Matayo 7
7
Yesu nakiegesabe cuelia ndibhetolo musango
(Luka 6:37-38, 41-42)
1Du̱mbi̱ Yesu nakibhugia bhiyo; “Bhukulukubhucuelia ndibhetolo musango, na bhenu̱ bhakada kibhucuelia, 2nanga Mambombi̱ ada kibhucuelia musango nesi̱ na bhenu̱ bhukubhucueliaga ndibhetolo. Nesi̱ bhukubhucueliaga ndibhetolo musango andiahau̱ dhe nesi̱ na bhenu̱ Mambombi̱ ada kibhucuelia musango.
3“Ndia akidhuwa noku̱zi̱ba ntu̱bu̱ sa mbahu ndia anili kei̱so uwe nolia na mbabho kei̱so ndiako andiki? 4Okungia bhoni̱ dako eti; ‘Odhuwe nikubhuwe ntu̱bu̱ ke i̱so uwe nolia na mbabho ke ndiako?’ 5Uwe ngobhi̱a, otekete webhuweku̱ nku̱mi̱ mbabho kei̱soako andu̱lu̱ otoke zi̱ba bhiani du̱mbi̱ ombuweku̱ dako ntu̱bu̱ ke i̱so.
6“Bhukulukubhupesi̱a bhambuwa kima ndia awelikani̱o. Bhukulukubhumakia bhanguya kima ndianu̱ sa mugaso nanga bhakikpetaga toli̱ bhagali̱ngane lwanisanu̱.
Kunga, kabhaga na eka
(Luka 11:9-13)
7“Bhukunge toli̱ bhakibhupesi̱a; bhukabhage toli̱ bhukuena; bhueke toli̱ bhaki̱bhu̱oku̱dhi̱li̱a. 8Nkpa poni mindia akikungaga, bhakimpesi̱aga, toli̱ nkpa poni mindia akikabhaga, akienaga, toli̱ nkpa poni mindia akiekaga, bhaki̱mu̱oku̱dhi̱li̱aga.
9“Andi ani̱ kowanu̱ mindia mi̱ki̱ mindiaki akinkungaga mugati̱ ampesi̱a tali? 10kedha mi̱ki̱ mindiaki kankunga asu̱ ampesi̱a njoka? 11Kabha bhenu̱ bhakoli̱ kibi ni̱bhu̱ku̱bhu̱pesi̱aga bhani̱ki̱ ndibhanu̱ kisembo mabhonga, bhukweli̱li̱kana eti Abanu̱ mindia ali gulu kakibhupesi̱a bhenjo ndibha bhakinkungaga kisembo mabhonga ndia akoli̱ menjo?
12“Ka kima poni ndio bhukukolaga, bhukole ka bhakpa ndibhetolo ndio bhukukabhaga eti bhakole kanu̱. Yoho andu̱lu̱ makulu sa Kilagilo ndia Mambombi̱ ampesi̱a Musa na ndia bhanabbi̱ bhahandika.”
Mpu̱me mabhomana na mpu̱me magbatikana
(Luka 13:24)
13“Bhugodhilie ka mpu̱me mabhomana nanga mpu̱me ndia aki̱bhu̱i̱sa ka gehena agbatikani̱a toli̱ nesi̱yo ndio bhukutombiliaku̱ adhoti̱a na bhakpa bi̱yabho bhakikoliliaga kau̱, 14no mpu̱me ndia akukugodhi̱sa ka bwomezi̱ ndia kaki̱si̱agabe abhomani̱a toli̱ bhakpa bhake bhakitangiaga ndibho.
Mili na mbu̱ka si̱
(Luka 6:43-44)
15“Bhwegendi̱e nanga bhanabbi̱ bhatua mbela. Bhaki̱bi̱kaga nibhaloli̱ ngubu sa bhantama no ka mulima ndiabho nibhali bhia bheboha bhamakalamaga. 16Bhu̱ku̱bhu̱i̱bi̱li̱li̱a ka ndia bhakikolaga. Bhakpa bhakikodhaga muzabbi̱bbu̱ ka ntiti kedha mu̱ti̱ni̱ ka matolu̱, 17andiahau̱ dhe mili poni mabhonga akikpetagaku̱ mbu̱ka mabhonga toli̱ mili mazinana akpetaku̱ mbu̱ka mazinana. 18Mili mabhonga kakikpetaku̱ mbu̱ka mazinana na mili mazinana kakikpetaku̱ mbu̱ka mabhonga. 19Mili poni ndia kakikpetagaku̱ mbu̱ka mabhonga bhakizombaga toli̱ bhasu̱mba. 20Ti̱-no ndia akidhuwa ni̱bhuku̱bhu̱ibi̱li̱li̱a bhanabbi̱ bhatua mbela ali ndia bhakikolaga.
21“Kali nkpa poni mindia akiniekaga eti; ‘Sali̱a, Sali̱a,’ mindia ada kigodha ka kusali̱a ndia gulu, no minjo mindia akikolaga ndia Aba mindia ali gulu akikabhaga. 22Ka tolo injo, bhakpa bi̱yabho bhada kinigia bhiyo; ‘Sali̱a, Sali̱a, bhikipesi̱a bhunabbi̱ ke i̱nako toli̱ nikikibhubhiyabe bhakpa bhali̱mo na kola kima mamadha ndia akitina nki̱li̱ ke i̱nako?’ 23Du̱mbi̱ nikibhutolia tonono bhiyo; ‘Emi ki̱bhu̱i̱bi̱. Bhunitukebe bhenu̱ bhakoli̱ kibi.’
Nsi̱mo ndia bhʼali̱ki̱ bhebhali
(Luka 6:47-49)
24“Nkpa poni mindia akiokaga kigambo ndiamo toli̱ ayeli̱abe ali bhia ntua magezi̱ mindia aʼlika ndabho ndiaki gua dhudhu mamota#7:24 dhudhu mamota Bbai̱bbu̱li̱ ndietolo bhagi̱ku̱ kuka kedha tali. andu̱lu̱ amote. 25Mbu̱la ndia asoka, li̱bho naki̱tu̱ma na wewelia naki̱bhi̱nda ndabho injo toli̱ kagu̱wa nanga musingi si̱ abha namoti̱. 26Toli̱ nkpa poni mindia akiokaga kigambo ndiamo toli̱ akoma yeli̱ai̱be ali bhia ndoma mindia aʼlika ndabho ndiaki ka mbu̱me. 27Mbu̱la ndia asoka, li̱bho naki̱tu̱ma na wewelia naki̱bhi̱nda, ndabho injo naki̱gu̱wa u̱poni naki̱si̱abe.”
28Yesu ndia adhakia onga kima yoho, bi̱ya bhakpa nki̱li̱ abhutina nanga kima ndia aegesa, 29nanga aegesa na mani̱ no ndia kali bhia bhaegesi̱ ndibhabho sa Kilagilo ndia Mambombi̱ ampesi̱a Musa.
ទើបបានជ្រើសរើសហើយ៖
Matayo 7: KWAMBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc., 2025