ଜଅନ୍ 5
5
ତିରିସ୍ ଆଟ୍ବରସ୍ ଉରିଂ ମଗୁନଂବାଇ' ଡୁକୁନୁଂ ଆମୁଇନ୍ଡା ଜିସୁଲା ବଲ୍ ଡିନ୍ଡେମ୍ଡେନ୍
1ଗୁତୁନ୍ ତିର୍ଗି' ଜିଉଦିରେମଲେନା ମୁଇ ପରବ୍ ଡୁକୁଗା'ସା' ଜିସୁଲା ଜିରୁସାଲମ୍ ମୁନା'ଉଂଗମ୍ବକ୍ ଉଇଗା' । 2ସା' ଜିରୁସାଲମ୍ବକ୍ ମେନ୍ଡା ଡାନ୍ଡର୍ ଉନ୍ତୁ' ମୁଇ ବନ୍ଦ୍ ଡୁତା । ଏବ୍ରିସାମ୍ବକ୍ ଆତୁନ୍ ବନ୍ଦ୍ #5:2 ଏନ୍ତୁକ୍ ଉଲାକ୍ବକ୍ ବେତ୍ସାଦା ଡ'ସେକ୍ସା ଲେକ୍ଲ'ତାବେତେସ୍ଦା ଡ'ସେକ୍ ସୁନ୍ତ । ଆତା ରେମଲେ ଲିଲେଇ'ପୁଲେଇ ପାଁନ୍ସ୍ଟା କୁଡିୟା ଡୁତା । 3ଗୁତୁନ୍ କୁଡିୟାବକ୍ କାନାକାନିବାଇ', ସଟାସଟିବାଇ', ଲିଲେଇ'ତଗ୍ଡାଗ୍ ମଗୁନଂବାଇ' ମାରି ପାଲ୍ପାଲ୍ ସିବାଇ' ରେମଲେସା' ଅବୁଦିର ଡୁକୁ । 4#5:4 କେନ୍ ସାରିପଦ ମୁଲ୍ ଲେକ୍ଲ'କୁନୁଂ ଏନ୍ତୁକ୍ ଉଲାକ୍ବକ୍ ଆଡୁତା ମାପ୍ରୁନା ଦୁତ ଗୁତୁନ୍ ବନ୍ଦ୍ବକ୍ ଅ'ପର୍ଡାଗ'ନା ଗାଇତୁନେଇ ଡ'ସେକ୍ ମା'ଏ ଜାଗ୍ଲ' ଡୁକୁ । ମାସା'ଡ'ନା ମୁସମୁସ ମାପ୍ରୁନା ଦୁତ ଆତା ବନ୍ଦ୍ବକ୍ ଜର୍ସେକ୍ ଆଡାଗ୍ ଅ'ପର୍ଡାଗ'କୁ । ସା' ଅ'ପର୍ଡାଗ'କୁନୁଂବେଲା ଜା ମୁଲ୍ ଡାଗ୍ବକ୍ ଗାଇତା ମାଇ ମାଏସା ସିକ୍ସେ'ଗା ଡୁକୁନୁଂ ବାନି ଡେଂକୁ । 5ଆତା ତିରିସ୍ ଆଟ୍ବରସ୍ ସିକ୍ସେକ୍ ଡୁକୁନୁଂ ମୁଇନ୍ଡା ରେମ ଡିରିକ୍ସେ'ଗା ଡୁକୁ । 6ସା' ଆତୁନ୍ ଡିରି'କୁନୁଂଆଁ ଜିସୁଲା ଜୁଲ'ସେକ୍ ମାଇ ଅବୁଦି ଦିନ୍ ଡି'କେନ୍ ଡୁତା ଡ' ମାଗ' । ମାଗ'ସେକ୍ “ଆନ ବାନି ଡିନ୍ଡେମ୍ପୁଲେଇ ମୁନ୍ ଡୁତା ଇ” ଡ'ସେକ୍ ଆମାଇ ଅ'ଗଁସ୍ଲା'ଗା' ।
7ସା' ସିରେମ୍ ଆମାଇ ସୁନ' “ବାବୁ, ଅ'ପର୍ଡାଗ'କୁନୁଂବେଲା ଆନିଂ ବନ୍ଦ୍ ବିତ୍ରେ ରିଂଅଁ' ଉଇପୁଲେଇ ଜାଏସା ରେମ ଆରାକ୍ । ମାରି ନିଂ ଉଇକେ ଉଇ ପାଲ୍ରେମ ଆନିଂ ରାବ୍ସେୟଁ' ଗାଇଉଇତା” ଡ'ସେକ୍ ସୁନ' ।
8ସା' ଜିସୁଲା ଆମାଇ ସୁନ' “ମୁରା'ଗା', ନନା ବିନେସାକ୍ ଜୁଗ' ଉରିଂ” ଡ'ସେକ୍ ସୁନ' ।
9ସୁନ'ସା' ଗୁତୁନ୍ ରେମ ଆଇ'କୁ ବାନି ଡେଂଗା' । ମାରି ନିଜର୍ନା ବିନେସାକ୍ ଜୁଗ' ଉରିଂଅଁ' ।
ଉନ୍ତା ବିସ୍ରାମ୍ଦିନ୍ ଡୁକୁ । 10ସା' ଜିଉଦିରେମଲେ ଆତୁନ୍ ବାନି ଡେଂକୁନୁଂଆଁ ସୁନ' “ଆ'ନା ବିସ୍ରାମ୍ଦିନ୍ବକ୍ ନନା ବିନେସାକ୍ ଜୁଗ' ରିଂଅଁ' ଉଇନା ନେଇ'ନା ନିୟମ୍ ଆରାକ୍” ଡ'ସେକ୍ ସୁନ' ।
11ମାତର୍ ମାଇ ଆମା'ଏ ସୁନ' “ଜା ଆନିଂ ବଲ୍ ଡେମ' ମାଇ ଆନିଂ, ନନା ବିନେସାକ୍ ଜୁଗ' ଉରିଂ ଡ' ସୁନ'” ଡ'ସେକ୍ ସୁନ' ।
12ସା' ମା'ଏ ଆମାଇ ଅ'ଗଁସ୍ଲା'ଗା' “ଆନ ଜା ବିନେସାକ୍ ଜୁଗ' ଉରିଂ ଡ'ସେକ୍ ସୁନ' ଗୁତୁନ୍ ରେମ ଜା?” ଡ'ସେକ୍ ଅ'ଗଁସ୍ଲା'ଗା' । 13ମାତର୍ ଆତା ଅବୁଦି ରେମଲେ ଡୁକୁନୁଂବକ୍ ଜିସୁଲା ଗାଇଉଇଗା'ସା' ମାଇ ଜା ଡ'ସେକ୍ ଗୁତୁନ୍ ବଲ୍ ଡେଂକୁନୁଂ ରେମ ଆମାକ୍ତ ।
14ତିର୍ଗି' ଜିସୁଲା ଆମାଇ ମନ୍ଦିର୍ବକ୍ ସୁସପ୍ବାଂସେକ୍ ସୁନ' “ଜୁ, ଆ'ନା ନ ବାନି ଡେଂନ; ମାରି ପାପ୍କାମ୍ ଆଡେମ' ଆରାକ୍ନା ଆନ ଗୁତୁନ୍କୁରୁଂ ଅଦିକ୍ କସ୍ଟ ସାପ୍ତା” ଡ'ସେକ୍ ସୁନ' । 15ସା' ଗୁତୁନ୍ ରେମ ଉଇସେକ୍ ଆନିଂ ଜିସୁଲା ବଲ୍ ଡେମ' ଡ'ସେକ୍ ଆଜିଉଦିରେମଲେ ବାର୍ସୁନ' ।
ନିଂ ମାପ୍ରୁନା ଉଁ'ଉଁ ଡ'ସେକ୍ ଜିସୁଲା ସୁଁସୁଡେନ୍
16ସା' ଜିସୁଲା ବିସ୍ରାମ୍ଦିନ୍ବକ୍ କେନା ଡେମ'କୁସା' ଜିଉଦିରେମଲେନା ମୁନା'ରେମେ ଆମାଇ କସ୍ଟ ବିବେ' ମୁଲାୟ' । 17ମାତର୍ ଜିସୁଲା ଆମା'ଏ ସୁନ' “ନିଂନା ବା ଆ'ନ୍ପନ୍ତେକ୍ ଇସାଉ କାମ୍ ଡେମ'ସେ'ଗା ଡୁତାସା' ନିଂସା ଡେମ'ତିଂ” ଡ'ସେକ୍ ସୁନ' । 18ଡି'କେନା ସୁନ'ସା' ଜିଉଦିରେମଲେନା ମୁନା'ରେମେ ଆମାଇ ଅଡାପ୍ପୁଲେଇ ମାରି ଅଦିକ୍ ସେସ୍ଟା ଡେମ' । ମାସା'ଡ'ନା ମାଇ ବିସ୍ରାମ୍ଦିନ୍ନା ନିୟମ୍ ଆମାନ୍ତା ଡେଂକୁ । ଗୁତୁନ୍ସା' ଆରାକ୍ ଆମାପ୍ରୁ ନିଜର୍ନା ବା ଡ'ସେକ୍ ନିଜେ ମାପ୍ରୁବୁରଂ ଅ'ସରିଗୁତା ।
19ସା' ଜିସୁଲା ଆମା'ଏ ସୁନ' “ନିଂ ଆପେ ସତ୍ ସୁନ'ତିଂ, ଉଁ'ଉଁନ୍ଡେଇଁ ନିଜେ ମାଏସା ଡିନ୍ଡେମ୍ ଆଗଂତା । ବାଡେଇଁ ମା ଡେମ'ତା ଗୁତୁନ୍ ଜୁଲ'ସେ'ଗାଉ ମାଇ ଡିନ୍ଡେମ୍ ଗଂତା । ମାସା'ଡ'ନା ବାଡେଇଁ ମା ଡେମ'ତା ଡୁ'ତୁନାଉ ଉଁ'ଉଁନ୍ଡେଇଁସା ଡେମ'ତା । 20ମାସା'ଡ'ନା ବାଡେଇଁ ଆ'ଉଁନ୍ଡେଇଁ ଆଲାତ୍ ଡେମ'ତା ମାରି ନିଜେ ମାମା ଡେମ୍ତ ଗୁତୁନ୍ ଗୁଲାଇ ଆ'ଉଁନ୍ଡେଇଁ ଅସୁଇ'ତ । ସତଇସା ବାଡେଇଁ ମାରି ଅଦିକ୍ ମୁନା'ମୁନା'ବାଇ' କାମ୍ ଆମାଇ ଅସୁଇ'ତ । ଗୁତୁନ୍ ଜୁଲ'ସେକ୍ ପେ କାବା ଡେନ୍ତୁପେ । 21ସା' ବାଡେଇଁ ମି ଗୁଇ'କୁନୁଂରେମ୍ବକ୍ ବ'ରତ ଡୁ'ତୁନା ଉଁ'ଉଁନ୍ଡେଇଁସା ନିଜର୍ନା ମୁନ୍ସୁଗ ଆଜା ମୁନ୍ ଆମାଇ ଜିବନ୍ ବେ'ତ । 22ମାରି ବାଡେଇଁ ନିଜେ ଆଜାଏସା ବିସାର୍ନା ଆଡେମ୍ତ ମାତର୍ ଆଗୁଲାଇର ବିସାର୍ନା ଡିନ୍ଡେମ୍ନା ଅଦିକାର୍ ଗୁଲାଇ ମାଇ ଆ'ଉଁନ୍ଡେଇଁ ବେଡ'ତା । 23ମାସା'ଡ'ନା ଆବାଡେଇଁ ମି ଗୁଲାଇର ମାନ୍ଗୁତା ଡୁ'ତୁନାଉ ଆ'ଉଁନ୍ଡେଇଁସା ମାନ୍ଲେଇ' ଡ'ସେକ୍ ଗୁଲାଇ ଅଦିକାର୍ ବେଡ'ତା । ଜା ଆ'ଉଁନ୍ଡେଇଁ ଆମାନ୍ତା ମାଇ ଆମାଇ ବେନ୍ଟାୟ'କୁନୁଂ ଆବାଡେଇଁସା ଆମାନ୍ତା ।
24ନିଂ ଆପେ ସତଇସା ସୁନ'ତିଂ, ଜା ନିଂନା ତୁମ' ଅଂଅଁ'ସେକ୍ ଆନିଂ ବେନ୍ଟାୟ'କୁନୁଂଆଁ ବିସ୍ବାସ୍ ଡେମ'ତା ମାଇ ମଡୁନମ୍ ଜିବନ୍ ବାଂଗା' । ମାପ୍ରୁ ଆମାଇ ବିସାର୍ନା ଆଡେମ୍ତ ମାରି ଆମାଇ ଅଗୁଇ'ନା ଡନ୍ଡ୍ ଆବେ'ତ । ମାଇ ଗୁଗୁଇ'ନା ଡନ୍ଡ୍କୁରୁଂ ଜିନ୍ସେକ୍ ମଡୁନମ୍ ଜିବନ୍ ବାଂଗୁତା ।
25ନିଂ ଆପେ ସତଇସା ସୁନ'ତିଂ, ଗୁଇ'କୁନୁଂ ରେମଲେ ମାପ୍ରୁନା ଉଁ'ଉଁନା ତୁମ' ଅଂତ ମାରି ଜାଜା ଅଂତ ମା'ଏ ବୁରତା, ଡି'କେନ୍ବାଇ' ମୁଇ ବେଲା ସୁସାପ୍ଡେନ୍ତା ମାରି ଆ'ନାସା ସା'ଗୁତା । 26ମାସା'ଡ'ନା ଜିବନ୍ ବିବେ'ପୁଲେଇ ଆନିଂନା ବା ବପୁ ଡୁତା । ଡୁ'ତୁନା ଜିବନ୍ ବିବେ'ପୁଲେଇ ମାଇ ଆନିଂସା ସମାନ୍ ବପୁ ବେଡ'ତା । 27ମାରି ଆରେମଲେ ବିସାର୍ନା ଡିନ୍ଡେମ୍ପୁଲେଇ ଆନିଂ ଅଦିକାର୍ ବେଡ'ତା ମାସା'ଡ'ନା ନିଂଉ ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁ । 28ନିଂନା ତୁମ' ଅଂଅଁ'ସେକ୍ ପେ କାବା ଆଡେଂଗା', ମାସା'ଡ'ନା ଗୁଇ'କୁନୁଂ ରେମଲେ ଗୁଲାଇର ନିଂନା ତୁମ' ଅଂତ, ଡୁ'ତୁନ୍ବାଇ' ମୁଇ ବେଲା ସାପ୍ତା । 29ମାରି ଜାଜା ବଲ୍କାମ୍ ଡେମ'କୁ ମା'ଏ ମଡୁନମ୍ ଜିବନ୍ ବୁମ୍ବାମ୍ପୁଲେଇ ମାରି ଜାଜା ଅଲିରାକ୍କାମ୍ ଡେମ'ସେକ୍ ଡୁକୁ ଆମା'ଏ ବିସାର୍ନା ଡେମ'ସେକ୍ ଡନ୍ଡ୍ ବି'ବେପୁଲେଇ ଗୁଇ'କୁନୁଂକୁରୁଂ ବୁରକ୍ସେକ୍ ଉନ୍ତା ତୁତୁର୍ଆର୍ତା । 30ନିଂ ନିଜର୍ନା ମୁନ୍ସୁଗ ମାଏସା ଡିନ୍ଡେମ୍ ଆଗଂତିଂ । ମାପ୍ରୁ ମା ସୁନ୍ତ ଗୁତୁନ୍ ଅଂଅଁ'ସେକ୍ ଡୁ'ତୁନ୍ସୁଗଉ ନିଂ ବିସାର୍ନା ଡେମ୍ତିଂ । ମାରି ନିଂ ବିସାର୍ନା ଡିନ୍ଡେମ୍ନା ସତ୍ ଡୁତା ମାସା'ଡ'ନା ନିଂ ନିଜର୍ନା ମୁନ୍ସୁଗ ଆରାକ୍ ମାତର୍ ଆନିଂ ଜା ବେନ୍ଟାୟ'ତା ମାଇନା ମୁନ୍ସୁଗ ଡିନ୍ଡେମ୍ପୁଲେଇ ମୁନ୍ ଡେଂଗୁତିଂ ।
31ନିଂଉ ନିଂନା ନିଜର୍ନା ବିସୟ ସାକି ସୁନ'ନା ନିଂ ସୁନ'କୁନୁଂ ସାକି ସତ୍ ଡ'ସେକ୍ ପେ ବିସ୍ବାସ୍ ଆଡେମ୍ତୁପେ । 32ମାତର୍ ପାଲ୍ ମୁଇନ୍ଡା ନିଂନା ବିସୟ ସାକି ସୁନ'ତା; ମାରି ନିଂନା ବିସୟ ମାଇ ସାକି ସୁନ'କୁନୁଂ ସତ୍ ଡ'ସେକ୍ ନିଂ ମାଗ'ତିଂ । 33#ଜଅନ୍ 1:19–27; 3:27–30ପେ ଜଅନ୍ବକ୍ ନିଂନା ବିସୟ ଅ'ଗଁସ୍ଲାକ୍ପୁଲେଇ ଆରେମଲେ ବେନ୍ଟାୟ'ପେ । ମାରି ମାଇ ସତ୍ ବିସୟରେ ସାକି ସୁନ'ତା । 34ଜୁ, ରେମଲେ ନିଂନା ବିସୟରେ ସାକି ସୁଁସୁ ଦର୍କାର୍ ଆରାକ୍ । ମାତର୍ ପେ ଗୁତୁନ୍ ଅଂଅଁ'ସେ'ଗା ବିସ୍ବାସ୍ ଡିନ୍ଡେମ୍ପୁଲେଇ ମାରି ରକ୍ୟା ବୁମ୍ବାମ୍ପୁଲେଇଉ ନିଂ କେନା ସୁନ'ତିଂ । 35ଜଅନ୍ଲା ବଲ୍ ଡକ୍ସେକ୍ ତାର୍କି'କୁନୁଂ ମୁଇ ବତିସୁଗ ଡୁକୁ । ମାରି ପେ ମାଇନା ତୁମ' ଅଂଅଁ'ସେକ୍ ପରେକ୍ ସାର୍ଦା ଡିନ୍ଡେମ୍ପୁଲେଇ ମୁନ୍ ଡେଂକୁପେ । 36ମାତର୍ ଜଅନ୍ଲା ନିଂନା ବିସୟ ସାକି ସୁନ'କୁନୁଂକୁରୁଂ ମୁନା'ବାଇ' ମୁଇ ସାକି ସୁଁସୁପୁଲେଇ ଡୁତା । ମାସା'ଡ'ନା ନିଂନା ବା ଆନିଂ ଅ'ଡମ୍ପୁଲେଇ ବେଡ'କୁନୁଂ ଗୁଲାଇ କାମ୍ ନିଂ ଆ'ନା ଡିନ୍ଡେମ୍ ଡେନ୍ତିଂ । ଗୁତୁନ୍ ନିଂ ଡେମ'କୁନୁଂ କାମ୍ ଗୁଲାଇ ପେ ଜୁଲ'ନା ନିଂନା ବା ଆନିଂ ବେନ୍ଟାୟ'ତା ଡ'ସେକ୍ ସାକିସୁଗ ଡୁତା । 37#ମାତିଉ 3:17; ମାର୍କ 1:11; ଲୁକ 3:22ଆନିଂ ବେନ୍ଟାୟ'କୁନୁଂ ନିଂନା ବା ସା ନିଂନା ବିସୟ ସାକି ସୁନ'ତା । ମାଇ ସୁନ'କୁନୁଂ ପେ ଇନ୍ଡଇ'ଏସା ଆଅଂତୁପେ ମାରି ମାଇ ମିବାଇ' ଡ'ସେକ୍ସା ଆଜୁତୁପେ । 38ମାଇନା ତୁମ' ପେନ୍ ଜିବନ୍ ବିତ୍ରେ ଆଡୁତା । ମାସା'ଡ'ନା ଆଜା ମାଇ ବେନ୍ଟାୟ' ଆମାଇ ପେ ବିସ୍ବାସ୍ ଆଡେମ୍ତୁପେ ।
39ପେ ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂ ବଲ୍ ପଡ୍ତୁପେ ମାସା'ଡ'ନା ଗୁତୁନ୍ ଆପେ ମଡୁନମ୍ ଜିବନ୍ ବେ'ତ ଡ'ସେକ୍ ପେ ଏତ୍ଗୁତୁପେ । ଜୁ, ଆତା ଗୁଲାଇ ନିଂନା ବିସୟଉ ସାକି ସୁନ'ତା । 40ମାତର୍ ମଡୁନମ୍ ଜିବନ୍ ବୁମ୍ବାମ୍ ଡୁତା ଡ'ସେକ୍ ପେ ନିଂବକ୍ ସୁସାପ୍ପୁଲେଇ ମୁନ୍ ଆଡେମ୍ତୁପେ ।
41ରେମଲେ ଜାଏସା ଆନିଂ ମୁନା'ରେମ୍ ଡ'ସେକ୍ ନାଉଲେଇ' ଡ' ଆଏତ୍ତିଂ । 42ମାତର୍ ପେ ଆମାପ୍ରୁ ପେନ୍ ଜିବନ୍ ବିତ୍ରେକୁରୁଂ ଆଲାତ୍ ଆଡେମ୍ତୁପେ ଡ'ସେକ୍ ନିଂ ମାଗ'ତିଂ । 43ମାସା'ଡ'ନା ନିଂନା ବାନା ଇମିବକ୍ ନିଂ ସା'ଗୁତିଂସା'ଏସା ପେ ଆନିଂ ବିସ୍ବାସ୍ ଆଡେମ୍ତୁପେ । ମାତର୍ ଜାଏସା ନିଜର୍ନା ମୁନ୍ସୁଗ ସାକ୍ନା ପେ ଆମାଇ ବିସ୍ବାସ୍ ଡେମ୍ତୁପେ । 44ଡୁ'ତୁନ୍ ଡ'ନା ପେ ମି ଆନିଂ ବିସ୍ବାସ୍ ଡିନ୍ଡେମ୍ ଗଂତୁପେ? ମାସା'ଡ'ନା ପେନ୍ ବିତ୍ରେ ମୁଇନ୍ଡା ଆମୁଇନ୍ଡା ଅ'ନାଉପୁଲେଇଉ ମୁନ୍ ଡେଂଗୁତୁପେ । ମାତର୍ ମାପ୍ରୁ ମୁଇନ୍ଡାଉ ଡୁତା, ମାଇ ଆନେଇ' ଅ'ନାଉଲେଇ' ଡ'ସେକ୍ ପେନା ମୁନ୍ ଆରାକ୍ ।
45ସା' ବିସାର୍ନା ଡିନ୍ଡେମ୍ବେଲା ମା'ଏ ଅଲିରାକ୍ବାଇ' ରେମଲେ ଡ'ସେକ୍ ନିଂ ପେନ୍ ବିସୟ ଆବାଲା ସୁନ୍ତିଂ ଡ'ସେକ୍ ପେ ଆଏତ୍ଗା' । ମାସା'ଡ'ନା ଆପେ ଡୁ'ତୁନ୍ଉ ସୁଁସୁରେମ୍ ନିଂ ଆରାକ୍ ମାତର୍ ପେ ଆଜା ଆସ୍ସେକ୍ ଡୁତୁପେ ଗୁତୁନ୍ ମସାଲାଉ ସୁନ୍ତ । 46ମାସା'ଡ'ନା ପେ ଆମସାଲା ବିସ୍ବାସ୍ ଡେମ'ତୁପେ ଡ'ନା ଆନିଂସା ବିସ୍ବାସ୍ ଡେମ୍ପେ । ମାସା'ଡ'ନା ମାଇ ନିଂନା ବିସୟଉ ଉଲାକ୍ବକ୍ ଲେକ୍ଲ'ତା । 47ମାତର୍ ମାଇ ଲେକ୍ଲ' ବେଡକୁନୁଂ ପେ ବିସ୍ବାସ୍ ଆଡେମ୍ତୁପେ ଡ'ନା ନିଂ ସୁନ'କୁନୁଂ ପେ ମି ବିସ୍ବାସ୍ ଡେମ୍ତୁପେ?” ଡ'ସେକ୍ ସୁନ' ।
ទើបបានជ្រើសរើសហើយ៖
ଜଅନ୍ 5: BFW
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
CC BY-NC-ND 4.0