Matayo 6
6
Yesu nakiegesabe pesi̱a bhanako
1Du̱mbi̱ Yesu nakibhugia bhaegi̱ ndibhaki bhiyo; “Bhwegendi̱e, kolilia bhakpa kima mabhonga kei̱soa bhakpa ndibhetolo andu̱lu̱ bhakpa bhenjo bhabhusinde, injo akidhua bhukutunge kisembo tukai̱ kindia Abanu̱ mindia ali gulu.
2“Konkonia nkpa mindia ali na ndia akikabha, koloku̱ya nokubhulangililia bhakpa bhoponi nesi̱ bhangobhi̱a bhaki̱yaga nibhakikola ka Ndabho kindia Bhayu̱daya yabhalami̱li̱aga na ka nesi̱yo andu̱lu̱ bhakpa bhabhusinde. Ka mazima nikibhutolia eti bhatungi̱ kisembo ndiabho ndia atu̱mi̱o. 3No konkonia nako, kolokudhuwa kibhoko ndiako sa kulegu̱ naki̱ba ndia kibhoko ndiako sa kuluku ali ka kolai̱, 4andu̱lu̱ konia ndiako abhe ka nsobho. Du̱mbi̱ Abako mindia akitangiaga ndia bhakoli̱li̱ ka nsobho akukupesi̱a kisembo.
Yesu nakiegesabe saba
(Luka 11:2-4)
5“Toli̱ kabha noli ka saba, kolokubha bhia bhangobhi̱a ndibha bhaku̱ndi̱ saba nibhatelemagi̱ ka Ndabho kindia Bhayu̱daya yabhalami̱li̱aga na ka makani andu̱lu̱ bhakpa ndibhetolo bhabhu̱zi̱be. Ka mazima nikibhutolia eti, bhatungi̱ kisembo ndiabho ndia atu̱mi̱o. 6No kabha noli ka saba Mambombi̱, ogodhe ka kisika ndiako, odhake ki̱ku̱ku̱ toli̱ onsabe Abako mindia bhakakintangiaga. Du̱mbi̱ Abako mindia akitangiaga ndia bhakoli̱li̱ ka nsobho akukupesi̱a kisembo. 7Toli̱ kabha noli ka saba, odhuwe koli̱sa loki̱ mamadha ndia kali na makulu bhia bhakafi̱le ndibha bhakyeli̱li̱kanaga eti Mambombi̱ akibhuoka nibhakoli̱si̱ loki̱ mamadha. 8Bhukulukubha bhia ebho nanga Aba ali̱ki̱ nai̱bi̱ ndio bhukukabha ndio bhukunkungi̱mbe.
9“Yoho andu̱lu̱ nesi̱ bhugbokiliani̱ saba Mambombi̱:
‘Abasu̱ mindia ali gulu
Odhuwe bhakpa poni bhangu̱ki̱se i̱nako
10Kusali̱a ndiako abi̱ke,
Ndio okukabhaga bhakole gwabhi̱mba, nesi̱ bhakikolaga gulu.
11Okipesi̱e li̱eli̱ ndiasu̱ tolo poni.
12Okigani̱li̱ye kibi ndiasu̱, nesi̱ na bhesu̱ kikibhugani̱li̱aga
ndibha bhakikikolagabe kibi.
13Kolokukidhuwa ni̱ki̱ki̱gu̱wa ka leka,
no okicungule kowa Mubi.’#6:13 Kihandiko ndietolo akitodhagabe, nanga kusali̱a, na mani̱ na ngu̱ko ali ndiako endindi na tolo poni. Amina.
14“Toli̱ bhukubhugani̱li̱a bhadanu̱ ndibha bhakibhukolagabe kibi, na bhenu̱ Abanu̱ mindia ali gulu ada kibhugani̱li̱a, 15no ndio bhukubhugani̱li̱ bhadanu̱ ndibha bhakibhukolagabe kibi, na bhenu̱ Abanu̱ mindia ali gulu kada kibhugani̱li̱a kibi ndianu̱.
Yesu nakiegesabe si̱ba
16“Toli̱ bhu̱ku̱si̱ba, bhukulukuani̱sa ke i̱so nesi̱ bhangobhi̱a bhakikolaga li̱ka nibhabheli̱ andu̱lu̱ bhabhu̱i̱bi̱li̱e nesi̱ bhasi̱bi̱o. Ka mazima, bhatungi̱ kisembo ndiabho ndia atu̱mi̱o. 17No bhu̱ku̱si̱ba, bhuoge ke i̱so toli̱ bhwesebhi̱ye mou̱la ka si̱kamuhu ndianu̱ du̱mbi̱ bhucanule, 18andu̱lu̱ bhakpa ndibhetolo bhakalaki̱bhu̱i̱bi̱li̱a nesi̱ bhu̱si̱bi̱o, Abanu̱ mindia bhakakintangiaga, toli̱ Abako mindia akitangiaga ndia bhakoli̱li̱ ka nsobho akukupesi̱a kisembo.
Yesu nakiegesabe tungo ndia gulu
(Luka 12:33-34)
19“Bhu̱ku̱lu̱ku̱bi̱si̱li̱a tungo ndianu̱ ka nsi kindia mama na bhanyenje bhaki̱lu̱zi̱li̱a na kindia bhasuma bhaki̱bhu̱na bhai̱bhe. 20No bhu̱bi̱si̱li̱e tungo ndianu̱ gulu kindia mama na bhanyenje bhakaki̱lu̱za toli̱ na kindia bhasuma bhakaki̱bhu̱na bhai̱bhe. 21Kindia obi̱si̱li̱ tungo ndiako, mulima ndiako aki̱li̱kaga kau̱.
Yesu nakiegesabe bemu sa kozo
(Luka 11:34-36)
22“I̱so ali bhia tala sa kozo. I̱so ndiako kabha nabhongi̱, kozo ndiako poni akibha na bemu, 23no i̱so ndiako kekabhe nabhongi̱, kozo ndiako u̱poni akibha ka ki̱li̱mi̱ki̱aga. Toli̱ bemu ndio olinai̱ kabha nali ki̱li̱mi̱ki̱aga, okubha noli ka ki̱li̱mi̱ki̱aga sa mani̱.
Yesu nakiegesa ndia agbei̱be Mambombi̱ na mbangana
(Luka 16:13; 12:22-31)
24“Kalibe mindia akitoka kolilia bhasali̱a bhebhali, akinkundabe moti̱ amuyale mindietolo. Kedha akimuokabe moti̱ angaye mindietolo. Bhukukutoka kolilia Mambombi̱ nibhulia ni̱bhu̱ku̱ndi̱ si̱ni̱ mbangana koli̱saki.
25“Ti̱-no, nikibhutolia eti, bhukulukutuntula nanga bwomezi̱ ndianu̱, ndio bhukuliya kedha ndio bhu̱ku̱nu̱wa kedha kozo ndianu̱ na ndio bhukulola. Bwomezi̱ kakoli̱ li̱eli̱ toli̱ kozo nakikolia ngoye? 26Bhu̱bhu̱zi̱be tabhi bhambu̱lu̱ ndibha gulu, bhakaki̱gu̱bananaga kedha hulula na bi̱sananaga ka nguli toli̱ Abanu̱ mindia ali gulu akibhupesi̱aga maliya. Bhukweli̱li̱kana eti bhenu̱ bhukuli na mugaso koli̱sa bhambu̱lu̱ bhenjo? 27Andi ani̱ kowanu̱ mindia akitoka todhabe saha ka bwomezi̱ ndiaki nanga tuntula?
28“Toli̱ bhu̱tu̱ntu̱li̱ nanga ngoye ndio bhukulola nangeki? Bhu̱zi̱be nesi̱ kimole ndia ka mabhi̱li̱ akibombaga. Kakikolaga kedha saniaga ngoye. 29Ka mazima nikibhutolia eti na Sulumani ka ngu̱ko ndiaki kalolabe moti̱ bhia ngoye mabhonga yoho. 30Kabha Mambombi̱ nakiloli̱saga bhiyo kasamili ndia ka mabhi̱li̱ ndia alibe lelu no u̱ma bhamakia ka kala. Kakibhuloli̱sa koli̱sa menjo bhenu̱ ndibho bhuli na hi̱ki̱li̱za nke? 31Ti̱-no, bhukulukutuntula nanga ndio bhukulola na ndio bhukuliya na ndio bhu̱ku̱nu̱wa, 32nanga bhakafi̱le bhagbei̱ kabha kima yoho poni. No bhenu̱ Abanu̱ mindia ali gulu ai̱bi̱ nesi̱ bhukukabha kima yoho poni. 33No bhutekete bhukabhage kima sa mugaso ka kusali̱a ndia Mambombi̱ toli̱ bhukole kima ndia awelikani̱o du̱mbi̱ Mambombi̱ akibhupesi̱a kima poni ndio bhukukabha.
34“Ti̱-no, bhukulukubha na bhanga nanga ndia akienikana u̱ma nanga kikaka ndia u̱ma aki̱si̱ya u̱ma. Tolo poni akibha na kikaka si̱.”
ទើបបានជ្រើសរើសហើយ៖
Matayo 6: KWAMBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc., 2025