E Rut 2
2
1E Noomi sas la jekh niamo pe e rig lake řomeski. Sas jekh manuš zuralo haj barvalo, anda e familija le Elimelekoski, haj kaj buśolas Boaz.
2E Rut e Moabita phenel ka e Noomi: “Mangav tu te mukes ma te źav ka le kîmpuri te puśav te si mange slobodo te tjidav spikuri”. E Noomi del palpale: “Źa, mîři śej!”
3Voj gêli te tjidel spikuri ande jekh kîmpo pala kodola kaj śinen. Haj maladilias kê o kîmpo sas le Boazosko, kaj sas anda e familija le Elimelekoski.
4Haj eta, o Boaz avel anda o Betlehem, haj phenel kodolenge kaj śinen haj tjiden: “Devlesa arakhav tume!” Von den les palpale: “O Del anel tu! Te svîncil tu!”
5Haj o Boaz phenel peska slugake kaj si thodini te lel sama katar kodola kaj śinen haj tjiden: “Kaski si kača têrni źuvli?”
6E sluga kaj si thodini te lel sama katar kodola kaj śinen haj tjiden del palpale: “Si jekh têrni źuvli moabicko, kaj avili palpale la Noomiasa anda o them o Moab.
7Voj phendias: ‘Muken ma te tjidav spikuri haj te lav so perel maškar le snopuri, pala kodola kaj tjiden’. Haj de diminiac kaj voj avili, voj bešli pe punřende źi akana, haj ferdi cîřa hodinisajli kote andre.”
8Atunči o Boaz phenel ka e Rut: “Ašun, mîři śej, na źa ta tjide spikuri ande jekh kaver kîmpo, na durio katar, haj beš mîře slugankenca.
9Dikh kaj tjiden ande o kîmpo, haj źa pala lende! Phendem mîře sluźenge te na azban tu. Haj kana avesa trušali, tu źasa ka le kanti, haj pesa anda kodo kaj le sluźi andine.”
10Atunči voj peli pe peski faca haj bandjili ka e phuv, haj voj phenel leske: “Sar arakhlem me mištimos ka tjire jakha, kê te les tu sama mandar, me kaj sim jekh strêjino?”
11O Boaz phenel palpale: “Phende mange sa so tu kêrdian tjiria suakrake dekîn mulo tjiro řom, haj sar tu muklian tjire dades haj tjiria da haj o them kaj tu arakhadilian, te źas karing jekh narodo kaj tu či źanesas maj anglal.
12Kê o Baro Del te del tu palpale so tu kêrdian, haj kê te aves putjindi sa katar o Baro Del, o Del anda o Israel, tela kaske pakha tu avilian te garadios!”
13Haj voj phenel: “Me arakhlem mištimos ka tjire jakha, mîřo baro! Kê tu lian pa mande o nêkazo, haj tu dian duma ka o jilo tjiria slugankako. Haj me či sim sar jekh tjire slugankendar.”
14Kana si te xan, o Boaz phenel ka e Rut: “Pašo, xa manřo, haj bol tjiro kotor ande le šuteski mol!” Voj bešli paša kodola kaj śinen. Dias la sêmînci peke; voj xalias haj ma nas la bokh, haj voj garadias so aśilias la.
15Purme voj vuštili te tjidel spikuri. O Boaz dias kača porunka ka peske sluźi: “Muken la te tjidel vi maškar le snopuri, na hamisavon late;
16haj înke ankalavena lake vuni spikuri katar le burnixa, kaj mukena la te tjidel, bi te phenen lake khanči”.
17Voj tjidias ande o kîmpo źi riate, haj purme mardias avri so voj tjidias. Sas paštji jekh efa orzo.
18Voj angêrdias o orzo haj avili ande o foro, haj laki suakra dikhlias so voj tjidias. Voj maj ankaladias so aśilias anda lako xaben, haj dias la.
19Laki suakra phenel: “Kaj tjidian tu adjes, haj kaj kêrdian tu butji? Svîncime te avel kodo kaj lias tutar sama!” Haj e Rut phenel peska suakrake kaste voj kêrdias butji: “O manuš kaste me kêrdem butji adjes”, phenel voj, “buśol Boaz”.
20E Noomi phenel peska boriake: “Te avel vo svîncime katar o Baro Del, kaj sikadias pe miloso vi le źivindenge vi le mulenge! Kodo manuš si amaro niamo”, maj phenel lake e Noomi, “vo si anda kodola kaj trobul te len sama amendar”.
21E Rut e Moabita maj mothol: “Vo maj phendias mange: ‘Beš mîře sluźenca, źikîn či gêton te śinen haj tjiden sa’”.
22Haj e Noomi phenel ka e Rut, laki bori: “Si mišto, mîři śej, kê te tu ankles leske slugankenca, haj kê te na arakhen tu ande jekh kaver kîmpo”.
23Gadia bešel voj le Boazoske slugankenca, te tjidel spikuri źikîn či gêton te tjiden o orzo haj o djiv o parno. Haj voj bešelas peska suakrasa.
ទើបបានជ្រើសរើសហើយ៖
E Rut 2: KALD1979
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Kalderash Ruth © Swedish Bible Society, 1979.