ရှင်လုကာ 1
1
အခန်း (၁)
သော်ဖိလုသို့ ပီးစာ
1လေးစားရပါရေ သော်ဖိလု၊ ကျွန်နော်ရို့ကြားမှာ ဘုရားရှင်ပြုတော်မူခရေ အံ့ဖွယ်အကြောင်းအရာတိကို 2အစဆုံးကနီ ကိုယ်တိုင်ကြုံတွိ့ခရရေလူတိနဲ့ ဘုရားရှင်ရဲ့ သတင်းစကားကို ကျွန်နော်ရို့ကို ဟောပြောသွန်သင်ရေလူတိ ပြောဆိုခကတ်တေအတိုင်း လူတိအများကြီးက ကျွန်နော်ရို့ပါးကို ရေးသားဖော်ပြခကတ်ပါရေ။ 3ယင်းကြောင့် ကျွန်နော်ရို့ကြားမာ ဖြိုက်ပျက်ခရေ အကြောင်းအရာအားလုံးကို ဂရုတစိုက် စုံစမ်းလေ့လာပနာ 4အသင်ရို့ သင်ယူခရရေ အကြောင်းအရာတိဟာ မှန်ကန်ရေဆိုဟာကို သိစီဖို့ အသင်ရို့ပါးကို ဒေပိုင်မျိုး အစီအစဉ်တကျ ရေးသားလိုက်ရခြင်း ဖြိုက်ပါရေ။
ရီနှိုက်မင်္ဂလာဆရာယောဟန် မွီးဖွားလာဖို့အကြောင်း
5ယုဒပြည်မှာ ဟေရုဒ်မင်း#1:5 ဟေရုဒ်မင်း ဟေရုဒ်မင်းဟာ ရောမလူမျိုးတိ ခန့်အပ်ထားရေ ဘုရင်တစ်ပါးဖြိုက်ပနာ ယုဒပြည်ကို (37 BCE ကနီ 4 BCE) အထိ ဘုန်းတန်ခိုးကြီးမှု၊ ရက်စက်ကြမ်းကြုတ်မှုတိနဲ့ ရောပနာ အုပ်ချုပ်ခရေ ဘုရင်တစ်ပါးဖြိုက်ပါရေ။ အုပ်စိုးနီရေအချိန်ခါ ဇာခရိလို့ခေါ်ရေ ဂျူးပုရောဟိတ်#1:5 ဂျူးပုရောဟိတ် ပုရောဟိတ်ဆိုဟာ လေဝိမျိုးနွယ်စုက ဆင်းသက်လာရေလူဖြိုက်ပနာ ဘုရားရှင်နဲ့လူတိကြားမာ ပူဇော်ပစ္စည်းတိကို ပူဇော်ပီးရပနာ ဘာသာရေးဆိုင်ရာ ကိစ္စတိကို ဂျေရုဆလင်ဗိမာန်တော်ထဲမာ လုပ်ဆောင်ပီးရရေ ဂျူးဘာသာရေးခေါင်းဆောင်။ တစ်ယောက်ဟာ အဘိယ#1:5 အဘိယ အဘိယဆိုဟာ ဂျူးပုရောဟိတ်တစ်ယောက်ရဲ့နာမေဖြိုက်ပြီးကေ ဂျေရုဆလင်မြို့က ဗိမာန်တော်မှာ အမှုတော်ထမ်းဖို့အတွက် ဖွဲ့စည်းထားရေ ဂျူးပုရောဟိတ် အဖွဲ့ခွဲ ၂၄ ဖွဲ့ထဲက တစ်ဖွဲ့ရဲ့အဖွဲ့ဝင်ဖြိုက်တေ။ ၁ရာ၊ ၂၄: ၁၀။လို့ခေါ်ရေ ပုရောဟိတ်အဖွဲ့ဝင်တစ်ယောက်ဖြိုက်တေ။ သူ့မယားသယ်ဧလိရှဗက်ဟာ အာရုန်#1:5 အာရုန် အာရုန်ဆိုဟာ မောရှေရဲ့အစ်ကိုဖြိုက်ပြီးကေ အစ္စရေးလူမျိုးတိရဲ့ ပထမဆုံးပုရောဟိတ်ဖြိုက်တေ။ ဂျူးပုရောဟိတ်အားလုံးလည်း သူ့ပါးက ဆင်းသက်လာဟာဖြိုက်တေ။ လို့ခေါ်ရေ ပုရောဟိတ်မျိုးရိုးက ဆင်းသက်လာရေလူဖြိုက်တေ။ 6သူရို့ နှစ်ယောက်စလုံးဟာ ဘုရားရှင်ရဲ့ပညတ်တော်တိကို အမှားမဟိ လိုက်နာကတ်ဟာကြောင့် ဘုရားရှင်ရှေ့တော်မာ ဖြောင့်မတ်တဲ့လူ#1:6 ဖြောင့်မတ်တဲ့လူ ဖြောင့်မတ်တဲ့လူဆိုဟာ ဘုရားရှင်ရဲ့ပညတ်တော်တိနဲ့ မိန့်ဆိုချက်တိကို လိုက်နာကျင့်ကြံနီထိုင်ကတ်တဲ့လူတိဖြိုက်တေ။တိ ဖြိုက်ကတ်တေ။ 7ယေတာလဲ သူရို့မာ သားသမီး မဟိ။ အဇာဖြိုက်လို့ဆိုကေ ဧလိရှဗက်ဟာ မြုံနီဟာကြောင့် ဖြိုက်တေ။ ယေပနာ သူရို့နှစ်ယောက်စလုံးဟာလည်း အကြီးကျယ် အိုလာကတ်ယာဖြိုက်တေ။
8တစ်ရက်နိန့်ခါ ဇာခရိဟာ ဗိမာန်တော်#1:8 ဗိမာန်တော် ဗိမာန်တော်ဆိုဟာ ဂျေရုဆင်မြို့မာ တစ်ခုတည်းဟိတဲ့အဆောက်အဦး။ ဂျူးလူမျိုးတိရဲ့ ဘုရားဝတ်ပြုတဲ့နီရာဖြိုက်ပါရေ။မှာ အလှည့်ကျတာဝန်ကို ဘုရားရှင်ရဲ့ရှေ့တော်မာ ဆောင်ရွက်နီတုံး 9ပုရောဟိတ်တိရဲ့ ဓလေ့ထုံးစံအတိုင်း ဗိမာန်တော်ကိုလားပြီးကေ အမွှီးနံ့သာတိ ထွန်းညှိပူဇော်ဖို့ မဲနှိုက်လို့ ရွီးချယ်ရေခါ ဇာခရိဟာ အရွီးခံရရေ။ 10ယင်းကြောင့် ဇာခရိဟာ ယင်းပိုင်အမွှီးနံ့သာတိနဲ့ ထွန်းညှိပူဇော်နီတုံးမာ လူတိဟာ ဗိမာန်တော်ဝင်းမာ ဆုတောင်းနီကတ်တေ။
11ယင်းအချိန်မာ ဘုရားရှင် စီလွှတ်တော်မူလိုက်တေ #1:11 နတ်ဒေဝါ နတ်ဒေဝါဆိုဟာ ဘုရားရှင်ပါးက လာရေ နတ်ကောင်းနတ်မြတ် နတ်ဒေဝါတစ်ပါးဟာ အမွှီးနံ့သာတိ ထွန်းလို့ပူဇော်ရေပလ္လင်ရဲ့ ညာဖက်မှာ ဇာခရိကို ရပ်ပနာကိုယ်ထင်ပြနီခရေ။ 12ဇာခရိဟာ နတ်ဒေဝါရပ်နီဟာကိုမြင်ခါ သူဟာ ကောင်းကြောက်ပနာ တုန်လှုပ်လားရေ။ 13ယေခါ နတ်ဒေဝါက သူ့ကို “ဇာခရိ မကြောက်ကေ့။ အဇာဖြိုက်လို့ဆိုကေ အသင့်ရဲ့ဆုတောင်းသံကို ဘုရားရှင် ကြားသိတော်မူရေ။ အသင့်ရဲ့မယား ဧလိရှဗက်ဟာ အသင့်အတွက် သားချေတစ်ယောက် မွီးပီးလိမ့်မယ်။ ပြီးကေ အသင်ဟာ သူ့ကို ယောဟန်လို့ နာမေပီးရဖို့။ 14သူမွီးလာရေအခါ အသင်ရို့ ကောင်းပျော်ရွှင်စီရဖို့ပိုင် အရာလူတိလည်း ကောင်းပျော်ရွှင်ရဖို့ဖြိုက်တေ။ 15အဇာဖြိုက်လို့ဆိုကေ ယောဟန်ဟာ ဘုရားရှင်ရှေ့တော်မှောက်မှာ အရေးပါတဲ့လူ ဖြိုက်လာဖို့။ သူဟာ တစ်ခါတောင်မှ စပျိုက်ရည်နဲ့အရက်သေစာတိကို သောက်ဖို့မဟုတ်။ အမိရဲ့ဝမ်းထဲမာဟိတုန်းကပင် သူဟာ ဉာဏ်အလင်းတော်#1:15 ဉာဏ်အလင်းတော် ဉာဏ်အလင်းတော်ဆိုဟာ အဖဘုရား၊ သားတော်ယေရှု၊ ဉာဏ်အလင်းတော်ဆိုတဲ့သုံးပါးတစ်ဆူထဲက တတိယတစ်ပါးဖြိုက်ပါရေ။ရဲ့ လမ်းပြထိန်းချုပ်မှုအောက်မာ ဟိနီလိမ့်မယ်။ 16သူဟာ အကြီးကျယ်များရေ အစ္စရေးလူမျိုးတိကို အပြစ်တိကနီ နောင်တသံဝေဂရစီပနာ သူရို့ရဲ့အရှင်ဖြိုက်တေ ဘုရားရှင်ဖက်ကို ပြန်လှည့်စီလိမ့်မယ်။ 17ယောဟန်ဟာ ပရောဖက်#1:17 ပရောဖက် ပရောဖက် ဆိုဟာ ဘုရားရှင်ရဲ့အမှုတော်တိကို ဆောင်ရွက်တေလူဖြိုက်တေ။ ဘုရားရှင်က ရွီးထားတဲ့ အထူးအသုံးပြုဟာကို ခံရယေလူဖြိုက်တေ။ ဘုရားရှင်က ယင်းလူကတဆင့် လူတိကိုမိန့်ကြားတော်မူရေ။ ဧလိယပိုင်မျိုး အခွင့်အာဏာနဲ့တန်ခိုးဟိပနာ အရှင်ရဲ့ရှေ့တော်ပြီး ဖြိုက်လိမ့်မေ။ သူဟာ မိဖတိက သားသမီးတိကိုထားယေ စိတ်နှလုံးတိကို ပြောင်းလဲစီပနာ နာခံခြင်းမဟိရေလူတိကိုလည်း ဖြောင့်မတ်မှန်ကန်တဲ့ အသိဉာဏ်ပညာတိကို ရဖို့အတွက် သင်ပီးလိမ့်မယ်။ ယင်းကြောင့် လူတိဟာလည်း အရှင်ကြွလာရေအချိန်မာ အဆင်သင့်ဖြိုက်နီကတ်လိမ့်မယ်” လို့ဆိုရေ။
18ယင်းခါ ဇာခရိကလည်း နတ်ဒေဝါကို “ဒေပိုင်အဖြိုက်အပျက်တိ ဖြိုက်လာဖို့လို့ ကျွန်နော် ပဇောင်သိနိုင်ပါဖို့ရောင်။ အဇာဖြိုက်လို့ဆိုကေ ကျွန်နော်ရို့လင်မယားနှစ်ယောက်စလုံးဟာ ကောင်းအိုနီကတ်ပါရာ” လို့ပြန်ပြောခရေ။
19ယေခါ နတ်ဒေဝါက ဇာခရိကို “ငါဟာ ဘုရားရှင်ရဲ့ရှေ့တော်မာ ခစားရရေ ဂါဗြေလ ဖြိုက်တေ။ ဒေပိုင်မင်္ဂလာသတင်းကောင်းကို အသင့်ပါးကို လာပြောဖို့အတွက် ဘုရားရှင်က ငါ့ကို စီလွှတ်လိုက်ဟာ ဖြိုက်တေ။ 20ယကေလဲ အချိန်တန်ကေဖြိုက်လာဖို့ ငါ့စကားကို အသင်မယုံကြည်ရေအတွက်နဲ့ ဒေအဖြိုက်အပျက်တိ မဖြိုက်လာခင်အချိန်ထိ အသင်ဟာ စကားမပြောနိုင်ဘဲ အနီလိမ့်မယ်” လို့ဆိုခယေ။
21ဇာခရိနဲ့ နတ်ဒေဝါရို့ဟာ ဗိမာန်တော်ထဲမာ စကားပြောနီကတ်တုံးမှာ အပြင်ဖက်မှာဟိရေ လူပရိတ်သတ်တိဟာ ဗိမာန်တော်ထဲမှာ ဇာခရိ အဇာဖြိုက်လို့ အချိန်အကြာကြီး ဟိနီဟာကို အံ့ဩနီကတ်တေ။ 22ဇာခရိ အပြင်ကို ပြန်လို့ထွက်လာရေအခါမှာလည်း သူဟာ စကားမပြောနိုင်ရာကြောင့် ဗိမာန်တော်ထဲမာဟိနီတုံး ဇာခရိဟာ အံ့ဩစရာတစ်ခုခုကို မြင်ခရရေလို့ လူပရိတ်သတ်တိက နားလည်လားကတ်တေ။ သူဟာ လူတိကို လက်ဟန်ခြီဟန်နဲ့ယာ ဆက်ပနာ အမူအရာတိပြနီခပြီးကေ စကားမပြောနိုင်ပဲဖြိုက်နီခရေ။
23ယပြီးကေ ဇာခရိဟာ ဗိမာန်တော်မာ ပုရောဟိတ်တိလုပ်ဆောင်ရဖို့ အမှုကိစ္စတိအားလုံးကို လုပ်ပြီးလားရေအခါမှာ သူ့အိမ်ကို ပြန်လားခရေ။ 24အချိန်တကေကြာရေအခါ ဇာခရိရဲ့မယား ဧလိရှဗက်ဟာ ဗိုက်ကြီးလာပြီးကေ သူမဟာ ငါးလလောက် ကြာလားရေအထိ လူတိကြားကို မလားဘဲနီခရေ။ 25ဧလိရှဗက်က “အရှင်ဟာ ငါ့ကို ကိုယ်ဝန်ဆောင်စီဖို့အခွင့်ကို ပီးခယာ၊ သူ့ရဲ့အလိုတော်နဲ့ ငါ့ကို လူတိရဲ့ အထင်သေးနီဟာတိကလည်း ပပျောက်စီတော်မူခယာ” လို့သူမကိုယ်သူမ ဆိုခရေ။
ကိုယ်တော်ယေရှု ဖွားမြင်တော်မူဖို့အကြောင်း
26ဧလိရှဗက်ရဲ့ကိုယ်ဝန် ခြောက်လလောက်ဟိရေအခါ ဘုရားရှင်ဟာ နတ်ဒေဝါဂါဗြေလကို ဂါလိလဲပြည်မာဟိရေ နာဇရက်မြို့ကို စီလွှတ်လိုက်တေ။ 27နတ်ဒေဝါဂါဗြေလကို မာရိလို့ခေါ်ရေ အပျိုမချေတစ်ယောက်ပါးကို လားလို့ သတင်းစကား ပြောစီခရေ။ မာရိဟာ ဘုရင်ဒါဝိဒ်ရဲ့ မျိုးရိုးက ဆင်းသက်လာရေလူဖြိုက်တဲ့ ယောသပ်နဲ့ယူဖို့အတွက် စေ့စပ်ထားဟာ ဖြိုက်တေ။ 28နတ်ဒေဝါက မာရိကို နှုတ်ဆက်ပြီးဟာနဲ့ သူမကို “ဘုရားရှင်ဟာ သူ့ရဲ့မဟာကရုဏာမေတ္တာတော်ကို အသင့်ပါးမှာ ပြသပြီးကေ အသင်နဲ့တတူ ဟိတော်မူရေ” လို့ပြောလိုက်တေ။
29ယေတာလဲ မာရိဟာ ယင်းစကားကို ကြားရေအခါ ကောင်းစိတ်ရှုပ်လားပနာ နတ်ဒေဝါရဲ့စကားတိဟာ အဇာကိုဆိုလိုရောင်လို့ တွေးနီခရေ။ 30ယပြီးကေ နတ်ဒေဝါက သူမကို “မကြောက်ပါကေ့၊ မာရိ။ ဘုရားရှင်က အသင့်ကို မျက်နှာသာပီးတော်မူရာ။ 31အသင်ဟာ ကိုယ်ဝန်ရလာပနာ သားတော်တစ်ပါးဖွားမြင်လိမ့်မယ်။ သူ့နာမေကို ယေရှုလို့ ခေါ်ရဖို့။ 32သူဟာ မြင့်မြတ်တဲ့လူတစ်ယောက် ဖြိုက်လာပနာ အမြင့်မြတ်ဆုံး ဘုရားရှင်ရဲ့သားတော်လို့ အခေါ်ခံရလိမ့်မယ်။ သူ့ရဲ့အဖိုးအဖီးဖြိုက်တေ ဒါဝိဒ်ဘုရင်ပိုင်မျိုး သူ့လူမျိုးတိကို အုပ်စိုးနိုင်တဲ့အခွင့်အာဏာကို ဘုရားရှင်က သူ့ကို ပီးအပ်တော်မူလိမ့်မယ်။ 33သူဟာ ယာကုပ်ရဲ့အမျိုးအနွယ်တိဖြိုက်တဲ့ အစ္စရေးလူမျိုးအပေါင်းရို့ကို#1:33 အစ္စရေးလူမျိုးအပေါင်းရို့ကို ယာကုပ်ရဲ့ အမျိုးအနွယ်ဝင်အပေါင်းရို့ လို့ မူရင်းကျမ်းမှာ ရေးသားထားပါရေ။ ဘုရင်အဖြိုက် အမြဲတမ်း အုပ်စိုးတော်မူပနာ သူ့ရဲ့ နန်းဆက်ဟာလည်း တစ်ခါလည်းသို့ ပျက်လားဖို့မဟုတ်” လို့ပြောခရေ။
34ယေခါ မာရိက နတ်ဒေဝါကို “အကျွန်ဟာ အပျိုမတစ်ယောက် ဖြိုက်ဟာကြောင့် ဒေကိစ္စဟာ ပဇောင်ဖြိုက်နိုင်ပါဖို့ရောင်” လို့ပြောခရေ။
35နတ်ဒေဝါကလည်း “ဉာဏ်အလင်းတော်ဟာ အသင့်ပါးကို သက်ရောက်ပြီးကေ အမြင့်မြတ်ဆုံးဘုရားရှင်ရဲ့ တန်ခိုးတော်ဟာလည်း အသင့်ကို လွှမ်းမိုးလားလိမ့်မယ်။ ယင်းကြောင့် အသင်မွီးလာဖို့သားဟာလည်း ဘုရားရှင်ရဲ့သားတော်လို့ အခေါ်ခံရလိမ့်မယ်။ 36အသင့်ရဲ့ အမျိုးဖြိုက်တေ ဧလိရှဗက်ဟာ အိုနီယာဖြိုက်လို့ လူတိက အချေမရနိုင်ယာလို့ ထင်နီကတ်တာလဲ အဂုကိုယ်ဝန်ဟိနီဟာ ခြောက်လလောက်ဟိရာဖြိုက်တေ။ 37အဇာဖြိုက်လို့ဆိုကေ ဘုရားရှင်အတွက် မဖြိုက်နိုင်ဆိုဟာ တစ်ခုတောင်မဟိ” လို့ပြောခရေ။
38ယေခါ မာရိက “အကျွန်ဟာ ဘုရားရှင်ရဲ့ အစီခံတစ်ယောက်ဖြိုက်ပါရေ။ အသင်ပြောရေစကားအတိုင်း အကျွန့်ကို ဘုရားရှင် အလိုတော်ဟိရေအတိုင်း ဖြိုက်ပါစီ” လို့ပြောခရေ။ ယေပြီးဟာနဲ့ ယင်းနတ်ဒေဝါဟာ မာရိနားက ထွက်လားခရေ။
မာရိဟာ ဧလိရှဗက်ပါးကို လားခြင်း
39ကောင်းမကြာခင်မာ မာရိဟာ အဆင်သင့်ပြင်ပနာ ဇာခရိနီရေ ယုဒပြည်နယ်က တောင်ထက်မာဟိရေ မြို့တစ်မြို့ကို အယင်လားခရေ။ 40မာရိဟာ ယင်းနီရာကိုရောက်တေအခါ ဇာခရိရဲ့အိမ်ကို ဝင်လားခပနာ ဇာခရိရဲ့မယားသယ် ဧလိရှဗက်ကို နှုတ်ဆက်ခရေ။ 41မာရိရဲ့ နှုတ်ဆက်စကားကို ကြားရဟာနဲ့ချက်ချင်း ဧလိရှဗက်ရဲ့ ဗိုက်ထဲကအချေဟာ လှုပ်လားခရေ။ ဧလိရှဗက်ပါးကို ဉာဏ်အလင်းတော် သက်ရောက်ပြီးကေ 42သူမက အသံအကျယ်ကြီးနဲ့ မာရိကို “ဘုရားရှင်က အရာမမါ့ချေတိအားလုံးထက် အသင့်ကို မျက်နှာသာပီးတော်မူပြီးကေ အသင့်မာ မွီးလာဖို့အချေဟာလည်း ဘုရားရှင်ရဲ့မျက်နှာသာပီးဟာကို ခံရဖို့။ 43ယေတာလဲ အရှင့်ရဲ့မယ်တော်က အကျွန့်ပါးကို ရောက်လာပြီးကေ ဒေပိုင်အခွင့်ထူးကို အကျွန် အဇာဖြိုက်လို့ ခံစားရဟာပါရောင်။ 44အသင့်ရဲ့ နှုတ်ဆက်စကားကို ကြားရဟာနဲ့ချက်ချင်း အကျွန့်ဗိုက်ထဲကအချေဟာ ပျော်ပြီးကေ လှုပ်ခါနီပါရေ။ 45ဘုရားရှင်ရဲ့သတင်းစကားဟာ အမှန်ဖြိုက်လာဖို့လို့ အသင်ကယုံကြည်ဟာကြောင့် အသင်ဟာ အမှန်ကို မင်္ဂလာဟိရေ” လို့အကျယ်ကြီး အော်ပြောလိုက်တေ။
မာရိက ဘုရားရှင်ကို ချီးမွမ်းစကားဆိုခြင်း
46ယေပြီးကေ မာရိကလည်း
“အကျွန်ဟာ ဘုရားရှင်ရဲ့ ကြီးကျယ်မြင့်မြတ်တဲ့ ဘုန်းတန်ခိုးတော်ကို အကျွန်ရဲ့စိတ်နှလုံးထဲကနီ ချီးမွမ်းပါရေ။
47အကျွန့်ရဲ့ စိတ်နှလုံးဟာ ကယ်တင်ရှင်ဘုရားပါးမှာ ပျော်ရွှင်မှုကိုရပါရေ။
48အကျွန်ဟာ ကိုယ်တော်ရဲ့ နိမ့်ကျရေအစီခံတစ်ယောက် ဖြိုက်တာလဲ ကိုယ်တော်ဟာ အကျွန့်ကို မေ့မထားပဲ အဂုချိန်ကစလို့ မျိုးဆက်တိုင်းမာဟိရေ လူတိအားလုံးက အကျွန့်ကို မင်္ဂလာဟိတဲ့လူလို့ ပြောကတ်လိမ့်မယ်။
49အဇာဖြိုက်လို့ဆိုကေ တန်ခိုးတော်ကြီးမြတ်တော်မူရေ ဘုရားရှင်ဟာ အကျွန့်ပါးကို ကောင်းတဲ့အရာတိကို သက်ရောက်စီတော်မူဟာကြောင့် ဘုရားရှင်ရဲ့ နာမတော်ဟာ မြင့်မြတ်တော်မူရေ။
50ဘုရားရှင်ဟာ သူ့ကို ချိုက်ကြောက်ရိုသေတဲ့လူတိကို သူ့ရဲ့မဟာကရုဏာမေတ္တာတော်ကို ခေတ်အဆက်ဆက်ကပင် ပြသတော်မူရေ။
51ဘုရားရှင်ဟာ စိတ်နှလုံးထဲမာ မာနထောင်လွှားရေလူတိကို သူ့ရဲ့တန်ခိုးတော်နဲ့ လွင့်စင်စီတော်မူရေ။
52သူဟာ အာဏာနဲ့အုပ်ချုပ်တဲ့လူတိကို သူရို့ရဲ့ပလ္လင်ထက်က ဆွဲချပနာ နှိမ့်ချတတ်တဲ့လူတိကို ဂုဏ်သိက္ခာကြီးမြတ်တဲ့လူတိ ဖြိုက်စီပါရေ။
53သူဟာ ငတ်မွတ်ဆာလောင်နီရေလူတိကို သူရို့လိုအပ်တေအရာတိနဲ့ ပြည့်စုံစီပြီးကေ ချမ်းသာရေလူတိကို လက်ဗလာနဲ့အဝီးကို စီလွှတ်တော်မူလိုက်တေ။
54-55ဘုရားရှင်ဟာ အကျွန်ရို့ရဲ့အဖိုးအဖီးတိဖြိုက်တေ အာဗြဟံ#1:54-55 အာဗြဟံ အာဗြဟံဆိုဟာ လူမျိုးအပေါင်းရဲ့ အဖိုးအဖီး ဖြိုက်တေ။ က၊ ၁၇:၅။နဲ့ သူ့ရဲ့မျိုးရိုးစဉ်ဆက်တိကို
အမြဲတမ်း မဟာကရုဏာမေတ္တာတော်ထားဖို့လို့ ကတိတော်ထားခရေ။
အဂုခါ ဘုရားရှင်ဟာ ကတိတော်ကို အောက်မိ့အမှတ်ရတော်မူရာ။
ယင်းကြောင့် သူဟာ သူ့ရဲ့အစီခံတိဖြိုက်တဲ့အစ္စရေးလူမျိုးအပေါင်းရို့ကို ကူညီမစတော်မူရာ”
လို့ဘုရားရှင်ကို ချီးမွမ်းပူဇော်ခရေ။ 56ယပြီးဟာနဲ့ မာရိဟာ ဧလိရှဗက်နဲ့အတူတူ သုံးလလောက်နီခရေ။ ပြီးကေ သူမရဲ့အိမ်ကို ပြန်လားခရေ။
ယောဟန်ကို မွီးဖွားခြင်းနဲ့ နာမေပီးခြင်း
57ယပြီးကေ ဧလိရှဗက်ဟာ မွီးဖွားဖို့အချိန်ရောက်တေအခါ သားချေတစ်ယောက်ကို မွီးခရေ။ 58ယပြီးကေ သူမရဲ့ အိမ်နားပါးချင်းတိနဲ့အမျိုးတိဟာ သူမကို ဘုရားရှင်က မေတ္တာတရားကြီးမားပုံကို ပြသတော်မူကြောင်း ကြားသိထားကတ်ဟာကြောင့် သူမနဲ့အတူတူ ဝမ်းသာကတ်တေ။
59အချေမွီးပြီးလို့ ရှစ်ရက်မြောက်တေနိန့်မှာ အရီဖျားလှီးမင်္ဂလာပွဲ #1:59 အရီဖျားလှီးမင်္ဂလာပွဲမောရှေပညတ်ကျမ်းအရ ယောက်ျားချေတိရဲ့ အင်္ဂါထိပ် အရီပြားကို လှီးဖြတ်ခြင်း။ ကို လုပ်ဆောင်ဖို့အတွက် လာခကတ်တေ။ ယပြီးကေ သူရို့ဟာ ယင်းအစိတ်ကေချေရဲ့နာမေကို သူ့ရဲ့အဖနာမေဖြိုက်တေ ဇာခရိကို ပီးချင်ခကတ်တေ။ 60ယေတာလဲသို့ အမိဖြိုက်တေဧလိရှဗက်က “မဟုတ်။ သူ့ကို ယောဟန်လို့ နာမေပီးရဖို့” လို့ပြောလိုက်တေ။
61ယင်းခါ လူတိက ဧလိရှဗက်ကို “နင်ရို့မျိုးရိုးမှာ ဒေပိုင်မျိုး နာမေကားမဟိ” လို့ပြောကတ်တေ။
62ယင်းဟာကြောင့် လူတိက အစိတ်ကေချေရဲ့ အဖဖြိုက်တေဇာခရိကို ပဇောင်ပိုင်မျိုးနာမေကို ပီးချင်ရောင်လို့ လက်ဟန်ခြီဟန်နဲ့ မီးခကတ်တေ။ 63ဇာခရိက သင်ပုန်းတချပ် တောင်းယူလိုက်ပနာ သူ့သားနာမေက ယောဟန်လို့ ချရေးပီးလိုက်ဟာကြောင့် မြင်ရရေအိမ်နားပါးချင်းတိလည်း အံ့ဩလားကတ်တေ။ 64ယင်းအချိန်မာ ဇာခရိဟာ ချက်ချင်း စကားပြန်လို့ပြောနိုင်လာပြီးကေ ဘုရားရှင်ကို စလို့ ချီးမွမ်းပူဇော်ခရေ။ 65အိမ်နားပါးချင်းတိနဲ့ အမျိုးတိဟာ ဒေအဖြိုက်ပျက်တိကို မြင်ရရေခါ ကောင်းအံ့ဩတုန်လှုပ်လားခကတ်တေ။ လူတိအားလုံးက ဒေသတင်းကို ယုဒပြည်နယ်က တောင်ပေါ်ဒေသကနီရာတိုင်းမှာ ပြောဆိုနီခကတ်တေ။ 66ယင်းသတင်းတိကို ကြားရရေ လူတိုင်းဟာ “ဒေအစိတ်ကေချေ ကြီးလာတဲ့အခါ ပဇောင်ပိုင်ဖြိုက်လာဖို့ရောင်” ဆိုဟာကို သူရို့ရဲ့စိတ်ထဲမာ တွေးနီခကတ်တေ။ အဇာဖြိုက်လို့ဆိုကေ ဘုရားရှင်ရဲ့တန်ခိုးတော်ဟာလည်း ယင်းအစိတ်ကေချေနဲ့တတူတူ ဟိနီခလို့ဖြိုက်တေ။
ဇာခရိက ဘုရားရှင်ကို ချီးမွမ်းခြင်း
67ယပြီးဟာနဲ့ ဉာဏ်အလင်းတော်ဟာ အချေရဲ့အဖဖြိုက်တဲ့ ဇာခရိပါးကို သက်ရောက်ပြီးကေ ဘုရားရှင်ရဲ့သတင်းစကားကို ပြောခရေ။
68“အစ္စရေးလူမျိုးအားလုံးရဲ့ အရှင်သခင်ဖြိုက်တဲ့ ဘုရားရှင်ကို ငါချီးမွမ်းပါရေ။ သူဟာ သူ့ရဲ့လူမျိုးအပေါင်းရို့ကို လွတ်မြောက်ဖို့ ကြွလာယာဖြိုက်တေ။
69ဘုရားရှင်ဟာ သူ့ရဲ့ အစီခံဖြိုက်တဲ့ဘုရင်ဒါဝိဒ်ကနီ ဆင်းသက်လာရေ တန်ခိုးအာဏာကြီးမားရေ ကယ်တင်ရှင်ကို ကျနော်ရို့ အားလုံးအတွက် ပီးသနားတော်မူခရာ။
70အယင်ခါတုန်းကပင် ဘုရားရှင်ဟာ သူရွီးချယ်ထားတဲ့ မြင့်မြတ်တဲ့ပရောဖက်တိကို မိန့်ကြားခရေအတိုင်း
71ဒေတန်ခိုးအာဏာကြီးရေကယ်တင်ရှင်ဟာ ကျွန်နော်ရို့ရဲ့ရန်သူအပေါင်းရို့ပါးက ကယ်တင်ဖို့အပြင် ကျွန်နော်ရို့ကို မနာလို၊ မုန်းရေလူတိပါးကလည်း လွတ်ကင်းစီဖို့ဖြိုက်ပါရေ။
72ယင်းအရာတိလုပ်ပီးခဟာက ဘုရားရှင်ဟာ ကျွန်နော့်ရို့ရဲ့အဖိုးအဖီးတိကို သူ့ရဲ့မဟာကရုဏာမေတ္တာတော်ကို ပြသတော်မူဖို့အကြောင်းနဲ့ သူ့ရဲ့မြင့်မြတ်တဲ့သဘောတူညီမှုကို အောက်မိ့အမှတ်ရစီဖို့ ဖြိုက်တေ။
73ဘုရားရှင်က ကျွန်နော့်ရို့ရဲ့ အဖိုးအဖီးတိဖြိုက်တေ အာဗြဟံကို ပီးထားခရေ သဘောတူညီမှုအတိုင်း
74-75ကျွန်နော်ရို့ကို ကျွန်နော်ရို့ရဲ့ရန်သူတိလက်က လွတ်မြောက်စီဖို့ဖြိုက်ပြီးကေ
ကျွန်တော်ရို့ အသက်ရှင်နီသမျှကာလပတ်လုံး ဘုရားရှင်ရဲ့ရှေ့မာ
မြင့်မြတ်ခြင်းနဲ့ ဖြောင့်မတ်ခြင်းဟိပြီးကေ အကြောက်တရားကင်းကင်းနဲ့ ဘုရားရှင်ကို အလုပ်အကျွေးပြုနိုင်ကတ်လိမ့်မေ” ဆိုပနာဖြိုက်တေ။
76ယပြီးကေ ဇာခရိက သူ့ရဲ့အစိတ်ကေချေကို
“ငါ့သားချေ၊ မတ်ကို အလွန်တရာမှ အမြင့်မြတ်ဆုံးဖြိုက်တဲ့ဘုရားရှင်ရဲ့ ပရောဖက်လို့ ခေါ်ဝေါ်ချီးမြှင့်ကတ်ဖို့ဖြိုက်တေ။
မတ်ဟာ အရှင်သခင်ကြွလာဖို့လမ်းကို ရှေ့ကနီ ကြိုလို့ ပြင်ဆင်ပီးရဖို့လူလည်း ဖြိုက်လိမ့်မယ်။
77ဘုရားရှင်က လူတိရဲ့အပြစ်အားလုံးကို ခွင့်လွှတ်တဲ့အနေနဲ့ ကယ်တင်ခြင်းအကြောင်းကို အသင်က လူတိကို ပြောပြရလိမ့်မယ်။
78-79ဘုရားရှင်ဟာ ကျွန်ုပ်ရို့အပေါ်မာ မဟာကရုဏာမေတ္တာတော်ကြီးမားဟာကြောင့် သူ့ရဲ့လူမျိုးတိကို ကယ်တင်ဖို့ ဖြိုက်တေ။ မိုးလင်းအာရုဏ်တက်နီမင်းကီးဟာ အမှောင်ထုကို ဖယ်ရှားပိုင်မျိုး ဘုရားရှင်ပါးကလာတဲ့ ကယ်တင်ရှင်မေရှိယဟာ
ဘုရားရှင်ကို မသိမမြင်ကတ်တဲ့လူတိနဲ့ သီခြင်းတရားကိုကြောက်နီတဲ့လူတိကို ကူညီဖို့ ကြွလာလိမ့်မေ။ သူဟာ လူတိအားလုံးကို အီးချမ်းရေဘဝကို လမ်းပြပို့ဆောင်ပီးလိမ့်မယ်” လို့ ပြောခရေ။
80အဂုခါ ယောဟန်ဟာ အရွယ်ရောက်လာပနာ အသိဉာဏ်ပညာနဲ့ ပြည့်စုံတဲ့လူ ဖြိုက်လာရေ။ သူဟာ အစ္စရေးလူမျိုးတိရှေ့မှာ အမှုတော်ကို စလို့မထမ်းဆောင်ခင်အချိန်ထိ တောကန္တာရထဲမှာ နီခရေ။
ទើបបានជ្រើសរើសហើយ៖
ရှင်လုကာ 1: RKI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Yangbye (တောင်ပိုင်းရခိုင်) Bible by Beyond Translation is licensed under Creative Commons Attribution-ShareAlike 4.0 License.