LUKA 2
2
Bobotami bo Yesu
(Mt. 1.18-25)
1Ontango yango, Mokondji wa Loma Sezaleya Ogilise apaka mitindo te bato bantso ebayali obokondji bo Loma bakomisa nkombo. 2Yango esalemaka mpoli mbala ya boo ntango eika Kilinusi Mokondji wa etuka ya Siliya. 3Yango, Moto wantso akeke omboka li bankoko bayi mpe omboka yayi mpoli bokomisi nkombo yayi. 4Bona Yosefu alongbaka omboka nazaleti wetuka ya Galileya mpe akeke omboka Beteleme wetuka ya Yudeya. Yosefu akeke ongo mpo aika mokitani wa Mokondji Dawidi mpo mboka yayi eika Beteleme. Beteleme eyebanaka mpe ndibe engumba ya Mokondji Dawidi. 5Yosefu na Maliya balakanaka te bakobalana mpe Maliya aika na djemi. Yango Yosefu akeke obeteleme ekambi na Maliya mpoli bokomisi nkombo li bango. 6Ntango eika Yosefu na Maliya ana, ntango ya Maliya ya boboti ekoswaka, 7abotaka nfana wayi wa boo wa mumpele. Ndenge enyalaka ndaku ya bapaya, alingaka nfana meni na biati bi nfa mpe amobeyaka osanduku wa boleyi bo biva.
Bandjelu bakanolaka babateli ba mpata te mobikiyi abotami
8Babateli ba mpata bangonga ya mokolo baika nobateli mpata li bango omala belebiyo na mboka Beteleme. 9Nambala yawi baboko Andjelu otomaka Kombo mpe eteli yantso engengeke na nkembo ya nkolo. Nantina yango, babateli ba mpata bakoswaka nabotili be. 10Kasi Andjelu akambelaka na babateli ba mpata te: Mpa botila, Nayani mpoli bo boteyi ntsango ndamu ekopa bato bantso esengo be. 11Nenu mobikiyi wawu abotami omboka ya mokondji Dawidi. Aomobikisi. Ao Nkolo. 12Mpe bolenda bekoyeba bino nfana wango: Bokomokula bamolibi na biati bi nfa mpe abetemi omanteyi ma sanduku wa boleyi bo biva. 13Nambala yawi, Bandjelu djunda ebautaka olikolo babimaka ekambi na Andjelu owaboo mpe baika nosandjoli Kombo. Nokambeli: 14Kombo akuli nkembo olikolo, mpe bato ebasepeli Kombo bakula kimiya ontse mpe omokili. 15Ontsima ana, Bandjelu bakeke ekolo mpe bavinyaka olikolo. Bona babateli mpata bakambelanaka bango na bango te: Nkolo atomiki Andjelu wayi wango mpoli boloteyi djambi li nfana obotami na mpokpa ya nenu. Toke omboka ya beteleme mpo tomobo. 16Ontsima, bakotolaka ekoto omboka. Bakulaka Maliya na Yosefu na nfana, abetemi osanduku wa boleyi bo biva. 17Ntango eboko babateli ba mpata nfana, bakanolaka moto wantso ntsango ebakanolaka Bandjelu mpoli nfana. 18Bato bantso ebayokaka ntsango onva babateli ba mpata bakanfaka. 19Kasi Maliya abombaka mambi mantso emasalemaka omotema mpe aika se nokanisi mpoli mambi mango. 20Bevinyaka babateli ba mpata omala mabango, batondoko Kombo be. Mpo mambi mantso emayokaka bango mpe emaboko bango maika mpendja ndenge ebakanolaka Bandjelu.
Batombi Yesu ondaku ya Kombo
21Ntango ekoswaka nfana na mikolo nfambi, bamokataka ngenga beyongaka mibeko mi Kombo, mpe baboti bayi Yosefu na Maliya bamopaka nkombo Yesu. Andjelu meni akanolaka Maliya te apa nfana meni nkombo yango oboo akula djemi. 22Ntango eilaka mikolo mi Maliya mi bopeto#2.22 Bopeto Ndibe mama wa sika, Maliya apetolamaka ndibe "moto wa bosoto", yango esengelaka nayi apa mbeka otempelo mikolo 40 ontsima ya boboti mpo apetolama mpo asambela waa Kombo ekambo na bato baiyo. bokokani na mibeko mi Mose, Yosefu na maliya bakeke otempelo wengumba Yelusaleme 23-24Bakeke ongo mpoli bopeyi mbeka ya bibenga bibale too bana babale ba bibenga betomaka mobeko mo Nkolo bakela mpo Maliya akoswa peto. Batombaka mpe nfana Yesu ongo ekambi na bango mpoli bomolakinyi onva Nkolo, mpo mibeko mi Nkolo mikambela te: Nfana wantso wa boo esengeli bamopa onva Nkolo.
Loyembo lo Simona na Ana Mosakoli
25Ontango yango mumpele moko aika wengumba Yelusaleme nkombo yayi eika Simeyona. Aika sembo oboo bo Kombo mpe moyengebene. Aika nokongi moto oko bondisa Bato ba Isalayele. Molimo mosantu moika ekambi nayi. 26Molimo Mosantu abonyaka Simeyona te too akowa ka tee akobo Kiliso olakaka Kombo botomi. 27Mokolo nfango molimo mosantu mokambaka Simeyona olopango lo Tempelo, ntango etombaka Maliya na Yosefu nfana Yesu ongo mpo bamopa na Kombo ndenge ebatomaka mibeko mi Nkolo bakela. 28Simeyona abokoko nfana Yesu mpe amokataka na maboko mayi. Ontsima atondoko Kombo mpe akambelaka te: 29Nkolo, sikanga okoki nontika ngai, mosali wawu nawa na kimiya mpo elaka yawu ekokisami mpoli ngai. 30Miyo ma ngai maboni mobiyi otomiki awu mpoli bobikiyi bato bantso. 31Omokomiyi mpo bato bantso bamoyeba 32Akoyala ndibe nfinda mpoli bolakinyi Kombo onva Bapagano, mpe akoyanela bato ba Isalayele lokumu, elo bango. 33Yosefu na Maliya bakanfaka na mambi emakambelaka Simeyona mpoli nfana Yesu. 34Ontsima ana, Simeyona aika nobapamboli baboti bayi, mpe ontsima akambelaka na nyango wayi Maliya te: Kombo aponi nfana oyo mpoli bobomi bato djunda mpe bato baiyo djunda bakobika o Isalayele. Akoyala ndibe elembo eyuti na Kombo kasi bato djunda bakomotelemele. 35Yango ena, akobimiya makanisi ma bato djunda. Mpe awu Maliya okoyoka mawa be. 36Ontango yango, eika mpe na mosakoli moko wa nfanyala nkombo yayi Ana. Ango wayi eika Fanuele outaka odjoko li Asele. Ana aika kotu mpendja. Akelaka mbula ntsambo olibala. 37Atikalaka bodjenge mpe aika na mbula ntuku nfambi na lineyi. Alekinyaka ntango yayi be otempelo. Aika nokumisi Kombo butu na moyi aika nokili boleyi mbala be ontango ya mabondeli. 38Ntango eika Simeyona nosololi na Maliya na Yosefu Ana ayaka mpe aika nokumisi Kombo. Akambelaka mpoli nfana Yesu onva bato bantso ebaika nokongi na elikia yantso te Kombo atoma Masiya mpoli bobikiyi bato ba Yelusaleme.
Bovinyeyi o Nazaleti
39Ntango eilinyaka Yosefu na Maliya bokeli mantso ematomaka mibeko mi Mose te bakela, bavinyaka omboka ya bango Nazaleti Wetuka ya Galileya. 40Nfana Yesu ayolaka mpe akoswaka na makasi ondjoto. Akoswaka mayele be mpe Kombo amopambolaka.
Nfana Yesu omanteyi ma Tempelo amasolola na Balakisi
41Mbula na mbula baboti ba Yesu baika nokeyi wengumba ya Yelusaleme mpoli bokeli nteke ya Pasika ekambi na Bayuda baiyo djunda. 42Ntango ekoswaka Yesu na mbula Djomi na mbale, ayi na baboti bayi bakeke onteke yango wengumba Yelusaleme ndenge eika bango nokeli. 43Ntango eilaka nteke meni, baboti bayi Maliya na Yosefu baika novinyi ondaku. Tobayebaka ka te Yesu atikali Wengumba ya Yelusaleme ayi meni. 44Baboti bayi bamanyaka te aika ekambi na bato baiyo ebaika nokeyi na bango mobembo ekambi. Baombolaka mokolo moko. Ontsuka ya mokolo nfango babandaka bonfaki onva djoko mpe beyi babango. 45Baboti bayi too bamokulaka ka, bavinyaka Wengumba Yelusaleme mpe baika noaki Yesu ongo. 46Ontsima ya mikolo miato, bakulaka Yesu olopango lo Tempelo. Ayalaka ana omanteyi ma Balakisi baiyo ba Mibeko mi Mose. Aika noyoki mambi emaika bango nolaki mpe aika no bauwi mituna. 47Bato bantso ebayokaka Yesu bakanfaka na mayele mayi mpe na biyano biayi na mituna mi bango. 48Ntango emokulaka baboti bayi ongo, bakanfaka. Nyango wayi amuwaka te: Nfana wangai mpodjeni olokeli bo! Ngai na Ango wawu tomitungisiki be, mpe toiki noakoaki! 49Ontsima, Yesu ayanoloka baboti bayi te: Mpodjeni bino babale viki no ntsaki? Too boyebi ka te esengeli na ngai nayala ondaku ya Ango wangai#2.49 Ango wangai Maloba "Ango wangai" emakambela Kombo, Ango wa Yesu wa lola too amakambela na Yosefu ka.? 50Kasi baboti bayi too basosoloko ndimbola ya mambi emakambelaka ayi na bango ka. 51Ontsima ana, Yesu avinyaka ekambi na baboti bayi Wengumba ya Nazaleti mpe aika no batosi be. Nyango wayi Maliya abombaka mambi mango mantso omotema mpe mbala be aika nomanyeyi mpoli ntina ya eloko yantso esalemaka. 52Beyolaka Yesu ondjoto na omolimo akulaka ngolu onva Kombo mpe onva bato.
ទើបបានជ្រើសរើសហើយ៖
LUKA 2: LIE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Likila Bible by Beyond Translation is licensed under Creative Commons Attribution-ShareAlike 4.0 License.