E Rut 1
1
1Ande kodia vriamia kana domnisarenas le krisinitoria ande o Israel sas jekh data bokh ande o them. Haj jekh manuš anda o Betlehem ande o Juda gêlotar peska řomniasa haj peske do śavenca te bešel jekh vriamia ande o them o Moab.
2O anav kodole manušesko sas Elimelek, o anav leska řomniako sas Noomi, haj leske duj śave buśonas Maxlon haj Kiljon; von sas efratituri anda o Betlehem ande o Juda. Arêsle ande o them o Moab, thode pe kote te bešen jekh vriamia.
3O Elimelek, o řom la Noomiako, mulo, haj voj bešli peske do śavenca.
4Von line řomnia pala pende katar le moabituri, kaj jekh buśolas Orpa haj e kaver Rut, haj von bešle kote paštji deš bêrš.
5O Maxlon haj o Kiljon vi von mule le duj, haj e Noomi bešli bi peske do śavenca haj bi peske řomesa.
6Purme voj vuštili, peske do borianca, eta te mukel o them o Moab, kê voj ašundias ande o them o Moab kê o Baro Del sas ka pesko narodo haj dias les manřo.
7Voj anklisti anda o than kaj voj bešelas, peske do borianca, haj thodias pe pe o drom te źal palpale ande o them o Juda.
8E Noomi phenel atunči peske do boriange: “Źan, ambolden palpale sako ka o khêr peska dako! Kê o Baro Del te kêrel tumenge mištimos, sar kaj tume kêrdian karing kodola kaj mule haj karing mande!
9Kê o Baro Del te kêrel te arakhen hodina sako ande o khêr jekhe řomesko!” Haj voj čumidias le. Von vazde o glaso haj rovenas;
10haj von phenen lake: “Niči, ame źasa tusa karing tjiro narodo”.
11Numa e Noomi phenel: “Źan palpale, mîře śeja, źan! Sostar avena tume manca? Šoha či maj arakhadiona mange śave kaj šaj te aven tumare řom.
12Źan palpale, mîře śeja, źan! Me sim pria phuri te šaj maj mêriti ma. Haj vi te gîndisaravas: ‘Maj si ma e nediaždia’, haj te davas ma vuže kadia riat jekhe řomeske, haj te arakhadionas mange śave;
13aźukêrenas tume atunči te bariona, phandavenas tume anda kodia andre haj aśenas bi řomenge? Niči, mîře śeja! Mange si suřučime te pêcisarav maj but de sar tume. Le Deviesko vas mardias ma.”
14Haj von vazde o glaso haj maj rovenas. E Orpa čumidias peska suakra haj lias peske latar laśo djes, numa e Rut či gêlitar.
15E Noomi phenel ka e Rut: “Eta, tjiri šogorica gêli palpale karing pesko narodo haj karing pesko Del, ambolde palpale vi tu, sar tjiri šogorica!”
16E Rut del palpale: “Na grêbisar ma te mukav tu, te źav dur tutar! Kaj tu źasa me źava, kaj tu bešesa me bešava. Tjiro narodo avela mîřo narodo, haj tjiro Del avela mîřo Del.
17Kaj tu meresa me merava, haj kote avava angropome. Te kêrel manca o Baro Del sogodi, ferdi o merimos šaj lela ma tutar.”
18Kana e Noomi dikhlias kê e Rut kamel te źal lasa, či maj phendias khanči.
19Von gêle le duj pe o drom źi ka o Betlehem. Haj kana von dine andre ande o Betlehem sa o foro mirisajlo haj le źuvlia phenenas: “Kadia si e Noomi?”
20Voj phenel lenge: “Na akharen ma Noomi, ‘e drago’, akharen ma Mara, ‘e vuřîcime’, kê o Maj Baro pherdias ma vuřîcija.
21Sas ma but kana gêlemtar, haj o Baro Del anel ma palpale le vas nange. Sostar akharen ma tume Noomi, kana o Baro Del dias ma kris haj nêkêžisardias ma?”
22Kadia avile anda o them o Moab e Noomi haj laki bori, e Rut e Moabita. Von arêsle ande o Betlehem ande e vriamia kana kezdisaren te tjiden o orzo.
ទើបបានជ្រើសរើសហើយ៖
E Rut 1: KALD1979
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Kalderash Ruth © Swedish Bible Society, 1979.