Izaia 31
31
Teny famelezana an’i Ejipta
1Loza ho an’ireo izay midina hitady vonjy any Ejipta;
miantehitra amin’ny soavaly#31,1 Miantehitra amin’ny soavaly. Ny Jody nitady soavaly sy kalesy any Ejipta, hoentiny miady amin’ny Asirianina.,
ary mitoky amin’ny kalesy, noho ny hamaroan’ireny,
sy amin’ny mpitaingin-tsoavaly, noho izy matanjaka;
nefa ilay Masin’i Israely tsy mba andrandrainy;
ary i Iaveh tsy tadiaviny.
2Izy anefa dia hendry; mahatonga loza, tsy mitsoa-teny#31,2 Tsy mitsoa-teny: Izany hoe, tsy diso amin’ny fanatanterahana izay nasainy nolazain’ny mpaminany.,
hitsangan-kamely ny ankohonan’ny ratsy fanahy,
ary handà ny fanampiana
avy amin’izay manao ny tsy marina.
3Ny Ejiptianina dia olombelona ihany, fa tsy fanahy;
dia haninji-tanana i Iaveh,
ka ho tafintohina izay manampy,
ho potraka izay hampiana,
ary hiara-devona avokoa izy roa tonta.
Iadian’i Iaveh i Asora
4Fa izao no nolazain’i Iaveh tamiko:
«Toy ny fieron’ny liona
sy ny liona tanora amin’ny rembiny,
raha mivory hanohitra azy
ny mpiandry ondry maro be,
ka tsy resin-tahotra izay horakorak’izy ireo,
na manahy izay hamaroany akory;
toy izany koa no hidinan’i Iavehn’ny tafika mba hiady,
eo an-tendrombohitra Siôna sy eo amin’ny havoany.
5Tahaka ny vorona mamelatra elatra hanomba ny zanany,
no hiarovan’i Iavehn’ny tafika an’i Jerosalema;
hiaro Izy sy hamonjy, ary handalo sy hanafaka.
6Koa miverena re amin’Ilay efa nihatahanareo fatratra,
ry zanak’i Israely.
7Fa amin’izany andro izany#31,7 Amin’izany andro izany: na hoe amin’ny andro fanafahana. ny olona,
samy hanary ny sampy volafotsy aman-tsampy volamena avy
izay nataon’ny tananareo hanotàna.
8Ary i Asora ho lavon-tsabatra,
nefa tsy sabatr’olombelona#31,8 Tsy sabatr’olombelona, fa sabatr’i Iaveh.;
sabatra izay tsy sabatr’olombelona no handevona azy;
handositra eo anoloan’ny sabatra izy,
ary ny zatovony hampandoavina hetra.
9Ny vatolampy#31,9 Vatolampy. Angamba teny fanesoana ny sampy izany, izay tsy mba tena vatolampy marina tahaka an’i Iaveh. handositra aman-tahotra;
ary ny andriandahiny mangovitra handao ny faneva,
- teny ton’i Iaveh - izay manana ny afony ao Siôna,
sy ny fatam-pandoroany ao Jerosalema.»
Voafantina amin'izao fotoana izao:
Izaia 31: MBC
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Katolika © La Société Biblique Malgache, 2003.