OHÚTU 24
24
Áyísīki le ɔnyā lɛ
1Abālɔbányā Ébrahām le hīla ókplícī nɛ̄hi ɛɛ́, Ɔwɔicō kē le ɔhā hɛ́ ce ɔ́ ipú ɔdā dóódu nōó yá ā. 2Ébrahām da ɔ̄cocɛ̄hɔ̄ kú nū nōo wɛ ɔnyākwɔ́cɛ kú ɛjɛ̄ɛ̄jī ācocɛ̄hɔ̄ ā, nōo gē leyīkwu ɔdā dóódu nɛ̄ Ébrahām lɛ ā kahíníī, “Lɛ abɔ̄ wu um agada#24.2 lɛ…agada: Ɛ́gɛ́nyā nēé gē gbɛka nōó lɛ opīyabɔ̄ ŋ́ má ká ā lɛ ɔkpá gbo gā um. 3N tíne ká ā gbɔkpá ā ŋmá lɛ iyē kú Óndú, nōo wɛ Ɔwɔicō kú ɔkpáncō mɛ́mla ɛcɛ ā ka, anúɔ í gáā lɛ ɔnyā lɛ ɔyí um ŋmá ipú ayínɔ̄nyā kú Ukénan nɛ̄ um lā ipú uwā nyā ā ŋ́. 4Amáŋ, ka a géē kwúcē ga ɔlɛ́ um, ɛgiyí ācɛ ɔlɛ́ um, gaá lɛ ɔnyā lɛ Áyísīki, ɔyí um.”
5Anɔ́ɔ ɔ̄cocɛ̄hɔ̄ ā da ɔ́ kahíníī, “Eko nɛ̄ ɔnyā í cɛ̄ kóō yɛce um wā ajɛ nyā ŋ́ bɛ́ɛ? Ó lɛ ā, n kwú ɔyí uwɔ í cīgbīhi ga ajɛ nɛ̄ a ŋmá ā kɛ̄ɛ?”
6Ébrahām tá ɔ̄ ohi kahíníī, “Yá ɛ́gɛ́ dúú nōó lɛ ká ā híī je ɔyí um cīgbīhi ga abɔ́ɔ ŋ́. 7Óndú ā, nōo wɛ Ɔwɔicō kú ɔkpáncō, nōo je um ŋmá ɔlɛ́ ádā um mɛ́mla ajɛ ɛga nēé ma um ā, nōo cokónu gā um ka anúɔ géē je ajɛ nyā lɛ ipɔ́ɔma kú um ā, géē tū alelékwū-ōtɛ̄hɔ̄ kú nū ɛhɔ̄ gbɔbū ga abɔ́ɔ. Alelékwū-ōtɛ̄hɔ̄ ā í yá cɛ́ɛ́ ká ā géē lɛ ɔnyā ā lɛ Le ɔyí um ŋmá abɔ́ɔ. 8Amáŋ, ɔ́dāŋ ka ɔnyā ā í cɛ̄ koó yɛce uwɔ̄ ŋ́, ayíka ɛka kú um géē wú uwɔ tá. Amáŋ, ɔdā dóódu kóō yá ká ā je ɔyí um kwúcē ga abɔ̄ ŋ́.” 9Anɔ́ɔ ɔ̄cocɛ̄hɔ̄ ā le abɔ̄ wu Ébrahām, ɔkpanī nū, agada, le ɛka gbo kóō yá ɔdā nɛ̄ Ébrahām da ɔ́ ā.
10Ɔ̄cocɛ̄hɔ̄ ā, nōo leyīkwu agbénú kú ɔkpani nū ā, le aínyankwūlūmī igwó kú ɔkpani nū kpó, mɛ́mla ɔdā ō je yá ɔnyā ɛhi dóódu ŋmá ɛgiyí ɔkpani nū. Anɔ́ɔ ó cāŋjɛ le yɛ tá Umɛsopotɛ́mīya, igelī nɛ̄ Unáhɔ lā ā á. 11Eko nōó le táajɛ abɔ́ɔ ā, ó le yá kú aínyankwūlūmī ā kéē lɛ okwúukwu kpó kwaajɛ ɛgiyí obugā iyɛ̄cɛ kú igelī ā, ɔ̄nɔ̄ɔ̄nɛ̄ eko nɛ̄ ācɛnyā ī wā gaá hɛ́ éŋkpɔ̄ ā. 12Anɔ́ɔ ó le ɔkɔ gbā kahíníī, “Óndú ā, awɔ nōo wɛ Ɔwɔicō kú ɔkpani um Ébrahām ā, lɛ ɔwɛ kú um yá gbóóló gā um cɛ́ɛ́ ká ā lɛ okónu nɛ̄ a ce lɛ ɔkpani um ā yá jīla. 13Ami háyi okónu obugā ɛga nɛ̄ ācɛnyā kú igelī ā gē wā í hɛ́ éŋkpɔ̄ ā yɔ̄ á. 14Lɛ ɔ́ yá tɔ́ɔtɛ́ cɛ́ɛ́ ka ɔyínɔ̄nyā nɛ̄ n géē da ɔ́ kahíníī, ‘Kócōō lɛ ɔjá kú uwɔ túkpɛɛ́ gā um kú um lɛ éŋkpɔ̄ gwá káá,’ nōó géē ka kahíníī, ‘Gwá. N kōō í bī éŋkpɔ̄ gé lɛ aínyankwūlūmī kú uwɔ dúú ā, ɔyínɔ̄nyā ɔ́ɔmā kóō kwú pīya ɔnyā nɛ̄ a fu lɛ Áyísīki, ɔ̄cocɛ̄hɔ̄ kú uwɔ ā. Ɔ́dāŋ ka ɛ̄nyā le yá lɛ ā, n géē jé ka a le okónu nɛ̄ a ce lɛ ɔkpani um ā yá ɛɛ́.”
15Ɛ́ɛ́ kóō gbɔ̄ɔkɔ ā kwɛyí ā, Urebéka fajɛ le ɔjá nōó ī hɛ́ éŋkpɔ̄ tū ɔ̄ ce ɔkɔ. Ó wɛ adá kú Ubɛ́tūwɛlu, nōo wɛ ɔyínɔ̄nyīlɔ kú ɔyínɛ́ Ébrahām, nēé hī Unáhɔ, nɛ̄ ɔnyā nū kē wɛ Umílka ā. 16Ɔyípɔ̄ŋcɛ́nyā ā jɔ̄ŋcɛ̄nyā nɛ̄hi klla lɔhi ō má eyī. Ó wɛ ɔ́ncɛ́nyā nōó jé ɔ̄cɛnyīlɔ jéejéé ɛ́ɛ́ ŋ́. Ó lɛ tá obugā ā, le éŋkpɔ̄ hɛ́ tū ɔjá kú nū omōōmu, anɔ́ɔ ó gā ɛcɛ á. 17Ɔ̄cocɛ̄hɔ̄ kú ɔlɛ́ Ébrahām ā le inya kwu gaá jīla anú ɔwɛ, anɔ́ɔ ó kahíníī, “Kócōō je éŋkpɔ̄ gā um lígíí kú um gwá ŋmá ɔjá kú uwɔ.” 18Anɔ́ɔ Urebéka kahíníī, “Gwá, ɔkpani” Anɔ́ɔ ó tá ɔjá kú nū ā kpɛɛ́ le éŋkpɔ̄ je lɛ ɔ́ le gwá á. 19Eko nōó le je lɛ ɔ́ le gwá kwɛyí ā, ɔyínɔ̄nyā ā klla kahíníī, “N géē hɛ́ lɛ aínyankwūlūmī kú uwɔ dúú jāā gbéeko nēé le gwá mɛ̄.” 20Ó kwú éŋkpɔ̄ nōo yɔ̄ ɔjá ā ú pīya tū ipú ɔdā ō lɛ éŋkpɔ̄ tū ɔ̄ lɛ aɛ́bɛ́ gwá fíyaa. Ó klla le inya kwu ga obugā ā kpɔ́ gaá le éŋkpɔ̄ hɛ́ le bī wā í pīya tū ɔ̄ lɛ aɛ́bɛ́ ā kpɔ́. Ɔwɛ ɛ́gɛ́nyā nōó le kpó éŋkpɔ̄ lɛ odúúdú aínyankwūlūmī ā á. 21Ɔ̄cɛ ā yɔ̄ ī má kóō jé ɔ́dāŋ ka Óndú ā le iyāwu kú nū ā yá lɔhi lɛ ɔ́ ɛɛ́.
22Eko nɛ̄ aínyankwūlūmī ā le éŋkpɔ̄ gwá kwɛyí ā, ɔ̄cɛ ā kwú eliká kú ugóolu (oje ɔdɔ), nōo gbɔɔ́lá nɛ̄hi ā ú wu ɔ́ ɛnwū. Ó klla kwú oje otābɔ̄ ɛpa kú ugóolu (oje ɔdɔ), nōo gbɔɔ́lá nɛ̄hi ā í tū ɔ̄ abɔ̄ dúú. 23Anɔ́ɔ ɔ̄cɛ ā da ɔ́ kahíníī, “Da um, ɔyínɔ̄nyā kú ɔ̄nyɛ nɛ̄ a wɛ āa? Inu yɔ̄ ɔlɛ́ ádā uwɔ lɛ alɔ nɛ̄ alɔ géē gbɔga anú glá āa?” 24Urebéka tóohi da ɔ́ kahíníī, “N wɛ ɔyínɔ̄nyā kú Ubɛ́tūwɛlu, ɔyí kú Umílka, nōó ma lɛ Unáhɔ āa.” 25Ó klla kahíníī, “Alɔ lɛ ácí mɛ́mla ɔdōlé nōo géē jɛ̄ aɛ́bɛ́ ā, mɛ́mla inu nɛ̄ a géē gbo anú.” 26Anɔ́ɔ ɔ̄cɛ ā túkpɛɛ́ le okwúukwu kwaajɛ, le ɛ̄gbā gbā Ɔwɔicō. 27Ó kahíníī, “N tá uwɔ ahínyá, Ɔwɔicō kú ɔkpani um, Ébrahām. A le okónu nɛ̄ a ce lɛ ɔkpani um ā yá kpaakpa gaajɛ ɛɛ́. Óndú, ā le um bī kpaakpa wā ɔlɛ́ kú aɔ́máapú ɔkpani um.”
28Anɔ́ɔ ɔ́ŋcɛ́nyā ā le inya kwu ga ɛgiyí ācɛ ɔlɛ́ ɛ́nɛ́ nū gaá le odúúdú ɔdā nōo yá ā kpó ka lɛ uwá. 29Urebéka lɛ ɔyínɛ́ nɔ̄nyīlɔ éyi nɛ̄ iyē nū lē ka Ulában. Anɔ́ɔ Ulában lɛ inya kwu gɛɛcɛ, ga ɛgiyí ɔ̄cɛ ā, okónu Obugā ā. 30Eko nōó lɛ eliká ā má, mɛ́mla oje otābɔ̄ abɔ̄ kú ɔyínɛ́ nū nɔ̄nyā ā, klla lɛ ɔdā nɛ̄ Urebéka ɔyínɛ́ nū ka ā pó ā, ó le yɛ tá ɛgiyí ɔ̄cocɛ̄hɔ̄ kú Ébrahām, abɔ̄ ó máhāyi pī aínyankwūlūmī ā ɛgiyí obugā ā. 31Anɔ́ɔ ó da ɔ́ kahíníī, “Wā ká ālɔ̄ ga ɔlɛ́. Awɔ nɛ̄ Óndú ā le ɔhā hɛ́ ce uwɔ ā. Ɔdíyá nɛ̄ ā hāyi ɛcɛ āa? N le inu tútū gbēyī uwɔ klla lɛ ɛga tútū lɛ aínyankwūlūmī kú uwɔ ɛɛ́.”
32Ɔ̄cɛ ā gā ɔlɛ́, anɔ́ɔ Ulában le iyó wī ŋmá igbīhi kú aínyankwūlūmī ā, anɔ́ɔ ó le ácí mɛ́mla ɔdōlé kpó lɛ uwá á. Ó klla le éŋkpɔ̄ bī gé lɛ ɔ̄cɛ ā mɛ́mla ācɛ nēe wā mémla anú ā kéē lɛ ikpó na. 33É le ɔdōlé kpó wā kéē lé, anɔ́ɔ ó kahíníī, “N gaá lé ɔdōlé ŋ́ jāā gbéeko nɛ̄ n lɛ ɔkwu iyāwu kú um ā ka lɛ aá.” Anɔ́ɔ é kahíníī, “Ka mɛ́ɛ́nɛ.”
34Anɔ́ɔ ó kahíníī, “N wɛ ɔ̄cocɛ̄hɔ̄ kú ɔlɛ́ Ébrahām, 35Óndú ā le ɔhā hɛ́ cē ɔkpanī um, Ébrahām, nɛ̄hi, ó kē kwú pīya ɔ̄cɛ nɛ̄hi. Ó lɛ aálá, aɛ́wū, aɛ́na, oje nɛ̄hɛ́ mɛ́mla oje ɔdɔ, aɔ́fiyɛ nɔ̄nyā mɛ́mla aɔ́fiyɛ nɔ̄nyīlɔ, aínyankwūlūmī mɛ́mla aíjaki. 36Usára nōo wɛ ɔnyā kú ɔkpani um, Ébrahām ā, mɔyí éyi lɛ ɔ́, eko nōó le hīla ā. ɔyí ɔ́ɔmā nōó kpó ɔdā dóódu nōó lɛ ā lɛ ɔ́ á. 37Ɔkpani um cɛ̄ gā um le ɛka gbo ka n lɛ ɔ́da kú nū tū. Ó ka amíyɔ̄ híī lɛ ɔnyā lɛ ɔyí anúɔ ŋmá ipú áncɛ́nyā kú Ukénan, nɛ̄ anúɔ lā ajɛ kú uwā ā ŋ́. 38Ikɔɔkɔ ɔ́ɔmā, amíyɔ̄ ga ɔlɛ́ ádā anúɔ, ɛgiyí ācɛ ɔlɛ́ anúɔ kú amíyɔ̄ gaá lɛ ɔnyā lɛ lɛ ɔyí anúɔ. 39Anɔ́ɔ n da ɔkpani um ɔ̄kā ka, ‘Eko nɛ̄ ɔnyā ā í cɛ̄ kóō wā mɛ́mla um ŋ́ bɛ́ɛ?’ 40Ó tá um ohi kahíníī, ‘Óndú ā, nɛ̄ n himayī lɛyítáajɛ lɛ ɔ́ ā, géē tū alelékwū-ōtɛ̄hɔ̄ kú nū kóō yɛ mɛ́mla uwɔ cɛ́ɛ́ kóō lɛ iyāwu kú uwɔ yá lɔhi. A géē lɛ ɔnyā lɛ ɔyí um ŋmá ɛgiyí ācɛ ɔlɛ́ um, ŋmá ɔlɛ́ ācɛ ɔlɛ́ um. 41Ɔwɛ nɛ̄ a géē wútá ŋmá ɛka ā wɛ ka ɔ́dāŋ ka a le yɛ tá ɛgiyí ācɛ ɔlɛ́ um nēé tá ɛlā nɛ̄ a ka āa.’
42“Eko nɛ̄ n gā ɛgiyí obugā ícɛ nyā ā, anɔ́ɔ n le ɔkɔ gbā kahíníī, ‘Óndú, Ɔwɔicō kú ɔkpanī um, Ébrahām. kóocōō lɛ ɔdā nɛ̄ n yɔ̄ ī yá nyā yá lɔhi gā um. 43Mɔ́ɔ̄, ami háyī pī obugā nyā yɔ̄ á. Eko nɛ̄ ɔyípɔ̄ŋcɛ́nyā éyi gā kóō hɛ́ éŋkpɔ̄, n géē da ɔ́ kóō lɛ éŋkpɔ̄ je gā ŋmá ipú ɔjá kú nū kú n le gwá. 44Ɔ́dāŋ nōó cɛ̄ nōó klla cɛ̄ ka anúɔ géē bī éŋkpɔ̄ gé lɛ aínyankwūlūmī kú um, ayíka anú nɛ̄ a fu kóō wɛ ɔnyā kú ɔyínɔ̄yilɔ kú ɔkpani um á.’
45“Ofíílí kú ɔkɔ nɛ̄ n yɔ̄ ī gbā ipú ɔtū ā kóō mɛ ā, Urebéka fajɛ le ɔjá nōó gáā hɛ́ éŋkpɔ̄ tū ɔ̄ ā ce ɔkɔ. Ó le tá obugā ā gaá le éŋkpɔ̄ pi. N da ɔ́ kahíníī, ‘Kócōō jé éŋkpɔ̄ gā um ka n̄ gwá.’ 46Ó le ɔjá kú nū túkpɛɛɛ́ ŋmá ɔkɔ, anɔ́ɔ ó kahíníī, ‘Gwá. N kē géē je éŋkpɔ̄ lɛ aínyankwūlūmī kú uwɔ gwá dúú.’ Anɔ́ɔ n le gwá á, ó klla le je lɛ aínyankwūlūmī ā dúú. 47Anɔ́ɔ n le ɔ̄kā da ɔ́ ka, ‘Ɔyínɔ̄nyā kú ɔnyɛ nɛ̄ a wɛ āa?’ Ó tóohi kahíníī, ‘Ɔyínɔ̄nyā kú Ubɛ́tūwɛ̄lu, ɔyí kú Unáhɔ nɛ̄ Umílka ma lɛ ɔ́ á.” Anɔ́ɔ n kwú eliká ā ú wu ɔ́ ɛnwū klla kwú oje o tābɔ̄ ú tū ɔ̄ abɔ̄ á. 48N túkpɛɛɛ́ le ɛ̄gbā gbā Ɔwɔicō kú ɔkpani um, Ébrahām, nōo bī um tá kpaakpa ká n̄ gaá lɛ ɔyínɔ̄nyā kú ɔyínɛ́ kú ɔkpani um lɛ lɛ ɔyí kú ɔkpani um, Ébrahām ā. 49Abālɔbányā ā, da um, ɔ́dāŋ ka ā géē yá ɔdā nɛ̄ a cíkā ō yá lɛ ɔkpani um, kócōō ka gā um. Ɔ́dāŋ koó lɛ ā ŋ́, ka koó lɛ ā ŋ́, cɛ́ɛ́ ka n̄ miya ɔdā nɛ̄ n géē yá ā.”
50Anɔ́ɔ Ulában mɛ́mla Ubɛ́tūwɛ̄lu tóohi kahíníī, “Ɔdā nyā wā ŋmá ɛgiyí Óndú ā nɛ, alɔ í lɔfú ka ɔdōbɔ̄bí gā uwɔ̄ glá ŋ́. 51Urebéka yɔ̄ iyɔ̄bū uwɔ abɔ́ɔ á, kwú ɔ̄ ú ká ā nyɔ̄. Kóō wɛ ɔnyā kú ɔyí ɔkpani uwɔ, ɛ́gɛ́nɛ̄ Óndú ā ka lɛ ā.”
52Eko nɛ ɔ̄cocɛ̄hɔ̄ kú Ébrahām ā le ɛlā nyā pó ā, ó túkpɛɛ́ le eyī pīya kláajɛ, le ɛ̄gbā gbā Ɔwɔicō. 53Anɔ́ɔ ó le īlī mɛ́mla aɔ́dōyíifa kú oje nɛ̄hɛ́ mɛ́mla ugóolu (oje ɔdɔ) kpó wɛ̄ɛcɛ, anɔ́ɔ ó kwú kpó lɛ Urebéka. Ó klla je ɛhi nōo gbɔɔ́lá nɛ̄hi lɛ ɔyínɛ́ kú Urebéka mɛ́mla ɛ́nɛ́ nū.
54Anɔ́ɔ anú mɛ́mla ācɛ nēe bá mɛ́mla anú ā le ɔdōlé lé klla le enyi gwá. Anɔ́ɔ é le gbo abɔ́ɔ á. Eko nēé cāŋjɛ ɔ̄cɔ̄ɔ̄cī ā, ó kahíníī, “Habɔ̄ um tá cɛ́ɛ́ kú n̄ cīgbīhi ga ɛgiyí ɔkpani um.”
55Amáŋ ɔyínɛ́ kú Urebéka mɛ́mla ɛ́nɛ́ nū kahíníī, “Ká ɔ́ncɛ́nyā ā kóō yɔ̄ mɛ́mla alɔ lígíí, ɛ̄cī igwó ōfōōfūnū ɛ́ɛ́, cɛ́ɛ́ kóō lɔfú nyɔ̄ igbīhāajɛ.” 56Anɔ́ɔ ó da uwá kahíníī, “Aá kwú um tū ɛ́ɛ́ gɛ ŋ́. Abɔ̄ Óndú ā le iyāwū kú um ā yá lɔhi ɛɛ́ ā, ká n̄ nyɔ̄ ga ɛgiyí ɔkpani um.” 57Anɔ́ɔ é kahíníī, “Ālɔ̄ lɛ ɔ́ncɛ́nyā ā hīgwú kú ālɔ̄ da ɔ́ ɔ̄kā.” 58Anɔ́ɔ é le Urebéka hīgwú, anɔ́ɔ é le ɔ̄kā da ɔ́ kahíníī, “A dɔɔ̄kā ō nyɔ̄ mɛ́mla ɔ̄cɛ āa?” Ó cɛ̄ kahíníī, “Īī, n géē nyɔ̄.” 59Anɔ́ɔ é cɛ̄ lɛ Urebéka, ɔyínɛ́ uwā, mɛ́mla ɔ̄cocɛ̄hɔ̄ kú ɔlɛ́ uwā nōo ī leyīkwu Urebéka ā, kóō nyɔ̄ mɛ́mla ɔ̄cocɛ̄hɔ̄ kú Ébrahām mɛ́mla ācɛ nēe wā mɛ́mla anú ā. 60Anɔ́ɔ é le ɔhā hɛ́ ce ɔ́ klla le okónu cā lɛ Urebéka kahíníī,
“Awɔ, ɔyínɛ́ alɔ nɔ̄nyā ā, ká ā kwú pīya ɛ́nɛ́ kú ācɛ úlúúlā igbíngbídi!
Ayááyí uwɔ kéē mīyɛ aɔ́lɛ́ kú aólɛlā kú uwā tɔ̄ɔkwu.” 61Anɔ́ɔ Urebéka mɛ́mla ɔ̄cocɛ̄hɔ̄ kú nū ā cāŋjɛ gaá cɛyí aínyankwūlūmī kéē nyɔ̄ mɛ́mla ɔ̄cocɛ̄hɔ̄ kú Ébrahām ā. Anɔ́ɔ é gbɔɔ́ ō nyɔ̄ tɔ̄há á.
62Ɛpléeko nyā Áyísīki pīyɛyí ŋmá Ubiyɛlaháyírɔ̄yi#24.62 ɔkɔ opīyabɔ̄ nɛ̄ncɛ̄ ōhī le tá ipú ígbíli kú; Uhíbru ŋmá ī wā. “Obugā kú ɔ̄cɛ nōo má um” anɔ́ɔ ó gaá lā Unégēbu á. 63Áyísīki le tɛ́ɛcɛ, ɔ̄nɔ̄ɔ̄nɛ̄ kóō mīyɛ owu. Ó je eyī gicō anɔ́ɔ ó le aínyankwūlūmī má bá yɔ̄ ī wā á. 64Eko nɛ̄ Urebéka le Áyísīki má ā, ó le hīlatá ŋmá ɛyí inyankwūlūmī nōó cɛyí nū ā. 65Anɔ́ɔ ó le ɔ̄kā da ɔ̄cocɛ̄hɔ̄ kú Ébrahām ā kahíníī, “Ɔ̄nyɛ yɔ̄ ī wā ɛgiyí alɔ ŋmá ipú ɛhɔ̄ yɔ̄ āa?” Anɔ́ɔ ɔ̄cocɛ̄hɔ̄ ā kahíníī, “Ɔkpani um nɛ,” Anɔ́ɔ Urebéka kwú adíko kú nū ú pīya klá eyī á. 66Ɔ̄cocɛ̄hɔ̄ ā le odúúdú ɔdā nēe yá ɛga nōó ŋmá kpɛ́mm ā kpó ka lɛ Áyísīki. 67Anɔ́ɔ Áyísīki lɛ Urebéka bī wā ipú áklɔ̄kpɛ nɛ̄ ɛ́nɛ́ nū lā gbɔbū ā, anɔ́ɔ ó kwú pīya ɔnyā nū á. Urebéka he Áyísīki ɔtū nɛ̄hi, anú tá ɔ̄ ɔtulé ipú ikwū kú ɛ́nɛ́ nū mɛ́ɛ́ á.
Voafantina amin'izao fotoana izao:
OHÚTU 24: IFBCL
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra