GÉNESIS 19
19
Sodomatapash, Gomorratapashmi tucuchishca
1Ña chishashcapimi, Sodoma shuti puebloman ishcaipura angelcuna chayarca. Lot runaca, Sodoma puebloman yaicuna pungupimi tiajurca. Chai angelcunata Lot ricushpaca, tuparingapaj jatarishpami, alpaman chayajta cumurirca. 2Shina cumurishpaca, cashnami nirca:
—Ñucata mandajcunalla, cunanga cangunata servijpaj huasipi mingaringapaj shamupaichiyari. Cangunapaj chaquitapash maillapanguichilla nipanimi. Caya tutamandata jatarishpa, cangunapaj ñanda catipanguichillami— nircami.
Shina nijpimi, angelcunaca:
—Na, cunan tutaca ñambillami pacarina canchi— nishpa tigrachinajurca.
3Shina nijpipash Lot shuti runaca, paicunataca ripashunchiyari nijurcallami. Shina nijujpillatami Lot runahuan rishpa, paipaj huasiman yaicunajurca. Paicuna micuchunga, jatun micuita rurashpami, levadura illaj tandata cusashpa carajpi micunajurca.
4Ashtahuangarin puñungapaj nara siririjpillatami, Sodoma pueblopi causaj runacunaca, Lot runapaj huasita muyunajurca. Chairalla viñai huambracunamanda callarishpa, ashtahuan rucucunacaman tucui gentecuna tandanajushpami, chashna muyunajurca. 5Paicunaca, Lot runata cayashpami cashna ninajurca:
—¿Cunan tuta cambaj huasiman shamushca runacunaca, maipita? Paicunahuan siriringapaj llujchimui— ninajurcami.
6Shina nijpimi Lot runaca, paicunapajman llujshishpa punguta vicharca. 7Shina llujchishpami, cashna nirca:
—Ñuca huauquicuna, chashna jatun nalitaca na ruranachu canguichi. 8Ricuichi cunanga, jarihuan nara tacarishca ishcai ushicunatami charini. Paicunatami canllaman llujchimusha, paicunataca cangunapaj ima ali cajpipash ruraichilla. Ñuca huasi ucupi mingaringapaj shamushca cai jaricunatalla, ama imatapash rurapaichi— nircami.
9Shina nijpimi paicunaca:
—Chaiman anchuri— ninajurca.
Shinallata cashnatapashmi ninajurca:
—Cai na rijsishca runami, ñucanchihuan causaj shamurca. ¿Pairachu ñucanchi juez tucugrin? Cunanga candami, paicunatapash ashtahuan yali nalita rurashun— nishpami, Lot runataca ninandapacha llaquichinajurca.
Shina rurashpami, punguta faquingapaj quimirinajurca. 10Shina ruranajujpimi angelcunaca, maquita chutashpa Lot runata japishpa, paicunahuan huasi ucuman churashpa, punguta vicharca. 11Huasi pungu ladopi shayanajuj runacunataca, uchillamanda callarishpa rucucamanmi, ñausayachishpa saquirca. Chaimandami, punguta mascanajushpallata shaijunajurca.
12Shina cajpimi angelcunaca, Lot runataca cashna ninajurca:
—¿Imatapash caipi ashtahuan charinguirachu? Mashacunata, cambaj churicunata, ushicunata, cai pueblopi tucui ima charishcacunataca, cai pushtumanda llujchilla. 13Cai pueblotaca tucuchigrinchimi. Cai pueblopi causajcuna caparishcacunapash, Mandaj Diospaj ñaupacamanmi chayarca. Chaimandami Mandaj Diosca, ñucanchi tucuchinajuchun cachamurca— ninajurcami.
14Shina nijpimi Lot runaca llujshishpa, paipaj ushicunata cazarana mashacunata cashna nirca:
—Jatarishpa, cai pushtumanda llujshichi. Mandaj Diosca, cai pueblota tucuchigrinmi— nircami.
Ashtahuangarin paipaj mashacunapaj yuyaipica, yanga asingapajlla nijunshnallami uyarirca. 15Ña yurajlla punllayajujpimi angelcunaca, Lot ucha llujshichun cashna ninajurca:
—Cai pueblota llaquichijpi ama huañungapaca, jatarishpa cambaj huarmitapash, caipi tianajuj cambaj ishcandi ushicunatapash pushashpa llujshi— ninajurcami.
16Lot runa na ucha llujshijpimi, angelcunaca Lot runatapash, paipaj huarmitapash, paipaj ishcandi ushicunatapash maquimanda japirca. Shina japishpami Lot runata, Mandaj Dios llaquishcashnallata pueblomanda llujchishpa canllapi churagrirca. 17Paicunata ña canllaman llujchishca jipami, angelcunaca cashna ninajurca:
—Cambaj causaita quishpichingapaca, calpashpa pacajugri. Ama cambaj huashaman tigrarishpa ricunguichu. Cai tucui jatun pambacunapipash, ama shayaringuichu. Urcupi pacajungapaj calpailla, na cashpaca huañunguimi— ninajurcami.
18Ashtahuangarin Lot runaca, cashnami nijurca:
—Ñucata mandajcunalla. Ñucaca, na ripashachu nipanimi. 19Ricupaichi, cunanmi cangunata servijca, cangunapaj ñavipi ali ricuripashcani. Causaita ñucaman carashpami, ñucata ashtahuan ninanda llaquishcataca ricuchishcanguichi. Ashtahuangarin urcuman rishpa pacajugritaca, na ushapashachu. Chai jatun llaqui ñucapajman chayamujpica, huañupashami. 20Ricupaichi, cunanga chai puebloca chaipi pacajugringapaj ladollami. Chai puebloca, uchilla pueblomi. Cunanga, ñuca ama huañungapaj, chaipi pacajuchun saquihuaichilla. (Chai puebloca, ¿nachu uchilla pueblo?) Chaiman rishpami, ñuca causaita quishpichisha— nijurcami.
21Shina nijpimi, cashna nishpa tigrachirca:
—Ricui, cai llaquimanda quishpichijuchun, can mañashcatapash chasquishcanimi. Chashna mañashcamanda, can nijushca pueblotaca, na tucuchishachu. 22Shina cashcamanda, chaipi ucha pacajugrilla. Can chaiman chayangacaman, imata ruraitapash na ushashachu— nircami.
Chai pueblotaca uchilla cajpimi, Zoar nishpa shutichirca.
23Zoar shuti puebloman Lot runa chayajujpica, indica ñami cai pachaman llujshimujurca. 24Shinamandami Mandaj Diosca, Sodoma shuti, Gomorra shuti pueblocunapi, azufrehuan rupajuj ninata tamiachimurca. Chashnami Mandaj Diosca, jahua pachamanda tamiachimurca. 25Shina tamiachishpami pueblocunataca, chaipi tucuilla jatun pambacunandi tucuchirca. Chai pueblocunapi tucui causajcunataca, pambacunapi fucushca granocunandimi tucuchirca. 26Shina tucuchijujpimi Lot runapaj huarmica, Lotpaj huashata catijushpa, huashaman tigrarishpa ricurca. Shina ricushpaca, cachi rumimanmi tigrarca.
27Abrahamga, maipimi Mandaj Diospaj ñaupajpi carca, chai pushtumanllatami cayandi tutamandaca, vichai tigrarca. 28Chaipi cashpami Sodoma shuti, Gomorra shuti pueblocunata, chai tucuilla pugru pambacunatapash ricujurca. Chai llactamanda cushnica, jornomanda cushni llujshinshna llujshijujtami ricujurca. 29Taita Diosca, chai jatun pambapi pueblocunataca, tucuillami tucuchirca. Chashna tucuchijushpami Taita Diosca, Abrahamda yarirca. Shina yarishpami, Lot runa causajushca pueblocunata llaquinayaita tucuchijushpaca, Lot runata chai tucuchina chaupimanda canllaman llujchirca.
30Ashtahuangarin Lot runaca, Zoar pueblomanda vichai rishpami, paipaj ishcandi ushicunandi urcupi causajurca. Lot runaca, Zoar pueblopillata causanata manllashpami, paipaj ishcandi ushicunandi, shuj jatun utujupi causajurca. 31Chaipimi punda ushica, jipa ushita cashna nirca:
—Ñucanchi taitaca, ñamari rucu. Tucui llactacunapi causanshnallata ñucanchihuan causangapaca, cai llactapica jaripash na tianllu. 32Chashna cashcamanda shamui, ñucanchi taitaman vinota ufiachishpa, paihuan puñushun. Chashna puñushpami, ñucanchi taitamanda miraita charishpa catishun— nijurcami.
33Chashna nishpami, chai tutallata paicunapaj taitaman vinota ufiachinajurca. Shina ufiachishpami punda ushica, paipaj taitahuan puñurca. Ashtahuangarin taitaca, paipaj ushi ima horas siririjtapash, ima horas jatarishcatapash na yacharcachu. 34Cati punllapica punda ushimi, jipa ushita cashna nirca:
—Ricui, caina tutami ñucaca taitahuan puñurcani. Cunan tutapash, vinota ufiachun carashunlla. Shina carashpaca, ñucanchi taitamanda miraita charingapaj, cambash paihuan puñungapaj yaicunguillami— nircami.
35Chashnami chai tutapash, paicunapaj taitaman vinota ufiachinajurca. Chai jipaca, jipa ushipashmi shamushpa, taitahuan puñurca. Ashtahuangarin taitaca, paipaj ushi ima horas siririjtapash, ima horas jatarishcatapash na ricurcachu. 36Lot runapaj ishcandi ushicunami, paicunapaj taitapajta vijsayu tucurca. 37Punda ushica, shuj churita ungushpami paitaca, Moab shutita shutichirca. Paica, cunangaman moabitacunapaj taitami. 38Jipa ushipash, shuj churita ungushpami, Ben-ammi shutita shutichirca. Paica, cunangaman amonitacunapaj taitami.
Селектирано:
GÉNESIS 19: QUII
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Quichua Imbabura Bible © United Bible Societies, 1994.