LUKA 1
1
Ebandeli
1Moto wa lokumu Teyofile, bato djunda basili bakomi mambi bobilani na emalekaka omanteyi ma biyo. 2Bakomaka mambi bobilani na emabakanolaka bato ebaika ana webandela ndenge ebakanolaka bango. Bato bango baika basali ba ntsango yango elendi mambi mango bango ndi balopaka ntsango. 3Ngai meni nakiki nandoko mpendja mambi mantso emalekaka banda webandela mpendja. Mpoli bonandi nakpaka meko te esengeli nakoma mpe na bosolo ndenge elekaka mambi mpo djawu Teyofile. 4Nalingi oyeba te mambi emabokanoli bato mpoli Yesu mao veti.
Andjelu akanolaka bobotami bo Yowane Mobatisi
5Ontango eika Elode Mokondji wa engumba ya yudeya, eika na nganga Kombo moko nkombo yai eika Zakaliya aika nobiki ana, aika olisanga li banganga Kombo ebabiangamaka olisanga li Abiya. Ayi na nfali wai Elizabeti baika bango bantso babale bakitani banganga Kombo wa boo wa Isalayele, Alona. 6Zakaliya na Elizabeti baika bango babale sembo oboo bo Kombo. Elingi nokambela te, babikaka bobilani na mibeko mintso mi Kombo too bakelaka bobe ka. 7Kasi Elizabeti too aika namakoki ma boboti nfana ka, yango too baika na banaka. Mpe ayi na Zakaliya banunaka mpendja. 8Mokolo moko, Zakaliya aika nosali mosala nfayi mo bonganga nganga Kombo oboo bo Kombo, mpo eika ngonga ya lisanga djai liponuvaka mpoli bosaleli Kombo omanteyi ma Tempelo. 9Eika mumeseno mpoli banganga Kombo bovaki mbesa mpoli bokpeyi meko moto nda okokpela otempelo wa Nkolo mpoli botumbi malasi ma ansa. Mpe nkombo ya Zakaliya ndi eponuvaka. 10Ndibe mumeseno, etukuluku ya bato bantso ebayanganaka mpoli bongbangemi baika nosambeli ondjeyi ya Tempelo ontango eika Zakaliya notumbi malasi ma ansa omateyi ma Tempelo. 11Na mbalakaka Adjelu autaka onva Nkolo abimelaka Zakaliya. Andjelu atemeke onkako ya eboko ya mumpele ya etumbelo eteli eika notumba Nganga Kombo malasi ma ansa. 12Ntango eboko Zakaliya Andjelu atilaka be. 13Kasi Andjelu akambelaka nayi te: Zakaliya Mpakotila mpo Kombo ayoki beiki awu nosambeli. Awu na Elizabeti nfali wawu bokokula nfana wa mumpele. Bosengeli nomobianga Yowane. 14Akokopa esengo be mpe bato djunda bakosepela ntango ekobotama ayi. 15Kombo akomokpaa moto wa motuya mpendja. Too akonyuwa vino too manga maati nanfa botini ka, mpe nguya ya molimo Mosantu mokoyala olikolo djayi oboo vayi bobotami. 16Akososolisa bato djunda ba isalayele botiki bosumuki mpe bobili waa Nkolo Kombo wa bango. 17Akoyala moto okoyala na molimo mpe nguya ya Mosakoli Eliya. Ayi akoya oboo bonkolo, mpoli bokominyi mitema mi bato mpoli boyani vayi. Akovinya boyokani onva ba Tata na bana babango, mpe akobongola milimo mi bato ebakale otosa boyamboli vanya bo Kombo mpo bayambola vanya bo Kombo. 18Zakaliya auwaka Andjelu te: Nakoyeba ndengende te mambi emakambeli awu makosalema veti? Naompaka, nfali wangai aompaka mpenja mpoli boboti bana. 19Andjelu akambelaka nayi te: Nkombo yangai Gabiyele, natemi oboo bo Kombo mpoli bomosaleli, Kombo antomi ngai mpo nakopa ntsango ndamu eye mpoli nfana wawu wa mumpele. 20Kasi yoka nabolamu. Okokoswa emimi okodjanga maloba tee ntango ekobotama nfana wawu wa mumpele. Yango ekosalema mpo too oyamboli ka mambi emakokanoli ngai. Mambi mantso emakokanoli ngai makosalema ontago ya mango. 21Ntango eika Zakaliya nosololi na Andjelu omanteyi ma Tempelo, bato ondjeyi baika nokongi Zakaliya mpo abima ondjeyi. Baika nomiuwi mpodje atikaliki ntango be omanteyi ma Tempelo. 22Ontsuka ntango ebimaka Zakaliya otempelo, too akokaka waa bokambeli na bango ka. Nabona ndi bato bayebaka na bilembo mpe na bodjangi vayi maloba te aboni eboneneli omanteyi ma Tempelo. 23Ntango eilaka poso wai wa mosala omanteyi ma Tempelo, avinyaka ondaku yai Oyudeya. 24Ontsima ya ntango botini, nfali wa Zakaliya Elizabeti akoswaka na djemi, mpe ayalaka ondaku ekolo na bato basandja batano. 25Akambelaka te: Nkolo ankeli te nakula makoki ma boboti nfana. Andakinyi mawa mayi sikanga mpe alongoli ntsoni yangai onva bato mpoli bodjangi bo bana.
Andjelu akanolaka Maliya te Yesu akobotama
26Ntango ekoswaka djemi li Elizabeti na basandja motoba, Kombo atomaka Andjelu Gabiyele o engumba ekabiangama Nazaleti wetuka ya Galileya. 27Akeke onva ngondo na nkombo ya Maliya. Maliya aika mobandami wa nfana wa mumpele na nkombo ya Yosefu, oika mokitani wa Mokondji Dawidi. 28Andjelu ayaka onva yai mpe akambelaka nayi te: Mbote yawu, Maliya. Kombo akopamboli mpendja. Kombo aonawu. Akopamboli#1.28 Akopamboli Maloba ontse ya loka elipeivi likanisi: Nkoma li bato ba lokota lo Geleki elingi nokambela te: opambolami omanteyi ma banyala. boleki banyala bantso! 29Ntsango ya Andjelu etungisaka Maliya mpe amiuwaka te: Ntina nde empeyi ayi mbote ya ndenge eyebo? 30Nayango Andjelu akambelaka nayi te: Kombo akanaka bokopamboli Maliya, nayango Mpakotila! 31Yoka djambi etibo. Okokula djemi mpe okobota nfana wa mumpele. Okomopa nkombo ya Yesu. 32Akoyala na nguya be mpe akoyebana ndibe nfana wa Kombo oleki olikolo. Nkolo Kombo akomokela Mokondji olikolo li bato bai bobilani nandenge elakelaka ayi na nkoko wayi Mokondji Dawidi. 33Ayi akokamba bakitani ba Yakobo mpe akobaombinya mpoli seko na seko. 34Nayango Maliya auwaka Andjelu te: Ndengende nakoki nokula nfana ontango yo ngai naino ngondo? 35Andjelu akambelaka nayi te: Molimo mosantu mo koya olikolo djawu. Nguya ya Kombo oleki olikolo ekokoyata mobimba nfawu. Nayango, nfana mosantu okobotoma onva yawu akobiangama nfana wa Kombo. 36Tika nakokanola eloko mpoko: Nfa mama wawu Elizabeti mpe akobota nfana wa mumpele, ntsoo akosweyi mpaka be. Bato bayebaka te too akoki nobota waa banaka, kasi asili nokoswa na djemi li basandja motoba. 37Too yona eloko mpoko ya mpasi onva Kombo ka. 38Nayango Maliya ayanolaka te Nao mosali wa Nkolo. Tika maloba mantso emakambela ayi na ngai makokisama onva ngai Nayango ndi Andjelu amotikaka.
Maliya akeyi nalenda Elizabeti
39Ontsima ya nfa mikolo, Maliya amikominyaka mpe awelisaka bokeyi o etuka ya Yudeya eyo moko wa bingumba omanteyi ma ngomba. 40Ntango ekoswaka ayi ondaku ya Zakaliya, apaka Elizabeti mbote. 41Ntango eyokaka Elizabeti mbote ya Maliya, Nambala yawi nfana anikanaka na esengo omanteyi ma libumu li Elizabeti. Nayango Elizabeti anyalaka na molimo mosantu. 42Aonfanaka na esengo onva Maliya mpe akambeli te: Maliya, Kombo akokeleli bolamu boleki banyala bantso. Mpe Kombo apamboli nfana okobota awu. 43Awu omoboti wa Nkolo wangai oyani na ndenda! Too nakomi na lokumu lunene etubo ka. 44Nakokanoli se ntango eyokiki ngai ompeyi mbote, nfana omanteyi ma ngai asepeliki be kino anikaniki. 45Nkolo akopamboli mpo oyambolaka te Nkolo akokokisa mambi emakokela ayi mpo djawu. 46Nayango Maliya ayanolaka na loyembo te Natatoli bonene bo Kombo 47Mobimba mu ngai mo sepeli na Kombo mobikiyi wangai, 48mpo aboniki bomiuniyi bongai, mosali wai. Kasi, bobandi nenu mpe bokei bike bintso bakombianga mopambolami. 49Mpo Kombo wa makoki mantso akeliki mambi ma bokanfeyi mpoli ngai. Nkombo yai yo Mosantu. 50Kombo okolakinya mawa mai mpoli seko na seko onva bato baka mongbangemela mpe no mosaleli. 51Akelaka mambi manene na nguya yai. Auniyaka bato balokumu mpe ebaika nomanyeyi mambi manene mpoli bango meni. 52Abotoloko bokuli mpe nguya li Bakondji kasi apei eteli ya motuya onva bato ba bomiuniyi. 53Kombo aleiyaka bato ebaika na ndjala biloko bilamu kasi abenginyaka bato babokuli mpe too abapaka eloko ka. 54Alosungaka biyo bato ba Isalayele basali bayi, mpoli bokanisi bololakinyi mawa mayi 55onva Abalayama mpe bakitani bayi bantso mpoli seko. Nandenge yango, akokisi elaka epaka ayi na bankoko babiyo. 56Maliya atikalaka basandja bato onva Elizabeti, mpe ontsima avinyaka onva yayi o Nazaleti.
Bobotami bo Yowane mobatisi
57Ntango ya Elizabeti ya boboti ekoswaka abotaka nfana wayi wa mumpele. 58Ntango eyoka bato ebaika noyali nayi belebiyo na banfa mama bayi bayokaka belakinyaka Nkolo mawa mayi onva yayi na bomopeyi nfana wa mumpele basepelaka na Elizabeti. 59Ntango ekokisaka nfana mikolo nfambi, beyi na banfa mama basanganaka mpoli bosepeli ekambi mpe batenaka nfana wa Zakaliya ngenga#1.59 Ngenga Bayuda bantso ba bampele esengelaka te baba tena ngenga. Botenuvi genga django eika elembo ya boyebi te omoko wa bato ba lingomba elikelaka kombo boyokani na bango.. Bakanisa te nkombo yayi ekoyala Zakaliya mpo yangondi eika nkombo ya Ango wayi. 60Kasi nyango wa nfana akambeli na bango te: weyi! Tosengeli nomobianga Yowane. 61Tomanyaka te akopa nfana nkombo ekobilana na moto moko wa djoko. 62Bona bakelaka bilembo na maboko mpoli buwi Zakaliya, Ango wa nfana nkombo nda elingaka ayi abianga nfana. 63Zakaliya ayongaka libaya mpe akomaka olikolo li django te: nkombo yayi Yowane bato bantso ebayanganaka ana bakanfaka mpoli mambi emakomaka ayi. 64Nambala yawi, Zakaliya akokaka waa bokambeli mpe abandaka botondi Kombo. 65Bato bantso ebaika noyali belebiyo na bango bakanfaka be mpe batilaka. Bato bantso ba bingumba bi ngomba li Yudeya baika nokambeli na mantso emasalemaka. 66Moto wantso oyokaka mambi mango aika nomakanisi mpe nokanfeyi be, nokambeli te: Yo veti nfana oyobo akoyola mpoli bokosweyi moto moko wa motuya be. Bakambelaka bona mpo elakinyaka puu te Nkolo aika nayi.
Esakoli ya Zakaliya
67Ontsima ana, Zakaliya Ango wa Yowane anyalaka na Molimo mosantu, mpe apaka ntsango euta na Kombo nokambeli te: 68Lokumu lo lu Nkolo, Kombo okakumisa biyo bato ba Isalayele, mpo akoya veti mpe akobikiya bato bayi. 69Apeyi mobikiyi wa nguya mpoli biyo djoko li Mokondji Dawidi, mosali wayi. 70Ebo yo mpendja mambi emalakaka Kombo te akokela, ondjela ya Basakoli bayi basantu ebaika nobiki ki ontango ya kala. 71Apei mobikiyi mpoli biyo, mpoli bolobikiyi biyo onva banguna babiyo mpe onva bato bantso ebakaloina. 72Kombo akeli bompoli bolakinyi mawa mayi onva Bankoko babiyo mpoli bokeli elakaka ayi te akokela o boyokani vayi bosantu. 73Ebo yo elaka ya boyokani epakayi na Nkoko wabiyo Abalayama akambelaka te: 74Nakobobikiya onva banguna ba bino mpo bongbangemela ngai djanga nabotili. 75Alingaka biyo toyala bayengebene onva yayi mpe totosa mibeko miayi ntango yantso eyo biyo na bomoyi. 76Mpo djawu nfana wangai, okobiangama Mosakoli wa Kombo olikolo li mantso, mpo okoke oboo boboyani bonkolo, nakomiya bato mpoli boyani vayi. 77Okosunga bato bawu bayeba te Nkolo amaya mpoli bobabikiyi ondjela ya bolimbisi masumu mabango. 78Kombo alingi alobikiya mpo aona boboto be, akotoma Masiya buti oluma eloabi olikolo mpoli bolosungi biyo. 79Akosunga ebamabika omanteyi ma molimo mpe mawa mpe bato ebamatila ntango emakanisa bango mpoli lowa mpo bakoka bobiki na kimiya wa Kombo. 80Nfana ayolaka na molimi mpe na ndjoto. Aika nobiki wesobe tee mokolo emobimakayi puu onva bato ba Isalayele.
ទើបបានជ្រើសរើសហើយ៖
LUKA 1: LIE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Likila Bible by Beyond Translation is licensed under Creative Commons Attribution-ShareAlike 4.0 License.