ମାତିଉ 5
5
ଜିସୁଲା କୁନ୍ଡାବାଗ୍ବକ୍ ଆରେମଲେ ଅମାକ୍ଡେନ୍
1ସା' ଅବୁଦି ରେମଲେ ମାଇନ୍ବକ୍ ସା'କୁନୁଂ ଜୁଲ'ସେକ୍ ଜିସୁଲା ମୁଇ କୁନ୍ଡାବାଗ୍ବକ୍ ଡାଇ'ସେକ୍ ଆତା ମୁଇ ତାନ୍ବକ୍ ଲେଇ'ଗା' । ତିର୍ଗି' ମାଇନା ସିସ୍ୟଲେ ମାଇନା ଉନ୍ତୁ' ସା'ଗା' । 2ସା' ମାଇ ଆମା'ଏ ଅମାଗ'ସେକ୍ ସୁନ':
ସତଇସାନା ସାର୍ଦା
(ଲୁକ 6:20–23)
3“ଜାଜା ନିଂ ଆମାପ୍ରୁ ମାରି ଅଦିକ୍ ଅଦିକ୍ ମାଗ'ନାଉ ଡେନ୍ତା ଡ'ସେକ୍ ନିଜର୍ନା ଜିବନ୍ବକ୍ ଏତ୍ତା ମା'ଏ କପାଲ୍ବାଇ' ରେମଲେ ।
ମାସା'ଡ'ନା ସରଗ୍ରାଜି ଡୁ'ତୁନ୍ବାଇ' ରେମଲେପୁଲେଇ ।
4ଜାଜା ଉକ୍ସେ' ୱାଇସେକ୍ସେକ୍ ଡୁତା ମା'ଏ କପାଲ୍ବାଇ' ରେମଲେ ।
ମାସା'ଡ'ନା ମାପ୍ରୁ ମା'ଏନ୍ ଜିବନ୍ବକ୍ ସାର୍ଦା ବେ'ତ ।
5ଜାଜା ଦରମ୍ବାଇ' ଡୁତା ମା'ଏ କପାଲ୍ବାଇ' ରେମଲେ ।
ମାସା'ଡ'ନା ମାପ୍ରୁ ବେ'ତିଂ ଡ'କୁନୁଂ ତିମେ ଦର୍ତନିନା ଅଦିକାର୍ ମା'ଏ ବାମ୍ତା ।
6ଜାଜା ମାପ୍ରୁନା ମୁନ୍ସୁଗ ବଲ୍ ଡୁକୁପୁଲେଇ ଅବୁଦି ମୁନ୍ ଡେଂଗୁତା ମା'ଏ କପାଲ୍ବାଇ' ରେମଲେ ।
ମାସା'ଡ'ନା ମାପ୍ରୁନା ମୁନ୍ସୁଗ ଆମା'ଏ ଗୁଲାଇ ବାମ୍ତା ।
7ଜାଜା ଆପାଲ୍ ରେମଲେ ଲିବିସୁପ୍ତା ମା'ଏ କପାଲ୍ବାଇ' ରେମଲେ ।
ମାସା'ଡ'ନା ଆମା'ଏସା ମାପ୍ରୁ ଲିବିସୁପ୍ତା ।
8ଜାଜା ମା'ଏନ୍ ଜିବନ୍ବକ୍ ପବିତ୍ରବାଇ' ଡେଂସେକ୍ ଡୁତା ମା'ଏ କପାଲ୍ବାଇ' ରେମଲେ ।
ମାସା'ଡ'ନା ମା'ଏ ଆମାପ୍ରୁ ଜୁତ ।
9ଜାଜା ସାନ୍ତିସାର୍ଦା ଡେଂସେକ୍ ଡୁକୁପୁଲେଇ କାମ୍ ଡେମ୍ତ ମା'ଏ କପାଲ୍ବାଇ' ରେମଲେ ।
ମାସା'ଡ'ନା ଆମା'ଏ ମାପ୍ରୁନା ଉଁ'ଉଁନେ ଡ'ସେକ୍ ୱାଇତ ।
10 #
1 ପିତର୍ 3:14
ଜାଜା ମାପ୍ରୁନା ମୁନ୍ସୁଗ ଡୁକୁନୁଂ ବଲ୍କାମ୍ ଡେମ'ସେକ୍ କସ୍ଟ ବାଂଗୁତା ମା'ଏ କପାଲ୍ବାଇ' ରେମଲେ ।
ମାସା'ଡ'ନା ସରଗ୍ରାଜି ମା'ଏପୁଲେଇ ।”
11 #
1 ପିତର୍ 4:14
“ପେ ଆନିଂ ବିସ୍ବାସ୍ ଡେମ'ତୁପେସା' ରେମଲେ ଆପେ ଅ'କିୟାଲିତା, କସ୍ଟ ବେ'ତ ମାରି ମା'ଏ ଅଲିରାକ୍ବାଇ' କାମ୍ ଡେମ'ତା ଡ'ସେକ୍ ପଲୁ ସୁନ୍ତ, ମାତର୍ ପେ କପାଲ୍ବାଇ' ରେମଲେ । 12#ପେରିତ 7:52ଇନ୍ତେକନ୍ଡେ'କା ଆବାବବାଦିଲେସା ଡୁ'ତୁନାଉ ମା'ଏ କସ୍ଟ ବେଡ'କୁ ଡ'ସେକ୍ ପେ ଏତ୍କୁଲା । ସା' ପେ ଅବୁଦି ସାର୍ଦାକୁସି ଡେଂସେକ୍ ଡୁକୁଲା ମାସା'ଡ'ନା ସରଗ୍ବକ୍ ଆପେ ମାପ୍ରୁ ଅବୁଦି ମୁନା'ବାଇ' ପୁରାସ୍ ବେ'ତ ।”
ଆଜିସୁଲା ବିସ୍ବାସ୍ ଡେମ'କୁନୁଂ ରେମଲେ ବୁତି'ସୁଗ ମାରି ତାରା'ସୁଗ ଡୁକୁଡୁତା ଡ'ସେକ୍ ଜିସୁଲା ସୁଁସୁଡେନ୍
(ମାର୍କ 4:21; 9:50; ଲୁକ 14:34–35)
13 #
ମାର୍କ 9:50; ଲୁକ 14:34,35 ପେ କେନ୍ ଦର୍ତନିନା ରେମଲେନ୍ ବିତ୍ରେ ବୁତି'ସୁଗ ଡୁତୁପେ । ମାତର୍ ଗୁତୁନ୍ ବୁତି'ବକ୍ ଗାଇବି' ଆଡୁତା ଡ'ନା ଆତୁନ୍ ବୁତି' ମାରି ଅଗାଇବି' ଗଂତୁନେଇ' ଇ? ଆରାକ୍ । ସା' ଗାଇବି' ଆଡୁତା ଡ'ନା ମାରି ମାଏସା କାମ୍ପୁଲେଇ ଗୁତୁନ୍ ବଲ୍ ଆରାକ୍ ଡେନ୍ତାସା' ଗୁତୁନ୍ ବାଇରି ଅଡକ୍ସୁଂତ । ମାରି ରେମଲେ ଗୁତୁନ୍ ବାଗ୍ବକ୍ ଜଗ'ଜଗ' ଉଇତା ।
14 #
ଜଅନ୍ 8:12; 9:5 ପେ ଗୁଲାଇ ଦେସ୍ଦୁନିଆନା ତାରା'ସୁଗ ଡୁତୁପେ । ମୁଇ ମୁନା'ଉଂଗମ୍ କୁନ୍ଡା ବାଗ୍ବକ୍ ଡୁତା ଡ'ନା ଗୁଲାଇ ରେମଲେ ଆତୁନ୍ ଉଂଗମ୍ ଜୁଜୁ ଗଂତା । 15#ମାର୍କ 4:21; ଲୁକ 8:16; 11:33ଜାଏସା ବତି ଅ'ଡଲ'ସେକ୍ କିକ୍ ଆଲୁଂ ଆବୁଂତ ମାତର୍ ଗୁତୁନ୍ ବତି ବୁଂବୁଂନା ତାନ୍ବକ୍ଉ ବୁଂତ । ଡୁ'ତୁନ୍ ବୁଂଅଁ'ନା ଡିଂଅଁବକ୍ ଆଗୁଲାଇର ତାରା' ବେ'ତ । 16#1 ପିତର୍ 2:12ଡୁ'ତୁନ୍ଉ ବତିନା ତାରା' ଗୁଲାଇର ଜୁଜୁ ଗଂକୁନୁଂସୁଗ ପେ ଡେମ'କୁନୁଂ ବଲ୍କାମ୍ ରେମଲେ ଜୁଲ'ସେକ୍ ସରଗ୍ବକ୍ ଡୁକୁନୁଂ ଆମାପ୍ରୁ ସୁନ୍ଡ୍ରଲେଇ' ।
ମାପ୍ରୁ ବେଡ'କୁନୁଂ ଗୁଲାଇ ନିୟମ୍ ବଲ୍ ଡ'ସେକ୍ ଜିସୁଲା ସୁଁସୁଡେନ୍
17ମସାଲା ଲେକ୍ଲ'କୁନୁଂ ନିୟମ୍ ମାରି ବାବବାଦିଲେ ଲେକ୍ଲ'କୁନୁଂ ନିୟମ୍ ଗୁଲାଇଉ ବୁଡାଇବାର୍ପୁଲେଇ ମାଇ ଆକେ ସା'ଗୁତା ଡ'ସେକ୍ ପେ ଆଏତ୍ଗା' । ଗୁତୁନ୍ ଗୁଲାଇ ବୁଡାଇବାର୍ପୁଲେଇ ଆରାକ୍ ମାତର୍ ଗୁତୁନ୍ ଗୁଲାଇବକ୍ ଲେକ୍ଲ'କୁନୁଂ ସମାନ୍ ଡେମ'ସେକ୍ ଅ'ଡମ୍ପୁଲେଇଉ ନିଂ ସା'ଗୁତିଂ । 18#ଲୁକ 16:17ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂ ଗୁଲାଇ ତୁମ' ସତଇସା ଡେଂନାଉ ଡେନ୍ତା । ସା' କେନ୍ କି'ତୁଂ ମାରି ଦର୍ତନି ଡୁକୁଡମ୍ ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂ ମୁଇ ଡାଉବାଇ' ଅକ୍ୟର ଆରା'ଗେ ମୁଇ ଡାଉବାଇ' ବୁନାଇ'ସା ଆନାସ୍ତା ଡ'ସେକ୍ ନିଂ ଆପେ ସତଇସା ସୁନ'ତିଂ । 19ସା' ମାପ୍ରୁନା ଉଲାକ୍ବକ୍ ଡୁକୁନୁଂ ଡାଉବାଇ' ନିୟମ୍ ବିତ୍ରେ ଆମୁଇ ନିୟମ୍ସା ଜା ଆମାନ୍ତା ମାରି ଆପାଲ୍ ରେମଲେସା ଗୁତୁନ୍ ମମାନ୍ବାର୍ପୁଲେଇ ଅମାକ୍ତ ଆମାଇ ସରଗ୍ରାଜିବକ୍ ମୁନା'ରେମ୍ସୁଗ ଆଜୁତ । ମାତର୍ ଗୁତୁନ୍ ଜା ମାନ୍ତା ମାରି ଆପାଲ୍ ରେମଲେସା ଗୁତୁନ୍ ବଲ୍ ଅମାକ୍ତ ଆମାଇ ମାପ୍ରୁନା ରାଜିବକ୍ ମୁନା'ରେମ୍ ଡ'ସେକ୍ ଜୁତ । 20କେନ୍ ପାରୁସିଦଲ୍ନା ରେମଲେ ମାରି ମସାଲା ବେଡ'କୁନୁଂ ନିୟମ୍ ଅମାକ୍ରେମେ ନେଇ ମାପ୍ରୁନା ତୁମ' ମାନ୍ସେକ୍ ଡୁତୁନେଇ ଡ'ତା, ମାତର୍ ପେ ମା'ଏନ୍କୁରୁଂ ଅଦିକ୍ ମାପ୍ରୁନା ତୁମ' ମାନ୍ସେକ୍ ଆଡୁତୁପେ ଡ'ନା ପେ ଇନ୍ଡଇ'ଏସା ସରଗ୍ରାଜିବକ୍ ଗୁଗାଇ ଆଗଂତୁପେ ଡ'ସେକ୍ ନିଂ ଆପେ ସୁନ'ତିଂ ।
ଆଜାଏସା ଆଗିସେ'ଗା'
(ଲୁକ 12:57–59)
21“‘ଆରେମଲେ ଆଅଡାବ' ମାରି ଜାଜା ଅଡାପ୍ତ ଆମା'ଏ ବିସାର୍ନା ଡେମ'ସେକ୍ ଡନ୍ଡ୍ ବିବେ' ଡୁତା’ ଡ'ସେକ୍ ଆନେଇ'ନା ୟା'ତୁତାଲେ ଅଇନ୍ତେକନ୍ଡେ'କା ସୁନ'କୁନୁଂ ପେ ଅଂଅଁ'ତୁପେ । 22ମାତର୍ ନିଂ ଆପେ ସୁନ'ତିଂ ଜା ଆପାଲ୍ରେମ ଗିସେ'ତା ଆମାଇ ବିସାର୍ନା ଡେମ'ସେକ୍ ଡନ୍ଡ୍ ବେ'ତ । ମାରି ଜା ଆପାଲ୍ରେମ ବାସିଡିଲ'ସେକ୍ ଅଲିରାକ୍ବାଇ' ତୁମ' ସୁନ୍ତ ଆମାଇ ବିସାର୍ନା ଡିନ୍ଡେମ୍ନା ମୁନା'ରେମଲେନ୍ବକ୍ ରିଂଅଁ'ଉଇସେକ୍ ବିସାର୍ନା ଡେମ୍ତ । ମାରି ଜା ଆପାଲ୍ରେମ ମାକ୍ନାବାଇ' ଡ'ସେକ୍ ସୁନ୍ତ ଆମାଇ ବିସାର୍ନା ଡେମ'ସେକ୍ ସୁଂଅଁ ଡକୁନୁଂ ନର୍ଗବକ୍ ରାନ୍ଡେଲ' ବେ'ତ ।”
23“ସା' ପେ ଆମାପ୍ରୁ ସୁନ୍ଡ୍ରକ୍ସେକ୍ ମାମା ଗିଗେପୁଲେଇ ବେଦି କନ୍ଡେକ୍ ଡୁକୁନୁଂବେଲା ମାଇ ଆନିଂ ଗିସେ'ଗୁତାବେ ଡ'ସେକ୍ ଜାଏସାନା ଏତ୍ ସାକ୍ନା, 24ଗୁତୁନ୍ ଆମାପ୍ରୁ ଗିଗେପୁଲେଇ ରିଂଅଁ'କୁନୁଂ ଆତା ବେଦିକନ୍ଡେକ୍ଉ ବୁଂଅଁ'ସେକ୍ ମୁଲ୍ ମାଇନ୍ବକ୍ ଉଇସେକ୍ ମାଇବୁରଂ ମିସ୍ଲା । ତିର୍ଗି' ସାକ୍ସେକ୍ ନ ଆମାପ୍ରୁ ଗିଗେ ଗେ ।”
25“ଜାଏସା ମୁଇନ୍ଡା ଆନ ବିସାର୍ନା ଡିନ୍ଡେମ୍ନା ଜାଗାବକ୍ ରିଂଅଁ'ଉଇଡେନ୍ତା ଡ'ନା ଆତା ଉଇ ସିଁସେଇଁଉ ମନ୍ଜାକୁରୁଂବକ୍ଉ ନ ମାଇବୁରଂ ଅଇଁୟ'ସେକ୍ ସେଟ୍ଟ' ମିସ୍ବେ' । ଆରାକ୍ନା ଆନ ନନା ଦାଇରେମ୍ ବିସାର୍ନା ଡିନ୍ଡେମ୍ରେମ୍ନା ତିତିବକ୍ ରିଂ ବେ'ତ । ରିଂ ବେଡ'ନା ମା'ଏ ଆନ ସଇନିକଲେନ୍ବକ୍ ବେ'ତ । ବେଡ'ନା ଆନ ମା'ଏ ବନ୍ଦିବକ୍ ସୁରୁଂତ । 26ସୁରୁଂଅଁ' ଡ'ନା ନ ଆ'ଇ ଡାବୁ ବିବେ' ଡୁତା ଡ'ସେକ୍ ବିସାର୍ନା ଡେମ'ତା ଆଇ'ତୁନ୍ ଡାବୁ ଗୁଲାଇ ବିବେ' ଅ'ଡମ୍ପନ୍ତେ'କା ଉନ୍ତ୍କୁରୁଂ ବାଇରି ତୁତୁର୍ ଆଗଂତୁନ ଡ'ସେକ୍ ନିଂ ଆନ ସତଇସା ସୁନ'ତିଂ ।”
ଜାଲିବାଇ' କାମ୍ ଆଡେମ' ଡ'ସେକ୍ ଜିସୁଲା ଅମାକ୍ଡେନ୍
27“‘ଜାଲିବାଇ' କାମ୍ ଆଡେମ'’” ଡ'ସେକ୍ ଅଇନ୍ତେକନ୍ଡେ'କା ସୁନ'କୁନୁଂ ପେ ଅଂଅଁ'ତୁପେ । 28ମାତର୍ ଜାଏସା ମୁଇନ୍ଡା ରେମ ଆମୁଇନ୍ଡା ସେଲାନ୍ଲା ଜୁଲ'ସେକ୍ ମାଇବୁରଂ ଅଲିରାକ୍ବାଇ' କାମ୍ ଡିନ୍ଡେମ୍ନା ମୁନ୍ ସାକ୍ନା ମାଇ ଗୁତୁନ୍ ସେଲାନ୍ଲାବୁରଂ ମାଇନା ଜିବନ୍ ବିତ୍ରେ ଜାଲିବାଇ' କାମ୍ ଡେମ' । 29#ମାତିଉ 18:9; ମାର୍କ 9:47ସା' ନନା ସୁସୁମ୍ତିକୁରୁଂନା ମ' ଆନ ଅଲିରାକ୍ବାଇ' କାମ୍ ଡିନ୍ଡେମ୍ପୁଲେଇ ମୁନ୍ ବେଡ'ତା ଡ'ନା ଗୁତୁନ୍ ନ ତଗ୍ସୁଂ । ଗୁତୁନ୍ ତଗ୍ସୁଂଅଁ'ନା ଆନ ବଲ୍, ମାସା'ଡ'ନା ଆନ ସୁଂଅଁବକ୍ ରାନ୍ଡେଲ'ସୁଂଅଁ'ନା ନନା ଗୁଲାଇ ଞେରିବୁରଂ ସୁଂଅଁବକ୍ କସ୍ଟ ବୁମ୍ବାମ୍ ବାଦୁଲ୍ ଗୁତୁନ୍ ମୁଇ ନସ୍ଟ ଡେଂନା ଡେନ୍ତା । 30#ମାତିଉ 18:8; ମାର୍କ 9:43ମାରି ନନା ସୁସୁମ୍ତି ଆନ ଅଲିରାକ୍ବାଇ' କାମ୍ ଡିନ୍ଡେମ୍ପୁଲେଇ ମୁନ୍ ବେଡ'ତା ଡ'ନା ଗୁତୁନ୍ ନ ସେବ୍ସୁଂ । ଗୁତୁନ୍ ସେବ୍ସୁଂନା ଆନ ବଲ୍, ମାସା'ଡ'ନା ଆନ ସୁଂଅଁବକ୍ ରାନ୍ଡେଲ'ସୁଂଅଁ'ନା ନନା ଗୁଲାଇ ଞେରିବୁରଂ ସୁଂଅଁବକ୍ କସ୍ଟ ବୁମ୍ବାମ୍ ବାଦୁଲ୍ ଗୁତୁନ୍ ମୁଇ ନସ୍ଟ ଡେଂନା ଡେନ୍ତା ।
ଲଂସିସି'ନା
(ମାତିଉ 19:9; ମାର୍କ 10:11–12; ଲୁକ 16:18)
31 #
ମାତିଉ 19:7; ମାର୍କ 10:4 “‘ମାରି ଜାଏସା ମୁଇନ୍ଡା ରେମ ଆକୁନୁଇ'ଡେଇଁ ଲଂସି'ତିଂ ଡ'ନା ମାଇ ମୁଇ ଉଲାକ୍ବକ୍ ଲଂସି'ତିଂ ଡ' ଲେକ୍ଲ'ସେକ୍ ଆକୁନୁଇ'ଡେଇଁ ବିବେ' ଡୁତା’ ଡ'ସେକ୍ ଇନ୍ତେକନ୍ଡେକ୍ ସୁନ'କୁନୁଂସା ପେ ଅଂଅଁ'ତୁପେ । 32#ମାତିଉ 19:9; ମାର୍କ 10:11,12; ଲୁକ 16:18; 1 କରି 7:10,11ମାତର୍ ନିଂ ଆପେ ସୁନ'ତିଂ ମୁଇନ୍ଡା ସେଲାନ୍ଲା ଜାଲିବାଇ' କାମ୍ ଡେମ'ନାଉ ଆମାଇ ଲଂସିସି' ଗଂତା । ଆମାଇ ସରଉ ଲଂସିଡ'ତା ଡ'ନା ମାଇ ଆପାଲ୍ ଇଂଗେରେ ଇ'ତା ଡ'ନା ମାଇ ଜାଲିବାଇ' କାମ୍ ଡେମ'ତା । ସା' ଜା ଆମାଇ ଲଂସିଡ' ଗୁତୁନ୍ ଇଂଗେ'ରାଉ ଆମାଇ ଡୁ'ତୁନ୍ବାଇ' ପାପ୍କାମ୍ ଅ'ଡେମ୍ଡେନ୍ । ମାରି ଜାଏସା ମୁଇନ୍ଡା ଇଂଗେରେ ଡୁ'ତୁନ୍ବାଇ' ଲଂସିଡ'କୁନୁଂ ସେଲାନେବକ୍ ବୁଂଅଁ'ତା ଡ'ନା ମାଇସା ଗୁତୁନ୍ ସେଲାନ୍ଲାବୁରଂ ଜାଲିବାଇ' କାମ୍ ଡେମ'ତା ।”
ପର୍ମାନ୍ ସୁସପ୍ନା
33“ମାରି ‘ପେ ପର୍ମାନ୍ ସବ'କୁନୁଂ ଇନ୍ଡଇ'ଏସା ଆବାନାଗା' । ପ୍ରବୁଲାବୁରଂ ମୁଇନ୍ଡା ପର୍ମାନ୍ ସବ'ନା ମାଇ ଡୁ'ତୁନ୍ଉ ଡିନ୍ଡେମ୍ ଡୁତା’ ଡ'ସେକ୍ ଇନ୍ତେକନ୍ଡେକ୍ ଆନେଇ'ନା ୟା'ତୁତାଲେ ସୁନ'କୁନୁଂ ପେ ଅଂଅଁ'ତୁପେ । 34-35#ଜାକୁବ୍ 5:12; ମାତିଉ 23:22ମାତର୍ ନିଂ ଆପେ ସୁନ'ତିଂ ପେ ଇନ୍ଡଇ'ଏସା ପର୍ମାନ୍ ଆସବ'। ସରଗ୍ନା ଆରା'ଗେ ଦର୍ତନିନା ଇମି ସୁନ'ସେକ୍ ପେ ଇନ୍ଡଇ'ଏସା ପର୍ମାନ୍ ଆସବ' । ମାସା'ଡ'ନା ମାପ୍ରୁ ଲିଲେଇ'ନା କର୍ଜି ଡୁତା ସରଗ୍; ମାରି ମାଇନା ତିକ୍ସୁଂ ବୁଂବୁଂନା ଜାଗା ଡୁତା ଦର୍ତନି । ମାରି ଜିରୁସାଲମ୍ ମୁନା'ଉଂଗମ୍ନା ଇମି ସୁନ'ସେକ୍ସା ପେ ପର୍ମାନ୍ ଆସବ' । ମାସା'ଡ'ନା ଗୁତୁନା ଡୁତା ମୁନା' ରାଜାନା ଉଂଗମ୍ । 36ମାରି ନିଜର୍ନା ବ'ବ୍ବକ୍ ସକ୍ସେକ୍ ପର୍ମାନ୍ ଆସବ' । ମାସା'ଡ'ନା ନନା ବ'ବ୍ବକ୍ ଡୁକୁନୁଂ ଆମୁଇ ଉକ୍ବକ୍ସା ଅ'ତୁଲୁଇ ଆରା'ଗେ ଅ'କାଲ୍ୟା ଆଗଂତୁନ । 37ସା' ନ ମାଏସା ସୁଁସୁବେଲା ‘ଅଂ ଡ'ନା ଅଂ’ ଡ'ସେ'ଗାଉ ସୁଁ, ଆରା'ଗେ ‘ଆରାକ୍ ଡ'ନା ଆରାକ୍’ ଡ'ସେ'ଗାଉ ସିଦାସିଦା ସୁଁ । ମାସା'ଡ'ନା ପାଲ୍ ମାମାନା ଇମି ମିସାୟ'ସେକ୍ ନେଇ' ସୁଁସୁ ଦର୍କାର୍ ଆରାକ୍, ଡୁ'ତୁନ୍ବାଇ'ନା ସଇତାନ୍ଉ ଡେମ୍ତ ।”
ଜାଏସା ଆପେ ଅଲିରାକ୍ ଡେମ'ନା ଆମାଇସା ଡୁ'ତୁନ୍ଉ ନିଂ ଡେମ୍ତିଂ ଡ'ସେକ୍ ଆଏତ୍ଗା'
(ଲୁକ 6:29–30)
38“ଇନ୍ତେକନ୍ଡେ'କା ଡି'କେନା ସୁନ'ତା, ମା ଡ'ନା, ‘ଜାଏସା ମୁଇନ୍ଡା ପାଲ୍ରେମନା ମ' ଅ'କାନାଲ'ନା ମାଇନା ମ'ସା ଅ'କାନା ଡୁତା, ମାରି ଜାଏସା ମୁଇନ୍ଡା ପାଲ୍ରେମନା ଗିନେ ଅପିକ୍ଡେର'ନା ମାଇନା ଗିନେସା ଅପିକ୍ଡେର୍ ଡୁତା’ ଡ'ସେକ୍ ସୁନ'କୁନୁଂ ପେ ଅଂଅଁ'ତୁପେ । 39ମାତର୍ ନିଂ ଆପେ ସୁନ'ତିଂ, ଜାଏସା ଆପେ ଅଲିରାକ୍ ଡେମ'ନା ଆମାଇସା ଡୁ'ତୁନ୍ଉ ନିଂ ଡେମ୍ତିଂ ଡ'ସେକ୍ ପେ ଆଏତ୍ଗା' । ପେ ମି ଡିନ୍ଡେମ୍ ଡୁତା ଡ'ନା, ଜାଏସା ଆପେ ସୁସୁମ୍ତିକୁରୁଂନା ଜାମ୍ବାଲିବକ୍ ସାପ୍ଡେକ୍ ବୁଗ'ନା ମାରି ମୁଇସାଂ ଜାମ୍ବାଲିସା ଆମାଇ ଅସୁଇ'ବେ' । 40ଜାଏସା ମୁଇନ୍ଡା ପେ ଅଲୁ'କୁନୁଂ ସକା ଆନିଂ ବିବେ' ଡୁତା ଡ'ସେକ୍ ଆପେ ବିସାର୍ନା ଡିନ୍ଡେମ୍ରେମ୍ବକ୍ ରିଂଅଁ' ଉଇତା ଡ'ନା ଆମାଇ ପେନା ସକା ମାରି ପେ କୁକୁଇକୁନୁଂ ଇମ୍ପ'ସା ବେ' । 41ଜାଏସା ମୁଇନ୍ଡା ରେମ ମାଇ ତେୟଁ' ଉଇଡେଂକୁନୁଂ ଆପେ କେନା ନିଂବୁରଂ ମୁଇ କିଲିମିଟର୍ ନ ତେୟଁ' ସା'ବା ଡ'ସେକ୍ ଜବର୍ଦସ୍ ଡେମ'ନା ପେ ଗୁତୁନା ମାଇବୁରଂ ଦୁଇ କିଲିମିଟର୍ ତେୟଁ' ଉୟା । 42ଜାଜା ଆପେ ମାମା ଲୁଡ'ନା ଆମାଇ ବେ' । ଜାଏସା ପେନ୍ବକ୍ ରିନ୍ ଲୁଲୁ' ସାକ୍ନା ପେ ଆବେ'ତିଂ ଆଡିଗ' ।”
ପେ ଆଦାଇରେମ୍ ଆଲାତ୍ ଡେମ୍
(ଲୁକ 6:27–28; ଲୁକ 6:32–36)
43“ଇନ୍ତେକନ୍ଡେ'କା ଆନେଇ' ମା ଡ'ସେକ୍ ଅମାଗ'କୁ ଡ'ନା, ‘ପେ ଇନ୍ତୁସିଂଡାନ୍ଡର୍ସିଂନା ରେମଲେବକ୍ ଆଲାତ୍ ଡେମ୍ ମାତର୍ ଆଦାଇରେମେ ଗୁମୁଇ’ ଡ'ସେକ୍ ଅମାଗ'କୁନୁଂ ପେ ଅଂଅଁ'ତୁପେ । 44ମାତର୍ ଆପେନ୍ ଦାଇରେମ୍ ପେ ଆଲାତ୍ ଡେମ୍ ମାରି ଜାଜା ଆପେ ଅବୁଦି ଦୁକକସ୍ଟ ବେଡ'ସେକ୍ ଡୁତା ମା'ଏପୁଲେଇ ପେ ପାର୍ତନା ଡେମ୍ ଡ'ସେକ୍ ନିଂ ଆପେ ସୁନ'ତିଂ । 45ପେ ଡୁ'ତୁନ୍ ଡେମ'ନା ସତଇସା ସରଗ୍ବକ୍ ଡୁକୁନୁଂ ପେମ୍ବା ମି ଡେମ'ତା ଡୁ'ତୁନା ପେସା ଡେମ'ତୁପେସା' ପେ ମାଇନା ଉଁ'ଉଁ ଏତୁପେ । ଜାଜା ବଲ୍କାମ୍ ଡେମ'ତା ମାରି ଜାଜା ଅଲିରାକ୍କାମ୍ ଡେମ'ତା ଆମା'ଏ ଆଗୁଲାଇର ମାଇ ସିଂଇଁନା ତାରା' ବେଡ'ତା । ଦରମ୍ବାଇ' ରେମଲେପୁଲେଇ ମାରି ଜାଜା ଦରମ୍ବାଇ' ଆରାକ୍ ଡୁ'ତୁନ୍ବାଇ' ରେମଲେପୁଲେଇସା ମାଇ ଡାଗ୍ ଅ'ଗୁର'ତା । 46ଜାଜା ଆପେ ଆଲାତ୍ ଡେମ'ତା ଆମା'ଏଉ ପେ ଆଲାତ୍ ଡେମ'ନା ମାପ୍ରୁ ଆପେ ମାମା ବଲ୍ଟା ବେ'ତ ଇ? ଆରାକ୍ । ସିସ୍ତୁ ଲୁଲୁ'ରେମ୍ସା ଡୁ'ତୁନାଉ ଡେମ'ତା । 47ପେ ଆପେନା ବାଇଲ'ଗେଉ ସୁନ୍ଡ୍ରତୁପେ ଡ'ନା ମା ଲାବ୍? ପେନ୍ ଜିବନ୍ବକ୍ ଇ'କିସା ବାଦ୍ଲି ଆଡୁତା, ମାସା'ଡ'ନା ଜାଜା ଆମାପ୍ରୁ ବିସ୍ବାସ୍ ଆଡେମ୍ତ ମା'ଏସା ଡୁ'ତୁନାଉ ଡେମ'ତା । 48ସା' ସରଗ୍ବକ୍ ଡୁକୁନୁଂ ପେମ୍ବା ମି ଗୁଲାଇବକ୍ ବଲ୍ ଡୁତା ଡୁ'ତୁନା ପେସା ଗୁଲାଇବକ୍ ବଲ୍ ଡୁକୁଲା ।”
Voafantina amin'izao fotoana izao:
ମାତିଉ 5: BFW
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
CC BY-NC-ND 4.0