GÉNESIS 18
18
Taita Diosca, Isaacta carashapachami nijushcami
1Chaipaj jipami Mandaj Diosca, Mamre shuti pambapi encina nishca quirucuna shayanajuj ladopi Abrahamman ricurirca. Paipaj carpa pungupi, chaupi punlla ninan rupaipi tiajujpimi ricurirca. 2Pai vichai ricushpaca, quimsapura runacuna paipaj ladopi shayanajujtami ñapash ricurca. Shina ricushpami, paipaj carpa pungumanda calpashpa llujshishpaca, paicunata tuparigrishpa alpapi cungurirca. 3Abrahamga cashnami nirca:
—Jatun Dioslla, cunan cambaj ñavipi ali ricurijpica, canda servijpajmandaca, ama yalishpa ripaillachu nipanimi. 4Cunanga, asha yacuguta apamujpi, cangunapaj chaquita maillangapaj shuyapaichi. Chai jipaca, quiru ucupi samapanguichillami. 5Asha tandagutapashmi apamupasha. Chaita micushca jipaca, cangunapaj shungupi shinlli tucushpa ripanguichilla. Chaipajllatami, cangunata servij ñuca ladota yalipashcanguichi— nircami.
Shina nijpimi, paicunaca:
—Can nishcashnallata rurailla— ninajurca.
6Shina nijpimi Abrahamga, carpaman uchalla rishpa, paipaj huarmi Sarataca, cashna nirca:
—Quimsa batea ashtahuan ali jacuta ucha japishpa masai. Chai jipaca, tandata rurashpa ninapi cusai— nircami.
7Abrahamga, huarmi huagracuna shayanajuj pushtuman ucha rishpami, shuj ali huahua shicuta japishpa, paita servijman curca. Chai servijca, uchami yanungapaj rirca. 8Abrahamga, lecha virata, lecheta, shicu aicha yanushcata japishpami, paicunapaj ñaupajpi churarca. Shina churashpaca paipashmi, quiru malqui ucupi paicunahuan tiarishpa micujurca.
9Abrahamdaca:
—¿Sara shuti cambaj huarmica maipita?— ninajujpimi:
—Cai carpapimi— nishpa tigrachirca.
10Shina nijpimi, cashna nirca:
—Na llullashpami nini, cambajman tigramushapachami. Ricui, Sara shuti cambaj huarmica, caya huata cai punllacunashnallatami, shuj churiguta charinga— nircami.
Sara huarmica, paipaj huashapillata carpaman yaicuna pungupi shayajushpami, tucuita uyajurca. 11Abrahambash ña rucugu, Sarapash ña payagumi carca. Sara huarmipaca, quilla nanaihuan ungunapash, ña chingashcami carca. 12Sara huarmica, paipaj shungupi asishpami cashna yajurca: “Ñucaca, ña cashna payayashca cashpatachu, ¿ñuca cusa ñucapi chayachun munaita charisha? Ñuca cusapash ñamari rucu” yajurcami. 13Chaimandami Mandaj Diosca, Abrahamdaca cashna nirca:
—¿Imashpata Sara huarmica, cunan ña payapica huahuata ungushapachachu imashi yashpa asirca? 14¿Taita Diospaca, imapash na ushanalla tianllu? Ima hora shamusha nishca punllapillatami, cambajman tigramusha. Sara shuti huarmica, caya huata cunan punllacunashnallatami, shuj churiguta charinga— nircami.
15Shina nijpimi Sara huarmica, manllaita charishpa:
—Na asircanichu— nishpa llullarca.
Shina nijpimi paica:
—Na chashnachu, ashtahuangarin asircanguimi— nirca.
Abrahamga, Sodoma pueblota ama llaquichipaichu nijushcami
16Chai quimsa runacuna chaimanda jatarishpaca, Sodoma pueblotami ricunajurca. Abrahambash, paicunata cumbashpami rijurca. 17Chashna rinajujpimi, Mandaj Diosca cashna yarijurca: “Ñuca imata ruranataca, ¿Abrahamman na villashpa pacashachu? 18Abrahammandaca, ¿shinlli jatun llacta tucuna cajpita, tucui cai pachapi llactacunapash, paimanda bendiciai tucuna cajpitachu pacasha? 19Paipaj huahuacunatapash, paipaj jipa mirai huasi ucu puracunatapash, Mandaj Dios ñucata ali cazushpa, imata cashpapash cashcatapacha rurashpa, aligutapacha causanajuchun, Abraham mandanataca yachanimi. Abrahamman imata carasha nijushcata, Mandaj Dios ñuca paiman carachunmi, chashna rurajunga” yajurcami. 20Chai jipami Mandaj Diosca, cashna nirca:
—Sodoma shuti, Gomorra shuti pueblocunapi caparinajujcunaca, ashtahuan ashtahuanmi mirashpa catijun. Paicunapaj juchaca, ashtahuambachami mirashpa catijun. 21Shinamandami cunanga, nalita rurashcamanda caparishcapash chashna cashcata, na chashna cashcata ricungapaj uriajusha. Shina uriajushpami yachasha— nijurcami.
22Chai runacunaca chaimanda anchurishpami, Sodoma puebloman rinajurca. Ashtahuangarin Abrahamga, Mandaj Diospaj ñaupajpirami carca. 23Chaipimi Abrahamga, Mandaj Diospajman quimirishpa, cashna nijurca:
—¿Imatapash cashcatapacha rurajcunatapashchu, canda na manllajcunahuan tucuchigripangui? 24Imatapash cashcatapacha rurajcunaca, cai pueblopica picha chungallapash tiambashchari. ¿Paicunatapashchu tucuchigripangui? Cai pueblopi causaj imatapash cashcatapacha ruraj, picha chunga gentecunata juyaimandaca, ¿nacha chai pueblopi causajcunapaj juchata cungapanguiman?
25Imatapash cashcatapacha rurajtaca, canda na manllajhuanga na huañuchinachu capangui. Chaitaca napacha rurapanguichu. Imatapash cashcatapacha rurajtaca, canda na manllajtashnaca ima horapash na llaquichinachu capangui. Tucui cai pachapi causajcunapaj Juezca, ¿nachu imatapash cashcatapacha ruranman?— nijurcami.
26Shina nijpimi Mandaj Diosca, cashna nirca:
—Sodoma pueblopi causaj imatapash cashcatapacha ruraj, picha chunga gentecunallapash tiajpica, paicunata juyaimandami, cai pueblopi tucui causajcunapaj juchata cungasha— nircami.
27Shina nijpimi Abrahamga, cutin cashna nijurca:
—Ricui ñucaca, ñutu alpa uchufa cashpapash, cunangarin ñuca Jatun Dioshuan rimai callaripashcanimi. 28Imatapash cashcatapacha rurajcuna picha chunga tiashcamandaca, picha illangapashchari. ¿Chai picha illashcamandalla, tucuilla pueblota tucuchipanguimanllu?— nircami.
Shina nijpimi:
—Chuscu chunga pichalla chaipi tiajpipash, na tucuchishachu— nirca.
29Cutinmi Abrahamga:
—Chaipica, chushcu chungallapashchari tianga— nirca.
Shina nijpimi:
—Chai chuscu chungata juyaimandaca, na tucuchishachu— nishpa tigrachirca.
30Shina nijpimi Abrahamga, cashna nirca:
—Ñuca Jatun Dioslla, cunanga cutin ñuca rimajpica, ama fiñahuanguichu. Chaipica, quimsa chungallapashchari tianga— nircami.
Shina nijpimi:
—Quimsa chungallapash chaipi tiajpica, na tucuchishachu— nishpa tigrachirca.
31Shina nijpimi Abrahamga, cashna nirca:
—Ricui, ñuca Jatun Diostaca, cunanmi yapata rimajupanilla. Chaipica, ishcai chungallapashchari tianga— nircami.
Shina nijpimi:
—Chai ishcai chungata juyaimandaca, na tucuchishachu— nishpa tigrachirca.
32Shina nijpimi Abrahamga, cutimbash cashna nircara:
—Ñuca Jatun Dioslla, ama fiñahuanguichu. Cunanga, shuj viajegutallami nigripani. Chaipica chungallapashchari tianga— nircami.
Shina nijpimi:
—Chai chungata juyaimandaca, na tucuchishachu— nishpa tigrachirca.
33Mandaj Diosca, Abrahamhuan rimaita tucuchishca jipaca rircallami. Shinallata Abrahambash, paipaj huasiman tigrarcallami.
Селектирано:
GÉNESIS 18: QUII
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Quichua Imbabura Bible © United Bible Societies, 1994.