Luka 22
22
Yahuza A Jǝla Gɔ Gǝ Lungto Lungto Yesu
(Mat 26:1-5; Mar 14:1,2; Yoh 11:45-53)
1Nǝn kwama Dikulom Kʊkkʊm nɨ mɨ Yisti woi, wʊnɨ jǝ jo lɛ gɔ Dikulom Yabtǝmɨ a dwama. 2Dʊʊm nǝbkǝlamɔ jǝbɔ nǝb mɛlalɨ diilɔ jǝ saa gola nɨ lɛ jǝ jʌm gǝn nɛ daddadɨ. Jǝ swɨ lɛ jǝ maa nyɔ jʊ a bwɨɨ jǝ nyʊwa taal nǝbɨɨ lɛ.
3Nǝngɔ Mammɔ a dɔ nǝl Yahuza Iskariyotii, win a mʊgɔ bɛtɔ mɛlalɨ gǝnɔ nɨ kʊb jeli yoi. 4Yahuza a shu ya mʊrkam nyiyo jǝbɔ dʊʊm nǝbkǝlamɔ jǝbɔ dʊʊm tɔɔtǝm Kan Kwaamanɔ, kanga gǝ lungtom Yesu lɛɨ. 5Nǝngɔ ja maa fulotǝm nǝl. Ja fɛka gɔ jǝ ywa gǝn kemʌn. 6Yahuza a jǝla nǝn nyɔ. Nǝngɔ a tǝl saatǝm gola nɨ gǝ lungtom Yesu lɛɨ, a kwama nɨ mɨ nǝb wo a daa Yesu woi.
Yesu A Ja Dikulom Yabtǝmɔ
(Mat 26:17-25; Mar 14:12-21; Yoh 13:21-30)
7Dikulom Kʊkkʊm nɨ mɨ Yisti woi a kɛla a bɛ. Dikulom Yabtǝm nɨ jǝ biyom gal lɛɨ. 8Yesu a twam Bitrus jǝbɔ Yohana gɔ, “Ya jǝ́ fɛka bǝm jǝjalǝn Dikulom Yabtǝmɔ sǝ bǝ ja.”
9Ja bʌ gǝn gɔ, “Nǝn fɛka mʊn jǝjalǝn nɨ a fee?”
10Nǝngɔ a jǝla ji gɔ, “Na jǝ́ dɔ tuulɔngɨ, jǝ́ nya nya kaa balɨ a do suul mwɛ a dul gǝn. Jǝ́ bwang gǝm, jǝ́ yɔ ya jǝ́ dɔ lɔngɔ dɔm lɛɨ. 11Jǝ́ sʊwa gǝn jengɔ, ‘Nǝn feyi a twam nǝn a daa mɔ woi gɔ, kan shigtǝm faabǝmɨ ba gǝ jam jǝjalǝn Dikulom Yabtǝm lɛ jǝbɔ bɛtɔ mɛlalɨ gǝnɨ, gǝ na a fee?’ 12Nʊng jen nʊng dalɨ kan dʌbʌl wʊnɨ ja fɛkaɨ. N daagɔ jǝ́ fɛka bǝm jǝjalǝnɔ lɛ woi.”
13Nǝngɔ ja shui, ya ja nya dǝngdǝng kanga Yesu a sʊwa ji. Nǝngɔ ja fɛka jǝjalǝn Dikulom Yabtǝmɨ.
Nɔɔtǝm Mwɛ Fogfogi Sagsag Tɛlalɔɨ
(Mat 26:26-30; Mar 14:22-26; 1Kor 11:23-26)
14Kumɔ ba laɨ, nǝngɔ Yesu a yɨ jatǝm jǝjalǝnɔ dakini jǝbɔ bɛtɔ twama gǝnɨ. 15Nǝngɔ a sʊwa ji gɔ, “Mǝ nyʊwa wɛl jatǝm Dikulom Yabtǝmɔ lɛ dakini nǝbɔ jen sǝla n nɔɔ gaalan! 16Mǝ sʊwa jen nɛ, mɨsɔ mǝ yǝla lɛ n ja Dikulom nɨ wo, na kɛl nɨ a yii bɔ a fɔlɔn lɔ Kwaamaɨ.”
17Nǝngɔ a do kʌshigɨɨ, a buu Kwaama gǝm kang, a sʊwa gɔ, “Jǝ́ yo jǝ́ tǝga a kʊm jen. 18Mǝ sʊwa jen nɛ, a kǝngkǝnɨ mɨsɔ mǝ yǝla lɛ n nɔɔ mwɛ tʊʊl fogfogi nɨ wo tag, na fɔlɔn lɔ Kwaamaɨ a bɛ bɨɨ.”
19Nǝngɔ a do kʊkkʊmɔ, a buu Kwaama gǝm kangɨ, a kǝl, a nǝ jii, a sʊwa gɔ, “Wʊnɨ n bʊtɔ mɨ wʊnɨ mǝ nǝ a kɛl dul jeni. Ya jǝ́ maa lɛ nyɔ sǝ ya jǝ́ bʊʊla lɛ nǝn mǝ.”
20A gul jatǝm jǝjalǝnɔ gǝm, nǝngɔ a do kʌshigɔ a sʊwa gɔ, “N swatǝm yaa tʊʊm mǝndɨ wʊnɨ ja tǝla a kɛl dul jeni. 21N wɔ nʊ nɨ lungto i lɛɨ, ja lɛ dakini jǝbɔ mǝ! 22Bʊla Nǝlɨ bʊla bʊla kanga ja fɛkaɨ. N mwɛ nʊ nɨ a lungto gǝnɨ.” 23Nǝngɔ bɛtɔ mɛlalɨ gǝnɔ a tǝl bʌbko lɛ gɔ nuwo a kʊm jin maa lɛ nyɨɨ.
Gʊbkatǝm Gɔ Kɛna Nuwo N Dʊʊɨ
24Nǝngɔ gʊbkatǝmɔ a gun a kʊm bɛtɔ mɛlalɨ gǝnɨ gɔ nuwo nyɨ yǝlam dʊʊ lɛɨ. 25Yesu a sʊwa ji gɔ, “Fɔlɔlɔm nǝb nɨ a nyǝm bɔ Kwaamaɨ, jǝ nʊng nǝbam jinɔ fɔlɔn. Nǝb dʊʊm nɨ maa jim borang lɛɨ, gǝ sʊwa dul jinɔ gɔ nǝb tɨkalɨ nǝbɨɨ. 26Bɛ ka yǝlam lɛ nyɔ a kʊm jen. Bɛ dʊʊgɔ a kʊm jeni a yǝlam bwɛsǝn. Nʊ nɨ a kǝga jǝbɔ jeni a yǝlam na bwɛ jwaalɛ. 27Nuwo a laa dʊʊnɨ, n nʊ nɨ a yɨ ja lɛɨ ka? N nʊ nɨ tǝga jǝjalǝn nɛɨ ka? N ke bɔ nʊ nɨ a yɨ ja lɛɨ ka? Mǝ wɔ a kʊm jen na nʊ nɨ tǝga jǝjalǝn nɛɨ.
28“Nǝjen jǝ́ tɨɨ a daa mɨ woi a gaalanɔ mǝ nɔɔɨ. 29Kanga Tɛtɛ mɨ a nɨ ɨ kwaan fɔlɔnɨ, nǝngɔ mǝ nǝ jen nɛɨ, 30sǝ jǝ́ ja, jǝ́ nɔɔ jǝbɔ mǝ a fʌlen a mʊgɔ fɔlɔn lɔ mɨ, jǝ́ yɨ a kotere fɔlɔn, jǝ́ maa fɔlɔn nyatɨnɔ kʊb jeli yoi, a nǝbɔ Israilaɨ.
Bitrus Kana Kana Nyǝmtǝm Yesui
(Mat 26:31-35; Mar 14:27-31; Yoh 13:36-38)
31“Bitrus, Bitrus! Mammɔ a saa gola sǝ a yu jen na jaam. 32N maa mʊn keli Bitrus, kage nǝtǝm bɨlǝngkɛl mʊnɔ yal. Na ń yǝla ń bɛɨ, bɛ ń kʊʊ kɛtǝlam mʊnɔ gǝm nǝl.”
33Nǝngɔ Bitrus a jǝla gǝn gɔ, “Tɛlalɔ, n jǝla n yɔ a lɔsomi nǝbɔ mɔ. Na n bwaaɨ, bǝ bʊla dakini.”
34Yesu a jǝla gǝn gɔ, “Mǝ sʊwa ń nɛ Bitrus, mʊ kana kana nyǝmtǝm mǝndɨ naagɔ taal nǝn kum nɨ sǝla kwalɨ jangagɔ a ma kamɨ.”
35Nǝngɔ Yesu a bʌ bɛtɔ mɛlalɨ gǝnɨ gɔ, “A di nɨ mǝ twam jen mɨ bǝla kemʌn woi, mɨ sʊwa woi, mɨ twam woi, jǝ́ lɛ kaa jǝl wo ka?”
Nǝngɔ ja jǝla gǝn gɔ, “Ɔ ɔ.”
36Yesu a sʊwa ji gɔ, “A kǝngkɨɨ, gwam nʊ nɨ nǝn bǝla kemʌn, nǝn sʊwaɨ, ga do ga ta a kang. Na nʊ nɨ mɨ nǝn gulʌni, ga miyo bɛllɛ gǝnɔ ga ten win. 37Mǝ sʊwa jen nɛ, jʊ ja mʊla a kɛl Kwaamaɨ yii yii a dul mɨ gɔ, ‘Ja mʊr gǝn a mʊgɔ nǝb bwɨlangkɛl.’ Jʊ ja sʊwa a dul mɨɨ, kwama yiitǝm gǝnɔ a la.”
38Bɛtɔ mɛlalɨgɔ a sʊwa gǝn gɔ, “Tɛlalɔ, gulʌntɨnɔ wɔ yo.” Nǝngɔ Yesu a sʊwa ji gɔ, “A wʊlam.”
Yesu A Maa Keli A Dʌbʌl Yem Zaitun
(Mat 26:36-46; Mar 14:32-42)
39Yesu a jel a shu a Yem Zaitun kanga gǝ maam lɛɨ, nǝngɔ bɛtɔ mɛlalɨ gǝnɔ a bwang gǝmɨ. 40Ya ja la daagɨɨ, nǝngɔ a sʊwa ji gɔ, “Jǝ́ maa keligɔ, kage jǝ́ yal a mʊgɔ tɛltǝm.” 41Nǝngɔ a bǝla jii, na kʊtatǝm matǝm tɛl. Nǝngɔ a gǝla jʊng a maa keligɨɨ, 42a sʊwa gɔ, “Tɛtɛ, na ń jǝlaɨ, dem mɨ bɛ kʌshi gaalan nɨ. Wʊnɨ ke bɔ swɨtǝm mɨ, n swɨtǝm mʊn.” 43Nǝngɔ bwɛ twama Kwaamaɨ a gǝla a dʌbʌl ba kʊʊ gǝm nǝl lɛɨ. 44Jʊ nɨ gɔ a mʊgɔ gaalan dangǝnɨ, a sʊtǝn keligɔ, mɨbamɔ jel lɛ a bʊtɔ gǝn na tʊʊm tǝla lɛ a tǝm.
45Kwama Yesu a gun a maatǝm keli, nǝngɔ a yǝla yɔ a daagɔ bɛtɔ mɛlalɨ gǝnɔ woi, ya nya ji jǝ daa dum lɛ a mʊgɔ fitǝm nǝl. 46Nǝngɔ a bʌ ji gɔ, “N wɛ a bwɨ jǝ́ daa dum lɛɨ? Jǝ́ gun jǝ́ maa keligɔ, kage jǝ́ yal a mʊgɔ tɛltǝm.”
Ja Ta Yesu
(Mat 26:47-56; Mar 14:43-50; Yoh 18:2-11)
47A dɨ bɔ kiyotǝm kɛlɔ, nǝngɔ mʊrkalɨ nǝbɨɨ a bɛɨ. Nǝn Yahuza win a mʊgɔ bɛtɔ mɛlalɨ gǝnɔ kʊb jeli yoi, a bɛ nǝn jii. Nǝngɔ a bɛ nǝn dɔɔm sǝ ba kwal Yesui. 48Yesu a bʌ gǝn gɔ, “Yahuza, nǝn kwaltǝm mʊ lungto Bʊla Nǝlɨ lɛɨ ka?”
49Bɛtɔ mɛlalɨ gǝnɔ nɨ jǝ dakinii ja kuwo jʊ nɨ bwɨ lɛɨ, nǝngɔ ja bʌ gǝn gɔ, “Tɛlalɔ, nǝ kaba ji nǝn gulʌn ka?” 50Nǝngɔ kaa win a kʊm ji a mwatɨm lɔl kang jajǝng bwɛ jwaalɛ dalɨ nǝkǝlagɨɨ.
51Yesu a sʊwa ji gɔ, “Jǝ́ bǝla wo.” Nǝngɔ Yesu a do lɔl nʊ nɨ ja mwatɨɨ, a yǝla a swa tʌgoi.
52Nǝngɔ Yesu a bʌ dʊʊm nǝbkǝlamɔ jǝbɔ nǝb dʊʊm tɔɔtǝm Kan Kwaamanɔ jǝbɔ nǝb dʊʊm nǝbɨɨ nɨ a bɛ sǝ ba ja ta gǝnɨ gɔ, “Jǝ́ jel nǝn gulʌn jǝbɔ dwam sǝ jǝ́ ta ɨ maa na nǝkuu? 53Kwangkwang mǝ dakini nǝbɔ jen a Kan Kwaaman, jǝ́ ta ɨ bɔ. Wʊnɨ n kwama jen, n kwama maajɨ fɔlɔn kumtojili.”
Bitrus A Kana Nyǝmtǝm Yesui
(Mat 26:57,58,69-75; Mar 14:53,54,66-72; Yoh 18:12-18,25-27)
54Nǝngɔ ja ta Yesu ja shu nǝnɨ. Ja yɔ nǝn gɔ a lɔ dalɨ nǝkǝlagɨɨ. Bitrus bwang jim lɛ a kʊta. 55Ba ja mʊʊ kǝlagɔ a talɨ lɔ jǝ yǝmam woi, Bitrus tǝgǝn yǝm a kʊm jin. 56Kaa win a kʊm bɛtɨ nɔɔtǝn nɨ maa maajɨ lɛ a lɔgɨɨ, nǝngɔ a kuwo gǝn yǝm a keli kǝlaɨ, nǝngɔ a ya gǝm nu a sʊwa gɔ, “Balɨ nɨ tǝgǝn gǝ na jǝbɔ Yesu!”
57Bitrus a kana gɔ, “Nɔɔlɨ, mǝ nyǝm gǝn bɔ.”
58Ja yɨmtǝn dǝmɨ, kaa nʊ nɨ a kuwo Bitrusi, nǝngɔ a sʊwa gɔ, “Bɨlǝngǝn, mʊ tǝmʊn mʊ wo a kʊm jin.”
Bitrus a gar gǝm gɔ, “Ke bɔ mǝ.”
59Yɨgǝtǝn dǝmɨ, nǝngɔ kaa nǝl gɔ, “Mɨ nyǝmatǝm wo bwɛ nɨ tǝgǝn gǝ na jǝbɔ gɔ, jʊ a bwɨɨ n bwɛ Galilii.”
60Nǝngɔ Bitrus a sʊwa gɔ, “Mǝ nyǝm bɔ jʊ mʊ sʊwa lɛɨ!” Lǝga bɔ ga nʊng nyiyo, nǝngɔ kwalɨ jangagɔ a ma kamɨɨ. 61Tɛlalɔ a ka nu a dʌng gǝnɨ, nǝngɔ Bitrus a bʊʊla nǝn jʊ Tɛlalɔ a sʊwa gǝnɨ gɔ, “Dwiyen mʊ kana kana nyǝmtǝm mǝndɨ naagɔ taal sǝla kwalɨ jangagɔ a ma kamɨ.” 62Nǝngɔ Bitrus a jel a yooli ya ji wigɔ nǝn bʊr nyɨɨ.
Ja Mog Gǝn, Ja Bʊg Gǝn
(Mat 26:67,68; Mar 14:65)
63Nǝb nɨ tɔɔ Yesu lɛɨ, ja mog gǝn nǝngɔ ja bʊg gǝnɨ. 64Nǝngɔ ja bwam nu gǝnɨ, ja bʌ gǝn gɔ, “Sʊwa nǝn, nuwo a jǝga ńɨ?” 65Jǝ sʊwala gǝn bwɨlang katɨ lɛ, jǝ tuwola gǝn nɛ.
Ja Bɛ Nǝn Yesu A Kǝga Nǝb Dʊʊmɨ
(Mat 26:59-66; Mar 14:55-64; Yoh 18:19-24)
66Tǝmsɛlɨ nǝngɔ mʊrkalɨ nǝb dʊʊm nǝbɨɨ jǝbɔ dʊʊm nǝbkǝlamɔ jǝbɔ nǝb mɛlalɨ diilɔ ja mʊrkaɨ, nǝngɔ ja yɔ nǝn Yesu a kǝga nǝb dʊʊm koteregɨɨ. 67Ja bʌ gǝn gɔ, “Sʊwa nǝn, nǝmɔ mʊ nǝn Kiristi ka?” Nǝngɔ a sʊwa ji gɔ, “Na n sʊwa jeni, mɨsɔ jǝ́ jǝla lɛ nǝn. 68Na n bʌ jen kɛlɨ, mɨsɔ jǝ́ jǝla ɨ lɛ. 69A kǝngkǝnɨ, Bʊla Nǝlɨ yɨ yɨ a kang jajǝng Kwaamaɨ, Nǝ kwaan.”
70Nǝngɔ gwam jinɔ ja bʌ gǝn gɔ, “Mʊ nǝn Bʊla Kwaamaɨ ka?”
A jǝla ji gɔ, “Jǝ́ sʊwa dǝngdǝng, nǝmǝ.”
71Nǝngɔ ja sʊwa gɔ, “N kaa nǝtǝm nyiyo wɛ bǝ saa lɛ tagɨ? Bǝn nǝn kang bǝn bǝ nyʊwa a sʊwa nǝn nyiyo gǝn.”
Voafantina amin'izao fotoana izao:
Luka 22: DBD
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©️2024 Luke Initiative for Scripture Translation