ମାତିଉ 6
6
ଆଗରିବ୍ରେମ୍ ସାନ୍ଡୁଂ ଡୁତା
1 #
ମାତିଉ 23:5
ସଇଗା ଡେଂସେକ୍ ଡୁକୁଲା । ମାସା'ଡ'ନା ନେଇ ବଲ୍କାମ୍ ଡେମ'ତୁନେଇ ଡ'ସେକ୍ ଆରେମଲେ ଅସୁଇ'ପୁଲେଇ ପେ ପେନା ମାମା ବଲ୍କାମ୍ ଆଡେମ' । ପେ ଡୁ'ତୁନ୍ ଡେମ୍ତୁପେ ଡ'ନା ସରଗ୍ବକ୍ ଡୁକୁନୁଂ ପେମ୍ବାନ୍କୁରୁଂ ପୁରାସ୍ ଆବାମ୍ତୁପେ ।
2ଡୁ'ତୁନ୍ସା' ପେ ଆଗରିବ୍ରେମ୍ ମାମା ସାନ୍ଡୁଂଅଁ'ନା ପାର୍ତନା ଡିଂଅଁବକ୍ ମାରି କୁରୁଂଗୁ'ତାଂବକ୍ ଅସୁୟ'ସେକ୍ ମାରି ଆଗୁଲାଇର ସୁନ' ବୁଲ୍ଲ'କୁନୁଂ ନାଡାଇବାର୍ବାଇ' ରେମଲେସୁଗ ଆଡେମ' । ମା'ଏ ରେମଲେ ଆନେଇ ଜୁଲେଇ' ଡ'ସେକ୍ ଅ'ନାଉପୁଲେଇଉ ଡୁ'ତୁନ୍ ଡେମ'ତା । ମା'ଏ ଡୁ'ତୁନା ଡେମ'ତାସା' ରେମଲେ ମା'ଏ ଡେମ'କୁନୁଂ ବଲ୍କାମ୍ପୁଲେଇ ଆମା'ଏ ନାଉଲ'ତାସା' ମାପ୍ରୁନ୍କୁରୁଂ ମା'ଏ ମାସା ଆବାମ୍ତା ଡ'ସେକ୍ ନିଂ ଆପେ ସତଇସା ସୁନ'ତିଂ । 3ମାତର୍ ପେ ଆଗରିବ୍ରେମ୍ ସାନ୍ଡୁଂବେଲା ସୁସୁମ୍ତିନା ତିତି ମା ଡିନ୍ଡେମ୍ ଡେନ୍ତା ଡ'ସେକ୍ ବାସାକ୍ତିନା ତିତି#6:3 ଡ'ନା, ପେ ମଇତର୍ ଅ'ତୁକୁନୁଂ ପେନା ବାଇଲକ୍ସା ମମୁନାକ୍ସୁଗ ଡିନ୍ଡେମ୍ ଡୁତା । ମମୁନାକ୍ସୁଗ ବିବେ' ଡୁତା । 4ଡୁ'ତୁନା ଜାଏସା ମମୁନାକ୍ସୁଗ ପେ ଆପାଲ୍ରେମ ସାନ୍ଡୁଂତୁପେ ଡ'ନା ସରଗ୍ବକ୍ ଡୁକୁନୁଂ ପେମ୍ବା ପେ ଡେମ'କୁନୁଂ ବଲ୍କାମ୍ ଜୁଲ'ତାସା' ମାଇ ପେ ଡେମ'କୁନୁଂ ବଲ୍କାମ୍ପୁଲେଇ ଆପେ ପୁରାସ୍ ବେ'ତ ।
ମି ପାର୍ତନା ଡିନ୍ଡେମ୍ ଡୁତା ଡ'ସେକ୍ ଜିସୁଲା ଅମାକ୍ଡେନ୍
(ଲୁକ 11:2–4)
5 #
ଲୁକ 18:10–14
ପାର୍ତନା ଡିନ୍ଡେମ୍ବେଲା ନାଡାଇବାର୍ବାଇ' ରେମଲେ ଡେମ'କୁନୁଂସୁଗ ପେ ଆଡେଂଗା', ମାସା'ଡ'ନା ମା'ଏ ରେମଲେ ଆନେଇ ଜୁଲେଇ' ଡ'ସେକ୍ ପାର୍ତନା ଡିଂଅଁବକ୍ ମାରି ଆଟ୍ବକ୍ ତଂସେକ୍ ଡକ୍ତି'ତା କିରକ୍ସେକ୍ ପାର୍ତନା ଡିନ୍ଡେମ୍ପୁଲେଇ ମୁନ୍ ଡେଂଗୁତା । ମା'ଏ ଡୁ'ତୁନା ଡେମ'ତାସା' ରେମଲେ ଆମା'ଏ ନାଉଲ'ତା, ସା' ମାପ୍ରୁନ୍କୁରୁଂ ମା'ଏ ମାସା ଆବାମ୍ତା ଡ'ସେକ୍ ନିଂ ଆପେ ସତଇସା ସୁନ'ତିଂ । 6ମାତର୍ ପେ ପାର୍ତନା ଡିନ୍ଡେମ୍ବେଲା ବିତ୍ରେନ୍ ଡିଂଅଁବକ୍ ଗାଇସେକ୍ ପାଟା ଅନ୍ତୁକ୍ ରାଂଡିକ୍ସେକ୍ ଜାଏସା ଜୁଜୁ ମଗୁନଂବାଇ' ଡୁକୁନୁଂ ଆପେମ୍ବା ପାର୍ତନା ଡେମ୍ । ପେ ମ'ଜୁ ମ'ସୁଇ' ଡେମ'କୁନୁଂ ଗୁଲାଇ ମାଇ ଜୁଲ'ତାସା' ପେ ଡେମ'କୁନୁଂ ଗୁଲାଇପୁଲେଇ ମାଇ ଆପେ ପୁରାସ୍ ବେ'ତ ।
7ମାରି ପେ ପାର୍ତନା ଡିନ୍ଡେମ୍ବେଲା ଆମାପ୍ରୁ ମମୁନାକ୍ରେମ୍ ଡେମ'କୁନୁଂସୁଗ ଅର୍ତ ମଡୁକୁବାଇ' ତୁମ' ସୁନ'ସେକ୍ ମାର୍ମାର୍ ପାର୍ତନା ଆଡେମ' । ମାସା'ଡ'ନା ମାର୍ମାର୍ ସୁନ'ନା ନେଇନା ମାପ୍ରୁ ଅଂତ ଡ'ସେକ୍ ମା'ଏ ଏତ୍ଗୁତା । 8ସା' ପେ ମା'ଏସୁଗ ଆଡେଂଗା', ମାସା'ଡ'ନା ଆପେ ମାମା ଦର୍କାର୍ ଗୁତୁନ୍ ଗୁଲାଇ ପେ ଲୁଲୁ' ସିଁସେଇଁଉ ପେମ୍ବା ମାଗ'ତା ।
9ସା' ପେ ପାର୍ତନା ଡିନ୍ଡେମ୍ବେଲା ଡି'କେନା ପାର୍ତନା ଡେମ୍:
“ଅ ସରଗ୍ବକ୍ ଡୁକୁନୁଂ ନେଇନା ବା,
ଗୁଲାଇ ରେମଲେ ଆନ ପବିତ୍ରବାଇ' ଡ'ସେକ୍ ମାନ୍ଲେଇ' ।
10ନ ଗୁଲାଇରନା ବାଗ୍ବକ୍ ରାଜା ଏଲା,
ସରଗ୍ବକ୍ ଡୁକୁନୁଂ ଗୁଲାଇ ମି ନନା ମୁନ୍ସୁଗ ଡୁତା ଡୁ'ତୁନାଉ
ଦର୍ତନିବକ୍ସା ନନା ମୁନ୍ସୁଗ ଗୁଲାଇ ଡେମେଇ' ।
11ନେଇ ସୁସୁମ୍ପୁଲେଇ ଦର୍କାର୍ ଡେଂକୁନୁଂ ଆ'ନା ବେ' ।
12ନେନ୍ ବାଗ୍ବକ୍ ବୁଲ୍କାମ୍ ଡେମ'କୁନୁଂ ରେମଲେବକ୍ ନେଇ କେମା ଡେମ'କୁନୁଂସୁଗ
ନେଇ ଡେମ'କୁନୁଂ ଗୁଲାଇ ବୁଲ୍କାମ୍ସା ନ ଆନେଇ କେମା ଡେମ୍ ।
13ମାରି ପାପ୍ବାଇ' କାମ୍ ଡିନ୍ଡେମ୍ନା ପରିକାକୁରୁଂ ଆନେଇ ସୁଲୁଂ ବୁଂ,
ମାରି ଅଲିରାକ୍ବାଇ'ନା ବୁଦି ବପୁକୁରୁଂ ଆନେଇ ରକ୍ୟା ଡେମ୍ ।” #6:13 “ମାସା'ଡ'ନା ରାଜି, ବପୁ ମାରି ମଇମା ଇସାଉପୁଲେଇ ନନାଉ ଡୁତା, ଆମେନ୍!” ଡ'ସେକ୍ସା ଏନ୍ତୁକ୍ ଉଲା'ଗେବକ୍ ଲେକ୍ଲ'ତା ।
14 #
ମାର୍କ 11:25,26 “ମାରି ରେମଲେ ପେନ୍ବାଗ୍ବକ୍ ଅଲିରାକ୍ବାଇ' କାମ୍ ଡେମ'କୁନୁଂ ଗୁଲାଇ ପେ କେମା ଡେମ୍ତୁପେ ଡ'ନା ସରଗ୍ବକ୍ ଡୁକୁନୁଂ ପେମ୍ବାସା ପେନା ଅଲିରାକ୍ବାଇ' କାମ୍ ଡେମ'କୁନୁଂ ଗୁଲାଇ କେମା ଡେମ୍ତ । 15ମାତର୍ ପେ ଆରେମଲେ କେମା ଆଡେମ୍ତୁପେ ଡ'ନା ପେମ୍ବାସା ପେନା ପାପ୍ କେମା ଆଡେମ୍ତ ।”
ଆଂଡାକ୍ସ ପାର୍ତନା ଡିନ୍ଡେମ୍ନା ଜିସୁଲା ଅମାକ୍ଡେନ୍
16ନାଡାଇବାର୍ବାଇ' ରେମଲେ ଆଂଡାକ୍ସ ପାର୍ତନା ଡିନ୍ଡେମ୍ବେଲା ଆପାଲ୍ ରେମଲେ ଅସୁଇ'ପୁଲେଇ ସିନ୍ତାଲ'କୁନୁଂସୁଗ ମା'ଏନ୍ ସାର୍ମ' ଅସୁଇ'ତା । ମାତର୍ ପେ ମା'ଏସୁଗ ଆଡେଂଗା' । ମାସା'ଡ'ନା ରେମଲେ ଆନେଇ ଜୁଲ'ସେକ୍ ମା'ଏ ଆଂଡାକ୍ସ ପାର୍ତନା ଡେମ'ତା ଡିଗେଇ' ଡସେ'ଗାଉ ମା'ଏନା ସାର୍ମ'ଡେ ମଗୁଇମ' ଇନ୍ସର୍ସେକ୍ ଡୁକୁନୁଂସୁଗ ଆରେମଲେ ଅସୁଇ'ପୁଲେଇ ଡେମ'ତା । ମା'ଏ ଡୁ'ତୁନା ଡେମ'ତାସା' ରେମଲେ ଆମା'ଏ ବଲ୍ରେମ୍ ଡ'ସେକ୍ ନାଉଲ'ତାସା' ଗୁତୁନାଉ ଆମା'ଏ ପୁରାସ୍ ବାମ୍ତା ଡ'ସେକ୍ ନିଂ ଆପେ ସତଇସା ସୁନ'ତିଂ । 17ମାତର୍ ପେ ଆଂଡାକ୍ସ ପାର୍ତନା ଡିନ୍ଡେମ୍ବେଲା ଆବ'ବ୍ ସୁଉ'ତୁରପ୍ ସୁକ୍ସେକ୍, ସାର୍ମ' ଗୁଇମ'ଗୁଇ'ତିକ୍ସେକ୍ ଡିନ୍ଡେମ୍ ଡୁତା । 18ଡୁ'ତୁନ୍ ଡେମ'ନା ପେ ଆଂଡାକ୍ସ ପାର୍ତନା ଡେମ'ତୁପେ ଡ'ସେକ୍ ରେମଲେ ଜାଏସା ଆମାକ୍ତ । ମାତର୍ ଆମାପ୍ରୁ ଜାଏସା ଜୁଜୁ ଆଗଂତା ଡ'ନାସା ନେଇ' ମାରି ପାଲ୍ ରେମଲେ ମଜୁନୁ ମାମା ଡେମ'କୁନୁଂ ମାଇ ଜୁଲ'ତା । ସା' ନେଇ' ଡେମ'କୁନୁଂ ଗୁଲାଇ ଜୁଲ'ସେକ୍ ଆନେଇ' ମାଇ ପୁରାସ୍ ବେ'ତ ।
ଗୁଲାଇ ଦନ୍ସପ୍ତିକୁରୁଂ ଆମାପ୍ରୁ ଅବୁଦି ଆଲାତ୍ ଡେମ୍
(ଲୁକ 12:33–34)
19 #
ଜାକୁବ୍ 5:2,3 କେନ୍ ଦର୍ତନିବକ୍ ନିଜର୍ପୁଲେଇ ଦନ୍ସମ୍ପତି ତରିମ' ଆବୁଂଅଁ' । କେନ୍ ଦର୍ତନିନା ଗୁଲାଇ ଦନ୍ସମ୍ପତି ତପ୍ଡୁର'ଗୁସାଗ'ସେକ୍ ସୁମ୍ଲୁଗ'ସୁମ୍ବେର' ନାସ୍ ଉଇତା ମାରି ଡୁଂଗା'ରେମ୍ ଡାବ୍ଲେଡ' ପୁଇଲଗ'ସେକ୍ ଡୁଂଗା'ଲ' ରିଂଅଁ' ଡୁଂତା । 20ମାତର୍ ସରଗ୍ବକ୍ ପେନ୍ ଦନ୍ସମ୍ପତି ବୁଂ । ଆତା ଡ'ନା ଆତପ୍ଡୁର୍ଆଗୁସାକ୍ତ ମାରି ଆସୁମ୍ଲୁକ୍ ଆସୁମ୍ବେର୍ତ, ମାରି ଡୁଂଗା'ରେମ୍ ଡାବ୍ଲେଡ' ପୁଇଲଗ'ସେକ୍ ଡୁଂଗା'ଲ' ଆରିଂତା । 21ମାସା'ଡ'ନା ପେନା ଦନ୍ସମ୍ପତି ଆମ୍ବ' ଡୁତା ଆତାଉ ପେନା ଏତ୍ସା ଡୁତା ।
ଞେରିନା ବତି
(ଲୁକ 11:34–36)
22ମ' ଡ'ନା ପେନା ଞେରିନା ବତି । ସା' ମ' ବଲ୍ ଡୁତା ଡ'ନା ପେନା ଗୁଲାଇ ଞେରିପୁଲେଇ ଗୁତୁନ୍ ଅବୁଦି ବଲ୍ ତାର୍ତା । 23ମାତର୍ ପେନା ମ' ଅଲିରାକ୍ବାଇ' ଡୁତା ଡ'ନା ପେନା ଞେରି ଗୁଲାଇ ଅବୁଦି ଞୁର୍ଉଇତା । ପେନା ଞେରିବକ୍ ଡୁକୁନୁଂ ଗୁତୁନ୍ ବତି ଞୁର୍ଉଇତା ଡ'ନା ପେ ଅବୁଦି ଞୁର୍ବକ୍ଉ ଡୁତୁପେ ।
ମା ସୁମ୍ତିଂ ମା ଇ'ତିଂ ଡ'ସେକ୍ ପେ ଆସିନ୍ତାଲ'
(ଲୁକ 12:22–34; 16:13)
24ଜାଏସା ମୁଇନ୍ଡା ରେମ ଇମ୍ବାର୍ ସାକାର୍ରେମ୍ନା ଗତିରେମ୍ ଏ ଆଗଂତା । ମାସା'ଡ'ନା ମାଇ ଆମୁଇନ୍ଡା ଗୁମୁୟ'ସେକ୍ ଆମୁଇନ୍ଡା ଆଲାତ୍ ଡେମ୍ତ । ମାରି ଆମୁଇନ୍ଡା ବଲ୍ ମାନ୍ତା, ଆମୁଇନ୍ଡା ବଲ୍ ଆମାନ୍ତା । ଡୁ'ତୁନ୍ଉ ପେ ଦନ୍ସମ୍ପତିବକ୍ ଏତ୍ସେକ୍ ଗୁତୁନ୍ ତେଂଗି' ଉଇନା ମାପ୍ରୁନା ସେବା ଡିନ୍ଡେମ୍ ଆଗଂତୁପେ ।
25ନିଂ ଇସାଉ ମା ସୁମ୍ତିଂ ଆରା'ଗେ ମା ଇ'ତିଂ; ଆରା'ଗେ ମା ଅଲୁକ୍ତିଂ ଡ'ସେକ୍ ପେ ଆସିନ୍ତାଲ' । ମାସା'ଡ'ନା ସୁସୁମ୍ ଇ'ନାକୁରୁଂ ପେନା ଜିବନ୍ ଅବୁଦି ମୁନା'ବାଇ' ମାରି ଞେରିପୁଲେଇ ଡୁକୁନୁଂ ସକାବାନ୍ଦାକୁରୁଂ ପେନା ଞେରି ଅବୁଦି ମୁନା'ବାଇ' ଡୁତା ଡ'ସେକ୍ ନିଂ ଆପେ ସତଇସା ସୁନ'ତିଂ । 26ଆପୁରି' ଆସୁରଇ'ଏ ଜୁ । ମା'ଏ ଲୁଗ'ୱାୟ' ଆଡୁତା କି ଡାମୁଂ ଡାଲେ'ବକ୍ସା ବୁଂଅଁ' ଆଡୁତା । ଡୁ'ତୁନ୍ ଡ'ନାସା ସରଗ୍ବକ୍ ଡୁକୁନୁଂ ପେମ୍ବାଉ ଆମା'ଏ ଗୁଲାଇ ସୁସୁମ୍ ଇ'ନା ଇସାଉ ବେଡ'ତା । ମା, ପେ ମା'ଏନ୍କୁରୁଂ ମୁନା' ଆରାକ୍ ଇ? 27ପେନ୍ ବିତ୍ରେ ଜାଏସା ସିନ୍ତାଲ' ସିନ୍ତାଲ' ଡୁକୁକ୍ସେକ୍ ଆନିଜର୍ନା ଜିବନ୍ ନିଜେ ଇ'କିସା ଅ'ଲାଂ ଗଂତୁପେ ଇ? ଆରାକ୍! 28ମାରି ମାସା' ପେ ସକାବାନ୍ଦାପୁଲେଇ ସିନ୍ତାଲ'ତୁପେ? ବୁର୍ଲୁକ୍ବକ୍ ଡୁକୁନୁଂ ଆସାରିଲେ ଜୁ, ମା'ଏ ମି ମୁନା'ଗୁତା? ମା'ଏ ବୁରଂଗୁଡାକ୍ ଡେମ' ଆଡୁତା କି ଇମ୍ପ'ସେନ୍ଡି ତାୟଁ'ଗାଡ' ଆଡୁତା । 29ମାତର୍ ସଲମନ୍ ଡ'କୁନୁଂ ମୁନା' ରାଜାଲା ମାଇନ୍ବକ୍ ଅବୁଦି ଦନ୍ସମ୍ପତି ଡୁକୁଗା' ଡ'ନାସା ଗୁତୁନ୍ ସାରିଲେସୁଗ ମଇନାବାଇ' ମୁଇ ସକାସା ଅଲୁକ୍ ଆଡୁତା ଡ'ସେକ୍ ନିଂ ଆପେ ସୁନ'ତିଂ । 30ମାରି ବୁର୍ଲୁକ୍ବକ୍ ଡୁକୁନୁଂ ଆକିରେଇଁଏ ଜୁ । ମା'ଏ ଅବୁଦି ମଇନାବାଇ' ତୁନାଗୁତା । ମା'ଏ ଅବୁଦି ମଇନାବାଇ' ତୁନାତା ଡ'ନାସା ଆ'ନା ଡୁତା ବେରା ଆମା'ଏ ସୁଂଅଁବକ୍ ବାଲ'ସୁଂତ । ମାପ୍ରୁ ଆମା'ଏ ଆଇ'କେନ୍ ମଇନାବାଇ' ଅ'ରଇଁୟ'ତା ଡ'ନା ମାଇ ଆପେ ଅଲୁକ୍ପୁଲେଇ ସକାବାନ୍ଦା ଆବେ'ତ ଇ? ମାସା' ପେ ଆମାପ୍ରୁ ବଲ୍ ବିସ୍ବାସ୍ ଆଡେମ୍ତୁପେ? 31ନେଇ ମା ସୁମ୍ତୁନେଇ ମା ଇ'ତୁନେଇ ମାରି ମା ଅଲୁକ୍ତୁନେଇ ଡ' ଗୁଲାଇ ଏତ୍ସେକ୍ ଆସିନ୍ତାଲ' । 32ଜାଜା ଆମାପ୍ରୁ ବିସ୍ବାସ୍ ଡେମ' ଆଡୁତା ମା'ଏଉ କେନ୍ ଗୁଲାଇ ତୁର'ବୁଲ୍ଲ'ତା । ମାତର୍ ସରଗ୍ବକ୍ ଡୁକୁନୁଂ ପେମ୍ବା କେନ୍ ଗୁଲାଇ ଆପେ ଦର୍କାର୍ ଡ'ସେକ୍ ମାଗ'ତା । 33ମାତର୍ ପେ ମୁଲ୍ ମା ଡିନ୍ଡେମ୍ ଡୁତା ଡ'ନା ମାପ୍ରୁନ୍ ରାଜିନା ବିସୟ ମାରି ମାଇନା ମୁନ୍ ମା ଗୁତୁନ୍ ଡିନ୍ଡେମ୍ପୁଲେଇ ଏତ୍ସେ'ଗା ଡୁକୁଲା । ଡୁ'ତୁନ୍ ଡ'ନା ଆପେ ମାମା ଦର୍କାର୍ ଗୁତୁନ୍ ଗୁଲାଇ ମାପ୍ରୁ ବେ'ତ । 34ସା' ଆ'ନାପୁଲେଇ ଅବୁଦି ଦୁକକସ୍ଟ ନେ'ନ୍ବକ୍ ଆ'ନାଉ ଡୁତା । ସା' ବେରା ଆନିଂ ମା ଡେନ୍ତାବେ ଡ'ସେକ୍ ଆ'ନାଉ ଗୁଲାଇ ଏତ୍ସେକ୍ ଆସିନ୍ତାଲ' ।
Voafantina amin'izao fotoana izao:
ମାତିଉ 6: BFW
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
CC BY-NC-ND 4.0