Inona no tena ilainao?

Manana fanontaniana lehibe ho anao aho. Ahoana no hiainanao ny herin’ny fitsanganana amin’ny maty? Andeha hojerentsika ny zava-misy– betsaka ny kristianina tsy miaina anaty hery sy finoana, ary ny sasany dia Kristianina anarana fotsiny.

Ny Apostoly Paoly dia nilaza mikasika izany toe-javatra mampiahiahy izany: “manana ny endriky ny toe-panahy araka an'Andriamanitra, nefa nandà ny heriny; ireny koa dia halaviro.” (II Timoty 3 : 5). Malahelo aho milaza fa nahita mpino aman’arivony izay tsy tena mino akory. Tsy manana hery, na fahatokisana na fifaliana izy ireo.

Nahoana no vitsy ny Kristianina miaina anaty hery, fiadanana sy antom-pisiana? Angamba tsy manana valiny mahafapo aho, saingy fantatro tsara ny vahaolana. I Paoly dia Apostoly modely, saingy mbola nanana hetaheta amina zavatra telo izy : “mba hahazoako an'i Kristy–eny, mba ho fantatro Izy sy ny herin'ny fitsanganany tamin'ny maty ary ny fiombonana amin'ny fijaliany ka hampitovina amin'ny endriky ny fahafatesany.” (Filipiana 3 : 10)

Tsy menatra i Paoly nitsotra hoe :

1. Te hahalala an’I Kristy izy.

2. Te hahalala ny herin’ny fitsanganana amin’ny maty.

3. Te hiaraka hizaka ny fahoriany koa izy.

Fa andraso kely, nga moa tsy efa fantatr’i Paoly I Kristy? Mazava ho azy fa eny, fa fifandraisana tena akaiky no tiany ambara. Amin’ity andininy ity dia nampiasa ny teny grika i Paoly hoe “Ginosko”, izay midika hoe fahalalana azo avy amin’ny traikefa sy fifandraisana akaiky. Oay! Mila an’izany daholo koa isika.

Faharoa, i Paoly dia nanao zava-mahagaga maro tamin’ny Anaran’I Jesosy, fa mbola nangetaheta karazana hery manokana foana ihany izy: fitsanganana amin’ny maty “dunamis”. Nitady hery dinamita bebe kokoa izy.

Ary farany, i Paoly dia naniry ny hahatsapa ny hery sy fampiononan’I Kristy ao anatin’ny fahoriana. Fantatsika fa nanolo-tena mba ho voavono, voatorotoro, notoraham-bato, nogadraina, ary novonoina noho ny finoany mihitsy aza, fa nila an’I Kristy ho eo anilany izy. Tsy nitsahatra ny nangetaheta sy naniry mihoatra kokoa foana izy.

Mbola manana an’izany hetaheta lalina izany ve ianao izao?

Fantaro fa mivavaka ho anao izahay. Maminay ianao ary tianay mba hahita ny herin’ny fitsanganana amin’ny maty sy fisiana amin’ny fiainanao.

Satria ianao dia zava-mahagaga.