LUK 1
1
LUKA
NSANGI YA MBOTO YÉ ASWENEKE LUKA
1Mfumu Tiofili, bandi bavul yaswenama mu mambi mà malé mubo labisi, 2yaswenama mampeine mà amwene bandi bani mu kierama ba kisiami munga bà. Bandi bani bakiali pani tang le ayandiki kukierama mampeine manswene mbali ya tobo, se yandiki pani ba yandiki se kuta masolo ma mambi mani. 3Tiofili wa likumu, anga mè kakwa ndieka mboto kibene kuyebe mambi mwene yandiki liyantiki lilani mè mamono mboto le kuswenekele mambi mwene mpili ma liabila, 4Mè nzola nze uyebe le mampeine akusiami bandi munga Yezu melé ma masongo.
KUBUTUKU ANDI BUMWANI BA Yezu
Wanzio usiama kubutuku ka Zaa Mbotiki
5Mu tang akiali Erodi Ntotili wa Yudeya akiali andi nganga-nzem mwese zini la ndé Zakadia, mu zumu la Abia. Mukiatsi wa ndé ba mubiela Lisabete, ndé se wakiali mu zumu la Arono. 6Ababwele bakiere lizingi la mboto kumisi mia Nzem ba lemfeka ngolo mu mansik manswene andi mu mansik ma Mfumu Nzem. 7Kasi, loka bà bakiali ti bani munga Lisabete loka ndé wakiali andi mpili ya kusiene zumu. Se ababwele bakiali kibene andi mvul yavul (munga kuboro bani) 8Kilwomo kimwese, Zakadia wakiera kisali kandé anga nganga-nzem mu tempele la Nzem mpambi lo akiali kikalili kakimvuku ka bà. 9Ba muswele mu kubolo zeke mpili akiali kikalili kabà nganga-nzem, munga kuwini mubo la tempele la Mfumu Nzem munga kufumbu madiasi. 10Tang ayandiki Zakadia kufumbu madiasi, bandi bavul bakiali kunsà la tempele mu bisambi bia Nzem. 11Tang akiali Zakadia mubo la tempele, wanzio mwese atweme Mfumu Nzem wa ti mutwekele muko la kità la altar kwani ba fimba madiasi. 12Zakadia wamwene wanzio wa tekete andi bomo kibene. 13Kasi wanzio umusiama:» Zakadia, lokuwo bomo munga Nzem wawé bisambi bia nze. Nze andi Lisabete mukiatsi wanze liyi boro mwani wa bali. Liyi mubiela Zaa, 14Uyi kupa nze kiese kavul se bandi bavul buyi yangalala tang uyi butuku ndé. 15Munga le ndé uyikali mundu wa munene kuboso la Nzem. Lilani, loka ndé mpili ya kunwa mani-mani matwo mu mbeing ya rezeng ya ngiani ata mani manswene masà melé andi alkol. Uyi twarisama mu Mfinzi ya Mikiel yandiki zumu la ngwene. 16Se wu yitwali kwelé Mfumu Nzem wa bà, bandi bavul mubo la bandi ba Yisalaele. 17Uyikali mundu wani uyikali andi muwungu ti ngolo ya ngianzi Elia. Ndé uyiyà kuboso la Mfumu, kuyili miteme mia bandi munga kuyà kandé. Uyi furulu ngwakana ya ba Taa kwelé bani ba bà, uyi bumu miteme mia bani akwene bulemfe mu mayele ma Nzem. 18Zakadia wafili wanzio: «Ambwene mè ngi yebe le mambi matoro Nzem muyi kierama mukiereke? Mè ngielé mununu, mukiatsi wa mè se welé mununu munga kuboro bani.» 19Wanzio wu mufirila: Zini la mè Ngabidie se nkala kuboso la Nzem (ku kierelé Ndé). Nzem wa ntomo muku ti kushami nsangi ya mboto yé munga mwani wanze wa bali. 20Kasi wele kubon. Nze yikali kiwulu tii kilwomo kie yibutuku mwani wanze wa bali mambi muyi kierama munga lokanze makwikili ma ndaa ma kusiami mè. Mampeine manswene ma kusiami mè muyi kierama mu tang la mà.» 21Kunsa, mu ngani ya tempele, bandi bakiali buzila Zakadia se bakiali buyitika munga wakiali tang la bwele mubo la tempele mu yani fwete kiere ndé. 22Tang atwé Zakadia mu tempele, loka ndé wakwé kutoro ti bà. Bubwani bayeba le ndé wamwene lisè la Nzem mubo la tempele munga wa bakiera bidimbi muko, kasi loka ndé wa kweka kutoro. 23Tang ayi bilwomo biandé bia kisali mubo la tempele, ndé le wafiri kunzo ya ndé (ku Yudeya). 24Kungwe la tang lani, mukiatsi wa ndé Lisabete wakiali andi zumu, se wakiere banswé ba tari loka ndé wa twéka kunsà mu bibo vukula bandi banswene. 25Wa bitwerele ndé kakwa:» Dere yé makiere Mfumu munga mè; mu bilwomo bié, wa nswe ngiebe ya ndé se watiele nswene ya mè mubo la bandi.»
Wanzio usiama kubutuku ka Yezu
26Kungwe la nswé wasiami la zumu la Lisabete, Mfumu-Nzem watweme wanzio Ngabidie kumbanzi ya Nazarete, mu meine ma Galileya. 27Wa we kwelé mwani wa mukandi mwese zini la ndé Madia. Bibweri biandé ba musiami le nze yi wolo bali mwese zini la ndé Yozef, mutili wa Ntotili Dawidi. 28Wanzio wayi kwelé ndé se watwere:» Mboto ya nze, Madia. Nzem wa kusampulu kibene. Welé andi nze. Wa kusampulu nze kulé bakandi banswene! 29Kasi tang awé Madia mambi mani atwere wanzio, wa biyangisi ngolo mu mangindi ubifula ku muteme wa ndé ntendele ya mboto yani. 30Bubwani wanzio wu musiama:» Lokuwo bomo, Madia munga Nzem wa kuswe dienge la ndé. 31Wele mpeine yé. Nze muyi pwese se yi boro mwani wa bali. Nze yi mupà zini la ndé Yezu. 32Ndé uyikali mundu wa munene se bandi buyi mubiela Mwani wa bali wa Taa wani welé kundie la bianswene. Nzem Mfumu uyi musà Mfumu mundie la bandi ba ndé, mpili akiali kaka nkà wa ndé Dawidi. 33Uyikali Mfumu mundie la batili ba Yakobo mvul andi mvul. Ndé loka ndé uyi wetse liyali. 34Bubwani Madia wafulu wanzio:» Ambwene mè ngi boro mwani.» Munga mè loka mè kutuba vuku noro ti bali?» 35Se Wanzio wa mufirili se wa musiami le,» Mfinzi ya mikiel iyi yà bundie lanze, se ngolo ya Nzem yani yalenina kundie iyikufi nze wa mutsini munga nze ukwé mu kuboro, se Mwani wa Santu wani yibutuku kwelé nze buyi mubiela Mwani wa Nzem, 36Wele mpeing yé: Ata mvul ya ndé ya pwisila, mpeing wanze Lisabete se welé andi zumu la mwani wa bali. Wo welé nswé wasiami wa zumu ata mpili atwere bandi le loka ndé uyi boro. 37Munga lokakwa kimi kampasi kwelé Nzem.» 38Bubwani Madia wafirili:» Mè ngielé kwelé Mfumu anga le mundu wa ndé wa kisali. Wetse le mambi manswene atwere nze kwelé mè mu kierama kwelé mè.» Bubwani wanzio wawè kandé.
Madia wawè dere Lisabete
39Kungwe la bilwomo, Madia wa yilama se wa we nswali ku Yudeya yani yelé mbanzi mu bobo la miong. 40Tang wa twele, wawini munzo ya Zakadia se wapà Lisabete mboto. 41Tang awé Lisabete Madia umupaka mboto, mu mbalimwese mwani wa nikila mukiese mubo la zumu la Lisabete. Bubwani Lisabete wawolo andi Mfinzi ya mikiel. 42Watwere mu ndaa ya ngolo kwelé Madia. 43Kasi munga nkié mè masienene dienge lé, le ngwa Mfumu Nzem wa mè uyi kwelé mè? 44Mè kusiama le tang awé mè mboto ampe nze, mwani mubo la mè wamono kiese ka ngolo tii wa nikila. 45Nze ba kusampulu munga nze akwikili le Mfumu Nzem wuyikiere yé watwere ndé. 46Mukung wa kukumisi wa Madia. 47Mè wanswene ngielé mukiese kwelé Nzem ngulusu wa mè. 48Munga wamwene kubitiese ka mè, mundu wa ndé wa kisali. Bubwani, ma ndongo manswene buyi mbiela mundu wa kiese. 49Munga Nzem wa ngolo yanswene wakiere bimi bia binene kwelé mè; Zini la ndé lelé la musantu. 50Ngiebe ya nze mvul andi mvul munga bandi bani buyi wo ndé bomo. 51Watwere kwelé bandi banswene bwere bakô la ndé: wa piatsi bani bayindila andi lilende. 52Watiele mu ngolo bantwarisi mu bimfumu bia bà kasi wa kese bandi bani bubitiesa. 53Nzem wa disi bandi bakiali nzali mu bimi bia mboto mè wa yiri bandi ba nzimi loka ndé se kubapa ata kime. 54Uma we nwele Yisalaele, bansari, ba ndé mu kuyindila maliatsi mu kuswo ngiebe ya Abalayame andi batile ba ndé banswene munga mu kimakolo mu nzili yani wa lwingisi maliatsi mani ape ndé ba nkaa babisi. 55Wa webelé mu kuswo ngiebe yandé kwelé Abalayam andi kwelé batili ba ndé munga tang lanswene! 56Madia masali banswé ba tari kunzo andi Lisabete; kungwe wa furu kunzo ndé ku Nazarete.
Kubutuku ka Zaa Mbotiki
57Tang la kuboro Lisabete la lung; waboro mwani bali, 58Bandi ba mukombo andi bandi ba mfinama bawé le Mfumu Nzem wa wekelé mukiatsi wa ndé ngiebe mu kumupà mwani wa bali bawo kiese andi ndé. 59Mu kilwomo ka kinani, kungwe la libutuku la mwani, bibweri bia mwani bia yà munga mu kukiese mwani; bazwela bu mupe zini la Tara ndé: Zakadia. 60Ngwa ndé Lisabete watwere, loka bà buyi mubiela Zakadia mu kibo kiani kuloma ku mubiela Zaa. 61Ba musiami: «Mu bibweri bia nze; lokakwa kwele andi mwesi wele ti zini lani la Zaa,» 62Buswoka tara ndé mu bidimbi munga kuyebe nde uzola bu mubiela nà 63Zakadia malomo kimèse; uma sweneke: «wasweneke Zini landé Zaa,» Banswene bu mayitiki: 64Mbalimwese munu wa ndé wa sorola lileme ndé la tekete, wa yandiki kutoro andi kukumisi Nzem. 65Bandi banswene bakiali mumbimi ya bà bayitiki andi kuwo bomo se bandi banswene bakiali ku mong wa Yudeya ba yandiki kuta yanswene yani yakierama. 66Bandi banswene ba weka mambi mani bakiali buyitika se butora:» Mwani wo uyikali nà? munga ko la Mfumu Nzem lakiali andi ndé. 67Zakadia, Tara Zaa, wawolo mu mfinzi ya mikiel wa yandiki kubikili mu mpili yiyani: 68Likumu kwele Mfumu Nzem wa Yisalaele munga wayi kwelé bandi ba ndé se wa bakwele. 69Wa kipe lugulusu la ngolo, mutili wa nsari wa ndé Dawidi. 70Yani atwere ndé mu nzili ya bangianzi ba santu bani bakiali andi ndé mu tang lankolo. 71Ngulusu ugulusu bisi kwelé ba mbene babisi mu kiyeke ka ko la bani banswene bu menga bisi. 72Watwere uyi kiere kidimbi ka ngiebe kwelé ba nkaa babisi se uyi webele mu ngwakana ya ndé ya santu. 73Ngwakana yani asheli ndé andi nkaa bisi Abalayam. 74Bisi ba kigulusu kwelé ba mbene babisi, bisi ka fwete kierelé Nzem akwene bomo. 75Mè ngi tambila kuboso la ndé mu busantu andi mu masongo bilwomo bianswene bia lizingi labisi. 76Se nze, mwani wa mè wa mukieke, nze buyi kubiela ngianzi wa ngianzi wa Nzem wa yolo, munga nze yi tambila kuboso la Mfumu Nzem munga kuyili manzili ma ndé, 77Munga mu kupà kwelé bandi ba ndé mayele ma lugulusu mu kulololo masomo ma bà, 78Munga kikomo ka ngiebe ya Nzem wa bisi tang litwoka liyi seme mundie labisi yandiki ku yolo 79munga kuswo nseme kwelé bandi buzinga mu mpimbi andi kizwisi ka lifha; se munga bisi kilaba nzili ya ngembe. 80Mwani wakwéle se wayà bwere mu ngindi se wakiali mu kibère ka nsé. Ti mu kilwomo ka kumwene kandé kuboso la bandi ba Yisalaele.
ទើបបានជ្រើសរើសហើយ៖
LUK 1: SOO
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Smgo (Songo) Bible by Beyond Translation is licensed under Creative Commons Attribution-ShareAlike 4.0 License.