Zuwã 10
10
Pone'ẽrebâ 'madâ'â'wa duré ite pone'ẽrebâ norĩ
1Tawamhã Zezusi hã te duré rowahutu, ãne:
— Tô sena wa za aima rowasu'u za'ra wa'wa, ãne: Ni'wa hã pone'ẽrebâ norĩ wa'ra 're, 're isimasa mono zéb u 'ridawa na za isébré õ hã, wa'ra na si za isarõno hã, ta hã isimisaihuri, duré danhibrob zô dapãrĩ'wa. 2Tazahã, 'ridawa na za isébré hã, ta hã pone'ẽrebâ 'madâ'â'wa. 3'Ridawa 'madâ'â'wa hã te za tãma 'ridawa, 'ridawa hã. Duré pone'ẽrebâ norĩ zô, isisi na sô ihârâ za'ra zé te te wapari za'ra wamhã, te za sadaihu'u za'ra. Itẽme si'aba'réi wamhã, wa'ra hawi te za oto sani za'ra, rob u. 4Uburé wa'ra nhiti, tinhimizama te te sani za'ra parimhã, isõwa te za timorĩ za'ra. Tawamhã isarina te za ai'aba'ré, te te siwi mreme waihu'u pese wa. 5Tazahã, ni'wa iwaihu'u õ zarina hã, niwa isi'aba'ré da hã, mare di. Te za tãma ropé, isa'rese'õ mreme hã tãma waihu'u za'ra õ wa.
6Ã hã rowasu'u na romnhimiré'é na ma tô Zezusi hã rowasu'u. Tane nherẽ, ni'wa hã te te sadaihu'u õ di.
Zezusi hã, 'ridawa na isiwasu'uzé
7Tawamhã Zezusi hã te duré sina tinha, ãne:
— Tô sena wa za aima ĩsiwasu'u za'ra wa'wa, ãne: Wa hã 'ridawa, pone'ẽrebâ 're isisisi mono zé. 8Uburé ĩwana we 're inomro mono norĩ hã, ta norĩ hã isimisaihuri norĩ, duré danhibrob zô dapãrĩ'wa. Tane nherẽ, pone'ẽrebâ norĩ hã imreme te te 're wapari za'ra mono õ di. 9Wa hã 'ridawa. Ni'wa hã ĩ'ãma sébré wamhã, tinho'reptuzé te za sina uwaimra. Sébré wamhã, duré apâ watobro wamhã, ro iwẽ hã te za sõpẽtẽ, rowẽ u'âsi 're ihâimana mono zé hã. 10Isimisaihuri hã simisaihuri da si, te we 're ne, duré dapãrĩ zô si, duré dahâimanazé te te dawi iprub da si. Tazahã, wa hã pone'ẽrebâ norĩ ma, ihâimanazé te 're anhomri mono da, wa tô wei mo, rowẽ u'âsi 're ihâimana za'ra mono zé hã.
Zezusi hã, pone'ẽrebâ 'madâ'â'wa iwẽ na isiwasu'uzé
11— Wa hã pone'ẽrebâ 'madâ'â'wa ĩwẽ. Pone'ẽrebâ 'madâ'â'wa iwẽ hã te za sisõ, pone'ẽrebâ norĩ zawi te. 12Romhuri'wa hã rob'uiprazém na tipawa'âbâ zô si te te 're romhuri. Tahawa ta hã, pone'ẽrebâ 'madâ'â'wai õ di. Duré pone'ẽrebâ norĩ hã itei õ di. Tahawa, abaze zahi hã sô imorĩ za'ra na te te 'madâ'â wamhã, te za tãma rẽme za'ra. Te za tãma wara. Tawamhã abaze zahi hã te za wano'õ. Te za duré ãma ropé. 13Romhuri'wa hã te za wara, tipawa'âbâ zô si te te 're romhuri mono wa, pone'ẽrebâ norĩ hã tãma marĩ dai õ wa. 14Wa hã pone'ẽrebâ 'madâ'â'wa ĩwẽ. Ĩma waihu'u pese di, ĩte pone'ẽrebâ norĩ hã. Tane duré tãma ĩwaihu'u pese za'ra di, 15Ĩmama hã te te ĩwaihu'u pese ne, duré Ĩmama hã ĩma iwaihu'u pese ne. Tahawa, ĩte pone'ẽrebâ norĩ da hã ĩsisawi ãna wa za ĩsisõ. 16Ĩte pone'ẽrebâ norĩ hã te duré tihâimana za'ra, ãme dasiré wa'ra 're, isimasab õ hã. Ta norĩ zama tô i'ru zahi, te we i'ãwisi za'ra da hã. Tawamhã ta norĩ zama te za ĩmreme hã wapari za'ra. Tahawa misi haré te za pone'ẽrebâ ubumro hã 're hâimana. Duré misi haré za pone'ẽrebâ 'madâ'â'wa hã.
17— Tahawa, Ĩmama ma ĩzawi di, ĩhâiba hã za te sõmri wa, apâ te te ĩma sõmri da, 're ĩhâimana u'âsi mono zé hã. 18Ni'wa hã ĩhâimanazé te te ĩwi iwazere da hã, mare di. Tazahã, ĩsi'uihâ na wa za ĩsisõ, te ĩsima iwẽzéb zarina. Ĩnhimiroti pire hã te ĩma tihâiba, ĩsisõmrizéb da hã, duré apâ te ĩsima i'âri da hã. Tô ã hã ma tô Ĩmama hã ĩma ti'ru, te 'manharĩ da.
19Ãne hã Zudeu norĩ te te wapari za'ra wamhã, ma tô duré sima aipo'o. 20Tawamhã da'ahâ na ma tô ãne hã nharĩ za'ra ni:
— Wa'uburé ré, te tihâiba. Ma duré 'rãihaiwamna. E marĩ da, te isimirowasu'u hã iwapari za'ra wa'wa.
21Tane nherẽ, ni'wam norĩ hã te duré nharĩ za'ra, ãne:
— Mare di. Ni'wa hã wa'uburé ré, 're morĩ wamhã, ãne hã te te 're rowasu'u waihu'u mono õ di. E tawamhã wa'uburé hã isimito pese ré hã.
Zezusi hã, Zudeu norĩ te te siwi iwẽ'õzé
22Tawamhã rowa'u'u wahâ 'rowi, te Zeruzalẽ ãma dato hã tihâiba, 'Re ihâimana u'âsi mono ãma dawatazé#10.22 Ã hã Festa da Dedicação, Zudeu norĩ hã tinhitob'ru norĩ wi, Zeruzarẽ apâ te te siwi i'ârizém na, 'Re ihâimana u'âsi mono nhorõwa 'ri 'rãihâ zama, dato te te sima 're i'manharĩ za'ra mono zé, ãma dasipo'repu'uzéb da hã hã. 23Taha ré, te Zezusi hã tihâiba, 'Re ihâimana u'âsi mono nhorõwa 'ri 'rãihâ 'wawi wa'ra ãma, apito Salomahã te, 'ri zahâpâ nhisi na dazasizéb 'rata. 24Tame ma tô Zudeu norĩ hã imana wawi si'rã'õtõ. Tahawa te ãne siwi sadanha:
— E mahã bâtâ u wa za wahâimana za'ra ni, wasiwawã na hã. Ma'ãpé, sõ'awi wama asiwasu'u za'ra na, tô sena a hã Cristu#10.24 Cristu hã, 'Re ihâimana u'âsi mono te te ipisudu, Danho'reptui'wa da, te wasu'u. wamhã.
25Tawamhã Zezusi hã ma sada'âbâ za'ra, ãne:
— Wa tô aima ĩsiwasu'u pari za'ra wa'wa. Tane nherẽ, asiwi ĩzazei wa'aba õ di. Romhuri hã Ĩmama nhisi na te 're i'ab'manharĩ mono hã, ta hã te te 're ĩwasu'u, wa hã ni'wa na hã. 26Tane nherẽ, asiwi ĩzazei wa'aba õ di, a norĩ wa'wa hã ĩte pone'ẽrebâi õ wa. 27Ĩte pone'ẽrebâ norĩ hã ĩmreme te za wapari za'ra. Ta norĩ hã ĩma waihu'u pese za'ra di. Duré te za ĩzarina ai'aba'ré. 28Ta norĩ ma, wa za dahâimanazé isi'utõrĩ'õ hã pisutu za'ra. Tahawa niwa idâ'â za'ra da hã, mare di. Ni'wa ĩnhib'rata hawimhã te te ĩwi isani za'ra da hã waihu'u õ di. 29Ĩmama, ĩma ipisutu'wa za'ra hã, uburé danhipai u sa'ẽtẽ uptabi di. Ni'wa hã Ĩmama nhib'rata hawimhã te te tiwi isani za'ra da hã waihu'u õ di. 30Wa norĩ hã Ĩmama me hã, misi wa 're wahâimana.
31Tawamhã Zudeu norĩ hã ma tô duré ẽne hã sada waibu za'ra, Zezusihi da, te te ãma siwi wĩrĩ da. 32Tahawa, Zezusi hã te duré tãma nharĩ za'ra, ãne:
— Asõ'a za'ra wa'aba, wa tô marĩ iwẽ hã ahâ na te 're a'manharĩ, Ĩmama te te ĩma i'ru hã. E mahã u'âbâ te tawamhã asima iwẽ za'ra wa'wa, asiwi ĩwĩrĩ aba da hã.
33Tawamhã Zudeu norĩ te asa tãma nharĩ za'ra, ãne:
— Marĩ 're i'ab'manharĩ wẽ mono u'âbâ, ẽtẽ na wa te wasiwi aiwĩrĩ da, wa te wasima wẽ za'ra õ di. Tazahã, tane asina nharĩ wa. Tane asina inharĩ 'remhã, 'Re ihâimana u'âsi mono ãma te iwasé. A hã wasine ti'ai ãma a'uwẽ nherẽ, te asi'madâ, 'Re ihâimana u'âsi mono na.
34Tawamhã Zezusi hã te duré tãma nharĩ za'ra, ãne:
— Ate za'ra wa'wa roti zahi na rob'ui'éré hã te nomro, 'Re ihâimana u'âsi mono te te inharĩzé hã, ãne: “A norĩ wa'wa hã ihâiba'õ.” 35Ibaihâ Iwazé pese na rob'ui'éré hã tô sena. Duré wama waihu'u pese za'ra di, 'Re ihâimana u'âsi mono ma tô ihâiba'õ na wamri za'ra, ni'wam norĩ hã 'Re ihâimana u'âsi mono mreme te te iwapari za'ra norĩ hã. 36Tawamhã wa hã, 'Re ihâimana u'âsi mono te te ĩpisudu, te te duré we ĩzatõrĩ, ti'ai ãma 're idahâimana za'ra mono u. E niha te ãne nherẽ, ĩma inharĩ za'ra wa'wa, 'Re ihâimana u'âsi mono ãma te iwasété na hã, te ĩsina nharĩ wa, wa hã 'Re ihâimana u'âsi mono 'ra na. 37Ĩmama ma romhuri hã te 're a'manharĩ mono õ wamhã, asiwi ĩzazei wa'aba tõ. 38Tazahã, asiwi ĩzazei wa'aba õ nherẽ, te 're a'manharĩ mono wamhã, ma'ãpé asimizaze za'ra wa'aba, marĩ te 're i'ab'manharĩ mono na si, Ĩmama, ĩsiré 're ihâimana mono na duré Ĩmama siré 're ĩhâimana mono na hã waihu'u za'ra wa'aba da, duré sadaihu'u za'ra wa'aba da zama.
39Tawamhã Zudeu norĩ hã te te duré aré siwi âri da. Tane nherẽ, ma tô isib'rata hawi tiwi tiwatobro za'ra.
40Tawamhã Zezusi hã ma tô apâ saprĩ, Zodã pa na. Ma tô mo, Zuwã Batista hã romhuri na te te sãna'rata wi, â dawabzuri te te dama i'ab'manharĩzéb u. Tame ma tô nhamra. 41Tawamhã da'ahâ uptabi na ma tô itẽme ai'aba'ré ni isãmrazéb u. Ãne ma tô nharĩ za'ra ni:
— Zuwã Batista hã niwa te te 'manharĩ õ di, marĩ dama i'manharĩ waihu'u'õ hã. Tane nherẽ, ã hã aibâ uburé te te dama 're iwasu'u mono zé hã, tô sena te te 're wasu'u.
42Tahawa, tame sãmra ré, da'ahâ na ma tô Zezusi hã saze za'ra ni.
ទើបបានជ្រើសរើសហើយ៖
Zuwã 10: xavBP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Wycliffe Bible Translators, Inc.