Matayo 4
4
Sitani nakimuleka Yesu
(Maliko 1:12-13; Luka 4:1-13)
1Du̱mbi̱ Mwoyo Mawelikana naki̱mu̱i̱sa Yesu ke lungu andu̱lu̱ Sitani amuleke. 2Naladhaki tolo maku̱mi̱ ana nasi̱bi̱, Yesu inja nakingba. 3Du̱mbi̱ Sitani naki̱bi̱ka nakingia bhiyo; “Kabha noli Mi̱ki̱ mindia Mambombi̱, olagilie tali yoho abhe li̱eli̱.”
4Yesu naki̱nsi̱ki̱aku̱ bhiyo; “Bhahandi̱ki̱ bhiyo; ‘Nkpa kakibhaga mwomezi̱ nanga li̱eli̱ u̱kaka, no nanga kigambo ndia Mambombi̱.’ ”#Kilagilo 8:3
5Du̱mbi̱ Sitani naki̱mu̱i̱sa Yesu ka tau̱ni̱ mawelikana ndia ka Yelusalemu naki̱ndai̱sa ka lusui sa Hekalo. 6Sitani nakingia Yesu bhiyo; “Kabha noli Mi̱ki̱ mindia Mambombi̱, obu̱mbu̱ke ogu̱we gwabhi̱mba, nanga bhahandi̱ki̱ bhiyo;
‘Mambombi̱ akibhulagilia bhamalai̱ka ndibhaki bhundiliako’
toli̱ ‘bhakukubhaka kulungi
andu̱lu̱ kolokwebhi̱nda gua tali obhu̱nu̱ka kigu.’ ”#Zabbu̱li̱ 91:11-12
7Yesu naki̱nsi̱ki̱aku̱ bhiyo; “Bhahandi̱ki̱ bhiyo; ‘Kolokumulengesa Sali̱a Mambombi̱ mindiako.’ ”#4:7 Kilagilo 6:16.
8Sitani nakitodha naki̱mu̱i̱sa Yesu gua gu̱si̱a makangama si̱ni̱ nakimuani̱sa kusali̱a poni ka nsi na ngu̱ko si̱. 9Nakingia bhiyo; “Yoho poni ni̱ku̱ku̱pesi̱a kobhala su̱ku̱mana gwabhi̱mba lami̱ami.”
10Yesu naki̱nsi̱ki̱aku̱ bhiyo; “Sitani onitukebe, nanga bhahandi̱ki̱ bhiyo; ‘Omulami̱e Sali̱a Mambombi̱ toli̱ onkolilie ndiye yekaka.’ ”#Kilagilo 6:13
11Du̱mbi̱ Sitani nakintukabe toli̱ bhamalai̱ka nibhaki̱ya konia Yesu.
Yesu nakitandika mulimo ndiaki sa tebeza
(Maliko 1:14-15; Luka 4:14-15)
12Yesu ndia aoka eti Yohana Mbati̱zi̱ bhambi̱si̱ ka nkomo, atinaku̱ si̱ki̱aki ka kyalo ndia ka Galilaya. 13Atuka ka tau̱ni̱ ndia ka Nazaleti̱ naki̱ya li̱kaki ka Kapelenau̱mu̱ ndia abhi̱ bi̱ya na tu̱li̱ Galilaya ka kyalo ndia ka Zebbu̱loni̱ na Nafutali. 14Akola yoho tu̱mi̱sa ndia nabbi̱ Isaya aonga bhiyo;
15“Kyalo ndia ka Zebbu̱loni̱ na kyalo ndia ka Nafutali
ali ka nesi̱yo ndia aki̱ya ke tu̱li̱ nekpengbu̱a Yolodani
na Galilaya kindia Bhakpa ndibha kali Bhayu̱daya bhaki̱li̱kaga.
16Bhakpa ndibhali ka ki̱li̱mi̱ki̱aga sa kibi
bhatangia bemu sa mani̱.
Bhenjo ndibha bhaki̱li̱kaga ka moli̱-moli̱ sa ku̱wa,
bemu akibhuenikiliana.”#Isaya 9:1-2
17Tukilia bwile injo, Yesu atandika tebeza nakigia bhiyo; “Bhwesi̱ki̱eku̱ kibi ndianu̱ nanga kusali̱a ndia gulu ali bi̱ya.”
Yesu nakibhubhuwa bhaegi̱ ndibhaki bhei̱ni̱ ndibha kateketa
(Maliko 1:16-20; Luka 5:1-11)
18Tolo moti̱ Yesu nali kadhetaga nekpengbu̱a mwalo ndia ke tu̱li̱ Galilaya, abhutangia bhatua kunama bhebhali, moti̱ nandiye Si̱moni̱ mindia yabhangiagaku̱ Petelo na namaki Andeleya nibhali kaleka kati̱mba sa bhasu̱ ke tu̱li̱ nanga bhabhi̱ bhakomani̱. 19Toli̱ nakibhugia bhiyo; “Bhunitombe ki̱yage imamoti̱, nikibhuegesa komana bhakpa nesi̱ bhu̱li̱ki̱ komana bhasu̱.” 20Du̱mbi̱ nibhakimeliaku̱ nibhakidhuwa kati̱mba ndiabho nibhakintomba.
21Nibhalia ki̱ya, Yesu abhutangia bhatua kunama ndibhetolo bhebhali, Yakobbo na Yohana bhani̱ki̱ ndibha Zebedayo. Zebedayo na bhani̱ki̱ ndibhaki bhebhali bhabha nibhali ka bhwati̱ kasaniaga kati̱mba du̱mbi̱ Yesu nakibhueka bhatua kunama bhebhali bhehe. 22Du̱mbi̱ nibhakimeliaku̱ nibhakidhuwa bhwati̱ na ababho, nibhakintomba Yesu.
Yesu nakitebeza na lami̱sa bhakpa
(Luka 6:17-19)
23Yesu ai̱ya ka Galilaya poni nalia kitebeza ka Ndabho kindia Bhayu̱daya yabhalami̱li̱aga na langililia Makulu Mabhonga ndia agbei̱be kusali̱a ndia Mambombi̱ na lami̱sa ndwali̱ poni ka bhakpa. 24Makulu ndia angbei̱be Yesu adhakiaga kyalo ndia ka Si̱li̱ya poni du̱mbi̱ bhakpa nibhaki̱bhu̱bi̱ki̱sa ndibhabha nibhalwali̱ na ndibha kozo yabhu̱zi̱gi̱dhi̱o na ndibha yabhabhubhandu̱ bhali̱mo na bhatua mpu̱mbu̱ na ndibha yabhakatimani̱o, toli̱ nakibhulami̱sa bhoponi. 25Bi̱ya bhakpa bhantomba Yesu tukabho ka Galilaya na ka tau̱ni̱ komi̱ ndia ka Yelusalemu na ka Yu̱deya na ka kyalo ndia ali nekpengbu̱a tu̱li̱ Yolodani.
ទើបបានជ្រើសរើសហើយ៖
Matayo 4: KWAMBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc., 2025