Yòhánà 12
12
Màríyà ɖa àɖɛ̃́ ɖà nɛ́sɛ̀ fú Yèésù
(Màtéwò 26:6-13; Mákò 14:3-9)
1Kíbí ó bɔ ɔdzɔ́ mɛ́ɛfà, tsí ɔma-Ìyúɖà† ŋa kó dzɛ ɔɖɔ̃́-Àɖádzɔ̀ɔ́†#ɛ́, Yèésù ǹɖe bɛ̀, tsí lɔ ńBètàní. Ìlú-Làsárò, ɛnɛ yèé ó dzí ti náàŋírĩ-òkú ŋa wá náyé#ɛ́ ni. 2Ńbɛ̀ɛ́, à se dzídzɛ fúu. Tsí ɔ̀nyà ŋa kpérí si nára-kpɔ̃rɔ̃, tsí wà dzɛŋɛ́ báa, tsí Làsárò gbo wà náàŋírĩ-ŋa. Màrítà gbo wà bɛ̀, tsí wà kpɛ̃́ dzídzɛ fú ɔ̀nyà ŋa.
3Màríyà† ɔmànà-Màrítà gbo wà bɛ̀. Tsí ó lɔ káà kɛ́ àɖɛ̃́ rṹrũ̀ fĩ́rĩ́fĩ́rĩ́-kã̀ wá, tsí wáa ɖàá ɖà nɛ́sɛ̀-Yèésù. Àɖɛ̃́#ɛ́ kɔ̃́ àlàbɔ̀-lítà-kã̀, tsí ó gbowó gbo héŋú. Egi-nàríɖò sɔ̃́ŋú ní à ń tseé#ɛ́. Tsí ó ɖàá ɖà nɛ́sɛ̀-Yèésù kpó, tsí ó wà mú irɔ̃-éwo‐ɛ̀ nɔ̀ɔ́. Ńbɛ̀ɛ́, rṹrũ̀-àɖɛ̃́#ɛ́ gba ilé#ɛ́ kpó.
4Ɔmatsɛ́-Yèésù†-kã̀ wà, tsí à náa kpèé ní Yúɖà Sìkàrìyɔ́tì. Òŋu ní wáa ta Yèésù#ɛ́. Kíbí ó rí bɛ́ɛ̀#ɛ́, ó ní: 5Àɖɛ̃́#ɛ́ nákó nyáa gbowó tó ìmarũ-owó-itsɛ́-ɔdzɔ́ ɔgɔ́ɔrú lé ńgboó (300) nɔ̀! Kí tse tsí à kò tàá, tsí ká mú owó‐ɛ̀ fú adzìyàkú ŋa báàyí?
6Kò tsi ó wà rã́ã̀bo fú olákèmà ŋa ní tse tsí ó wà fɔ̀ bɛ́ɛ̀#ɛ́. Olè ní òŋu ká‐ɛ̀ dzɛ́#ɛ́. Òŋu ní náa banɛ́ àɖákà-owó#ɛ́. Tsí bí à mú iŋɛ́-kã̀ si ńnɛ̀ ná, náa kɛ́ɛ ɖúkù fú ara‐ɛ̀.
7Tsí Yèésù kɔ̀ fúu ní: Kó kɔ̀ɔ́ dzɔ̀ɔ́, tsí kó míra. Ó ɖi, ó mú àɖɛ̃́#ɛ́ ɖúkù si fú ɔdzɔ́-rírì-òŋu ni. 8Adzìyàkú ŋa òŋu, à wà bá ŋa si nɔ́dzɔ́ kɔ́dzɔ́. Ó ɖi òŋu, òŋu kàkó wà bá ŋa si títí lɔ.
9Ńbɛ̀ɛ́#ɛ́, ɔ̀nyà ɛ̀gbɛ̀lɛ́ɛ̀gbɛ̀-kã̀ náàŋírĩ-ɔma-Ìyúɖà ŋa gbɔ́ ní Yèésù wà ńBètàní si, tsí à wá ní àŋa kó wáa ríi. Kò tsi àtsùgbé-òŋu níìkã̀ ní à wá#á. À wá, àtsùgbée ká wáa rí Làsárò, ɛnɛ yèé Yèésù dzí ti náàŋírĩ-òkú ŋa wá náyé#ɛ́ gbo. 10Kíbí onùgbó-atsɛbɔ-Ɔ̀ɖáyé† ŋa gbɔ́ bɛ́ɛ̀#ɛ́, à mú arũ ɖé ní àŋa kó kpa Làsárò gbo, 11iŋɛ́ yèé tse#ɛ́, àtsùgbé‐ɛ̀ ní ɔma-Ìyúɖà kpíkpɔ̀ sɛ̃̀ náànyì-ŋa, tsí wà tɛ̀ náànyì-Yèésù#ɛ́.
Yèésù wɔ̀ ńǹlú-Yèrúsàlɛ́mì kíbí ólú bɛ́
(Màtéwò 21:1-11; Mákò 11:1-11; Lúkà 19:28-40)
12Ó ɖi ńlɛ̀ má‐ɛ̀, tsí ɔ̀nyà ɛ̀gbɛ̀lɛ́ɛ̀gbɛ̀ yèé wá nɔ́ɖɔ̃́-Àɖádzɔ̀ɔ́†#ɛ́, à gbɔ́ ní Yèésù bàa ńYèrúsàlɛ́mì. 13Ńbɛ̀ɛ́, à ǹɖe, tsí káà ɖá ɔ̀kpɛ̀ ŋa banɛ́, tsí lɔ ká káà kpàɖé‐ɛ̀. Tsí à wà ɖúgbe ní: Ényìì! Kùsɛ̀ɛ̀ fú ɛnɛ yèé bàa nárũ-Ɔlɔ́dzɔ́#ɛ́! Kùsɛ̀ɛ̀ fú ólú-ìlú-Ìsàràyɛ́lì†!
14Ńbɛ̀ɛ́, Yèésù rí kɛ́tɛ́kɛ́tɛ́-ɛɖã-kã̀, tsí ó dzì ńǹtá‐ɛ̀. Ó dzì ńǹtá‐ɛ̀ bɛ́ɛ̀ ti nára-kíbí à ti kɔɔ́ si ńǸwé-Ɔ̀ɖáyé†#ɛ́. À kɔ si ní:
15“Ɔma-Sìyɔ́nì† ŋa, ɛ̀ɖɔ̃̀ kó máa ɖá ŋɛ́.
È rí! Ólú-ŋɛ́ bàa.
Ó dzì ńkɛ́tɛ́kɛ́tɛ́-ɛɖã, tsí bàa.”#12:15 Ìwé-Sàkàríyà 9:9 (Zacharie 9:9)
16Ɔmatsɛ́‐ɛ̀ ŋa kò gbɔ́ òkpì-iŋɛ́-kã̀ kpókpó ńǹɖì-bɛ̀. Ó ɖi, náànyìwà, kíbí ó dzí ti náàŋírĩ-òkú ŋa, tsí lɔ nɔ́ɔ̀rɔ̃#ɛ́, ní à tédzú ní à ti kɔ iŋɛ́ nyɛ̀ŋɛ̀ ŋa si ńǸwé-Ɔ̀ɖáyé ti nára‐ɛ̀, tsí ɔ̀nyà ŋa gbo tseé kíbí Ìwé-Ɔ̀ɖáyé† fɔ̀ɔ́#ɛ́.
17Báàyí#ɛ́, ɔ̀nyà kpó yèé wà ńɖi-Yèésù ńǹwèrè yèé ó kpe Làsárò fùɖá ńnɔ́-érì, tsí dzíi ti náàŋírĩ-òkú ŋa wá náyé#ɛ́, à wà kpɛ̀rɔ́‐ɛ̀ fú ɔ̀nyà ŋa. 18Ńnɛ̀ ní ɔ̀nyà kpíkpɔ̀ lɔ káà kpàɖé‐ɛ̀#ɛ́. Ìɖéǹɖè#ɛ́, ɔ̀nyà ŋa gbɔ́ kíbí ó tse iŋɛ́-àwùsì ɔ̀tɔ nyɛ̀ŋɛ̀#ɛ́.
19Ńbɛ̀ɛ́, ɔma-ɛgbɛ́-Fàrísì† ŋa wà fɔ̀ fú ara-ŋa ní: Àhã́ã̀! È kè wà rí báàyíì? È kàkó nyáa tse iŋɛ́-kã̀ kpókpó fúu nɛ́! Ɔ̀nyà kpó wà tɛ̀ náànyì‐ɛ̀.
Yèésù wà kpòwe fú ŋa ti nára-ikú‐ɛ̀
20Ɔma-Gɛ̀rɛ́kì kã̀ŋa gbo wà náàŋírĩ-ɛnɛ yèé ŋa wá nɔ́ɖɔ̃́#ɛ́, tsí ká wáa sɛ̃ Ɔ̀ɖáyé#ɛ́. 21Ńbɛ̀ɛ́, à lɔ káà rí Fìlíkpò, tsí wà wí fúu ní: Ɔ̀gá, àŋa wà wo kó rí Yèésù. (Fìlíkpò#ɛ́, ɔma-Bètsàyìɖá ŋa ni. Ìlú#ɛ́ wà nérè-Gàlìlé.)
22Ńbɛ̀ɛ́, òŋu gbo ǹɖe, tsí lɔ káà múu wí fú Ànɖérè. Tsí àŋa méèdzì#ɛ́, à lɔ ńɖi-Yèésù, tsí káà múu wí fúu.
23Tsí Yèésù wà wí fú ŋa ní: Ìwèrè tó, tsí ɔ̀nyà ŋa kó rí lílákṹ-òŋu, Ɛnɛ yèé ɔ̀nyà bí#ɛ́†. 24Ó ɖi, òŋu wà wí fú ŋa ní fee, bàfó ɔma ɔ̀kã̀ntso, bí kò tsubú si ńlɛ̀, tsí dzirà#á, kà ɖi kpíkpɔ̀ láyé. Ɔ̀kã̀ntso#ɛ́ gé ní náa dzɛ́ si#ɛ́. Ó ɖi, bí ó dzirà#á, náa lama kpíkpɔ̀. 25Ɛnɛ yèé wà tsèsérè si ńǹtá-ayé-ara‐ɛ̀ gé#ɛ́, ɛnɛ nyɛ̀ŋɛ̀ nákó tsɛ̀rá. Tsí ɛnɛ yèé kò wà mú ayé‐ɛ̀ kpe iŋɛ́-kã̀ ńǹtalɛ̀ bí#ɛ́, àyɛ̀ wà fúu si báàyí, tsí nákó wà fúu si títí lɔ náàrìtã́. 26Bí ɔ̀nyà-kã̀ wà wo kó dzítsɛ́ fú òŋu, ɛnɛ nyɛ̀ŋɛ̀ kó tɛ̀ náànyì-òŋu. Ńbí òŋu nákó wà#á, ńbɛ̀ ké ní adzítsɛ́-òŋu gbo nákó wà#á. Tsí bí ɔ̀nyà-kã̀ dzɛ́ adzítsɛ́-òŋu#ɛ́, Boba-òŋu nákó kɛ́ éwo‐ɛ̀ lɔ ńǹgbèrí. 27Báàyí#ɛ́, ɛ̀ɖɔ̃̀-òŋu kò dzokó si. Tsí bí òŋu kó fɔ̀ fáà báàyí? Òŋu kó fɔ̀ ní: Boba-mi, gbà mí nárũ-ìréré yèé bàa náàsòkò yèé#ɛ́ɛ̀? Òò. Òŋu kàkó nyáa fɔ̀ bɛ́ɛ̀. Àtsùgbé-ìréré#ɛ́ gìɖì ní òŋu wá ńǹtalɛ̀#ɛ́ náàsòkò yèé#ɛ́. 28Ó ɖi, Ɔ̀ɖáyé Boba, kó mú lílákṹ‐ɛ̀ ɖíre ɔ̀nyà ŋa.
Ńbɛ̀ɛ́, oŋù-kã̀ ɖɔ̃́ ti nɔ́ɔ̀rɔ̃, tsí wà fɔ̀ ní: Ǹ ti mú lílákṹ-mi ɖíre ná, tsí màa tɔ́ múu ɖíre ró.
29Ńbɛ̀ɛ́, ɔ̀nyà kpíkpɔ̀ yèé wà bɛ̀#ɛ́, à gbɔ́ kíbí oŋù#ɛ́ ɖɔ̃́ gbà#á. Tsí à wà fɔ̀ ní: Àyèrá ní ké bɛ́ɛ̀#ɛ́. Tsí ɔ̀nyà kã̀ŋa ní: Adzítsɛ́-ɔ̀rɔ̃†-kã̀ wíìnyɛ̀ fú Yèésù ni.
30Tsí Yèésù wà wí fú ŋa ní: Kò tsi òŋu ní oŋù#ɛ́ wà wíìnyɛ̀ fú#ɛ́. Ó ɖi, àŋa ní ó wà wíìnyɛ̀ fú#ɛ́. 31Ó ɖi báàyí ní ìwèrè tó, tsí Ɔ̀ɖáyé kó kpɛdzɔ́ fú ɔ̀nyà-ayé yèé ŋa#á. Báàyí ní ìwèrè tó, tsí Ɔ̀ɖáyé kó lé Ètsù†, ólú-ìtalɛ̀ bí ǹɖe#ɛ́. 32Tsí òŋu, ńǹwèrè yèé à nákó kɛ́ òŋu ǹɖe ńǹtalɛ̀#ɛ́, òŋu nákó gbɛ̃́ ɔ̀nyà kpó lɔ ńɖɔ̀-ara-òŋu.
33Ó wà wí afɔ̀ yèé bɛ́ fú ŋa, tsí wà ń nya kíbí nákó kú gbà#á ɖíre ni.
34Ńbɛ̀ɛ́, ɛnɛ yèé wà bɛ̀ ŋa#á, à wà wí fúu ní: Ìwé-Ɔ̀ɖáyé† wí fú àŋa ní Kírísítò nákó gbé náyé bí títí lɔ náàrìtã́ ni. Kí tse tsí ó wà fɔ̀ fú àŋa ní Ɛnɛ yèé ɔ̀nyà bí#ɛ́, à nákó kɛ́ɛ ǹɖe ńǹtalɛ̀? Nɛ̀ɛ́ dzɛ́ Ɛnɛ yèé ɔ̀nyà bí#ɛ́ gìɖì ńǹkɛ̀ɛ́ ni?
35Tsí Yèésù wà wí fú ŋa ní: Mímá wà ńɖi-ŋa si. Ó ɖi, ó wà fú àsòkò tsígíɖí-kã̀ gé ni. Ńbɛ̀ɛ́, kíbí ɔdzɔ́ wà má fú ŋa#á, ká rɛ̃̀, tsí òkùkù kó máa kù ɖí ŋa nɔ́ɔ̀nà. Iŋɛ́ yèé tse#ɛ́, ɛnɛ yèé wà rɛ̃̀ nóòkùkù#ɛ́, kà ma ńbí ó làkóò#ɛ́. 36Ó ɖi, ńǹwèrè yèé mímá wà ńɖi-ŋa si#ɛ́, ká gbàá gbɔ́, tsí ká ɖi ɔma‐ɛ̀ ŋa.
Ɔma-Ìyúɖà ŋa kɔ̀ ní àŋa kàkó gba Yèésù gbɔ́
Kíbí ó wí fú ŋa bɛ́ɛ̀ tã́#á, ó sá ǹɖe ńɖi-ŋa, tsí káà ɖúkù ńǹɖì dzídzɛ̃̀-kã̀ oɖé. 37Kíbí ó dzɛ́ gìɖì ní Yèésù tse iŋɛ́-àwùsì kpíkpɔ̀, tsí à rí#ɛ́, à kò gbàá gbɔ́. 38Ó lɔ bɛ́ɛ̀, àtsùgbée afɔ̀ yèé Yèsáyà† agbáfɔ̀-Ɔ̀ɖáyé fɔ̀† ti fɔ̀ wáa lɔ#ɛ́ kó tsɛ ni. Yèsáyà ní:
“Ɔlɔ́dzɔ́, àa dzíkɔ̀-ɛ̀ɛ fú ŋa, tsí à kò gbàá gbɔ́.
Ò tse iŋɛ́-àwùsì ŋa fú ŋa,
tsí à kò rí ikpá-ɛ̀ɛ ńnɛ̀.”#12:38 Ìwé-Yèsáyà 53:1 (Ésaïe 53:1)
39Iŋɛ́ yèé tse tsí à kò nyáa gbàá gbɔ́#ɛ́, Ɔ̀ɖáyé òŋu ká‐ɛ̀ gbà ńǹtá-Yèsáyà#á ké, 40tsí ní:
“Ɔ̀ɖáyé sirì bo odzú-ŋa,
àtsùgbée ká máa wà rírã,
tsí ó tse tsí ifɛ̀ɛ́nɔ́ tã́ ɖí ŋa gbo,
àtsùgbée ká máa wà gbɔ́ òkpì-afɔ̀‐ɛ̀.
Ɔ̀ɖáyé tse bɛ́ɛ̀, àtóoríi ká máa nyí lɔ ńɖɔ̀‐ɛ̀,
tsí kó bɔ ŋá.”#12:40 Ìwé-Yèsáyà 6:9-10 (Ésaïe 6:9-10)
41Yèsáyà fɔ̀ bɛ́ɛ̀, iŋɛ́ yèé tse#ɛ́, ó rí lílákṹ-Yèésù, tsí ó wà wíi ni.
42Ńǹtã̀ntã́‐ɛ̀#ɛ́, ɔ̀nyà kpíkpɔ̀ náàŋírĩ-onùgbó-ɔma-Ìyúɖà† ŋa gba Yèésù gbɔ́. Ó ɖi, àtsùgbé-ɔma-ɛgbɛ́-Fàrísì† ŋa#á, à kò nyáa fɔ̀ɔ́ gãgã. À wà sá ní ká máa lé àŋa ńlé-ìkpàɖé-ɔma-Ìyúɖà ŋa†. 43À náa wà wò ní ɔ̀nyà ŋa kó nyɛ àŋa láre Ɔ̀ɖáyé kó nyɛ̀ ŋá.
44Ńbɛ̀ɛ́, Yèésù wà wíìnyɛ̀ ɖúgbe fú ŋa ní: Bí ɔ̀nyà-kã̀ gba òŋu gbɔ́#ɛ́, kò tsi òŋu níìkã̀ ní ó gbà gbɔ́#ɛ́. Ó gba ɛnɛ yèé bɛ òŋu wá#á gbo gbɔ́. 45Tsí bí ɔ̀nyà-kã̀ rí òŋu#ɛ́, ó rí ɛnɛ yèé bɛ òŋu wá#á gbo ńnɛ̀ɛ́. 46Òŋu wá ńǹtalɛ̀#ɛ́, tsí òŋu dzɛ́ mímá, àtsùgbée bí ɔ̀nyà-kã̀ gba òŋu gbɔ́#ɛ́, kó máa gbé nóòkùkù. 47Bí ɔ̀nyà-kã̀ gbɔ́ afɔ̀-òŋu, tsí kò múu tsitsɛ́ tse#ɛ́, kò tsi òŋu ní wà kpɛdzɔ́ múu#ɛ́. Ó ɖi, òŋu kò wá ní òŋu kó wáa kpɛdzɔ́ fú ɔ̀nyà ŋa. Òŋu wá ní òŋu kó wáa gba ɔ̀nyà ŋa là ni. 48Bí ɔ̀nyà-kã̀ mú òŋu taánù, tsí kɔ̀ ní òŋu kàkó gba afɔ̀-òŋu gbɔ́, àkpɛ̀dzɔ́-kã̀ wà, tsí nákó ɖáàbi fúu. Àkpɛ̀dzɔ́#ɛ́, afɔ̀-òŋu ŋa ni, tsí nákó ɖáàbi fúu nɔ́dzɔ́-ìtã̀ntã́#á. 49Iŋɛ́ yèé tse#ɛ́, iŋɛ́ yèé òŋu wà wí#ɛ́, kò ti ńǹsérè tòŋu ká-òŋu. Ó ti ńǹsérè-Boba-òŋu, ɛnɛ yèé bɛ òŋu wá#á ni. Tsí ó wí fú òŋu ní òŋu kó wíi fú ɔ̀nyà ŋa. 50Tsí òŋu mà ní iŋɛ́ yèé Boba-òŋu wà fɔ̀ ní ká tse#ɛ́, náa fúnɛ náàyɛ̀-àrìtã́. Ó ɖi, iŋɛ́ yèé òŋu wà fɔ̀#ɛ́, òŋu wà fɔ̀ɔ́ kíbí Boba-òŋu fɔ̀ɔ́ fú òŋu gbà#á ni.
Voafantina amin'izao fotoana izao:
Yòhánà 12: ngl
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© (Active), Wycliffe Bible Translators, Inc. All rights reserved.