ୍ସେ'ଗା ତାଇ'ଗୁଇ' ଡେଂକୁ ।
48ସା' ଜିସୁଲା ଆମାଇ ସୁନ' “ଅବୁଦି କାବା ଡିନ୍ଡେମ୍ବାଇ' କାମ୍ ମାରି ସିନଲେ ଆଜୁଲ'ନା ପେ ଆନିଂ ସରଉ ବିସ୍ବାସ୍ ଆଡେମ୍ତୁପେ” ଡ'ସେକ୍ ସୁନ' ।
49ସା' ଗୁତୁନ୍ ରେମ ଆମାଇ ସୁନ' “ଅ ଗୁରୁ, ନିଂନା ଉଁ'ଉଁ ଗୁଗୁଇ' ସିଁସେଇଁଉ ନ ନିଂନା ଡିଂଅଁବକ୍ ସା'ବା” ଡ'ସେକ୍ ସୁନ' ।
50ସା' ଜିସୁଲା ଆମାଇ ସୁନ' “ନ ଇ'ଡା, ନନା ଉଁ'ଉଁ ବଲ୍ ଡୁତା” ଡ'ସେକ୍ ସୁନ' । ସା' ଜିସୁଲା ସୁନ'କୁନୁଂ ତୁମ' ବିସ୍ବାସ୍ ଡେମ'ସେକ୍ ମାଇ ଇ'ଗା' ।
51ସା' ମାଇ ଉନ୍ତ୍କୁରୁଂ ଇ'କେ ଇ' ମାଇନା ଗତିରେମ୍ ଆମାଇ ସୁସପ୍ବାଂସେକ୍ ନନା ଉଁ'ଉଁ ବୁରଗା' ଡ'ସେକ୍ ସୁନ' । 52ସା' ଆ'ଇବେଲା ଗୁତୁନ୍ ବାନି ଡେଂଗା' ଡ'ସେକ୍ ମାଇ ଆମା'ଏ ଅ'ଗଁସ୍ଲା'ଗା', ସା' ମା'ଏ ସୁନ' ତୁଗଲା ସାତ୍ଟାବେଲା ଆମାଇ ସି ଉନାଗା' ଡ'ସେକ୍ ସୁନ' । 53ସା' ଜିସୁଲା ଆମାଇ ଆ'ଇବେଲା “ନ ଉୟା, ନନା ଉଁ'ଉଁ ବୁରତା” ଡ'ସେକ୍ ସୁନ'ବୁଂଅଁ' ସମାନ୍ ଆଇ'ତୁନ୍ବେଲାଉ କେନା ଡେଂଗୁତା ଡ'ସେକ୍ ଗୁତୁନ୍ ଇଂଗେର୍ନା ବା ମାଗ' । ସା' ମାଇ ମାରି ମାଇନା ଡିଂଅଁନ୍ରେମ୍ ଗୁଲାଇର ଆଜିସୁଲା ବିସ୍ବାସ୍ ଡେମ' । 54ଜିସୁଲା ଜିଉଦା ଜିଲାକୁରୁଂ ଗାଲିଲି ଜିଲାବକ୍ ସାକ୍ସେକ୍ କାବାକାବା ଡିନ୍ଡେମ୍ବାଇ' କାମ୍ ଡେମ'କୁନୁଂ କେନ୍ବୁରଂ ଦୁଇପାଲି ଡେଂଗୁତା ।
ទើបបានជ្រើសរើសហើយ៖
ଜଅନ୍ 4: BFW
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
CC BY-NC-ND 4.0