Ma-thi-ơ 10
10
Pô Yê-su rwah tha pluh dwa Xêh Pachai
(Mag 3:13-19; Lu-ka 6:12-16)
1Pô Yê-su iêu tha pluh dwa anưk xêh mưrai, ƀai brei aco gon piêh tiaup di dôm tan ok yang thong pajru dhit dôm gruk rwak hakik, pađik pađwa. 2Sani nạn angan tha pluh dwa Xêh Pachai: Dahlau yatha nạn Si-môn lijang iêu nạn Phi-e-rơ, thong adei nhu nạn Ar-rê, Ya-kơ thong adei nhu nạn Yâng, nạn dôm anưk Xê-ƀê-đê; 3Phi-lip thong Ƀa-thê-lê-mi; Thô-ma thong Ma-thi-ơ nạn mưnuix mưk jiư; Ya-kơ nạn anưk A-phê thong Tha-đê; 4Si-môn nạn mưnuix bha kavôm Ka-na-nê-an,#10:4 Ka-na-nê-an: Akhar ni tabiak mưng xap A-ram hu ar nạn “tati tatang, tatang tiak”. Hadei di nan, kavôm Ka-na-nê-an ni hu angan Hi-lap nạn “Xê-lôt”, tha radak anưd mưnuix Yo Thaic anit diya, mưradhag vơk jakar Rô-ma. thong Yu-đa Ic-ka-ri-ôt, nạn ra lambil Bhô.
Rapajan Tha Pluh Dwa Xêh Pachai
(Mag 6:7-13; Lu-ka 9:1-6)
5Pô Yê-su pađar tha pluh dwa Xêh Pachai ni nao thong kakei laic: “Jôi nao tamư bhum mưnuix Bôl-Lingiu, lijang jôi tamư tha dhan halei anưd bôl Sa-ma-ri; 6min siam hơl, xang mưrai tom dôm pabo calah anưd bôl I-sra-ên. 7Tuk nao, xang rao lang laic: ‘Dit Biya Thôr Riga krung hu mưrai jek.’ 8Xang pajru dhit urang rwak, ngak ka urang mưtai diup vơk, ngak hacih mưnuix khalong, thong tiaup ajin. Khol hư krung hu tôk thoh, yơ xang brei thoh. 9Jôi ba mưh, pariak, ngan jiên dalam talei kaing; 10#I Kô 9:14; I Ti 5:18.Tuk nao jalan lijang jôi ba tabik, dwa blah ao, ngan takhok hai gai drưg, kaywa mưnuix ngak bruk đang bihu kaya ƀang. 11Tuk tamư pathar pathar dhan ngan palei halei, xang thôi tanhi pak nan hu thei nạn mưnuix lek thamgôn, bloh xang dok vơk libik nan ka tal tuk niga nao. 12Mưyah tamư thang halei, xang tadhau thug siam ka thang nan. 13Mưyah thang nạn lek thamgôn, yơ gruk thug siam khol hư mưca mưrai tom khol nhu; gilaic vơk, gruk thug siam khol hư mưca gilaic mai khol hư. 14#Bruk 13:51.Mưyah thei ôh daa rok, ngan ôh pang panôic khol hư yơ tuk niga thang ngan dhan nan, xang tapơh dhul krung hu đam di takai khol hư. 15#Mat 11:24.#Lu 10:4-12.Biak jơh, Ita đôm thong khol hư, tal harei bican inư, nưgar Sô-đôm thong Gô-mô-rơ mưca ciup dan dun njôl hơl dhan nan.
Dôm gruk gơk tatơk thi mưjiơng tabiak
(Mag 13:9-13; Lu-ka 21:12-17)
16 #
Lu 10:3. Mưni, Ita pachai khol hư nao yau pabo krưh tapôr athau thing. Xang jag ghơh yau ula, yor yau katrau. 17#Mag 13:9-11; Lu 12:11,12; Lu 21:12-15.Xang caga di dunya, kaywa khol nhu mưca mưk jao khol hư ka Ginum Biai Mưdhir An thong tong khol hư dalam thang nhom. 18Kaywa Ita, mưca khol hư gok ba mưrai pak anak dôm kwan pakrang nưgar thong dôm patao, piêh ngak kaxan ka khol nhu thong dôm mưnuix Bôl-Lingiu. 19Min tuk khol nhu ba jao khol hư, jôi uh tarak xang đôm yau halei, ngan đôm dôm haget; dalam tuk nan, dôm haget xang đôm mưca bihu ƀai brei ka khol hư. 20Kaywa ôh njaup êng khol hư đôm, min Pô Nưbi Ginrơh anưd Amư khol hư mưca đôm tapa khol hư. 21#Mag 13:12; Lu 21:16.Mưca xaai hakak adei piêh gok pamưtai, mưca amư ba jao anưk, anưk bik mưca brôk tagôk pagan gađi di amek amư thong ngak ka khol nhu xang mưtai. 22#Mat 24:9; Mag 13:13; Lu 21:17. Mat 24:13; Mag 13:13.Mưca khol hư gok abih paran mưbai limuk kaywa angan Ita, min thei kajap hatai ka tal taluic yơ mưca bihu dong paklah. 23Tuk mưnuix urang gơk tatơk khol hư dalam dhan ni, xang daup tapa dhan dêh; biak jơh, Ita đôm thong khol hư, khol hư ô ka nao tapa abih dhan I-sra-ên, yơ Anưk Mưnuix krung hu mưrai pajơ.
24 #
Lu 6:40.
Yâ 13:16; Yâ 15:20. Anưk xêh ôh hơl gru, halun ôh hơl di pô. 25#Mat 9:34; Mat 12:24; Mag 3:22; Lu 11:15.Anưk xêh bihu yau gru, halun bihu yau pô nạn tal pajơ. Pô thang dok gok iêu nạn Ƀê-ên-xê-ƀun, laic haget mưnuix thang!
Xang hôic taka di Pô Lingik
(Lu-ka 12:2-7)
26 #
Mag 4:22; Lu 8:17. Yau nan khol hư jôi hôic di khol nhu; kaywa ôh hu kabha haget pacang padaup bloh ôh gok parang tabiak; ôh hu kabha haget dađaup kavơk bloh ôh gok pabiđang. 27Nan yơ, dôm haget Ita đôm thong khol hư dalam xup xang đôm tabiak lingiu tanrak hadah, dôm haget khol hư pang xi xao di tangi, xang pablo ngok pabung thang. 28Jôi hôic di dôm ra pamưtai rup pabhap bloh ôh pamưtai bihu thap xwan, min dak hôic di Dê hu mưda thubang bih thap xwan gam rup pabhap dalam nôriga. 29Dwa cim ngik ôh njaup ciêt pablei bihu tha boh jiên ô? Min ôh hu drei halei lek trun di haluk, bloh ôh tui jamal Amư khol hư. 30Bahkan ƀuk ngok akok khol hư lijang bihu yaup bih pajơ. 31Kaywa nạn jôi hôic, kaywa khol hư banrik hơl di ralô cim ngik.
Tao Pô Yê-su di anak dunya
(Lu-ka 12:8-9)
32Yau nan, mưyah thei tao tôk Ita di anak dunya, yơ Ita lijang mưca tao tôk urang nan di anak Amư Ita ngok thôr riga; 33#II Ti 2:12.Dok thei kamlah klāk Ita pak anak dunya, yơ Ita lijang mưca kamlah klāk khol nhu pak anak Amư Ita ngok thôr riga.
Ôh ba thug siam min ba padak hanrak
(Lu-ka 12:51-53; 14:26-27)
34Jôi xanưng Ita mưrai ba thug siam ka dunya. Ita mưrai ôh njaup piêh ba thug siam, min nạn hanrak padak. 35Ita mưrai piêh klah nưh anưk likei thong amư, anưk kamei thong amek, nai mưtau thong amek pathang; 36thong ra thutruh mưnuix urang êng nạn mưnga vôm anưd khol nhu. 37Thei anit amư ngan amek hơl di Ita yơ ôh lek thamgôn thong Ita, thei anit anưk likei ngan anưk kamei hơl di Ita, lijang ôh lek thamgôn thong Ita. 38#Mat 16:24; Mag 8:34; Lu 9:23.Thei ôh galam gai gan gak drei bloh tui Ita yơ ôh lek thamgôn thong Ita. 39#Mat 16:25; Mag 8:35; Lu 9:24; Lu 17:33; Yâ 12:25.Thei ran khik xwan diup drei mưca lihik; dok thei kaywa Ita bloh lihik xwan diup drei, yơ mưca dwah bihu vơk.
Dôm kaya alin
(Mag 9:41)
40 #
Lu 10:16; Yâ 13:20.
Mag 9:37; Lu 9:48. Thei rok daa khol hư nạn rok daa Ita; thei rok daa Ita nạn rok daa Dê krung hu pađar Ita. 41Thei rok daa tha hôr kaywa nạn hôr, yơ mưca tôk kaya alin anưd hôr; thei rok daa tha urang kahanôt kaywa nạn urang kahanôt, yơ mưca tôk kaya alin anưd urang kahanôt. 42Thei brei ka tha dalam dôm urang hin hot ni ciêt tha ghar ia lian, kaywa urang ni nạn anưk xêh Ita; biak jơh, Ita đôm thong khol hư, mưca urang nan ôh lihik kaya alin drei ô.”
ទើបបានជ្រើសរើសហើយ៖
Ma-thi-ơ 10: CJM2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 Bible Society Vietnam. All rights reserved.