LUKA 3
3
Yowani mobatisi amakomiya ndjela mpoli Yesu
(Mt. 3.1-12 ; Mk. 1.1-8 ; Yn. 1.19-28)
1Eika sika anga mbula ya djomi na mitano ya boyangeli bo Tibele, Mokondji wa Loma. Posi Pilato aika mokondji wa etuka ya Yudeya, Elode aika mokondji wa Etuka ya Galileya, mpe nfa mama wayi Pilipo aika mokondji wa bituka bi Ituleya mpe Talakonite, mpe Lisaniya aika Mokondji wa etuka ya Abilene. 2Ananiya na Kayifa baika banganga Kombo banene. Ontango yango ntsango yawi eutaka onva Kombo mpe eyaka onva Yowane, nfana wa Zakaliya, oika noyali wesobe. 3Ontsima, Yowane aika nokeyi biteli bintso belebiyo na mokeli mo Yaladene. Aika nokanoli bato te, bolingaka Kombo abopa bolimbisi bo masumu mabino, ekomi boyambola. Bona nakobopa Batisimo. 4Yowane akokisaka maloba emakomaka mosakoli Yisaya omunkanda nfayi mokala Yisaya akomaka te: Moto moko akoanfana na mungongo makasi wesobe bokomiya ndjela mpo Nkolo aya. Bomokominya ndjela eyala semba. 5Esengeli bonyaliya biteli bintso bi lobwaku, bonyaliya miemba mintso na ngomba liyala ndenge yawi. Esengeli bokoswinya ba balala ebamankumba bakoswa semba, mpe ba balabala ebaona mabulu esengeli bobanyaliya. 6Bona moto wantso akobo Mobikiyi otomami na Kombo. 7Bobilani na mambi emakambelaka Yisaya, Yowane aika nokambeli na djunda li bato ebaika noyani onva yayi mpoli bokuli batisimo. Akambelaka na bango te, bona likama ndibe bana ba ndjo lingenge! Moto nda okokanoli te bokotola etumbu ya Kombo emaya mpoli bato ebampa obongola mitema ka? 8Se ndenge ekabota nfete mimbuma, bino mpe bosengeli nokela bolamu mpoli bolakinyi te bobongoli mpendja mitema. Mpe botika bokanisi omakanisi mabino te Kombo too kakobopa etumbu ka mpo to bakitani ba Abalayama. Mpo namakokanola te: Kombo akoki nokelela Abalayama bakitani sebuti omabanga emabo! 9Sikanga, Kombo aobelebiyo nabopeyi etumbu na bato ebampa obongola mitema ka. Aondibe moto omabete soka wayi o minkanga mi nfete. Moto ayalaka be nfete emokale obota mimbuma milamu ka, Kombo kakopa moto meni etumbu. Moto meni akoyala ndibe nfete emoteni bango mpe bamololiyi. 10Bona nfa nkabo ya bato omanteyi ma djunda bauwaka Yowane te: Kombo alingi biyo tokela teni? 11Yowane abayanolaka te: Moto ayalaka na basimisi babale, apa moko na moto odjangi. Oyalaka mpe na boleyi, pa mpe na moto odjangi boleyi. 12Bakongoli ba mpako mpe bayaka onva Yowane mpo bakula Batisimo. Mpe bamuwaka te: Molakisi, tosengeli nokela nde? 13Yowane abayanolaka te: Botika bokpeyi mosolo mo mpako be onva bato boleki emubopeyi bakondji ba ekolo ndingisa te bokpa. 14Ndenge yawi mpe, nkabo ya Basoda mpe bamuwaka te: Bona biyo, tosengeli nokela nde? Yowane abavinyelaka te: Mpa bobotolo bato mosolo mpe mpa bofunda bato nandenge ya lokuta, kasi bosepela se na lifuti elikabofuta Bakondji ba ekolo. 15Bato bantso baika nokongi te Masiya akoya noki, mpe baika nomanyeyi te ntango ntsiyo Yowane akoki noyala Masiya. 16Yowane akambelaka na bango te: Ngai na mabopa Batisimo na mayi, kasi moto moko amaya noki andeki ngai na bonene. Mpe too naona makoki ka ndibe mosali wayi mpoli boyutoli ntsinga li lipapa djayi. Ayi moto okobobatisa bino na Molimo Mosantu mpe na muya. 17Kiliso aondibe nfaali wa mala okati engasi ya nkinga omaboko mayi, akokombo eteli yayi ekotswaka bango mimbuma ondaku yayi ya ebombelo ya biloko, kasi akotumba nkinga omuya emokalola seko. 18Nandenge yango, na maloba djunda maiyo emaika Yowane nolendisi bato mpoli bobongoli mitema abalakaka maloba malamu. 19Kasi Yowane adjukelaka Mokondji Elode mpo abalaka nfali wa nfa mama wayi wa mumpele nkombo ya nfanyala meni Elodiade. Mpoli mambi mabe mantso emakelaka ayi. 20Ontsima, Elode akelaka djambi libe boleki mpoli ndenge ekelaka ayi Yowane oboloko.
Yesu akuli batisimo
(Mt. 3.13-17 ; Mk. 1.9-11 ; Yn. 1.32-34)
21Oboo bo Yowane ake oboloko aika nobatisi bato bantso. Abatisaka mpe Yesu. Se ontsima ana, ntango eika Yesu nosambeli, likolo li livaka onva Kombo. 22Mpe molimo mosantu munyuaka olikolo li Yesu ndibe ebenga. Kombo akambelaka uta olola te: O nfana wangai moko wa bolingo, mpe nasepeli be nawu.
Bankoko ba Yesu
(Mt. 1.1-16)
23Yesu akoswaka belebiyo na mbula ntuku ntsato ntango ebandaka ayi mosala nfayi mpoli Kombo. Bato baika nomanyeyi te aika nfana wa Yosefu, Yosefu aika mokitani wa Eli, 24nfana wa Matati, nfana wa Lewi, nfana wa Meleki, nfana wa Zanayi, nfana wa Yosefu, 25Nfana wa Matatiyasi, nfana wa Amosa, nfana wa Naomi, nfana wa Esili, nfana wa Nagayi, 26nfana wa Mate, nfana wa Matatiyasi, nfana wa Semeni, nfana wa Zoseki, nfana wa Zoda. 27Nfana wa Zowanani, nfana wa Lesa, nfana wa Zolobabele, nfana wa Sabatiyele, nfana wa Neli, 28nfana wa Meleki, nfana wa Adi, nfana wa Kasami, nfana wa Elemadami, nfana wa Eli, 29Nfana wa Yosuwa, nfana wa Eliyezeli, nfana wa Zolimi, nfana wa Matati, nfana wa Lewi, 30Nfana wa Simeyona, nfana wa Yuda, nfana wa Yosefu mpe, nfana wa Zonami, nfana wa Eliyakimi, 31Nfana wa Meleya, nfana wa Mena, nfana wa Matata, nfana wa Nata, nfana wa Dawidi, 32Nfana wa Isaya, nfana wa Obede, nfana wa Bowaze, mwana wa Salomo, nfana wa Nasoni, 33Nfana wa Aminadabe, nfana wa Adimi, nfana wa Arni, nfana wa Esolomi, nfana wa Falesi, nfana wa Yuda, 34Nfana wa Yakobo, nfana wa Isaka, nfana wa Abalayama, nfana wa Tala, nfana wa Nakolo, 35nfana wa Selusi, nfana wa Lago, nfana wa Faleke, nfana wa Ebele, nfana wa Sala, 36nfana wa Kayina, nfana wa Afazadi, nfana wa Seme, nfana wa Nowa, nfana wa Lemeki, 37nfana wa Matusala, nfana wa Enoka, nfana wa Zalede, nfana wa Malele, nfana wa Kayina, 38nfana wa Enosa, nfana wa Seti, nfana wa Adama, nfana wa Kombo.
ទើបបានជ្រើសរើសហើយ៖
LUKA 3: LIE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Likila Bible by Beyond Translation is licensed under Creative Commons Attribution-ShareAlike 4.0 License.