Zuwã 7
7
Zezusi duré isisãnawã norĩ
1Ãne parimhã, Zezusi hã ma tô datẽme 're mo, Galiléia na ti'a nhisi 'remhã. Te te sima wẽ õ di oto, Zudéa na ti'a nhisi ãma 're imorĩ da hã, Zudeu norĩ ma roti'wa norĩ hã te te siwi wĩrĩ da, sô rĩtĩ za'ra wa. 2Tawamhã romhutu di oto, Zudeu norĩ te dato, da te dasima 're i'ri nhoré mono zém na iromhâimanazéb u hã. 3Tahawa te Zezusihi ma ino norĩ hã nharĩ za'ra, ãne:
— Ma'ãpé aiwatobro ã hawi. Zudéa u aimorĩ, tame asazei'wa norĩ hã asimiromhuri 're i'ab'manharĩ mono zé hã te te 'madâ'â za'ra da. 4Ni'wa hã dama sa'rese za'ẽtẽ da wamhã, marĩ hã pi'uriwi te te 're a'manharĩ mono õ di. Tahawa ã hã marĩ 're i'ab'manharĩ mono zé hã, ma'ãpé uburé dama hâi'ré na.
5Tawamhã Zezusihi no norĩ zama te te siwi sazei õ di. Tahawa, ma tô ãne hã tãma nharĩ za'ra.
6Tawamhã Zezusi hã te tãma nharĩ za'ra, ãne:
— Zahadu bâdâ ĩma hã iwa waptã'ã õ di. Tazahã, aima za'ra wa'aba hã siwa'ru bâdâ hã i'uwaibaba. 7A norĩ wa'wa hã da te ai'ruiwapari za'ra wa'aba õ di. Tazahã, wa hã dama ĩwẽ'õ uptabi di, tô sena te 're da'awasu'u mono wa, marĩ, da te 're i'manharĩ za'ra mono hã, iwasété si wa. 8Dato za ihâimana u ai'aba'réi wa'aba. Wa hã ãma ĩmorĩ õ di za, zahadu bâdâ hã ĩma iwa waptã'ã õ wa.
9Tawamhã Zezusi hã ãne te te tãma nharĩ za'ra parimhã, ma tô a'â nhamra, Galiléia ãma.
Zezusi hã, dato ihâimana u imorĩzé
10Tawamhã ino norĩ hã dato ihâimana u si'aba'ré za'u, Zezusihi zama ma tô oto mo. Tane nherẽ, sõ'awi morĩ õ di. Pi'uriwi ma tô mo. 11Dato ihâimana ãma, Zudeu norĩ hã ma tô Zezusihi zô tirĩtĩ za'ra. Ãne te nasi sô anharĩ za'ra:
— E mame te tihâiba, aibâ hã.
12Tawamhã datoi ãma da'ahâ uptabi na idahâimana za'ra 'remhã ma tô ni'wam norĩ hã nasi ãne nharĩ za'ra:
— Ta hã aibâ, 're imorĩ wẽ.
Duré ni'wam norĩ hã ma tô nasi ãne nharĩ za'ra:
— Mare di. Sadawa nhipese na te te dama 're arob'rãmi.
13Tane nherẽ, sõ'awi da te dasima ãma rowasu'u za'ra õ di, Zudeu norĩ ma roti'wa norĩ ma, dapahi za'ra wa.
14Tawamhã dato isa'ẽne hã iwa'wa u oto ihâimanazéb u, Zezusi hã ma tô mo, 'Re ihâimana u'âsi mono nhorõwa 'ri 'rãihâ u. Tame ma tô oto dama rowahutu. 15Tawamhã Zudeu norĩ ma roti'wa norĩ hã ma tô ãma titob'uzu za'ra. Ãne ma tô nharĩ za'ra:
— E niha te te irowaihu'u pese uptabi, te te romnhoré õ nherẽ hã.
16Tawamhã Zezusi hã ma sada'âbâ za'ra, ãne:
— Ĩnhimirowahudu hã ĩsihawib õ di. We ĩzatõrĩ'wai hawip si. 17Ni'wa hã te te sima wẽ wamhã, 'Re ihâimana u'âsi mono te te sima 're iwẽ mono zé te te 're 'manharĩ mono da wamhã, te za waihu'u, e 'Re ihâimana u'âsi mono hawim na, wa tô te 're rowahutu, e niwamhã duré ĩsihawim na. 18Ni'wa hã sihawim na te te dama 're rowahutu mono wamhã, ta hã te te sima 're rob'ruiwapari, da te dasiwi 're uzei mono da. Tazahã, ni'wa hã tipisutu'wai ma si te te 're rowẽ zani mono da, te te sima 're rob'ruiwapari mono wamhã, ta hã tô sena ihâimana. Marĩ i'uptabi õ hã ãma hâimana õ di. 19E Mozési hã roti zahi te te aima hiri za'ra wa'aba ã bâ bété. Tane nherẽ, 'mai'madâ'â pese aba õ di, roti zahi hã. E marĩ da, te bété asima iwẽ za'ra wa'wa, asiwi ĩwĩrĩ aba da hã.
20Tawamhã ma tô dasiwi 'mahârâ ni, ãne:
— Wa'uburé ré, te 're aimo. E 'wa hã te te sima wẽ bâ, te te aiwĩrĩ da hã.
21Tawamhã Zezusi hã te asa dama tinha, ãne:
— Misi wa tô 'manha marĩ dama i'manharĩ waihu'u'õ hã. Tahawa, ma tô taha na uburé atob'uzu za'ra wa'wa. 22'Watébrémi hã te sabadu na zama 're isihâiwata nhihâri za'ra wa'aba mo, Mozési hã te te aima 'ru za'ra wa'aba wa. Tane nherẽ, danhihâiwata nhihâri hã Mozésihi ãma sãna'rata õ di. Ihi'rata norĩ ãma ma tô tinhana'rata. 23Mozési, roti zahi te te ihiri hã 're 'madâ'â rẽme za'ra wa'aba mono tõ da, 'watébrémi hã te sabadu na nherẽ 're isihâiwata nhihâri za'ra wa'aba mo. Tawamhã e marĩ wa, ma tô ĩzada asiti'ru za'ra wa'wa, sabadu na te ipesezém na aibâ hã hâiba wahuré. 24Sahâri za'ra wa'aba, dahâimanazém na da'madâ'â na da'ãma 're irowairébé za'ra wa'aba mono zé hã. Ma'ãpé i'uwaibaba na si da'ãma 're rowairébé za'ra wa'aba mono.
E Zezusi hã 'Re ihâimana u'âsi mono te te ipisudu, Danho'reptui'wa da
25Tawamhã ni'wam norĩ hã, Zeruzalẽ 're, 're isi'ubumroi mono hã ma tô nasi sisadanharĩ za'ra, ãne:
— E ã hãi õ di aibâ hã, dama ipire norĩ te te siwi wĩrĩ da, sô isõpré hã. 26Ma'ãpé 'madâ'â za'ra wa'aba. Sõ'awi te rowasu'u. Tane nherẽ, ni'wa hã te te tãma nharĩ õ di. Ãté dama ipire norĩ hã te te waihu'u pese za'ra di, Õ hã 'Re ihâimana u'âsi mono te te ipisutu na hã, Danho'reptui'wa da. 27Danho'reptui'wa hã wei wisi wamhã, ni'wa te te waihu'u õ di za, nima hawim na hã. Tazahã, ã hã aibâ hã wama waihu'u pese za'ra di, isa'ru hã.
28Tawamhã Zezusi hã 'Re ihâimana u'âsi mono nhorõwa 'ri 'rãihâ 'wawi wa'ra 'remhã te te dama rowahutu ré, ma tô mreme 'rãihâ na dama tinha, ãne:
— E tô tawamhã aima ĩwaihu'u pese za'ra wa'aba di. E duré aima waihu'u pese za'ra wa'aba di, nima hawi we ĩmorĩzé hã. Ĩsihawi we ĩmorĩ õ di. We ĩzatõrĩ'wa hã tô sena te 're hâimana. Tane nherẽ, aima waihu'u za'ra wa'aba õ di, ta hã. 29Tazahã ĩma waihu'u pese di, ihawi we ĩmorĩ wa, duré we te te ĩzatõrĩ wa.
30Tawamhã ma tô aré sada asapẽtẽ za'ra, te te siwi âri da. Tane nherẽ, ni'wa hã te te upi õ di, zahadu bâdâ ite hã iwa waptã'ã õ wa. 31Tawamhã da'ahâ uptabi wazari ni'wam norĩ ihâimana za'ra hã ma tô saze za'ra. Te duré nasi anharĩ za'ra, ãne:
— Danho'reptui'wa hã wei wisi wamhã, e ã hã aibâ, dama i'manharĩ waihu'u'õ te te 're i'ab'manharĩ mono nhipai u, te te 're a'manharĩ mono da bâ.
Dasi'wapéi 'manharĩ'wa norĩ hã, Zezusihi zô da te isatõrĩ za'ra zé, te te siwi âri da
32Tawamhã farizeu norĩ duré sasedoti ipire norĩ hã Zezusi da te dasima iwasu'u za'ra na, te te dawapari za'ra wamhã, ma tô dasi'wapéi 'manharĩ'wa norĩ hã sô satõrĩ za'ra, te te siwi âri da.
33Tawamhã Zezusi hã te tãma nharĩ za'ra, ãne:
— Suru na wa za ai'rata a'â ĩnhamra 'wa. Taha parimhã, wa za oto mo apâ, we ĩzatõrĩ'wai u. 34Te za ĩzô airĩtĩ za'ra wa'wa. Tane nherẽ, asiwi ĩnhopẽtẽ aba õ di za, ĩmorĩzéb u hã ãma ai'aba'réi waihu'u aba õ wa.
35Tahawa, te Zudeu norĩ ma roti'wa norĩ hã sima nharĩ za'ra, ãne:
— E momo te za merẽ mo, wa te wasiwi isõpẽtẽ waihu'u õ da hã. E Zudeu norĩ, ropâ zudeu'õ norĩ 're isi'ubumroi mono norĩ wazari te za 're sãmra. E tame te za zudeu'õ norĩ ma, te te 're rowahutu. 36E niha na te merẽ sina tinha, ãne te te inharĩ hã: “Te za ĩzô airĩtĩ za'ra wa'wa. Tane nherẽ, asiwi ĩnhopẽtẽ aba õ di za, ĩmorĩzéb u hã ãma ai'aba'réi waihu'u aba õ wa.”
Zezusi hã, â u'âsi na isiwasu'uzé
37Dato ihâimanazé bâdâ da'rãirẽme hã, ta hã bâdâ ipire. Taha bâtâ na Zezusi hã ma tô hâiwi za. Mreme 'rãihâ na ma tô tinha, ãne:
— Ni'wai ma 'rubu wamhã, we ĩtẽme morĩ, â u'â hã te te hâ'rẽne da. 38Ibaihâ Iwazé pese na rob'ui'éré hã te ãne ãma tinha: “Ni'wa hã te te ĩzazei wamhã, te za â u'â hã 're praba u'âsi, ipẽ'ẽ 'remhã.”
39Ãne na Zezusi te te rowasu'u wamhã, 'Re ihâimana u'âsi mono Pẽ'ẽzani na te tinha, ni'wam norĩ hã te te 're saze za'ra mono wa, za tãma 're ihâimana za'ra mono na hã. Ni'wam norĩ hã, zahadu 'Re ihâimana u'âsi mono Pẽ'ẽzani te te waibui õ di, Zezusi hã zahadu morĩ õ wa, 'Re ihâimana u'âsi mono, iwaihu'u pese uptabi 're isãmra mono zéb u hã.
Zezusihi u'âbâ dasima idasipo'ozé
40Ãne na Zezusihi mreme, da te wapari za'ra wamhã, ni'wam norĩ hã ma tô ãne nharĩ za'ra:
— Tô sena ã hã aibâ hã, 'Re ihâimana u'âsi mono zadawa 'mahârâ'wa, sô 're idanhimipari za'ra mono.
41Ni'wam norĩ hã te duré ãne nharĩ za'ra:
— Õ hã, Cristu.
Ni'wam norĩ hã te duré ãne sisadanharĩ za'ra:
— E niha te za merẽ Cristu hã Galiléia hawi wei mo. 42Ibaihâ Iwazé pese na rob'ui'éré na, iwasu'u inomro na hã, Cristu hã Davihi nhihudu za. Belẽ ãma te za duré podo, Davi 're isãmra mono zéb ãma.
43Tahawa, ma tô dasima aipo'o ni, Zezusihi u'âbâmhã. 44Ni'wam norĩ hã ma tô aré sima wẽ za'ra, te te siwi âri da. Tane nherẽ, ni'wa hã te te upi õ di.
Zudeu norĩ ma roti'wa norĩ hã, Zezusi te te siwi isazei õ zé
45Tawamhã dasi'wapéi 'manharĩ'wa norĩ, Zezusihi zô aré isi'aba'ré hã ma tô oto apâ ai'aba'ré, sasedoti ipire norĩ, duré farizeu norĩ isi'ubumrozéb u. Ãne ma tô sadanharĩ za'ra:
— E mahãta. E niha bâ, we asiwi saprõni aba õ di.
46Tawamhã dasi'wapéi 'manharĩ'wa norĩ hã ma sada'âbâ za'ra, ãne:
— Ni'wa niwamhã isine isimirowasu'u hã hâimana õ di, isimirowasu'u wẽ uptabi hã.
47Tahawa, te farizeu norĩ hã nharĩ za'ra, dasi'wapéi 'manharĩ'wa norĩ ma, ãne:
— E a norĩ wa'aba ma zama, ma duré aima rob'rãmi za'ra wa'wa. 48E ni'wa dama ipire hã duré farizeu hã te te saze pâ! 49Ni'wam norĩ ma, 'Re ihâimana u'âsi mono nhimiroti zahi na Mozési te te ãma irob'ui'érézé, tãma iwaihu'u õ hã, te 'Re ihâimana u'âsi mono hã iwasété si te te tãma 're pisutu za'ra.
50Tane nherẽ, Nicodemosi, isiré farizeu na 're ihâimana za'ra mono hã, nimahã na Zezusihi u imorĩ hã ma tô ãne tãma nharĩ za'ra:
51— Ni'wa hã marĩ te te i'manharĩzé hã wa te waihu'u wana ré, wa te ãma rowairébé waihu'u õ di za. Ãne hã 'Re ihâimana u'âsi mono nhimiroti zahi na Mozési te te ãma irob'ui'érézé hã, te te 'rui õ di.
52-53Tahawa, ma tô siwi sada'â, ãne:
— E a zama Galiléia hawimhã. Ma'ãpé romnhoré na, Ibaihâ Iwazé pese na rob'ui'éré na. Tawap si te za iwaihu, Galiléia hawimhã niwa ni'wa iwatobro õ na, 'Re ihâimana u'âsi mono zadawa 'mahârâ'wa hã.
Taha pari, danhorõwa u ma tô da te ropé.
ទើបបានជ្រើសរើសហើយ៖
Zuwã 7: xavBP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Wycliffe Bible Translators, Inc.