यूहना 1
1
जीवन आलवा वालू वसन
1दनिया ने सरूआत मा वसन तु नी वसन परमेसवर ने हाते तु नी वसनुस परमेसवर हे। 2नी इयस वसन सरूआत मा परमेसवर ने हाते तु। 3वसन हुस परमेसवर दनिया ने हेती सीजी बणावजी हे। वसन वगर कई बी सीज नीं बणावजी। 4वणा मा जीवन तु नी वु जीवन दनिया ने मनका हारू उजाळू तु। 5नी उजाळू अदारा मा समकतू तु, पण अदारू वणाय समकवा हू रूकी नीं हकजू।
6 #
मती 3:1; मर 1:4; लूका 3:1,2 परमेसवर आपड़े हाड़े हू एक मनक मुकलजो जिने नाम यूहना तु। 7वी एक गवा ने रूप मा आजो, ताकि वी मनकय उजाळा ने बारामा पाळी हके। ताकि हेता मनका विने वाती हबलीनी उजाळा माते विसवास करी हके। 8पण वी खुद उजाळू नीं तो, पण वणा उजाळा ने गवाई आलवा आजो तो। 9वु उजाळू हासु हे, जी हरेक मनका माते परगट थाहीं, वी दनिया ने नजर मा आवी रेजो तो।
10वी दनिया मा तो नी परमेसवर वणाहुस दनिया बणावजी, नी दनियाए वी नीं ओळकजो। 11वी आपड़े घेर आजो नी खुद ने घेर वालेस विने कई कदर नीं किदी। 12नी जतरय वणाय अपनावजो नी विने नाम माते विसवास किदो, वणाय वणय परमेसवर ने सुरअ थावा ने अदिकार आलजो। 13पण व नीते खुन हू, नीते सरीर हू नी नीते मनका ने मरजी हू। पण व ते परमेसवर ने मरजी हू आतमिक रूप हू पेदा थाजअ हे।
14नी वसने सरीर ने रूप लिदो, दया नी हासाई हू पराई ने अमारे वेसमा वाहो किदो। अमय विने एवी मईमा जुजी, जेम बाप ने एकलोता सुरा ने वे।
15यूहनाय विने बारामा गवाई आलजी नी हादिनी केजू, “ई वोस हे जिने बारामा मय केजू तु, ‘जी मय वाहे आवणा वालो हे, वी मय हू मुटो हे। केमके वी मारे जनमणा हू पेले आजर तो।’ ”
16विने मुटी दया हू अमय हेता माते दया हू दया थाती रेजी। 17अमय नियम ते मुसा हू आलजा, पण दया नी हासाई ईसु मसी हू मलजी हे। 18परमेसवर कणाय किरे नीं जुजो, पण एकलोतो सुरो जी पोते परमेसवर हे नी बाप ने खुला मा हे, वणायस आपड़ा माते परमेसवर परगट किदो।
बपतिसमा आलवा वाला यूहना ने गवाई
(मती 3:1–12; मरकुस 1:1–8; लूका 3:1–18)
19जेरे यरूसलेम हू यहुदि अदिकारी यूहना कनी याजको नी लेवीय ने यू पुसवा ने हारू मुकलजा के, “तु कुण हे?”
20ते पसे यूहनाय वणहू साप साप केई दिदू के, “मुँ मसी नीं हूँ।”
21वणय यूहना हू पुसयू के, “ते तु कुण हे? हूं तु एलिया हे?”
यूहनाय जबाव आलजो, “ना मुँ वो नीं हूँ।”
वणय पुसयू, “हूं तु परमेसवर ने हाड़े हू बुलवा वालो हे?”
वणाय जबाव आलजो, “ना।”
22पसे फेर वणय वणा हू पुसयू, “ते तु हे कुण पाई? अमय वताड़, ताकि जणाय अमअ मोकलजा ह वणाय उतर आली हकअ। तु आपड़े पोता ने बारामा हूं के हे?”
23यूहनाय जेम परमेसवर ने हाड़े हू बुलवा वालाय यसाया लकजू हे वणा हरको जबाव आलजो,
“मुँ हुनी जगा मा हादवा वाला ने आवाज़ हूँ।
‘परबू ने हारू वाट हिदी करो।’ ”
24य मनका फरीसीयो ने हाडे हू मुकलजा ता। 25वणय वणाहू पुसयू, “अगर तु नीते मसी हे, नीते एलिया हे नी नीते परमेसवर ने हाड़े हू बुलवा वालो हे ते तु मनकय पाणी हू बपतिसमा हय आले हे?”
26यूहनाय जबाव आलजो, “मुँ ते पाणी हू बपतिसमा आलु हूँ, पण तमारे वेसमा एक आदमी हे जणाय तमो नीं जाणता हो। 27मतलब मय वाहे जी आवणा वालो हे, मुँ विने खाहड़अ ने लेस खुलवा ने लायक बी नीं हूँ।”
28ई वाती यरदन नदी ने पार बेतनिया मा थाजी ती, जिय यूहना पाणी हू बपतिसमा आलतो तो।
ईसु परमेसवर ने गेटो हे
29बिजे दाड़े यूहनाय ईसुई आपड़े हाड़े आवतो थकण जुईनी केजू, “जुओ, यो परमेसवर ने गेटो हे, जी दनिया ने पाप उटावीनी लई जाए हे। 30ई विस हे जिने बारामा मय केजू तु, ‘एक आदमी मय वाहे आवणा वालो हे जी मय हू मुटो हे, केमके वी मारे जनमणा हू पेले आजर तो।’ 31पेले मुँ बी वणाय नीं ओळकतो तो, पण तणी पाणी हू बपतिसमा आलतो थकण आजो, ताकि इज़रायेल ने मनका वणाय ओळकी हके।”
32नी यूहनाय गवाई आलजी, “मय परमेसवर ने आतमा कबुतर ने हरकी आकास हू उतरती डिटी नी वणा माते आवीनी बेहीं गई। 33मुँ ते वणाय ओळकतो नीं तो, पण जणाय मय पाणी हू बपतिसमा आलवा हारू मुकलजो, वणायस मय हू केजू, ‘जणा माते तु आतमाए उतरतो नी ठेहरतो जुई, विस पवितर आतमा हू बपतिसमा आलवा वालो हे।’ 34नी मय यू जुईनी गवाई आलु हूँ के, इयोस परमेसवर ने सुरो हे।”
ईसु ने पेलका सेला
35बिजे दाड़े फेर यूहना नी विने सेलो माहू बे जणा विय ऊबा ता। 36नी जेरे वणाय ईसुई पाहे हू जातो थकण जुजो तो, वणाय केजू, “जुओ, ई परमेसवर ने गेटो हे।”
37तणी वळा वा बे सेला विने वात हबलीनी ईसु वाहे थाई गिया। 38ईसुई वाहे मुड़ी ने वणय वाहे आवता जुईनी वणअ हू केजू, “तमो किने खोज मा हो?”
वणय वणाहू केजू, “हे गरू, तु किय रे हे।”
39वणाय वणहू केजू, “आवीनी जुई लिओ।” नी वा वणा हाते गिया पसे वणय वणाने रेवा ने जगा जुजी, नी वणे दाड़े वणा हातेस रेजा नी केमके हाज ने सयार वजी रेजी ती।
40वणअ बे माहू जी यूहना ने वाती हबलीनी ईसु ने वाहे थाई गिया ता, वणअ मा एक समोन पतरस ने पाई अन्दरियास तो। 41वणाय पेले आपड़े हगा पाई समोन हू मलीनी वणाहू केजू, “अमय मसी मली गियो हे।” मसी मतलब सुणीयो थको। 42पसे अन्दरियास समोने ईसु पाहे लाजो।
ईसुई वणाय जुईनी केजू, “तु यूहना ने सुरो समोन हे। तु केफा केवाई।” केफा जणाय पतरस बी कय हे, जणने मतलब हे पाटा ने सिताल।
ईसुई फिलिपुस नी नतनएले हादवा
43बिजे दाड़े ईसुई गलील जावा नु तय किदू। पसे फिलिपुसे मलीनी केजू, “मय वाहे थाई जा।” 44फिलिपुस, अन्दरियास नी पतरस ने नगर बेतहसेदा ने रेवा वालो तो। 45फिलिपुस नतनएल हू मलजो नी वणाहू केजू, “अमय वी मली गियो हे जिने बारामा मुसा ने नियम मा नी परमेसवर ने हाड़े हू बुलवा वालय लकजू तु। वी यूसुफ ने सुरो नी नासरत ने रेवा वालो ईसु हे।”
46नतनएले वणाहू केजू, “हूं किये हाऊ सीज बी नासरत हू निकली हके हे?”
फिलिपुसे वणाहू केजू, “जाईनी जुई ले।”
47ईसुई नतनएले आपड़े हाड़े आवतो थकण जुईनी विने बारामा केजू, “जुओ, ई हासु इज़रायेली हे, अणामा कई खुटू नीं हे।”
48नतनएले वणाहू पुसयू, “तु मय केम जाणे हे?”
ईसुई वणाय जबाव आलजो, “अणा हू पेले के फिलिपुसे तु हादजो, तु अंजीर ने रूकड़ा ने नीसे तो तेरे तु मय डिटो तो।”
49नतनएले वणाय जबाव आलजो, “हे गरू, तु परमेसवर ने सुरो हे तु इज़रायेल ने महाराजो हे।”
50ईसुई वणाहू केजू, “हूं तु तणी विसवास करे हे के, मय तय यू केजू तु के, मय तु अंजीर ने रूकड़ा ने नीसे डिटो तो? तु अणा हू बी मुटा मुटा काम जुई।” 51पसे ईसुई वणहू केजू, “मुँ तमय हू हासु कऊँ हूँ, तमो हरग खुल्लू नी परमेसवर ने हरगदुते मय मनक ने सुरा माते आवता नी जाता जुहो।”
ទើបបានជ្រើសរើសហើយ៖
यूहना 1: WBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023 NLCI
CC BY-NC-ND 4.0