Luka 20
20
Beʋi Yesu Yɛ Kigaglaɛ kɛ Ɔdɔ Klɔ
1Liwetɔ lɛ gi Yesu azabasɛ banima bidɔ mɛ ní Lisɔligba lɛ mɛ ɛ, xe azaasɔli Liboe Gbã nɛ ɛ, Kusumu yo baka ba, Ɔsã nɔ badɔbasɛ ba ni banɔtsitsi ba bɛba, 2lɛ bɛsi yɛ si, “Si blɔ, kude woli wɔmɔ xe wɔɛbitɛ eboa la ya a? Lɛ nyaŋwɛ aki wɔ kude o?”
3Yesu ebu le onu aki ba si, “Abla ɛ mlaki tɔ miʋi mlo liboe. Mlasi mɛ, 4Nyaŋwɛ aki Yohanes kigaglaɛ xe azaakpɛ kuni yo aki banima a? Aya kɔ́ lidɔ loo dɔni banima kɔ́ na a?”
5Lɛ bekpese eboe la kuvu udi ní ba tsali kusi si, “Liboe woli kwiapani i? Xe kwipani si, ‘Dɔni Aya kɔ ɛ,’ aaʋi blo si, ‘Kɔlɔ, ege lɛ loso, mlaazi Yohanes aʋa aŋa ɛ?’ 6Pɔ xe kwipani si, ‘Dɔni banima klɔ ɛ,’ linɔkpi lɛ ya pɔ́ liasa blɔ akla, lɛ ese linu si bɛzi lɛ si Yohanes eze oboedoplɛ.”
7Lɛ loso e bebu le onu si, “Kúte niklɔ gi kidɔ ɔ.”
8Lɛ Yesu asi ba si, “Kɔlɔ mɛ fɛ, mátrasi mlɔ kude kɔkɔ kuliɔ gi mɛɛkɔ ɛbitɛ eboa la ya a.”
Abee ní Ɔnyrɔ nɔ aʋa Bedidi ba Su
9Lɛ Yesu ebu abee liɛ aki banima si: “Onyime ɔtɔ eze gi awa wain ɔnyrɔ, lɛ akɔ lɔ aki ɔnyrɔ nɔ aʋa bedidi ba si biatsa ɔgyɔ ɔki yɛ lɛ asɛ ní kepea lipoe gblamadzaɛtɔ ɛ. 10Agi wain yɛ ligu nɛ lina ɛ, akpɛ yɛ ɔnɔsumu tole atsisi yɛ ɔnyrɔ nɔ aʋa bedidi ba tɔ ɔzɛ yɛ ɔŋa klɔ ɔmani yɛ. Pɔ̀ ɔnyrɔ nɔ aʋa bedidi ba bekusi ɔnɔsumu ye e, lɛ bedzini ye tsisi iwla pluplu i. 11Lɛ atsisi ɔnɔsumu dzedze e; pɔ̀ ɔnyrɔ nɔ aʋa bedidi ba bekusi yɛ fɛ ɛ, bɛkpɛ yɛ kuyé, lɛ bedzini ye tsisi iwla pluplu i. 12Nite si atsisi ɔnɔsumu tánɛ; ɔnyrɔ nɔ aʋa bedidi ba bɛkpɛ yɛ libi fɛ, lɛ bɛkpikpini yɛ.
13“Lɛ ɔnyrɔ nɔ onetee eʋi isu ya si, ‘Kitɛ mabitɛ ɛ? Maatsisi mɛ ɔtutɔ mobinyimee gi malɔ ɛ; nyafɛ biakpɛ kubùbù yo ní yɛ su!’
14“Pɔ̀ gi ɔnyrɔ nɔ aʋa bedidi ba bɛmɔ yɛ ɛ, bɛpani nì bahanuglɔ ba si, ‘Mledi, onetee Yebi ye iliɛ ya. Mlaki tɔ kuye ye, atɔ yɛ kaŋasea kedzi blɔ kanɛ!’ 15Lɛ loso e behe ye ebú ní ɔnyrɔ nɔ mɛ ɛ, lɛ beye ye e.
Lɛ Yesu eʋi si, “kitɛ wain ɔnyrɔ nɔ onetee aabitɛ ɔnyrɔ nɔ aʋa bedidi ba ya ɛ? 16Aaba, kɔ eye benyime ba klɔ, kɔ akɔ wain yɛ ɔnyrɔ nɔ akpɛ ní ɔnyrɔ nɔ aʋa bedidi dzedze awla ɛ.” Agi banima benu le e, bɛ pani si, “Likíba lɛ mɛ!”
17Yesu edi ba lɛ eʋi si, “Kɔlɔ ege, liboe lɛ ya gi bɛŋwlimi libasɛ ɛ?
“ ‘Likla ɛlɛ klɔ gi bagbatrɔ ba bɛyurɔ si lima liboeboe me e,
lɛ lidzi ogó no aʋa likla nɛ ɛ.’
18“Ɔnɔ kakaa gi aadɔ likla ɛlɛ klɔ aʋa ɛ, avini kukpe kukpe; lɛ xe likla ɛlɛ klɔ liadɔ ní ɔnutɔ aʋa ɛ, liahɔ yɛ pliplipli.”
Kuʋiʋi Ní Kibɔ Gyɔ̀gyɔ̀ Su
19Ɔsã nɔ badɔbasɛ ba ni kusumu yo baka ba bɛpɛ́ kudeonu si bévu Yesu ní niklɔ kyɔŋ, lɛ ese linu si betè si basu ebu abee; pɔ̀ bezese banima a. 20Lɛ loso e bɛpɛ kudeonu lɛ bɛtsa ní kikpokpo me. Bɛtsa kibɔ ɛki benyime batɔ, tɔ babitɛ ŋwisi banɔ gbã benu u, pɔ̀ tɔ bapunu Yesu gani beʋiʋi me e, tɔ biakɔ yɛ ɔki Roma banɛ ma kesea ɔʋadi ye yɛ kigagla ɛ. 21Banɔpunu ba ya ba ɛ, beʋi Yesu si, “Ɔdɔbasɛ yɛ, kwite si wɔ eboe la gi wuzɛɛpani i, ni kidiliɛ gi wuzɛɛbasɛ banima ɛ, bina. Kwite si woʋidi ɔnɔ aŋu mɛ ɛ, pɔ̀ wuzɛɛbasɛ anukwarɛɛ ní Aya yɛ kupɛ́pɛɔ ki ɔnɔ onu u. 22Si blɔ, liyɔ kedu ní blɔ Ɔsã nɔ su si kugyɔ kibɔ ɔki Roma banɛ ma Ɔka ʋidi ye, loo kukígyɔ na a?”
23Pɔ̀ Yesu amɔ ba ìmɔ nɛ bede ʋa, lɛ asi ba si, 24“Mlabasɛ mɛ kibɔ pititi itɔ. Nyaŋwɛ aŋu mɛ ni linyí lítiní kɛ aʋa a?”
Bebu le onu si, “Roma banɛ ma ɔka ʋidi ye.” 25Lɛ loso Yesu asi ba si, “Xe nite e, kɔlɔ kidiliɛ gi kinu Roma banɛ ma ɔka ʋidi ye kinɛ ɛ, mlatsa kɛ aki yɛ, tɔ kidiliɛ gi kinu Aya kinɛ ɛ, mlakɔ kɛ aki Aya a.”
26Ní banima aŋu na mɛ klɔ ɛ, bátani yɛ kuvu ní liboeboe me, Ni kiliɛ gi ebu le onu i, lidzi onugutsetse ki ba lɛ loso bɛgɔ tsriɖi i.
Kudɔbasɛ ní Kuyɔyɔ Dɔni Bekpo ʋa mɛ su
27Lɛ Zadukianɛ batɔ, gi bázɛ lɛ aʋa aŋa si banima biayɔ dɔni bekpo ʋa mɛ ɛ, bɛba Yesu klɔ lɛ bɛpani si, 28“Ɔdɔbasɛ yɛ, Mose aŋwlimi kí blɔ ní ɔsã nɔ mɛ si, ‘Xe onyime etse e, xe ye yedze agɔ ɔ pɔ̀ ɔ́pɔ bebi i, lilɛ si onyime liɛ klɔ yeneminyime ɔgbani ɔtrɛtrɛ yedze tɔ bapɔ bebi gi biakɔ si benu yenemi ye okpo ye yɛ bebi i.’ 29Liba lɛ mɛ si beneminyime tiegloele beze; otsitsi ye agbani ɔdzɛ lɛ etse e, pɔ̀ ɔ́pɔ obi i. 30Lɛ ɔʋlaɛ agbani ɔdzɛɛ ɛ, 31lɛ ɔtanɛɛ fɛ ɛ. Nite ke lize ki ba tiegloele ba pɔ́ xe betse e, gi bápɔ bebi i. 32Gɔgɔɛ, ɔdzɛɛ kyɛ etse. 33Abla ɛ, ní liwe lɛ klɔ aʋa gi bekpo ʋa biayɔ ɛ, nyaŋwɛ yedze ɔdzɛɛ aaze e, gi ba tiegloele ba pɔ́ bɛgbani yɛ edi i?”
34Yesu ebu le onu aki ba si, “Benyime ni badzɛ ní kelea lia mɛ ɛ, bizɛgbani ba ahanuglɔ ba, 35pɔ̀ benyime ni badzɛ ba ya gi bɛna si biayɔ dɔni bekpo ʋa mɛ ɛ, xe biaze ligbã́ nɛ ní kelea lia klɔ gi kiaba mɛ ɛ, batrágbani baglɔ ɔ. 36Biaze ŋwisi Aya yɛ baxwɛdzɛ ba lɛ batrátani kutse tɔ ɔ. Benu Aya yɛ Yebi, lɛ ese linu si bɛyɔni ba dɔni bekpo ʋa mɛ. 37Lɛ Mose ebu le abasi mɔmɔmɔ si biayɔ nì bekpo ʋa. Ní bidɔ ŋwlimiŋwlimi ʋɛ klɔ mɛ gi apani ní ose lo gi ɛɛsɔ su i, apani ní Ɔkaɛ su si; onu ‘Abraham yɛ Aya, Isak yɛ Aya ani Yakob yɛ Aya.’ 38Yɛ ónu bekpo ʋa Aya boŋu i, bagbagbe ba ba Aya onu, lɛ yɛ ba pɔ́ balɛ ligbã nɛ akɔ ɔ.”
39Lɛ Ɔsã nɔ badɔbasɛ ba bɛpani si, “Ɔdɔbasɛ yɛ, Wobu le onu mɔmɔ!” 40Lɛ ɔna óze ba lipo si biaʋi ye liboeboe tɔ ɔ.
Nyaŋwɛ Yebi Onu Ɔnɔbu ye e
41Yesu eʋi ba si, “Kitɛ mɛ biapani si ɔnɔbu ye aaze Dawid yɛ osobi i? 42Gi Dawid ɔtutɔ apani ní Psalomo ʋa keplekpa mɛ si:
“ ‘Aya asi Mɛ Ɔkaɛ si,
“ze ní mɛ kaŋaa mɛ
43kɔzɛna ni lipoe lɛ gi maakɔ wɔ ahwafianɛ ma kpɛ ní wɔ kukliseo.’ ”
44Dawid axwa yɛ si ‘Ɔkaɛ’; lɛ Kitɛ liaze si Ɔnɔbu ye aatani Dawid yɛ osobi kuze e?”
Yesu Aki kugbagba si Bedi mumɔ ní Ɔsã nɔ Badɔbasɛ ba Su
45Agi banima pɔ́ bɛzɛta yɛ kutu i, Yesu asi yɛ badɔkpasi ba si, 46“Mleze nì aŋu ní Ɔsã nɔ badɔbasɛ ba su; gi bizɛpɛ si biazɛga za ní ba ewu gblamadza la mɛ ɛ, xe bɛzɛpɛ si bazɛpani ba nì kubùbù ní ablɔ ʋa aʋa a; gi bizɛkya ibùbùzekɔ ɛki isu ya a, gi bɛgɔ ɛplɛ ní Yudanɛ ma itsaklɔ ɔ, ani ikɔ gbã nɛ ní iŋaŋakplɔ nɛ su i. 47Lɛ bizɛɛpɛ kudeonu ní batrɛtrɛ ba bedze ba su ŋwisi kipɔnɔ si bɛpɔni ba na a, pɔ̀ kɔ bezuru ba kupeo o, lɛ kede e, bizɛbasɛ isu ya nì Aya kuxwaxwa gblamadza! Ba kutuheheo kwianyani koŋ!”
Voafantina amin'izao fotoana izao:
Luka 20: avn
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc