Ma-thi-ơ 12
12
Ngak bruk dalam harei Sa-ƀat
(Mag 2:23-28; Lu-ka 6:1-5)
1Tuk nan, dalam harei Sa-ƀat, Pô Yê-su nao thrang tapa along hamu padai abei, dôm anưk xêh Bhô lipa tian nan ka raup catek tangi padai ƀang. 2Dôm urang Pha-ri-si ƀôh yau nan, đôm thong Bhô: “Mong dêh, dôm anưk xêh gru ngak kabha ôh bihu idin ngak dalam harei Sa-ƀat.” 3Min Bhô thuuk: “Khol hư ô ka pôic ka bruk Đa-vit krung hu ngak, tuk ong mưthong dôm urang nao tui gok lipa ô? 4Ong krung hu tamư thang Pô Lingik ƀang tapei limah, paka tapei bloh ong thong dôm ra nao tui thubik ôh bihu idin ƀang, ciêt cek karei ka dôm gru mưliêng. 5Ngan nạn khol hư ô ka pôic dalam tapuk adat laic, dalam harei Sa-ƀat, dôm gru mưliêng dalam huji tanrok di adat harei Sa-ƀat bloh jang ôh tavak di glaic ô habar? 6Min Ita đôm thong khol hư, tak ni, hu tha Dê glong banrik hơl di bih huji. 7#Mat 9:13.Mưyah khol hư thau bihu ar kanen ni: ‘Ita ưng tian athur alim, mih ôh njaup athur limah,’ yơ khol hư krung hu ôh padok an mưnuix ôh hu glaic; 8kaywa Anưk Mưnuix nạn Pô harei Sa-ƀat.”
Pô Yê-su pajru rwak dalam harei Sa-ƀat
(Mag 3:1-6; Lu-ka 6:6-11)
9Pô Yê-su niga truh libik nan, nao tamư thang nhom. 10Tak nan hu mưnuix iop tha palāk tangin, khol nhu tanhi Bhô laic: “Dalam harei Sa-ƀat, bihu idin pajru rwak lei?” Khol nhu tanhi yau nan, piêh hu mưda palek palam Bhô. 11#Lu 14:5.Bhô bican thong khol nhu: “Thei dalam khol hư hu tha drei pabo lek trun gôk dalam harei Sa-ƀat gilaic ôh katung nhu tagôk ô habar? 12Laic haget mưnuix biak banrik hơl pabo thau kađơ! Yau nan, dalam harei Sa-ƀat bihu idin ngak kabha siam.” 13Bloh Bhô bican thong mưnuix iop tangin: “Xang yêr tangin tabiak!” Urang nan yêr tangin tabiak yơ tangin bihu dhit yau tangin dêh. 14Dôm urang Pha-ri-si tabiak nao, biai anngak mưradhag Bhô thong dwah ganap pamưtai Bhô.
Halun bihu Pô Lingik rwah
15Min Pô Yê-su thau kabha nan, yơ pleh truh libik nan. Hu ralô urang tui Bhô, thong Bhô pajru dhit ka abih. 16Min Bhô pakaup khol nhu jôi pabiđang ka thei thau Bhô. 17Yau nan, piêh ka panôic pakat hôr Ê-sai krung hu đôm bihu thit:
18“Mưni nạn halun Ita krung hu rwah,
Mưnuix Ita anit puja, bui tian Ita purmưta.
Mưca Ita brei Pô Nưbi Ginrơh Ita biđang ngok Mưnuix,
Mưca Mưnuix rao pahơh adil ka mưnuix Bôl-Lingiu.
19Mưca Mưnuix ôh kamlah cah, prêu ot,
Ôh thei hamit xap Mưnuix di lingiu ding.
20Mưca Mưnuix ôh joh phun tabo krung hu tabram,
Ôh padam hadah mưnhưk jek thi bôi.
Ka tal tuk Mưnuix ba adil mưrai jaiyak,
21Thong dôm mưnuix Bôl-Lingiu cek pachôm di angan Mưnuix.”
Pô Yê-su pajru urang gok ajin mưk – Glaic hanoh niêm tal Pô Nưbi Ginrơh
(Mag 3:20-30; Lu-ka 11:14-23; 12:10)
22Kal nan, mưnuix urang ba mưrai ka Pô Yê-su tha urang gok ajin mưk tagloh thong kamlo. Bhô pajru dhit, ngak ka urang nan đôm thong ƀôh bihu. 23Abih bôl bhap jang plơng kadơng đôm laic: “Hu njaup urang ni nạn anưk patao Đa-vit lei?” 24#Mat 9:34; Mat 10:25.Min tuk hamit yau nan dôm urang Pha-ri-si gilaic đôm: “Urang ni ôh mưda tiaup ajin bihu, mưyah ôh nhơ di ajin patao Ƀê-ên-xê-ƀun.” 25Pô Yê-su thau dôm thangka khol nhu yơ bican: “Dit biya halei êng klah nưh, mưca gok drup jalơh, tha dhan ngan tha thang halei êng klah nưh mưca ôh dang kajap bihu. 26Mưyah Sa-tan tiaup Sa-tan, ar nạn nhu êng klah nưh yơ dit biya nhu ngak habar dang kajap bihu? 27Mưyah Ita nhơ di Ƀê-ên-xê-ƀun bloh tiaup dôm ajin, nan yơ anưk bik khol hư nhơ di thei bloh tiaup ajin? Ywa nan ka, êng khol nhu mưca nạn mưnuix pachang bican khol hư. 28Dok mưyah Ita nhơ di Nưbi Ginrơh Pô Lingik bloh tiaup dôm ajin, yơ Dit Biya Pô Lingik krung hu mưrai tom khol hư pajơ. 29Ngan nạn, ngak habar mưnuix urang hu mưda tamư thang tha urang hu ritdhi piêh poh blah ƀang angui, mưyah dahlau yatha ôh girak urang nan ô? Xang girak urang nan vơk bloh mưng poh blah thang urang nan bihu. 30#Mag 9:40.Thei ôh mưdok thong Ita nạn mưradhag vơk Ita; thei ôh atadha thong Ita yơ gok cah côt. 31Ywa nan ka, Ita đôm thong khol hư: Abih danuh glaic thong panôic tanrok jang bihu ampun ka mưrôxak, min hanoh niêm tal Pô Nưbi Ginrơh mưca ôh bihu ampun. 32#Lu 12:10.Thei đôm pagan gađi thong Anưk Mưnuix yơ mưca bihu ampun; min thei đôm pagan gađi thong Pô Nưbi Ginrơh yơ kanê rai ni ngan rai hadei lijang mưca ôh bihu ampun.
Phun thong boh nhu
(Lu-ka 6:43-45)
33 #
Mat 7:20; Lu 6:44. Mưyah nạn phun siam yơ boh lijang siam, laic mưyah phun jhak yơ boh lijang jhak; kaywa mong boh yơ thau ka phun. 34#Mat 3:7; Mat 23:33; Lu 3:7. Mat 15:18; Lu 6:45.Hơic talei pajeh ula tanbôm dêh! Khol hư takrung nạn jhak, ngak habar đôm bihu kabha siam? Kaywa hu bak lamak dalam tian yơ pabah mưng đôm tabiak. 35Mưnuix siam kaywa patom patak dôm kabha siam; yơ mưnưk tabiak kabha siam; dok ra jhak kaywa patom patak dôm kabha ag yơ mưnưk mưboh kabha ag. 36Min Ita đôm thong khol hư, dalam harei bican inư, mưca mưnuix urang khai tabiak abih panôic ôh hu hanim drei krung hu đôm. 37Kaywa panôic đôm, hư mưca bihu mong yau kahanôt; lijang kaywa panôic đôm, mưca hư gok padok glaic.”
Nưm crih Yô-na
(Mag 8:11-12; Lu-ka 11:29-32)
38 #
Mat 16:1; Mag 8:11; Lu 11:16. Tuk nan hu dôm gru pato adat thong mưnuix Pha-ri-si đôm thong Bhô laic: “Pathau Gru, khol dahlak ưng iơk Gru ngak tha nưm crih.” 39#Mat 16:4; Mag 8:12.Bhô thuuk: “Rai rak xag mưjưy, agam ni pachang dwah tha nưm crih, min mưca ôh tôk bihu tha nưm crih halei, klāk nưm crih pakat hôr Yô-na tabiak. 40Kaywa yau Yô-na dok dalam tung ikan prong klau harei klau mưlam, lijang yau nan, Anưk Mưnuix mưca dok dalam tian tanưh klau harei klau mưlam. 41Dalam harei bican inư, bôl Ni-ni-ve mưca brôk tagôk mưthong rai rak ni thong padok an nhu, kaywa bôl nan krung hu pang panôic Yô-na rao lang thong tumal, min pak ni hu tha urang dok pôkja hơl di Yô-na! 42Dalam harei bican inư, patao kamei adih mưrong mưca brôk tagôk mưthong rai rak ni bloh padok an nhu, kaywa muk mưng luic boh tanưh mưrai pang panôic jag karag anưd patao Sa-lô-môn; min tak ni hu mưnuix dok glong banrik hơl di Sa-lô-môn!
Gok tan ok yang tamư vơk
(Lu-ka 11:24-26)
43Tuk tan ok yang tabiak truh di tha urang, nhu nao tapa dôm libik thu thang, dwah libik padei, min ôh dwah bihu. 44Bloh nhu đôm: ‘Mưca ita gilaic mai thang ita, libik ita birau tabiak truh.’ Tuk mai tal, ƀôh thang thoh, bah trah hacih, danôp nôk nang, 45nhu nao vêt thong ba mai tajuh ajin pakan xag mưjưy hơl, thubik tamư mưdok tak nan. Yau nan, canưk hadei anưd urang nan dok utan jhak hơl dahlau. Rai rak xag mưjưy ni lijang mưca yau nan rei.”
Amek thong dôm adei Pô Yê-su
(Mag 3:31-35; Lu-ka 8:19-21)
46Tuk Pô Yê-su dok krưh đôm thong tapôr bôl yơ amek thong dôm adei Bhô mưrai, dang pak lingiu thong dwah ganap đôm pôic thong Bhô. 47[Hu urang pathau thong Bhô laic: “Mưni amek thong dôm adei Gru krưh dang pak lingiu, ưng đôm pôic thong Gru.”]#12:47 Dalam tha thanôn blah vak tangin ôh hu kanen 47. 48Bhô thuuk: “Thei nạn amek Ita, thei nạn dôm dei ai Ita?” 49Bloh Bhô tacei tangin gah dôm anưk xêh thong đôm: “Sani nạn amek Ita thong dei ai Ita! 50Kaywa thei ngak tui jamal Amư Ita ngok thôr riga, urang nan nạn dei ai likei, dei ai kamei, thong nạn amek Ita rei.”
ទើបបានជ្រើសរើសហើយ៖
Ma-thi-ơ 12: CJM2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 Bible Society Vietnam. All rights reserved.